1. ¿Keyej itekitikauan Dios amo kimoujkaitaj keman moijtoua ke moneki kipanoskej ouijkayomej?

¿TIKONMOUJKAITA maj moijto ke itekitikauan Dios moneki kipanoskej “miak tajyouilis” achto ke kiseliskej nemilis nochipaya kemej netetayokolil? Xa amo. Komo yankuixtok tikonixmatik tamachtilis tein melauak oso uejkaujya, tejuatsin tikonmati ke tajyouilis, oso ouijkayomej, se taman tein se kipanoua itech nejin taltikpak kampa Satanás taixyekana (Apoc. 12:12).

2. 1) ¿Katiyejua okse tajyouilis kipanouaj akin kichiuaj kemej Cristo uan amo sayoj kuejmolmej tein nochin taltikpakneminij kipanouaj? (Xikonita taixkopin ipeujyan tamachtilis.) 2) ¿Akoni kichiua maj kipiakan taixnamikilis akin kichiuaj kemej Cristo, uan keniuj tikmatij?

² Akin tikchiuaj kemej Cristo tikpanouaj okse tajyouilis, amo sayoj “in mismo tajyouilis” oso kuejmolmej tein nochin taltikpakneminij tajtakouanij kipanouaj (1 Cor. 10:13). ¿Katiyejua? Chikauak taixnamikilis tein tikijyouiaj porin tiktakamatij ika nochi toyolo itanauatiluan Dios. Jesús kiniluij imomachtijkauan: “In takeual amo kachi ueyi chiuke uan ke ne ipatrón”. Uan no kijtoj: “Ijkon keme Nejuatsin nechtauelitstinenke in taltikpakuani, no ijkon namejuan namechtauelitstinemiske” (Juan 15:20). ¿Akoni kichiua maj tikpanokan nejon taixnamikilis? Satanás. Biblia kijtoua ke tamati kemej se  “kuoutajtekuani ten kitemotinemi [...] ki[n]xixikos” itekitikauan Dios (1 Ped. 5:8). Yejua ika, kikui tein yeski taman tein ika kitemoua maj tikauakan Jiova. Kemej neskayot, maj tikitakan tein kipanok tatitanil Pablo.

3-5. 1) ¿Toni tajyouilis kipanok Pablo ompa Listra? 2) ¿Keniuj Pablo uelik kinyolchikauak tokniuan ika seki tajtolmej tein kinextiaya ke kipiaskiaj okachi ouijkayomej?

³ Pablo miakpa kitajyouiltijkej porin kitekitiliaya Dios (2 Cor. 11:23-27). Se tonal kitajyouiltijkej ompa Listra. Satepan ke kipajtij se takat akin amo uelia ojtokaya akin ijkon yolik, tel miakej taltikpakneminij tein kimoujkaitakej tein panok, kinueyichiujkej kemej tiotsitsin Pablo uan Bernabé akin iuan yaya. ¡Yejuan monekik kintataujtiskej maj amo kinueyichiuanij! Sayoj ke, satepan ajsikej seki judíos akin kintakajkayauilijkej uan kichiujkej maj taltikpakneminij kinixnamikinij. ¡Tel ijsiujka mopatak nochi! Taltikpakneminij kitetenkej Pablo uan kinemilijkej ke kimiktijkej (Hech. 14:8-19).

⁴ Satepan ke Pablo uan Bernabé takalpanotoj Derbe, “mokepkej Listra uan Iconio uan Antioquía, uan kinchikaujkej imomachtijkauan Jesús, uan kinyolchikaujkej maj kisentokanij takuaujtamatinij uan kiniluiayaj: ‘Moneki tikpanoskej miak tajyouilis uan ijkon tikalakiskej itech itekiuajyo Dios’” (Hech. 14:21, 22, TNM). Yekinika uelis tiknemiliskej ke nejin tajtolmej amo taixejekol, ta tein melauj, komo moijtoua ke se kipanos “miak tajyouilis” amo teyolchikaua. Komo ijkon, ¿keniuj Pablo uan Bernabé kinyolchikaujkej tokniuan ika nejon tajtolmej tein kinextiaya ke kipanoskiaj okachi ouijkayomej?

⁵ Maj tikitakan ika nejmachkayot tein Pablo kijtoj uan nejon techpaleuis maj tikajsikamatikan. Yejua amo sayoj kijtoj: “Moneki tikxikoskej miak tajyouilis”. Ta kijtoj: “Moneki tikpanoskej miak tajyouilis uan ijkon tikalakiskej itech itekiuajyo Dios”. Kemej moita, Pablo kinyolchikauak tokniuan keman kiniluij toni netetayokolil kiseliskiaj komo amo kikauayaj Dios. Nejon netetayokolil amo sayoj katka se takochitalis. Tein melauj, Jesús kijtojka: “Naken yek takuautamati [‘taxikoua’, TNM] hasta kuak in mikilistempan, yejua ne makisas” (Mat. 10:22).

6. ¿Toni netetayokolil kiseliskej akin taxikoskej hasta keman ejkos tamilis?

⁶ Komo titaxikouaj, tikseliskej se netetayokolil. Tokniuan taixpejpenalmej kiseliskej nemilis tein amo kipiasok mikilis ompa iluikak uan tekiuajtiskej iuan Jesús. Uan ‘okseki ichkamej’ kiseliskej nemilis nochipaya nikan taltikpak “kampa mochiutos sayo ten kualtsin chipaukanemilis” (Juan 10:16; 2 Ped. 3:13). Sayoj ke axkan, ijkon kemej Pablo kinextij, moneki tikpanoskej miak tajyouilis. Maj tikitakan ome taman tayejyekolis tein tikpanouaj akin tikchiuaj kemej Cristo.

7. ¿Toni taman tajyouilis uelis moijtos ke se taixnamikilis tein moita?

⁷ Jesús achtook kijtoj: “Namechtemaktiske iuan tekiuani, uan tech in tiopan de judíos namechuijuitekiske. Uan namechuikaske iixpan in uejueyin tanauatiani uan in reyes” (Mar. 13:9). Kemej kinextiaj nejin tajtolmej, seki tokniuan kintajyouiltiskiaj, xa porin tekiuanij oso tayekananij itech taneltokalis tanauatiskiaj oso taoliniskiaj (Hech. 5:27, 28). Maj oksepa itech titanemilikan ineskayo Pablo. ¿Mouik keman kinemilij ke ueliskiaj ijkon kitajyouiltiskej? Nion tepitsin (xikonixtajtolti Hechos 20:22, 23).

8, 9. 1) ¿Keniuj kinextij Pablo ke kiixtalijka kixikos tajyouilis? 2) ¿Keniuj seki tokniuan itech totonaluan no kiixtalianij kichiuaskej nejon?

⁸ Pablo ika yolchikaualis kiixnamikik tayejyekolis tein moita tein Satanás kitalilij. Yejua kiyekijtoj: “Nion no niktasojta nonemilis de nejua san. Ta, para nejua kachi kuali [...] ma niktamichiuas in tekit ten nechnauatilij ya Totekotsin Jesús [...,] ma nejua nitanojnotstinemi ika in yankuik Tajtoltsin ten kualkui ne teiknelilis de Dios” (Hech. 20:24). Moyekita ke Pablo amo kimouiliaya maj kitajyouiltiskiaj. Ta yejua  kiixtalijka taxikos. Tein yeski tein panoskia, senkis kiixtalijka ‘kitamichiuas in tekit’ tein kiselijka.

⁹ Itech nejin tonalmej, miakej tokniuan no kiixtaliaj kichiuaskej nejon. Kemej neskayot, seki tokniuan itech se altepet tsaktokej ajsitokya veinte xiujmej porin amo kinekkej kipaleuiskej taltikpaktekiuajyot. Amo uelij motajtouiaj ininixpan tekiuanij porin itech nejon altepet amo onkak se tanauatil tein kinextia ke amo uelis kichikaujkauiskej aksa maj kichiua tein itanemilil amo kikaua. Tokniuan amo kinkauanij maj kinkalpanokan, nion ininchankauan, uan sekin kinmaanij uan kinchiuilianij okseki taman tein ika kintajyouiltiaj.

10. ¿Keyej moneki amo timouiskej komo tikpanouaj tajyouilis tein amo tikchiayaj?

¹⁰ Itech okseki altepemej, tokniuan kixikouaj tajyouilis tein amo kichiayaj. Komo tejuatsin tikonpanoua se taman tein amo tikonchiaya, amo xionmoui. Xikonnemili tein kipanok José. Yejua kinamakakej kemej takeual, sayoj ke Jiova “kimakixtij José tech nochi itajyouilisuan” (Hech. 7:9, 10). Yejuatsin no ijkon uelis mitsonpaleuis. Amo keman xikonelkaua ke “Jiova kimati kinmakixtis itech tayejyekolis taltikpakneminij akin nemij kemej yejuatsin kineki” (2 Ped. 2:9, TNM). Onkak miak taman tein kinextia ke uelis titakuaujtamatiskej iuan, uan tikxikoskej taixnamikilis ika yolchikaualis. Tikmatij ke yejuatsin uelis techmakixtis itech nejin taltikpak kampa mochiujtok tein amo kuali uan ke uelis techmakas nemilis nochipaya keman taixyekantos iTekiuajyo (1 Ped. 5:8, 9).

11. ¿Keniuj taixnamikilis tein amo moita taman ika taixnamikilis tein moita?

¹¹ Okse taman tajyouilis tein uelis tikpanoskej yejua taixnamikilis tein amo moita. ¿Keniuj nejin taixnamikilis taman ika taixnamikilis tein moita? Taixnamikilis tein moita tamati kemej se chikaujkaejekat tein ejkotiuetsi uan ijsiujka ueli kiuejueloua se kali. Sayoj ke taixnamikilis tein amo moita okachi tamati kemej ijkuak se kali tein chijchiujtok ika kouit okuiloua uan yolik kikuajtiyouij kouit hasta keman uetsi. Xa amo se kiitas ke tamouil kemej moajsi hasta keman amo teyi ueli se kichiuaok.

12. 1) ¿Katiyejua se taman taixnamikilis tein amo moita kitekitiltia Satanás? 2) ¿Keyej tel kuali kikisa nejon taixnamikilis? 3) ¿Keyej Pablo yolkuetauia?

¹² Satanás kiuelitaskia kitamis tokuali uikalis iuan Jiova, uelis yeski ika taixnamikilis tein moita oso ika taixnamikilis tein amo moita. Se taman taixnamikilis tein amo moita tein okachi kuali kikisa yejua keman se yolkuetaui, porin nejon uelis yolik kikaxanis tokuali uikalis iuan Dios. Tatitanil Pablo kijtoj ke yejua kemansa yolkuetauia (xikonixtajtolti Romanos 7:21-24). Yejua katka se takat akin kipiaya chikauak ikuali uikalis iuan Dios uan xa pouia iniuan oloch taojtokaltianij itech yekinika siglo. Komo ijkon, ¿keyej kijtoj “nionteiknelti”? Kijtoj ke ijkon momachiliaya porin kipiaya nepololmej: kinekia kichiuas tein kuali, sayoj ke okse chikaualis kiuikaya maj kichiua tein amo kuali. Komo tejuatsin kemansa no ijkon tionmomachilia, ¿melauj ke mitsonyolseuia tikonmatis ke hasta tatitanil Pablo kipanouaya nejon?

13, 14. 1) ¿Keyej seki itekitikauan Dios yolkuetauij? 2) ¿Akoni kineki kitamis totakuaujtamatilis uan keyej?

¹³ Miakej tokniuan kemansa yolkuetauij, motekipachouaj oso kimachiliaj ke amo teyi kinnamiki kipiaskej. Kemej neskayot, se tokniuj siuat akin tiktokaytiskej Débora, akin kisentokani kichiuani tekit kemej precursor, kijtoua: “Niksentoka nitanemilijtinemi itech se nepolol tein nikpiak uan nejon kichiua maj okachi amo kuali nimomachili. Keman nitanemilia itech nochi tein amo kuali tein nikchiuani, niknemilia ke amo akin nion keman uelis nechtasojtas, nion Jiova”.

¹⁴ ¿Keyej sekin itekitikauan Jiova akin amo kikauaj, kemej tokniuj siuat akin tikijtojkej, yolkuetauij? Onkak miak taman tein kichiua nejon. Sekin xa sayoj porin nochipa kipiaj amo kuali tanemilil ika tein kichiuaj uan  tein kinpanoua itech ininnemilis (Prov. 15:15). Oksekin xa amo kuali momachiliaj porin kipiaj se kokolis tein kichiua maj ijkon momachilikan. Tein yeski tein kichiuas maj ijkon timomachilikan, xikonelnamiki akoni kineki techixnamikis ika nejon. ¿Akoni kineki xionmomachili kemej yejua, akin amo kipiaok nechialis? (Apoc. 20:10.) ¿Akoni kineki xionmosenkaua? Kemaj, yejua Satanás. Ika taixnamikilis tein moita oso tein amo moita, yejua sayoj kineki se taman: maj timoteltekipachokan, tiyolkuetauikan uan maj timosenkauakan. Amo xikonelkaua: ixolal Jiova moajsi kemej yeskia itech se neteuilis.

15. ¿Toni moneki senkis tikixtaliskej tikchiuaskej?

¹⁵ Xikonsentoka kemej yeskia xiontateui. Nochipa xikonnemili netetayokolil tein uelis tikonselis. Pablo kinijkuilouilij tokniuan akin nemiaj Corinto nejin tajtolmej: “Amo timosenkauaj, ta maski tantiuj tein titamatij tapani, yekmelauj tein titamatij taijtik moyankuilijtiuj mojmostaj. Porin maski tajyouilis amo uejkaua uan sayoj tepitsin, kichiua maj tikpiakan se ueyitilis tein okachi tel ueyi uan uejkaua nochipaya” (2 Cor. 4:16, 17, TNM).

16. ¿Keyej motelneki maj axkan tikchiuakan tein techpaleuis maj tikxikokan ouijkayomej tein uelis tikpiaskej satepan?

¹⁶ Kemej tikitakejya, Satanás kikui miak taman “takajkayaualis” (Efes. 6:11). Tinochin moneki tikitaskej ke motelneki tayolmajxitilis tein moajsi itech 1 Pedro 5:9: “Xikmajpeutiyakan ne amokuali Satanás uan xiksentokakan xitakuautamatiyakan iuan Dios”. Nejon kijtosneki ke moneki axkan tikmachtiskej totanemilil uan toyolo uan ijkon uelis tikchiuaskej tein kuali keman monekis. Tateuianij motelmachtiaj keniuj mopaleuiskej keman moteuiskej tel achtook ke mochiuas neteuilis. Uelis tikijtoskej ke no ijkon panoua touan. Amo tikmatij toni tein kemej yeskia neteuilis tikpiaskej satepan. Yejua ika, kuali yeskia maj tikchiuakan axkan tein techpaleuis maj titaxikokan keman  tikpiaskej okachi ouijkayomej. Ika ichikaualis Dios, Pablo kinyolmajxitij tokniuan akin nemiaj Corinto nejin taman: “Ximoyoltatemolikan ika nejmach para nankitaske kox melau nankipiaj ok takuautamatilis [...]. Oksepa namechilia ximoyekyoltatemolikan namejuan san” (2 Cor. 13:5).

17-19. 1) ¿Keniuj uelis timoyoltatemoliskej? 2) ¿Keniuj telpochmej uan ichpochmej uelis momachtiskej uan ijkon kipaleuiskej tein kineltokaj kampa momachtiaj?

¹⁷ Se taman kemej timoyoltatemoliaj ijkon kemej tayolmajxitij Pablo, keman timochiuiliaj nejin netajtanilmej: “¿Nochipa nikchiua netataujtil? ¿Nikpaleuia ika yolchikaualis tein nikneltoka? ¿Niktakamati Dios uan amo taltikpaknenkej keman oksekin nechchikaujkauiaj maj nikchiua tein amo kuali? ¿Amo keman nimopolouilia nion se nechikol? ¿Nikixpanauia ininnepololuan okseki tokniuan, ijkon kemej nikuelitaskia maj no kichiuakan nouan? ¿Nikintakamati tayekananij itech nechikol uan takamej akin taixyekanaj itech inechikol Dios tein moajsi itech nochi taltikpak?”.

¹⁸ Kemej tikitaj, ome netajtanilmej ika tajtoua maj tikpaleuikan ika yolchikaualis tein tikneltokaj uan maj amo tikauakan maj oksekin techchikaujkauikan. Miakej telpochmej uan ichpochmej moneki kichiuaskej nejon kampa momachtiaj. Kichiuanij tein kinpaleuis maj amo mopinaujmatikan nion maj mouikan kijtoskej tein kineltokaj, uan yejua ika tanojnotsaj ika yolchikaualis. Itech revistas mokixtiani tayolmajxitilis tein tel tapaleuia. Kemej neskayot, itech amaix Tanejmachtijkej 1 metsti mayo xiuit 2013 itech página 9 uan 10 kimelauak keniuj telpochmej uelis okachi moyolchikauaskej keman kinnojnotsaskej akin iniuan momachtiaj uan kinchiuiliskej netajtanilmej tein kintanemililtis. Tetatmej, kuali yeskia ximomachtikan iniuan nanmokoneuan toni uelis tanankiliskej keman akin iniuan momachtiaj kinchiuiliaj seki taman netajtanilmej.

¹⁹ Sayoj ke tein melauj, kemansa teouijmaka se kipaleuis tein se kineltoka oso se kichiuas okseki taman tein Jiova techiluia maj tikchiuakan. Kemej neskayot, satepan ke titeltekitikej nochi tonal, xa monekis timochikauaskej tiyaskej nechikol. Uan xa monekis timochikauaskej kualkan timeuaskej uan ijkon uelis tikisaskej tanojnotsalis. Sayoj ke xikonelnamiki: komo axkan timomatij tikchiuaskej tein kichikaua tokuali uikalis iuan Dios, okachi uelis tikixnamikiskej okachi uejueyi tayejyekolis tein tikpiaskej satepan.

20, 21. 1) ¿Keyej komo titanemiliaj itech inemilis Jesús tein kitemakak techpaleuis maj amo timosenkauakan keman tikmachiliaj ke tiyolkuetauij? 2) ¿Toni moneki tikixtaliskej tikchiuaskej?

²⁰ ¿Uan toni uelis tikchiuaskej ika taixnamikilis tein amo moita? Kemej neskayot, komo tikmachiliaj ke tiyolkuetauij, ¿toni techpaleuis maj tikixnamikikan nejon? Se taman tein techpaleuis uan tein okachi kuali, komo titanemiliaj itech inemilis Jesús tein kitemakak. Yejua nejon kichiuak Pablo. Kemansa, tel amo kuali momachiliaya porin tajtakojkej katka, sayoj ke kimatia ke Cristo amo ininka momikilij akin amo kipiaj tajtakol, ta akin tajtakouanij ijkon kemej Pablo. Tein melauj, yejua kijkuiloj: “Ninemi porin nitakuaujtamati iuan iKonetsin Dios, akin nechtasojtak uan noka momikilij” (Gál. 2:20, TNM). Pablo kiselij inemilis Jesús tein kitemakak uan kineltokaya ke yejua kimakixtiaya.

²¹ Komo tikitaj inemilis Jesús tein kitemakak kemej se netetayokolil tein Jiova techmakak tisejsemej, uelis techtelpaleuis. Sayoj ke nejon amo kijtosneki ke niman tikmachiliskej ke amo tiyolkuetauijok. Tisekimej xa monekis tikixnamikiskej nejon tayejyekolis tein amo moita hasta keman moajsis yankuik taltikpak. Sayoj ke, ¡amo xionmosenkaua! Xikonelnamiki ke akin taxikoskej hasta keman ejkos tamilis, kiseliskej netetayokolil. Mojmostaj okachi motokia tonal keman iTekiuajyo Dios kiualkuis yolseuilis uan kinpaleuis nochin akin amo kikauaskej Jiova maj amo kipiakanok tajtakol. Xikonixtali tionkalakis itech nejon tekiuajyot maski monekis tikonpanos miak tajyouilis.