1. ¿Keniuj kinitaya Pablo akin nochipa kiteixmatiltiayaj kuali tanauatilmej?

TATITANIL Pablo kinelnamikia tokniuan akin nochipa kiteixmatiltiayaj kuali tanauatilmej. Yejua kijkuiloj: “Tamechelnamiktiyoue [...] kenin namejuan nanmotekitiltijtiyoue para Dios [...]. Uan no [...] kenin namejuan nanmosiouiltijtiyoue porin nankipiaj ne tetasojtalis. Uan no [...] kenin nankiyolikachixtiyoue, maski iksa ka tajyouilis, ne tonal kuak moualuikas in Totekotsin Jesucristo” (1 Tes. 1:3). Jiova no kinelnamiki tokniuan akin ika netasojtalis kitekitiliaj ika nochi ininyolo, maski tein kipanotokej kinkaua maj ueli kitekitilikan miak tonalmej oso sayoj tepitsin (Heb. 6:10).

2. ¿Toni tikitaskej itech nejin tamachtilis?

² Ne uejkauj uan itech totonaluan, miakej tokniuan kichiuanij miak taman maski ouij uan ijkon uelis kitekitiliskej Jiova miak tonalmej. Yekinika maj tikitakan ininneskayo seki tokniuan akin nenkej itech yekinika siglo uan satepan tikitaskej toni tataman tekit kichiuaj akin kiixtaliaj miak tonalmej kitekitiliskej Jiova uan keniuj uelis tikinelnamikiskej.

3, 4. 1) ¿Keniuj kitekitilijkej Jiova seki tokniuan itech yekinika siglo? 2) ¿Keniuj ueliaj moixpanoltiayaj nejin tokniuan akin miak tonalmej kitekitiliayaj Jiova?

³ Tepitsin satepan ke Jesús moauij, kipeualtij se taman tanojnotsalis tein mochiuaskia noyampa taltikpak (Luc. 3:21-23; 4:14, 15, 43). Satepan ke kimiktijkej, itatitaniluan kisentokakej kiixyekankej nejon tekit (Hech. 5:42; 6:7). Seki tokniuan kikaujkej ininchan uan yajkej okseko  tapaleuitoj kemej tanojnotsanij uan misioneros. Felipe tanojnotsak itech tataman xolalmej ompa Palestina (Hech. 8:5, 40; 21:8). Uan Pablo okachi uejuejka kiteixmatiltito kuali tanauatilmej (Hech. 13:2-4; 14:26; 2 Cor. 1:19). Sekin, kemej Silvano (Silas), Marcos uan Lucas, no kijkuilojkej seki amaixmej tein kipia Biblia oso kijkuilojkej tein tajkuilouanij kiniluijkej (1 Ped. 5:12). Uan miakej tokniuan siuamej kinpaleuijkej nejin takamej akin amo kikaujkej Dios (Hech. 18:26; Rom. 16:1, 2). Itech Escrituras Griegas Cristianas ixnesi tel miak taman tein teyolpaktij tein kipanokej nejin tokniuan akin kinextijkej yolchikaualis, tein kinextia ke Jiova nochipa kinelnamiki itekitikauan uan kinyekpia.

⁴ Sayoj ke, ¿keniuj moixpanoltiayaj tokniuan akin miak tonalmej kitekitiliayaj Jiova itech yekinika siglo? Tikmatij ke sekin, kemej Pablo uan akin iuan yayaj, tekitiaj seki tonalmej. Amo kichiayaj maj tokniuan kinmakanij teisa, sayoj ke miakpa nejin tokniuan kinpaleuiayaj (1 Cor. 9:11-15). Yejuan kinyoleuayaj maj takuatij ininchan uan maj mokauanij ompa. Sejsemej tokniuan uan kemej nechikol kinekiaj kinpaleuiskej (xikonixtajtolti Hechos 16:14, 15 uan Filipenses 4:15-18).

5. ¿Keniuj momachiliaj se takat uan se siuat namikuanij akin kiixpejpenkej miak tonalmej kitekitiliskej Jiova itech ininnemilis?

⁵ Itech totonaluan, miakej tokniuan kiixtaliaj kitekitiliskej Jiova miak tonalmej (xikonita recuadro “ Tataman kemej ueli se kitekitilia Jiova miak tonalmej”). ¿Keniuj yejuan kiitaj tein kiixpejpenkej kichiuaskej itech ininnemilis? Kuali yeskia xikontajtani. Tikyekmatij ke tein mitsonnankiliskej semi mitsonyolchikauas. Maj tikitakan tein kijtoua se tokniuj takat akin tekitini kemej precursor regular, precursor especial, misionero uan axkan tekiti itech se kali Betel tein moajsi itech okse ueyi altepet: “Keman peuak niktekitilia Jiova miak tonalmej, yejua tein okachi kuali tein nikixpejpenak itech nonemilis. Keman nikpiaya 18 xiujmej, amo nikmatia ox nikseliskia okachi ueyi tamachtilis, nikseliskia nitekitis miak tonalmej oso nikpeualtiskia tekit kemej precursor. Semi nechouijmakak nikixpejpenas. Sayoj ke nikitani ke Jiova amo kielkaua nochi tein tikchiuaj maski ouij uan ijkon uelis tiktekitiliskej miak tonalmej. Ueli niktekitiltiani tein Jiova nechmakani maj ueli nikchiua kemej amo keman ueliskia nikchiuas. Uan nejon amo keman panoskia komo niktemoskia nikajsis tein nikan taltikpak kiitaj ke tel kuali”. Inamik kijtoua: “Sejse taman tekit tein nikchiuani nechpaleuiani itech nochi tein nikchiua. Miakpa tikmachiliayaj ke Jiova techixyekanaya uan techyekpiaya. ¡Nochi nejin amo tikpiaskiaj komo amo tikpeualtianij nejin tekit! Mojmostaj niktasojkamatilia Jiova maj techkauani maj tiktekitilikan miak tonalmej itech tonemilis”. ¿Tikonuelitaskia no ijkon tikonijtos ika monemilis?

6. ¿Keniuj Jiova kiita tein tikchiuaj uan ijkon uelis tiktekitiliskej?

⁶ Semi melauak ke amo nochin ueli kitekitiliaj Jiova miak tonalmej. Tejuatsin axkan xa tikonpanotok teisa uan yejua ika amo ueli tikonchiua nejon. Sayoj ke, tein yeski tein tikonpanotos, uelis tikonyekmatis ke Jiova kielnamiki nochi tein tikonchiua uan ijkon uelis tikontekitilis. Kemej neskayot, Pablo kintitanilij inetajpalolis nochi tokniuan akin pouiaj itech nechikol tein moajsia Colosas, uan sekin hasta kintokaytij (xikonixtajtolti Filemón 1-3). Moyekita ke kipatiuitaya kuali tekit tein kichiujtoyaj. Uan no yejua nejon kimachiliaya Jiova. No ijkon, toTajtsin akin moajsi iluikak no kipatiuita tein tejuatsin tikonchiua. Sayoj ke, ¿keniuj tinochin uelis tikinpaleuiskej akin kitekitiliaj Jiova miak tonalmej?

7, 8. 1) ¿Toni kichiuaj akin tekitij kemej precursor? 2) ¿Keniuj uelis tikinpaleuiskej akin kichiuaj tekit kemej precursor?

⁷ Ijkon kemej tanojnotsanij itech yekinika siglo, itech totonaluan, akin tekitij kemej precursor tayolchikauaj itech nechikolmej. Miakej tanojnotsaj setenta horas itech se metsti. ¿Keniuj uelis tikinpaleuiskej?

⁸ Se tokniuj siuat akin monotsa Shari, akin tekiti kemej precursor, kijtoj: “Kemej mojmostaj titanojnotsaj, xa moita ke tichikaujkej. Sayoj ke  moneki maj techyolchikauakan” (Rom. 1:11, 12). Okse tokniuj siuat akin tekitik kemej precursor miak xiujmej, kijtoj nejin keman ininka tajtoj akin tekitij kemej precursor itech nechikol kampa poui: “Yejuan nochipa tekitij uan amo motsakuiliaj. Kitasojkamatij keman aksa kinuika itech inintepos keman tanojnotsatij, keman kinyoleuaj maj takuatij oso kinmakaj tepitsin tomin tein ika taxtauaskej keman yaskej itech tepos oso kiixtauaskej okseki taman. Nejon kichiua maj kimachilikan ke yekmelauj ininka timotekipachouaj”.

9, 10. ¿Toni kichiuanij seki tokniuan uan ijkon kinpaleuiaj akin tekitij kemej precursor itech nechikol kampa pouij?

⁹ Okse taman kemej uelis tikinpaleuiskej akin tekitij kemej precursor, komo tikisaj iniuan titanojnotsatij. Se tokniuj siuat akin tekiti kemej precursor akin monotsa Bobbi kitayokolijtoj: “Moneki maj okachi techpaleuikan itech semana”. Uan okse tokniuj siuat akin no tekiti kemej precursor uan poui itech nechikol kampa mosentilia Bobbi kijtoj: “Semi techouijmaka tikajsiskej aksa maj touan tanojnotsati tiotakpa”. Uan no, se tokniuj siuat akin axkan tekiti Betel tein moajsi Brooklyn kijtoua nejin ika tonalmej keman tekitik kemej precursor: “Nikelnamiki ke se tokniuj siuat akin kipiaya itepos nechiluiaya: ‘Nochipa keman amo tikajsis akoni iuan tikisas, xinechnotsa uan nejua mouan niyas’. ¡Yejua nechpaleuij maj kuali nikchiua tekit kemej precursor!”. Maj no tikitakan nejin tein Shari kijtoua: “Satepan ke tami tanojnotsalis, tokniuan akin tekitij kemej precursor uan amo kipiaj ininnamik miakpa mokauaj ininselti. Kuali yeskia maj kemansa tikinyoleuakan keman titaueyichiuaj kemej kalyetouanij. No kuali momachiliskej komo tikinyoleuaj maj touan kichiuakan okseki taman”.

¹⁰ Se tokniuj siuat akin kiajxitijtokya 50 xiujmej kitekitilia Jiova miak tonalmej, kijtoua nejin keman kielnamiki ijkuak iniuan tekitik kemej precursor okseki tokniuan siuamej: “Tayekananij amo kikauayaj maj pano miak metsti keman oksepa techkalpanouayaj. Techtajtaniayaj keniuj tiyetoyaj uan keniuj tipanotoyaj ika tekit uan kinekiaj kimatiskej ox techtekipachouaya okse teisa. Yekmelauj toka motekipachouayaj. Ualayaj kampa tinemiaj porin kinekiaj kimatiskej ox monekia maj techpaleuikan ika teisa”. Nejin xa techelnamiktia tajtolmej tein Pablo kijkuiloj tein ika kitasojkamatilij se tokniuj akin nemia Éfeso akin kipaleuij ika tein kipolouaya maski no monekia kinyekpias ichankauan (2 Tim. 1:18).

11. ¿Toni kichiuaj akin tekitij kemej precursor especial?

¹¹ Itech seki nechikolmej kipiaj tatiochiualis maj ompa moajsikan akin tekitij kemej precursor especial. Miakej nejin tokniuan tanojnotsaj  itech se metsti ciento treinta horas, uan no tapaleuiaj ika okseki taman itech nechikol. Ika nochi nejin tein kichiuaj, sayoj tepitsin oso nion tepitsin uelij tekitijok kampa kitaniskej tein ika moixpanoltiskej. Yejua ika, itech sucursal kinmakaj tepitsin nepaleuil ika tomin mejmetstika uan ijkon uelis kitayekanaltiskej tanojnotsalis.

12. ¿Keniuj tayekananij uan okseki tokniuan uelis kinpaleuiskej akin kichiuaj tekit kemej precursor especial?

¹² ¿Keniuj uelis tikinpaleuiskej akin tekitij kemej precursor especial? Se tokniuj tayekankej akin tekiti Betel uan iniuan tajtouani miakej nejon tokniuan, kijtoua: “Motelneki maj tayekananij iniuan tajtokan akin kichiuaj tekit kemej precursor especial, maj kimatikan toni kipanotokej uan maj kinemilikan keniuj uelis kinpaleuiskej. Seki itaixpantijkauan Jiova kinemiliaj ke kemej nejin tokniuan kiseliaj tepitsin nepaleuil ika tomin, amo teyi kinpolouaok. Sayoj ke tein melauj, onkak miak taman kemej uelis kinpaleuiskej”. Ijkon kemej akin kichiuaj tekit kemej precursor regular, akin tekitij kemej precursor especial kitasojkamatij maj moajsikan tokniuan akin uelis iniuan tanojnotsatiuij keman monekis. ¿Uelis ijkon tikonpaleuis?

13, 14. 1) ¿Keyej moneki tikinelnamikiskej tokniuan takalpanouanij uan ininnamik? 2) ¿Toni uelis tikonchiuas tejuatsin uan ijkon tikonpaleuis nejin tokniuan akin tikintasojtaj?

¹³ Tokniuan takalpanouanij uan ininnamik kipiaj chikauak inintakuaujtamatilis uan moita ke nochi kixikouaj. Sayoj ke no moneki maj kinyolchikauakan uan maj iniuan kisakan tanojnotsalis. Uan no kitasojkamatij keman tokniuan kinyoleuaj maj iniuan moixpetanikan uan kiuelitaj iniuan mosentiliskej. Uan keman kokolispeuaj oso moneki yetoskej tapajtiloyan, kuali yeskia maj tikinkalpanokan uan maj ininka timotekipachokan. Ueli tiknemiliaj keniuj Lucas, ‘tasojtepatijkej’ akin kijkuiloj amatajkuilol Hechos, ika netasojtalis kinpaleuij ika tein kinpolouaya Pablo uan akin iniuan yayaj (Col. 4:14; Hech. 20:5–21:18).

¹⁴ Uan no, tokniuan takalpanouanij uan ininnamik moneki kinpiaskej inintasojikniuan akin kinyolchikauaskej. Se tokniuj takalpanojkej kijkuiloj: “Moita ke notasojikniuan nochipa kimatij kemanian moneki maj nechyolchikauakan. Nechchiuiliaj netajtanilmej tein ika kinextiaj ke noka motekipachouaj, tein necholinia maj nikintapoui tein nechpanoua. Keman kuali nechkakij nechpaleuiaj maj okachi kuali nimomachili”. Tikyekmatij ke nejin tokniuan kitasojkamatij ika nochi ininyolo maj ininka timotekipachokan.

15, 16. 1) ¿Toni tekit kichiuaj akin tekitij Betel uan itech Kalmej kampa mochiuaj Uejueyi Nechikolmej? 2) ¿Keniuj uelis tikinpaleuiskej nejin tokniuan?

¹⁵ Noyampa taltikpak, akin tekitij Betel oso itech Kalmej kampa mochiuaj Uejueyi Nechikolmej, kichiuaj tekit tein motelneki tein tapaleuia maj motayekanalti iTekiuajyo Dios. Komo itech nechikol oso circuito kampa tipouij moajsij akin tekitij Betel, ¿keniuj uelis tikinelnamikiskej?

¹⁶ Keman tokniuan ajsij Betel, xa kintemouaj ininchankauan uan inintasojikniuan. Yejua ika kiteltasojkamatij maj oksekin akin tekitij Betel uan tokniuan itech nechikol kampa mosentiliaj kuali kinselikan uan maj mochiuakan inintasojikniuan (Mar. 10:29, 30). Horas tein ixyetok tekitiskej kinpaleuia maj uelikan yakan nechikolmej uan maj tanojnotsatij nochi semanas. Sayoj ke, kemansa xa monekis tekitiskej okachi horas. Yejua ika motelneki maj itech nechikolmej kiajsikamatikan nejin uan maj kinnextilikan ke kintasojtaj uan kipatiuitaj tekit tein kichiuaj (xikonixtajtolti 1 Tesalonicenses 2:9).

17, 18. ¿Toni tekit kichiuaj seki tokniuan akin miak tonalmej kitekitiliaj Jiova keman tapaleuitij okse altepet?

¹⁷ Seki tokniuan akin miak tonalmej kitekitiliaj Jiova kiselianij yaskej tapaleuitiuij okse altepet oso país. Ompa xa monekis momatiskej kikuaskej takual tein amo kiixmatiaj, momachtiskej okse tajtol uan momatiskej kemej ompa  nemij. ¿Keyej kiixpejpenkej tapaleuitiuij ompa? ¿Toni tekit kichiuaj itech nejon altepemej?

¹⁸ Seki tokniuan tekitij kemej misioneros uan miak tonalmej tanojnotsaj. Itech nechikolmej semi kinpaleuia taixmatilis tein kipiaj uan tamachtilis tein kiselianij. Itech sucursal kiitaj maj kipiakan se kali kampa nemiskej uan kinmakaj tepitsin nepaleuil ika tomin tein ika kiixtauaj seki taman tein moneki. Okseki tokniuan youij okse altepet porin tekititij Betel oso tapaleuitij maj mochijchiua okseki kalmej Betel, Kalmej kampa kiKepaj Amaixmej itech okse Tajtol, Kalmej kampa mochiuaj Uejueyi Nechikolmej oso Kalmej kampa tiMosentiliaj. Nechikol oso kali Betel tein taixyekana kampa mochiujtok tekit kiita maj kipiakan tein moneki, kemej kani mokauaskej uan tein kikuaskej. Ijkon kemej akin tekitij Betel, nejin tokniuan no youij nochi nechikolmej uan tanojnotsaj iuan nechikol, akin semi yolpakij maj ompa moajsikan.

19. ¿Keniuj uelis tikinelnamikiskej tokniuan akin miak tonalmej kitekitiliaj Jiova akin tapaleuiaj itech altepet kampa tinemij?

¹⁹ ¿Keniuj uelis tikinelnamikiskej nejin tokniuan akin miak tonalmej kitekitiliaj Jiova? Yejuan xa amo momattokej kikuaskej seki taman tapalol, okachiok keman yankuixtok ajsij. Maj tikelnamikikan nejin keman tikinyoleuaskej maj takuatij tochan. Kuali yeskia maj tikintajtanikan ox kinekij kiyekoskej se taman tapalol oso ox onkak teisa tein amo ueli kimajseuaj. Uan no, maj amo tiyolijsiuikan keman momachtijtoskej totajtol uan yolik momattiyouij kichiuaskej tein ompa mochiua. Monekis panos tonalmej uan ijkon uelis kiajsikamatiskej nochi tein tikijtoskej, sayoj ke uelis tikinpaleuiskej maj kijtokan tajtolmej kemej moneki. Maj tikelnamikikan ke yejuan kinekij momachtiskej.

20. ¿Keniuj uelis tikinpaleuiskej tokniuan akin miak tonalmej kitekitiliaj Jiova uan inintatuan?

²⁰ Ijkon kemej panouaj xiujmej, seki tokniuan akin miak tonalmej kitekitiliaj Jiova xa monekis kiitaskej keniuj kinyekpiaskej inintatuan. Komo inintatuan no itaixpantijkauan Jiova, xa kinekiskej maj ininkoneuan kisentokakan tapaleuijtokan kampa yetokej (3 Juan 4). Tein melauj, ininkoneuan kichiuaskej nochi tein ueliskej uan ijkon uelis kinyekpiaskej uan kinkalpanoskej nochipa keman ueliskej. Sayoj ke, tokniuan akin nemij ompakauin kampa inintatuan nejin tokniuan, uelis kiixtaliskej kinpaleuiskej keman monekis. Moneki maj amo tikelkauakan ke tokniuan akin miak tonalmej kitekitiliaj Jiova, kipaleuijtokej ika miak taman okachi ueyi tekit tein mochiujtok itech nejin tonalmej (Mat. 28:19, 20). ¿Uelis tejuatsin tikonpaleuis nejin tokniuan akin inintatuan xiuejkejya oso mokokouaj?

21. ¿Keniuj momachiliaj akin kitekitiliaj Jiova miak tonalmej keman kinpaleuiaj uan kinyolchikauaj?

²¹ Akin kiixtaliaj kitekitiliskej Jiova miak tonalmej, amo kichiuaj porin kinekij kitaniskej tomin, ta porin kinekij kimakaskej Jiova nochi tein ueliskej uan kinpaleuiskej oksekin. Uan kitasojkamatij keman oksekin kinpaleuiaj ika tein yeski taman. Se tokniuj siuat akin tapaleuia itech okse ueyi altepet kimelaua ijkon tein miakej kimachiliaj: “Maski sayoj teijkuilouiliskej seki tajtolmej tein ika tetasojkamatiliaj tein se kichiua, nejon kinextia ke totech tanemiliaj uan kitasojkamatij tein tikchiuaj”.

22. ¿Keniuj tikonita tejuatsin maj se kiixtali se kitekitilis Jiova miak tonalmej?

²² Tokniuan akin miak tonalmej kitekitiliaj Jiova, kiixpejpenkej kichiuaskej itech ininnemilis tein okachi kuali. Nejin se tekit tein teyolpaktia, kinpaleuia maj kipiakan tein monekis keman nemiskej itech yankuik taltikpak ijkuak taixyekantos iTekiuajyo Dios, keman tinochin techyolpaktis senkis tiktekitiliskej Jiova mojmostaj. Yejua ika, maj tikinpaleuikan akin kitekitiliaj Jiova miak tonalmej uan maj tiknextikan ke ‘tikinelnamiktiyoue [...] kenin yejuan motekitiltijtiyoue para Dios [...]. Uan no [...] kenin yejuan mosiouiltijtiyoue porin kipiaj ne tetasojtalis’ (1 Tes. 1:3).