1, 2. 1) ¿Toni tekit kichiuaya se ichkatajpixkej ne uejkauj itech xolal Israel? 2) ¿Keniuj tetatmej tamatij kemej nejon ichkatajpianij?

NE UEJKAUJ itech xolal Israel tel ouij katka tein kichiuaya se ichkatajpixkej. Tekitia ixtauat maski taseseyaskia oso tonaskia uan monekia kiitas maj tachtekinij oso tekuanimej amo kinuikanij ichkamej. Nochipa kiitaya keniuj moajsiaj iichkauan uan komo semej mokokouaya oso moxokoliaya, kiyekpiaya. Okachi kinitaya ichkatsitsin, porin okachi amo chikaujkej katkaj (Gén. 33:13).

² Itech seki taman, tokniuan tetatmej tamatij kemej nejon ichkatajpianij. Moneki kinextiskej kualneskayomej tein kipia se kuali ichkatajpixkej uan ijkon uelis kiniskaltiskej ininkoneuan “itech itamachtilis uan itayolmajxitilis Jiova” (Efes. 6:4, TNM). Tikmatij ke ouij se kichiuas nejon porin konemej moneki kiixnamikiskej amo kuali tanejnekilis tein kipiaj. Uan no, nikan taltikpak kinixnamikij ika itanemililuan Satanás tein motelmoyaujtok (2 Tim. 2:22; 1 Juan 2:16). Komo tejuatsin tikonpia mokoneuan, ¿keniuj uelis tikoniskaltis? Maj tikitakan eyi taman tein uelis tikonchiuas: tikonixmatis, tikontamakas uan tikonyekanas.

3. ¿Keniuj tetatmej uelis kuali kinixmatiskej ininkoneuan?

³ Se kuali ichkatajpixkej kiyekita keniuj moajsij sejsemej iichkauan porin kineki maj kuali moajsikan. Tejuatsin no uelis ijkon tikonchiuas iniuan mokoneuan. Biblia kijtoua: “Moneki kuali tikixmatis keniuj moajsij moichkauan” (Prov. 27:23). Komo tikonneki kuali tikonixmatis mokoneuan, moneki tikonmatis tein kichiuaj, tein kinemiliaj uan tein kipiaj itech ininyolo. ¿Keniuj uelis tikonchiuas nejon? Komo nochipa iniuan tionmonojnotsa.

4, 5. 1) ¿Toni uelis kichiuaskej tetatmej tein kinpaleuis maj ininkoneuan kijtokan tein kinpanoua? (Xikonita taixkopin ipeujyan tamachtilis.) 2) ¿Toni tikonchiuani tejuatsin tein mitsonpaleuiani maj mokoneuan kinekikan tajtoskej?

⁴ Seki tetatmej okachi kinouijmaka monojnotsaskej iniuan ininkoneuan keman yejuan telpochmejya oso ichpochmejya. Keman moajsij itech nejon xiujmej, yejuan okachi kinekij ininselti yetoskej uan xa kinouijmaka kijtoskej tein kinemiliaj oso tein kipiaj itech ininyolo. Komo mokoneuan ijkon kinpanoua, ¿toni uelis tikonchiuas? Amo xikonnemili ke moneki tikonchikaujkauis nankiixtaliskej kemanian nanmonojnotsaskej, okachi kuali xionmonojnotsakan keman teisa nankichiujtoskej. Uelis tikonyejyekos tiontajtos iniuan keman kuali momachiliskej (Deut. 6:6, 7). Nejon kijtosneki ke moneki okachi iniuan tionyetos. ¿Uelis iniuan tionnenemitiuj kansaika, iniuan tionmauiltis oso nankisenchiuaskej teisa kalijtik? Keman ijkon moajsij, telpochmej okachi kuali momachiliaj uan okachi amo kinouijmaka tajtoskej.

⁵ Sayoj ke, komo mokonetsin kisentoka amo kineki tajtos, ¿toni uelis tikonchiuas? Xikonyejyeko okse taman. Kemej neskayot, amo xikontajtani moichpoch toni kichiuak yejua itech nejon tonal, okachi kuali xikonilui toni tikonchiuak tejuatsin. Xa ijkuak uelis mitsoniluis teisa tein kipanok nejon tonal. Uan komo tikonneki tikonmatis toni kinemilia ika se tachiualis, amo xikontajtani keniuj yejua kiita, okachi kuali xikontajtani toni kinemilia semej itasojikniuan. Satepan xikontajtani toni kiyolmajxitiskia itasojikniuj.

6. ¿Keniuj uelis tikonchiuas maj mokoneuan kimachilikan ke uelis mouan tajtoskej?

⁶ Komo tikonneki maj mokoneuan kijtokan tein kipiaj itech ininyolo, moneki tikonchiuas maj kimachilikan ke tikonneki tikonkakis uan amo ke nochipa tikonpia tekit. Keman tetatmej moita ke nochipa amo kemantij, telpochmej oso ichpochmej okachi amo kinekiskejok kijtoskej tein kinpanoua. ¿Keniuj uelis tikonnextilis mokonetsin ke tikonneki tikonkakis? Moneki amo sayoj xikonilui: “Uelis titajtoskej keman tiknekis”. Yejua moneki kimatis ke amo tikonitas ke amo moneki tein ika mitsonnojnotsa uan ke amo tikonajuas. Kayla, se ichpoch akin kipia 19 xiujmej, kijtoj: “Ueli iuan nitajtoua nopopaj ika tein yeski taman. Amo nechtajtolkotona, uan amo no nechiluia ke amo kuali tein nikchiuak; sayoj nechkaki. Uan satepan nochipa tel kuali nechyolmajxitia”.

7. 1) ¿Keniuj tetatmej uelis kinextiskej taixejekolis keman ika tajtoskej teisa tein teouijmaka ika se tajtos, kemej ijkuak se moixmati iuan aksa? 2) ¿Keniuj tetatmej uelis ‘kinkualankakalakiskej ininkoneuan’, maski amo kinekiskej?

⁷ Keman iuan tiontajtos mokonetsin ika teisa tein teouijmaka ika se tajtos, kemej iuan moixmatis aksa, amo sayoj xikonnejmachti toni tein amo kuali uelis panos, ta no xikonmelauili maj kiita nejon kemej moneki. Kemej neskayot, xionmonemili ke tiontakuati kampa takualnamakaj uan tikonita ke itech amat kampa ixnesi toni taman tapalol onkak, itech nochi tanejmachtia ke uelis mitsonijtakos. Tejuatsin xa okseko tionyas tiontakuatiuj. Mokoneuan xa no ijkon uelis kichiuaskej komo mitsonixejekoltiaj teisa uan sayoj tikonnejmachtia ika miak taman (xikonixtajtolti Colosenses 3:21). Okachi kuali xionmochikaua tikonnextis taixejekolis. Se ichpoch akin monotsa  Emily kimelaua: “Keman notatuan ika nechnojnotsaj keman iuan se moixmati aksa, amo kinextiaj kemej se taman tein amo kuali. Kinextiaj ke tel kualtsin maj se kiixmati uan maj se kiajsi aksa akin iuan se monamiktis. Nejon kichiua maj kuali nimomachili keman ika titajtouaj nejon. Tein melauj, amo niknemilia nikintatilis, ta nikneki maj kimatikan komo peua nimoixmati iuan aksa”.

8, 9. 1) ¿Keyej tel kuali maj se tekaki ika nejmachkayot uan maj amo se tetajtolkotona? 2) ¿Keniuj tapaleuiani ijkuak tikonkaki tein mitsoniluiaj mokoneuan?

⁸ Ijkon kemej kijtoj Kayla, xikonnextili mokoneuan ke tikonneki tikonkakis komo amo tionyolijsiui keman mitsontapouiskej teisa (xikonixtajtolti Santiago 1:19). Katia, se temomaj akin iselti kiiskaltia isiuapil, kijtoua: “Achto niman nitelkualania iuan. Amo nikauaya maj kijto nochi tein kinekia nechiluis. Nejua xa nitelsioujtoya yejua ika amo uelia nikakia oso xa amo niknekia maj nechkuejmolo. Axkan ke amo ijkon nikchiuaok, nosiuapil no mopatakya. Axkan okachi kineki tajtos nouan”.

⁹ No ijkon kipanok iuan iichpoch se tepopaj akin monotsa Ronald. Yejua kijtoua: “Keman nechiluij ke kiuelitaya se telpoch akin no momachtiaya kampa yejua yaya, niman nitelkualanik. Sayoj ke nikelnamikik ke Jiova amo yolijsiui uan kinajsikamati itekitikauan uan niknemilij ke monekia nikauas maj noichpoch tamitajto achto ke teisa nikiluis. ¡Uan tel kuali tein nikchiuak! Axkan uelia nikajsikamatia tein kimachiliaya. Keman tamitajtoj amo nechouijmakak niknojnotsas ika netasojtalis. Uan nikmoujkaitak tein panok porin kuali kiselij tein nikyolmajxitij uan nechiluij ke ika nochi iyolo mochikauaskia mopatas”. Komo nochipa iniuan tionmonojnotsa mokoneuan, mitsonpaleuis xikonmati toni kinemiliaj uan toni kipiaj itech ininyolo. Uan nejon kichiuas maj okachi kitemokan monepaleuil keman kiixpejpenaskej kichiuaskej teisa. *

10, 11. ¿Keniuj uelis tikonpaleuis mokoneuan maj amo kikauakan tamachtilis tein melauak?

¹⁰ Se kuali ichkatajpixkej kimati ke kemansa semej iichkauan uelis poliuis. Xa kiitas okse ixtauat tein ompakauin moajsi, satepan kiitas okse tein okachi uejka yetok uan ijkon senkis mouejkatilis iniuan okseki ichkamej. No ijkon se konetsin uelis  peuas yolik kikaujtiyas tamachtilis tein melauak, xa porin kiyolnotsa mouikas iniuan amo kuali tasojiknimej oso kiixpejpena neixpetanilis tein amo kuali (Prov. 13:20). ¿Keniuj uelis tikonchiuas maj mokoneuan amo kinpano nejon?

¹¹ Niman xikonpaleui mokoneuan keman tikonitas ke moneki maj kiyektalikan teisa tein kinextiaj. Uan no, xikonpaleui maj okachi kuali kinextikan kualneskayomej tein kipiajya (2 Ped. 1:5-8). Uelis tikonchiuas nejon itech youak keman nantaueyichiuaskej kemej kalyetouanij. Amaix Ministerio del Reino de octubre de 2008 kijtoj: “Tikinyolmajxitiaj akin taixyekanaj kalijtik maj kiitakan ke motelneki kichiuaskej tein Jiova kinnauatij uan maj kiixtalikan nochipa momachtiskej Biblia kemej kalyetouanij”. ¿Tikonchiujtok nejon tein mitsonpaleuis kuali xikoniskalti mokoneuan? Uelis tikonyekmatis ke yejuan kitasojkamatij chikaujkayot tein tikonchiua keman tikontayekanaltia tikonpaleuis maj kichikauakan ininkuali uikalis iuan Jiova (Mat. 5:3, TNM; Filip. 1:10, TNM).

12. 1) ¿Keniuj telpochmej uan ichpochmej kinpaleuia taueyichiualis kemej kalyetouanij? (No xikonita recuadro  “Yejuan kitasojkamatij”.) 2) ¿Keniuj mitsonpaleuiani keman nantaueyichiuaj kemej kalyetouanij?

¹² Xikonita keniuj kiita Youak keman Taueyichiuaj kemej Kalyetouanij se ichpoch akin monotsa Carissa. Yejua kijtoua: “Nikteluelita keman timosentiliaj uan timonojnotsaj. Nejon kichiua maj okachi kuali timouikakan uan maj nochipa tikelnamikikan nejon taman tein tel kualtsin tein tikchiuaj. Nopopaj nochipa mochikaua maj tikpiakan totaueyichiualis. Keman nikita ke kinextia ke motelneki, nechyolchikaua uan nechpaleuia maj no ijkon nikita. Uan no nechpaleuia maj okachi nikpoujkaita kemej nopopaj uan kemej akin techixyekana itech totaueyichiualis”. Brittney, se tokniuj ichpoch kijtoua: “Taueyichiualis kemej kalyetouanij kichiua maj okachi kuali nimouika iniuan notatuan. Nejon kinextia ke kinekij kikakiskej toni kuejmolmej nikpia uan ke noka motekipachouaj. Kichikaua tokuali uikalis kemej kalyetouanij uan okachi techtokia”. Moyekita ke motelneki maj tetatmej kinpaleuikan ininkoneuan maj kitasojtakan Jiova. Uan se taman tein okachi tapaleuia maj mochiua nejon yejua taueyichiualis kemej kalyetouanij. *

13. ¿Toni uelis kinolinis konemej maj kinekikan kitekitiliskej Jiova?

¹³ Se kuali ichkatajpixkej kikui se kouit tein ika kinixyekana iichkauan uan kinpaleuia maj amo kinijtakokan. Yejua kitayekanaltia kinyekanas kampa “tel onkak sakat” (Ezeq. 34:13, 14). ¿No yejua nejon tein tikontayekanaltia iniuan mokoneuan? Tejuatsin tikonneki tikonixyekanas maj kitekitilikan Jiova uan tikonuelitaskia tikonpaleuis maj momachilikan kemej akin kijkuiloj Salmo: “Nikchiuas motanejnekilis, noDios, nechtelyolpaktia, uan motanauatil moajsi noyolijtik” (Sal. 40:8). Komo mokoneuan ijkon momachiliaj, xa kinekiskej motemaktiskej iuan Jiova uan moauiskej. Sayoj ke moneki kichiuaskej nejin tein motelneki keman uelisya kiajsikamatiskej toni kijtosneki uan keman yekmelauj kinekiskej kitekitiliskej Jiova.

14, 15. 1) ¿Toni moneki kiixtaliskej kichiuaskej tetatmej? 2) ¿Keyej seki telpochmej omeyolouaj?

¹⁴ ¿Uan komo mokonetsin amo kinextia ke kichikaujtok ikuali uikalis iuan Jiova oso hasta omeyoloua ke yejua nejin tamachtilis tein melauak? Xikonixtali tikonpaleuis maj kitasojta Jiova uan maj kitasojkamati nochi tein yejuatsin kichiuani (Apoc. 4:11). Satepan, keman kichiuas tein monekis, uelis iselti kiixpejpenas kitekitilis Jiova.

¹⁵ Sayoj ke, ¿toni tikonchiuas komo mokonetsin peua omeyoloua? ¿Keniuj uelis  tikonpaleuis maj kiita ke komo kitekitilia Jiova yejua tein okachi kuali tein uelis kichiuas itech inemilis uan ke uelis yolpakis nochipaya? Yekinika moneki tikonmatis keyej omeyoloua. ¿Xe porin kiita ke amo taixejekol tein kijtoua Biblia oso porin kimouilia kintapouis tein kineltoka akin iniuan momachtia? ¿Xe kinemilia ke itanauatiluan Jiova amo tapaleuiaj oso xa momachilia iselti uan kimachilia ke kiixtopeuaj?

16, 17. ¿Keniuj tetatmej uelis kinpaleuiskej ininkoneuan maj kipiakan se kuali uikalis iuan Jiova?

¹⁶ Tein yeski tein kichiuas maj mokonetsin omeyoloua, tejuatsin uelis tikonpaleuis maj moijkuanili nejon. ¿Keniuj? Seki tetatmej kuali kinkisani keman kintajtaniaj ininkoneuan nejin: “¿Mitsouijmaka timochiuas tiitatojtokakauj Cristo oso amo? ¿Toni nepaleuil tiknemilia ke kiualkui, uan toni ouijkayomej se kipia? ¿Melauj ke nepaleuil tein kiualkui axkan uan tein kiualkuis satepan okachi tel miak ke ouijkayomej?”. Sayoj ke moneki tikontajtanis ika motajtoluan, ika nochi moyolo uan ika netasojtalis. Amo xikonchiua maj kimachili ke tel miak taman tikontajtania. Keman iuan tiontajtos, xa uelis tikonitas tein kijtoua Marcos 10:29, 30. Seki telpochmej xa kinpaleuis komo kiamataliaj nepaleuilmej uan ouijkayomej. Keman kiitaskej tein kijkuilojkej uelis kinpaleuis maj kiitakan keyej yekmelauj omeyolouaj uan maj kichiuakan tein monekis. Uan no, ¿iniuan tionmomachtiani mokoneuan amaixmej Tamachtia Biblia uan Inetasojtalis Dios? Komo tejuatsin tikontekitiltia keman tikonmachtia oksekin, ¡okachiok moneki tikontekitiltis iniuan mokoneuan!

¹⁷ Ejkos tonal keman mokoneuan kiixpejpenaskej ox kitekitiliskej Jiova oso amo. Amo xikonnemili ke yejuan kitekitiliskej Dios sayoj porin tejuatsin ijkon tikonchiua. Yejuan moneki kipiaskej ininkuali uikalis iuan Jiova (Prov. 3:1, 2). Komo tikonita ke mokonetsin kiouijmaka kichiuas nejon, ¿uelis tikonpaleuis maj kiita ika nejmachkayot tamachtilismej tein tayekantokej? Xikonpaleui maj motajtani nejin: “¿Keniuj nikmati ke Dios nemi? ¿Toni kichiua maj nikneltoka ke yekmelauj noka motekipachoua? ¿Keyej nikneltoka ke itanauatiluan Dios nechtelpaleuiaj?”. Xikonnexti ke kuali tikoniskaltia uan xikonyekana ika nejmachkayot uan ijkon kiitaskej ke kitekitiliskej Jiova yejua tein okachi kuali tein uelis kichiuaskej itech ininnemilis (Rom. 12:2). *

18. ¿Keniuj tetatmej uelis kichiuaskej kemej okachi Ueyi Ichkatajpixkej?

¹⁸ Tinochin akin tikchiuaj kemej Cristo tiknekij tikchiuaskej kemej Jiova, akin okachi Ueyi Ichkatajpixkej (Efes. 5:1, TNM; 1 Ped. 2:25). Okachi tetatmej moneki kuali kinixmatiskej ininkoneuan, akin kemej yeskia ininichkauan. Moneki kuali kinixyekanaskej uan ijkon uelis kiseliskej tatiochiualismej tein Jiova kineki maj kipiakan. Yejua ika, tetatmej, kuali xikiniskaltikan nanmokoneuan keman nankinmachtiskej maj kitasojtakan toTajtsin akin nemi iluikak.