1, 2. Maski titatamamej uan tein yeski xiujmej tikpiaskej, ¿keniuj kineki Dios maj tikueyichiuakan?

KOMO titelpoch oso tiichpoch uan tipoui iniuan itaixpantijkauan Jiova akin moajsij noyampa taltikpak, uelis tikyekmatis ke tekit tein tikchiua kitelpia ipatiuj. Itech miak altepemej, xijxiujtika moauiaj tel miakej telpochmej uan ichpochmej. ¡Semi techyolchikaua tikitaskej ke kiixtaliaj kitekitiliskej Jiova!

² Tikyekmatij ke tikuelita timosentilis iniuan okseki telpochmej oso ichpochmej. Tinochin techyolpaktia iniuan tiyetoskej totasojikniuan akin kipiaj xiujmej tein tikpiaj. Sayoj ke, Dios kineki maj tinochin tiksenueyichiuakan maski titatamamej uan tein yeski xiujmej tikpiaskej. Tatitanil Pablo kijkuiloj ke Dios kinejneki maj “nochi in taltikpakuani ma makisakan [...] para ma ijkon kajsikamatikij in melauak Tajtoltsin de Dios” (1 Tim. 2:3, 4). Uan Apocalipsis 7:9 kijtoua ke akin kiueyichiuaj Jiova ualeuaj itech “nochi tataman paísme uan de nochi tataman tagayot, [...] pueblojme uan [...] nochi tataman tajtolisme”.

3, 4. 1) ¿Toni tanemilil kipiaj miakej telpochmej uan ichpochmej axkan? 2) Kemej kijtoua Efesios 4:25, ¿keniuj moneki tikinitaskej tokniuan itech nechikol?

³ Telpochmej uan ichpochmej akin pouij itech ixolal Dios tel  taman monejnemiltiaj, amo ijkon kemej akin amo kiueyichiuaj Jiova. Yejuan sayoj kitayekanaltiaj inintanejnekilis uan kichiuaj tein kinekij. Tein melauj, miakej tatemouanij kijtouaj ke axkan, telpochmej uan ichpochmej okachi kitayekanaltiaj sayoj inintanejnekilis. Ijkon kemej tajtouaj uan motilmajtiaj kinextiaj ke amo kinpoujkaitaj oksekin, okachiok akin xiuejkejya.

⁴ Nejon tanemilil noyampa moita. Yejua ika, telpochmej uan ichpochmej akin kinekij kiyolpaktiskej Jiova moneki semi mochikauaskej kiixnamikiskej. Sayoj ke nejon amo yankuixtok peuak moita, ta itech yekinika siglo, Pablo monekik kinyolchikauas tokniuan maj kiixnamikinij se tanemilil kemej nejon. Yejua kitokaytij kemej “ejekat, ten [...] kinyoltekitilijtok nochi nekes ten axkan kixnamiktinemij Totajtsin Dios” (xikonixtajtolti Efesios 2:1-3). Kuali tein kichiuaj telpochmej uan ichpochmej akin kiitaj ke moneki kiixtopeuaskej nejon tanemilil uan sentekitiskej iniuan tokniuan itech nechikol. Ijkon kemej monejnemiltiaj kinextiaj ke kiajsikamatij tein Pablo kijtoj: “Nochi tejuan tisenpoutinemij” (Efes. 4:25). Ijkon kemej motokia itamilis tein amo kuali tein mochiujtok nikan taltikpak, okachi monekis maj tisenyetokan iniuan tokniuan. Maj tikitakan seki neskayomej itech Biblia tein kinextiaj ke moneki tikchiuaskej nejon.

5, 6. ¿Toni techmachtia keman tikitaj ke Lot uan iichpochuan senyetoyaj?

⁵ Ne uejkauj, Jiova kinyekpiak itekitikauan ika nochi iyolo keman mosenpaleuiayaj ijkuak kipanouayaj ouijkayomej. Itech totonaluan, tiitekitikauan Dios akin tataman xiujmej tikpiaj ueli timomachtiaj miak taman ika neskayomej tein tikajsij itech Biblia. Yekinika maj tikitakan tein kipanok Lot.

⁶ Lot uan ichankauan ueliskia kinpanos tein amo kuali, porin Jiova yaya kiixpoloti Sodoma, xolal kampa nemiaj. Yejua ika, seki ángeles kinejmachtijkej maj kisaskia itech xolal uan maj kitemoskia mopaleuis itech tepemej. Yejuan kiluijkej: “¡Xicholo!” (Gén. 19:12-22). Lot uan ome iichpochuan tatakamatkej. Sayoj ke, keman Lot kiniluij akin yeskiaj imontikauan ke monekia kisaskej, kinemilijkej ke “kamanalojtoya”. Uan yejua ika momikilijkej (Gén. 19:14). Sayoj Lot uan iichpochuan, akin amo kikaujkej, momakixtijkej.

7. ¿Keniuj kinpaleuij Jiova akin kiskej Egipto porin senyetoyaj?

⁷ Maj tikitakan okse neskayot. Keman israelitas kiskej Egipto, amo moxexelojkej nion seseko yajkej. Uan keman Moisés “momamelauak itech ueyiat” uan ijkon Jiova kitajkoxeloskia at, amo iselti kipanauij nion sayoj iniuan seki israelitas. Kemej tikmatij, nochi xolal kipanauij ueyiat uan Jiova kinyekpiak (Éx. 14:21, 22, 29, 30). Nochin senyetoyaj, hasta “tel miakej tataman taltikpakneminij” akin amo katkaj israelitas akin kiixtalijkej iniuan yaskej (Éx. 12:38). ¿Melauj ke kinextiskiaj ke amo tamatij komo sekin, xa seki telpochmej oso ichpochmej, moxeloskiaj uan yaskiaj itech okse ojti tein kinemiliayaj ke okachi kuali katka? Komo ijkon kichiuaskiaj, Jiova amo kinyekpiaskiaok (1 Cor. 10:1).

8. Itech itonaluan Jehosafat, ¿keniuj kinextij ixolal Dios ke senyetoyaj?

⁸ Itech itonaluan tekiuaj Jehosafat, tel miakej tateuianij akin kipiayaj ueyi c hikaualis ualayaj kiteuikij ixolal Dios (2 Crón. 20:1, 2). ¿Toni kichiujkej itekitikauan Jiova? Yejuan takuaujtamatkej iuan Dios uan kitajtanijkej maj kinixyekanaskia (xikonixtajtolti 2 Crónicas 20:3, 4). Amo sejsemej kitemojkej kichiuaskej tein kinemiliskiaj ke okachi kuali katka. Biblia kijtoua ke “nochin akin nemiaj Judá ijkatoyaj iixpan Jiova, hasta ininkoneuan akin nojnelmejok, ininsiuauan uan ininkoneuan” (2 Crón.  20:13). Nochin senyetoyaj, maski tein yeski xiujmej kipiayaj, uan takuaujtamatkej iuan Jiova uan kichiujkej tein kiniluijka. Yejua ika Jiova kinyekpiak (2 Crón. 20:20-27). ¡Tel kuali technextilia keniuj ixolal Dios moneki kiixnamikis tayejyekolis!

9. ¿Toni techmachtia keman tikitaj ke tokniuan itech yekinika siglo senyetoyaj?

⁹ Tokniuan itech yekinika siglo no kinextijkej ke senyetoyaj. Kemej neskayot, keman miakej judíos uan akin amo judíos mochiujkej itatojtokakauan Cristo, “momachtijtiayaj [...] nochi in tajtolme ten in tatitanilme de Jesús kinnextiliayaj. Uan [...] sen yolseukanenke se uan okse uan no mosentatatautiliayaj iuan Dios. Uan [...] mosentiliayaj para kisepankuaske in pantsin” (Hech. 2:42). Uan keman peuak kintajyouiltiaj, monekik okachi mosenpaleuiskej uan moyekpiaskej (Hech. 4:23, 24). ¿Tikitaj toni techmachtia nejin? Keman tikpanouaj ouijkayomej moneki okachi tisenyetoskej.

10. ¿Kemanian monekis okachi tisenyetoskej?

¹⁰ Moualtokiaj seki tonalmej tein okachi ouijkej yeskij kemej amo keman kipanouanij taltikpakneminij. Tanauatijkej Joel kimelaua kemej “se tonal keman onkas tayouayanilot uan tamouilil yeski” (Joel 2:1, 2; Sof. 1:14). Ijkuak, ixolal Dios monekis okachi senyetos. Maj tikelnamikikan tein Jesús kijtoj: “Takan in pueblojuani de se país moxejxelojtokke [...], ijkuakon ne país nochi mouejueloske san” (Mat. 12:25).

11. ¿Toni techmachtia Salmo 122:3, 4? (Xikonita taixkopin ipeujyan tamachtilis.)

¹¹ Amo uejkaua, keman peuaskej nejon tonalmej tein ouijkej monekis okachi tisenyetoskej. Uelis tikajsikamatiskej nejin komo tikitaj keniuj chijchiujtoyaj kalmej itech ne uejkauj xolal Jerusalén. Ijkuak, kalmej amo ueuejka moajsiaj, yejua ika akin kijkuiloj Salmo kimelauak ke Jerusalén katka kemej se “xolal tein senyetok kemej sayoj se”. Kemej ijkon chijchiujtoyaj kalmej, akin ompa nemiaj ueliaj mopaleuiayaj uan moyekpiayaj se uan okse. Nejon xa no kielnamiktiaya akin kijkuiloj Salmo keniuj “kalyetouanij tein iaxka Jah” mosentiliayaj kemej se xolal uan kisenueyichiuayaj Jiova (xikonixtajtolti Salmo 122:3, 4). Itech nejin tonalmej uan itech tonalmej tein ouijkej tein moualtokiaj, tejuan no monekis okachi tisenyetoskej.

12. ¿Toni techpaleuis maj timomakixtikan keman amo uejkaua kiixnamikiskej ixolal Dios?

¹² ¿Keyej motelnekis maj tisenyetokan keman ejkoskej nejon tonalmej tein ouijkej? Itech Ezequiel capítulo 38 achtook moijtoua ke “Gog tein poui itech tal Magog” kiixnamikis ixolal Dios. Ijkuak monekis amo tikauaskej maj nion teyi techxelo nion tiktemoskej nepaleuil itech nejin taltikpak. Ta monekis okachi tisenyetoskej iniuan tokniuan. Sayoj ke nejin amo kijtosneki ke komo tipouij itech se nechikol timomakixtiskej, ta tisejsemej monekis tiknextiskej ke titakuaujtamatij iuan Dios uan tiktakamatij. Sayoj momakixtiskej akin kinotsaskej Jiova ika itokay (Joel 2:32; Mat. 28:20). Sayoj ke, ¿toni panos iniuan akin kikaujkej ixolal Dios uan yajkej itech okse ojti? ¿Momakixtiskej? (Miq. 2:12.)

13. ¿Toni taman ueli momachtiaj telpochmej uan ichpochmej ika tein tikitakejya hasta axkan?

¹³ Telpochmej oso ichpochmej, ¿nankiitaj ke semi tamouilil komo nanmouejkatiliaj iniuan tokniuan, ijkon kemej miakej kichiuaj? Amo uejkaua, motelnekis maj timopaleuikan se iuan okse. Yejua ika, axkan moneki tiktemoskej okachi kuali timouikaskej iniuan tokniuan, uan maj techyolpakti tiksentekitiliskej Jiova. Satepan, komo tisenyetokej iuan ixolal Jiova techpaleuis maj timomakixtikan.

14, 15. 1) ¿Keyej Jiova techmachtijtok axkan? 2) ¿Toni techyolmajxitia Jiova tein techyolchikaua maj tisenyetokan iniuan tokniuan?

¹⁴ Jiova techpaleuia maj ‘tiksentekitilikan’ (Sof. 3:8, 9). Yejuatsin techmachtijtok tein monekis tikchiuaskej satepan, keman “kiyankuikasentilis nochi taman imako Cristo” ijkon kemej kiixtalijtok (xikonixtajtolti Efesios 1:9, 10, TNM). Jiova kineki kinsentilis nochin akin nemij iluikak uan nikan taltikpak uan ijkon kisenueyichiuaskej kemej se kalyetouanij. Uan tikyekmatij ke ijkon kichiuas. Yejua ika, telpochmej uan ichpochmej, ¿nankiitaj ke motelneki tisentekitiskej iuan inechikol Jiova?

¹⁵ Jiova techmachtijtok keniuj tisenyetoskej axkan, porin kineki maj itech yankuik taltikpak no ijkon timoajsikan. Yejua ika, Biblia miakpa techyolmajxitia ke moneki timoyekpiaskej se iuan okse ika nejin tajtolmej: “Ximotasojtatiyakan”, “ximosepanyolchikauakan” uan “ximoyolmajxitikan [...] se uan okse” (1 Cor. 12:25; Rom. 12:10; 1 Tes. 4:18; 5:11). Jiova kimati ke titajtakouanij uan yejua ika kemansa techouijmaka kuali timouikaskej iniuan tokniuan. Yejua ika techiluia: “Ximotapojpoluikan se uan okse” (Efes. 4:32).

16, 17. 1) ¿Keyej moneki amo timopolouiliskej nechikolmej? 2) ¿Toni kinmachtia telpochmej uan ichpochmej ineskayo Jesús?

¹⁶ Ika nechikolmej Jiova no techmachtia maj tisenyetokan. Hebreos 10:24, 25 techelnamiktia keyej moneki amo timopolouiliskej. Se taman, porin techolinia maj ‘timotasojtatiyakan se uan okse’ uan maj ‘tikchiutiyakan in kuali tachiualisme’. Sayoj ke Jiova no techmaka nechikolmej porin ijkon uelis timoyolchikauaskej “se uan okse ika ne yolmajxitilis porin tikitaj ke kachi motokijtiuits ya ne tonal”.

¹⁷ Jesús techkauilij se kuali neskayot porin kiitaya ke motelnekia mosentilis iuan ixolal Dios. Keman kipiaya 12 xiujmej, yajki iniuan itatuan itech se ueyi nechikol tein mochiuak templo. Keman mokepayajya, José uan María amo kiajsiaj, sayoj ke amo porin yajki okseko iniuan okseki telpochmej. Ta keman itatuan kiajsikej, yejua tajtojtoya iniuan tamachtianij itech templo ika tein Biblia tamachtia (Luc. 2:45-47).

18. ¿Keniuj tonetataujtiluan uelis techpaleuis maj okachi kuali timouikakan iniuan tokniuan?

¹⁸ Kemej tikitakejya, komo tikinpialiaj netasojtalis tokniuan uan tiyouij nechikolmej, techpaleuia maj okachi kuali timouikakan iniuan. Sayoj ke no uelis tiktataujtiskej Dios  maj kinpaleui okseki tokniuan. Komo titajtanij itech toni taman maj kinpaleui, techelnamiktia ke motelneki ininka timotekipachoskej. Uan nejin amo sayoj akin uejueykej uelis uan monekis kichiuaskej. Komo titelpoch oso tiichpoch, xiknemili ox tiktekitiltijtok nochi nejin taman tein mitspaleuis okachi kuali ximouika iniuan tokniuan itech nechikol. Moneki tisenyetoskej iniuan tokniuan uan amo itech nejin taltikpak kampa Satanás taixyekantok uan ijkon uelis timakisaskej keman ejkos tamilis.

19-21. 1) ¿Itech toni taman moyekita ke itekitikauan Jiova senpoujtinemij? Xikonijto seki neskayomej. 2) ¿Toni techmachtia tein kichiuanij seki tokniuan keman mochiua se tetsauit?

¹⁹ Ijkon kemej kijtoua Romanos 12:5, itech totonaluan, itekitikauan Jiova kinextiaj ke senpoujtinemij. Uan nejin okachi moita keman panouaj tetsaujmej. Itech metsti diciembre xiuit 2011, tel kiouik itech isla Mindanao ompa Filipinas uan nejon kichiuak maj tel taapexoni. Itech sayoj se youal, kinuejueloj panoua cuarenta mil kalmej, uan seki katka ininchan miakej tokniuan. Sayoj ke, itech sucursal kitematiltijkej nejin: “Achto ke peuaskiaj tekitiskiaj tokniuan akin kinixtaliaj maj kiitakan maj motemaka nepaleuil, tokniuan itech okseki xolalmej peujkajya kititanij nepaleuil”.

²⁰ Keman chikauak talolinik itech seki xolalmej tein pouij Japón uan satepan ueyiat moajkotamotak, miakej tokniuan kipolojkej miak taman tein kipiayaj uan sekin kipolojkej nochi. Kemej neskayot, Yoshiko, se tokniuj siuat, kipoloj ichan. Kali kampa tiMosentiliaj uejka moajsia, kemej 40 kilómetros. Yejua kijtoua: “Tikmoujkakakkej keman tikmatkej ke se tonal satepan ke talolinik, tokniuj takalpanojkej uan okse tokniuj techtemokoj”. Uan no, ika yolpakilis kijtoj: “Semi tiktasojkamatij maj nechikol techmakani miak taman tein techpaleuij maj mochikauani tokuali uikalis iuan Jiova. Uan amo sayoj nejon, ta no techmakakej tilmaj, tekakmej, bolsos uan tilmaj tein ika se kochi”. Uan se tokniuj akin kiixtalijkej maj kiuika nepaleuil kijtoj: “Tokniuan itech nochi altepet senyetoyaj uan mosenpaleuiayaj. Hasta tokniuan akin kayomej Estados Unidos ualajkej tapaleuikoj. Keman tikintajtanijkej keyej kiixtalijkej ualaskej maski tel uejka, kijtojkej: ‘Iniuan tiyetokej tokniuan akin kayomej Japón uan moneki maj tikinpaleuikan’”. ¿Melauj ke tikpatiuitaj tipouiskej itech se nechikol tein ininka moteltekipachoua akin ompa pouij? Tikyekmatij ke Jiova semi kiyolpaktia kiitas ke itekitikauan senyetokej.

²¹ Komo axkan tisenyetokej, techpaleuis maj no ijkon tikchiuakan keman tikpiaskej okachi uejueyi tayejyekolis satepan, hasta komo amo ueliok titajtouaj iniuan tokniuan itech okseki altepemej. Tein melauj, nejon techmachtia keniuj uelis tikixnamikiskej tayejyekolis tein tikpiaskej keman tamis tein amo kuali tein mochiujtok nikan taltikpak. Fumiko, se tokniuj siuat kayot Japón akin makisak keman chikauak kiouaejekak, kijtoua nejin: “Amo uejkaua ejkos tamilis. Moneki tiksentokaskej tikinpaleuiskej tokniuan hasta keman ejkos tonal keman amo mochiuasok tetsaujmej”.

22. ¿Toni tikseliskej satepan komo tisenyetokej?

²² Tinochin akin timochikauaj tisenyetoskej, maski tein yeski xiuit tikpiaskej, tein melauj timomachtijtokej keniuj timakisaskej keman tamis tein amo kuali tein mochiujtok nikan taltikpak. Ijkon kemej kichiuak ne uejkauj, toDios kimakixtis ixolal (Is. 52:9, 10). Maj nochipa tikelnamikikan ke komo timochikauaj tipouiskej iuan ixolal Jiova tein senyetok, uelis timoajsiskej iniuan akin makisaskej. Okse taman tein no techpaleuis yejua komo tiktasojkamatij nochi tein tikselianijya. Nejin tikitaskej itech okse tamachtilis.