SEKI tokniuan telpochmej uan ichpochmej kiixtalijkej kiitatiuij se película. Miakej akin iniuan momachtiaj tamachtiloyan kiitatojya uan kinpaktij. Keman ajsij kampa kiitaskej, itech patauak amat kiitaj teposmej tein ika moteuiaj uan siuamej tein amo takentokej kemej moneki. ¿Toni kichiuaskej? ¿Mokauaskej uan kiitaskej película?

Nejin neskayot kinextia ke tinochin moneki tikixpejpenaskej tikchiuaskej teisa tein uelis kichikauas oso kijtakos tokuali uikalis iuan Jiova. Kemansa, xa tiknekiskej tikchiuaskej teisa, sayoj ke ijkuak tikyekixejekouaj, tikpataj totanemilil. ¿Kuali yetok nejon?

Netasojtalis tein tikpialiaj Jiova, techolinij maj timotemaktianij uan maj timoauianij. Timotenkaujkej iuan ke amo keman tikauaskej uan tiknekij ijkon tikchiuaskej. Sayoj ke Satanás akin techtauelita, senkis kitemoua kichiuas maj tikauakan Dios (Apoc. 12:17). Tikixtalianij tiktekitiliskej Jiova uan tiktakamatiskej itanauatiluan; komo tikpataj totanemilil uelis tikpoloskej tonemilis uan nejon semi amo kuali yeskia.

Panoua dos mil seiscientos xiujmej achto, Nabucodonosor, akin tekiuajtia Babilonia, tanauatij maj nochin kiueyichiuanij se ueyi tamachijchiuj ika oro. Akin amo kichiuaskiaj, kinpantamotaskiaj itech se ueyi tikomit. Sadrac, Mesac uan Abednego katkaj eyi telpochmej akin kiueyichiuayaj Jiova uan kinekiaj kitakamatiskej yejuatsin. Kemej amo motankuaketskej iixpan tamachijchiuj, kinpantamotkej tikonijtik. Maski Jiova kinmakixtij ika ichikaualis, kiixtalijkaj kitakamatiskej Dios maski mikiskiaj (Dan. 3:1-27).

Tanauatijkej Daniel amo no kipatak itanemilil, ta kisentokak kiueyichiuak Dios  akin melauak. Kimatia ke komo kiitaskiaj kichiujtok netataujtil, kipantamotaskiaj kampa yetoyaj tekuanimej. Maski ijkon, kisentokak kichiuak netataujtil expa tonal. Yejua ika, Jiova “kichiuak maj tekuanimej amo kijtakouanij” (Dan. 6:1-27).

Axkan, itekitikauan Dios no kiixtalianij kitekitiliskej Jiova. Ompa África, se tonal itech tamachtiloyan kichiujkej teisa tein ika kiueyichiuayaj tein kiixnextiaya altepet. Uan tokniuan telpochmej amo kinekkej kichiuaskej. Yejua ika kiniluijkej ke amo kinkauaskiajok maj yakan tamachtiloyan komo amo kichiuaskiaj. Seki tonalmej satepan, se ueyichiujkej akin kiita tamachtilis tein motemaka, takalpanoj itech altepet uan tajtoj iniuan seki nejon tokniuan telpochmej. Yejuan amo momoujtijkej uan ika poujkaitalis, kimelauilijkej keyej amo kiueyichiuayaj tein kiixnextia altepet. Axkan amo kipianijok kuejmolmej nion kinchikaujkauiaj maj amo kitakamatikan Dios.

Maj tikitakan tein kipanok Joseph. Inamik kipiaya cáncer uan ijsiujka momikilij. Ichankauan Joseph kipoujkaitayaj tein kinekia maj mochiua keman kipachoskiaj inamik. Sayoj ke ichankauan inamik amo kitekitiliaj Jiova uan kinekiaj maj mochiua seki taman tein Dios amo kiyolpaktia. Joseph kijtoua: “Kemej nejua amo nikauaskia maj mochiua nejon, kitemojkej kinchikaujkauiskej nokoneuan maj kipatakan inintanemilil, sayoj ke yejuan amo kichiujkej. Ichankauan nonamik no kinekiaj maj tochan tikyekpianij youak kemej yejuan momattokej kichiuaskej. Sayoj ke nikiniluij ke komo kinekiaj kichiuaskej, monekia yaskej okseko. Kimatiaj ke tein yejuan momattokej kichiuaskej amo mouika ika tein nikneltoka uan tein kineltokaya nonamik. Satepan ke uejkauak nikiniluijtoya ke amo tikchiuaskiaj, yajkej kichiuatoj okseko.

”Itech nejon ueyi ouijkayot uan tayokol, niktataujtij Jiova maj techpaleuiani kemej kalyetouanij maj tiktakamatinij itanauatiluan. Jiova kikakik tein niktataujtij uan techpaleuij maj titaxikouanij keman techchikaujkauiayaj.” Nion Joseph uan nion ikoneuan kinemilijkej kipataskej inintanemilil nion motemakakej kichiuaskej tein Dios amo kineki.

Tepitsin satepan ke panok Pascua itech xiuit 32, se siuat fenicia motokij kampa moajsia Jesús ijkuak yetoya Sidón uan miakpa kiluij maj kikixtiliskia isiuapil se amokuali ejekat tein kipiaya. Yekinika, Jesús amo kinankilij uan kiniluij imomachtijkauan: “Dios nechualtitanik sayo para ma nikinpaleui [...] in pueblojuan keme ichkame ten poliutokke, yejuan [...] in pueblojuani de Israel”. Kemej kisentokaya kitataujtiaya, kijtoj: “Amo kualtia ma nikinkuili in takualis den koneme [...] uan ma nikinmaka in itskuintsitsin”. Sayoj ke siuat tanankilij ika ueyi takuaujtamatilis: “Maski tejuan keme yeskia itskuintsitsin, pero timotaololouiliaj mesajtampa uan tikuaj nochi [...] den kitenkajkauaj in patrones”. Jesús kipatak itanemilil uan kipajtij siuapil (Mat. 15:21-28).

Keman Jesús kipajtij siuapil, kichiujtoya kemej Jiova, akin kipata itanemilil keman kiita ke kinamiki. Kemej neskayot, keman israelitas kichijchiujkej se kuakuejkonet ika oro, Dios kiixtalijka kinixpolos, sayoj ke kipatak itanemilil satepan ke Moisés kitataujtij maj amo kiixpolouani xolal (Éx. 32:7-14).

Tatitanil Pablo no kipatak itanemilil kemej Jiova uan Jesús. Itech seki tonalmej, kiitaya ke amo kinamikia maj Juan Marcos iuan youi tanojnotsati itech altepemej porin achto kinkaujka yejua uan Bernabé itech yekinika takalpanolis. Sayoj ke satepan kiitak ke mopatakaya uan tel kuali tekititoya. Yejua ika kitajtanij Timoteo: “Xiktemoti uan xikualkui ma uiki mouan porin nikmati ke ne Marcos kuali uelis techpaleuis ka nijin tekit” (2 Tim. 4:11).

 ¿Uan tejuan? Ijkon kemej kichiua toTajtsin tetasojtakej akin amo yolijsiui, kemansa xa tikitaskej ke moneki maj tikpatakan totanemilil. Kemej neskayot, xa monekis tikpataskej kemej tikinitaj oksekin. Komo Jiova uan Jesús, akin amo kipiaj tajtakol kichiujkej, ¿melauj ke tejuan, akin titajtakouanij, moneki tikitaskej keniuj moajsij oksekin uan komo moneki maj tikpatakan kemej tikinitaj?

Kemansa, xa monekis tikpataskej kemej tikitaj tekimej tein ika tikueyichiuaj Dios. Sekin akin tikinmachtiaj ika Biblia akin uejkaujya yajtokej nechikolmej amo kiixtaliaj moauiskej. Seki tanojnotsanij amo kiixtaliaj tekitiskej kemej precursor maski ueliskiaj. Uan sekin amo mochikauaj kiajsiskej okseki tekimej itech nechikol (1 Tim. 3:1). ¿Mitsonpanotok nejon? Komo ijkon, xikonelnamiki ke Jiova ika netasojtalis mitsonyoleua xikonajsi nejon tekimej. Yejua ika, ¿keyej amo tikonpata motanemilil uan okachi tionmochikaua tikontekitilis Dios uan tikonpaleuis oksekin?

Ella, se tokniuj siuat akin tekiti Betel ompa África, kinextij keniuj kiita tekit tein ompa kichiua: “Keman niajsik Betel, amo nikmatia ox niuejkauaskia. Niknekia niktekitilis Jiova ika nochi noyolo, sayoj ke niktelnekia niyetos iniuan nochankauan. Yekinika nikinteltemouaya... Sayoj ke tokniuj siuat akin iuan ninemia cuarto nechtelyolchikauak, yejua ika nikixtalij nimokauas. Axkan nikuikaya majtakti xiuit nitekititok Betel uan senkis nikixtaliani niksentokas nitekitis nikan nochi tein uelis uan ijkon nikinpaleuis tokniuan”.

¿Tikonelnamiki tein kipanok Caín keman kinexikoluij iikniuj uan tel kualanik? Jiova kiitak ke nejon yaya kiuikati maj kichiua  tein amo kuali, yejua ika kiyolmajxitij maj kitsakuiliani ikualanyo komo kinekia kipias itatiochiualis. Kinejmachtij ke “tajtakol ichtakayeto[ya] kaltenoj”. Caín ueliskia kipatas itanemilil, sayoj ke amo kinekik kichiuas tein Dios kiyolmajxitij. Semi amo kuali tein kichiuak, ta kimiktij iikniuj uan mochiuak yekinika taltikpaknenkej akin temiktij (Gén. 4:2-8).

Tein kipanok Uzías no techmachtia se taman tein motelneki. Maski yekinika katka tatakamatkej uan kipiaya se kuali uikalis iuan Jiova, satepan moueyinekik. Tajkuilol kijtoua ke kalakito templo uan yaya kichichinoti kopal, maski nejon sayoj tiopixkamej ueliaj kichiuayaj. Uan keman yejuan kiluijkej maj amo kichiuani nejon tein kinextiaya ke moueyinekia, amo kinekik kipatas itanemilil. Ta “kualanik” uan amo tatakamatik. Yejua ika Jiova kichiuak maj palani inakayo (2 Crón. 26:3-5, 16-20).

Nejin neskayomej techmachtiaj ke kemansa motelneki maj tikpatakan totanemilisl. Maj tikitakan tein kipanok Joachim, akin moauij itech xiuit 1955 sayoj ke kikalankixtijkej itech nechikol itech xiuit 1978. Panoua veinte xiujmej satepan, kinextij ke moyolnonotsak uan oksepa mochiuak itaixpantijkauj Jiova. Yankuixtok, se tayekankej kitajtanij keyej tel miak xiujmej satepan tajtanik maj kiselianij itech nechikol. Joachim tanankilij: “Semi niyolkualantoya uan amo niyolyemanik katka. Nechyolkokoua maj amo niman nikpatani notanemilil. Itech nochi nejon xiujmej keman niyetoya kalampa itech nechikol, nikmatia ke itaixpantijkauan Jiova tamachtiaj tein melauak”. Joachim kiitak ke monekia moyolnonotsas uan kipatas itanemilil.

Kemansa, tejuan xa no monekis tikpataskej totanemilil uan tein tikchiuaj. Yejua ika maj tikchiuakan ika miak pakilis uan ijkon tikyolpaktiskej Jiova (Sal. 34:8).