¿Tikonixtajtoltiani ika nejmachkayot amaixmej Tanejmachtijkej tein yankuixtok kiskej? Xikonita ox ueli tikonnankilia nejin netajtanilmej:

¿Keniuj tikmatij ke Dios amo itajtakol maj mochiua tein amo kuali?

Jiova yolmelauak itech nochi iojuan, amo tekaua, amo tachichikouia, teyoliknelia uan teyoltasojta (Deut. 32:4; Sal. 145:17; Sant. 5:11) (1/7, página 4).

¿Keyej yankuik tratados tel tapaleuiaj uan amo ouij se kintekitiltia?

Nochin sayoj se taman kemej chijchiujtokej. Sejse tratado techyoleua maj tikixtajtoltikan se texto uan kipia se netajtanil. Tein yeski tein tanankilis taltikpaknenkej, maj tiktapokan tratado uan ijkon uelis tiknextiliskej tein kijtoua Biblia. No uelis tikixpejpenaskej semej netajtanilmej tein tiknankiliskej keman oksepa tikalpanoskej (1/8, páginas 14 hasta 16).

¿Toni Peshitta siríaca?

Tajtol siríaco kisak itech tajtol arameo tein okachi mokuia itech ojpatika oso expatika siglo. Nesi ke itech nejin tajtol yekinika motajtolkepak seki tajkuilolmej tein pouij itech Escrituras Griegas Cristianas. Biblia tein mokepak ika tajtol siríaco moixmati kemej Peshitta (1/9, página 13 uan 14).

¿Keniuj tetatmej uelis kiniskaltiskej ininkoneuan?

Motelneki maj kinkakikan uan ijkon uelis kinixmatiskej. Tetatmej moneki kinpaleuiskej maj kitasojtakan Jiova uan kinixyekanaskej ika netasojtalis, okachiok keman omeyolouaj ox yejua tamachtilis tein melauak (15/9, páginas 18 hasta 21).

¿Toni taman kitamis iTekiuajyo Dios?

Kitamis kokolismej, mikilis, neteuilismej, tatasojtilis, nochin kipiaskej tein kikuaskej uan onkas tekit (1/11, página 6 uan 7).

¿Toni netenkaualis tein ika tajtoua Biblia kichiua maj sekin tekiuajtikan iuan Cristo?

Satepan ke Jesús kichiuak Pascua iniuan itatitaniluan tein amo oksepa kichiuaskiaj, kichiuak se netenkaualis iniuan imomachtijkauan akin amo keman kikaujkej, tein moixmati kemej netenkaualis ika Tekiuajyot (Luc. 22:28-30). Nejin netenkaualis kinyeknextilij ke iuan tekiuajtiskiaj ompa iluikak (15/10, página 16 uan 17).

¿Akonimej katkaj “ipueblojkauan [Dios] para kitasojtaske itokaytsin” akin ininka tajtoj Santiago itech Hechos 15:14?

Katkaj taneltokanij judíos uan akin amo judíos akin Dios kinsentilij kemej ‘ipueblojkauan [...] para ijkon uelis kitenextilijtinemiske in uelilisme de Totajtsin Dios’ (1 Ped. 2:9, 10) (15/11, página 24 uan 25).