1, 2. ¿Toni kichiuak Jesús itech youak 14 metsti nisán xiuit 33? (Xikonita taixkopin ipeujyan tamachtilis.)

ITECH youak 14 metsti nisán xiuit 33 chikauak metstonatoya itech altepet Jerusalén. Jesús uan itatitaniluan kichiujtoyaj Pascua. Judíos xijxiujtika kichiuayaj nejin tein ika kielnamikiaj ke Dios kinmakixtijka ompa Egipto 1,500 xiujmej achto. Satepan ke kichiujkej Pascua, Jesús iniuan 11 itatitaniluan akin amo kikauayaj kipeualtij se yankuik taman tein monekia moelnamikis. Itatojtokakauan monekia kisentokaskej kichiuaskej xijxiujtika uan ijkon kielnamikiskej imikilis Jesús (Mat. 26:1, 2).

² Jesús kichiuak se netataujtil keman kipeualtij nejin yankuik taman tein monekia moelnamikis. Ompa kinpanoltilij itatitaniluan pan tein amo kipiaya tein ika xokoyas uan kiniluij: “Xikuakan nijin pantsin”. Satepan kikuik se copa tein kipiaya vino, oksepa kichiuak netataujtil uan kiniluij: “Xitayikan nijin vino nochi namejuan” (Mat. 26:26, 27). Pan uan vino katkaj ixneskayomej. Nejon youak, Jesús kinmachtij itatitaniluan toni kijtosnekia nejon ixneskayomej uan miak tamanok tein motelneki.

3. ¿Toni netajtanilmej tiknankiliskej itech nejin tamachtilis?

³ Jesús kinekia maj itatojtokakauan kielnamikikan imikilis xijxiujtika. Satepan, nejin yankuik taman moixmatik kemej  “mouiskatakualis den Totekotsin Cristo” (1 Cor. 11:20). Axkan no moixmati kemej iTakualis toTekotsin. Itech nejin tamachtilis tiknankiliskej nejin netajtanilmej: ¿Keyej moneki tikelnamikiskej imikilis Jesús? ¿Toni kiixnextiaj pan uan vino? ¿Toni taman tein motelneki uelis tikchiuaskej achto ke tikelnamikiskej imikilis Cristo? ¿Akonimej moneki kikuaskej pan uan tayiskej vino itech iTakualis toTekotsin? ¿Keniuj tokniuan kinextiaj ke kitasojkamatij nemilis nochipaya tein Dios motenkaua kinmakas?

4. ¿Toni ueli kichiua inemilis Jesús tein kitemakak?

⁴ Kemej Adán tajtakoj, tinochin titajtakolejkej uan timomikiliaj (Rom. 5:12). Yejua ika, amo akin ueli kimaka Dios se taxtauil tein kimakixtis yejua uan oksekin (Sal. 49:6-9). Sayoj ke Jesús amo kipiaya tajtakol. Yejua toka momikilij uan ijkon uelik kimakak Dios taxtauil tein monekia. Ika nejon, uelis techijkuaniliskej tajtakol uan mikilis uan ijkon tinemiskej nochipaya (Rom. 6:23; 1 Cor. 15:21, 22).

5. 1) ¿Keniuj Jiova uan Jesús kinextijkej ke techtasojtaj? 2) ¿Keyej moneki timonechikoskej keman moelnamiki imikilis Cristo?

⁵ Dios kinextij ke techtasojta keman kitemakak iKonetsin kemej taxtauil (Juan 3:16). Uan Jesús no kinextij ke techtasojta ijkuak toka momikilij. Tein melauj, yejua ipa kinpialiaya netasojtalis taltikpakneminij achto ke ualaskia nikan taltikpak (Prov. 8:30, 31). ¡Semi tikintasojkamatiliaj Jiova uan Jesús tein kichiujkej tein ika techpaleuiaj! Yejua ika timonechikouaj keman moelnamiki imikilis Cristo xijxiujtika. Ijkon no tiktakamatij tein tanauatij Jesús: “Xiksentokakan xikchiuakan nejin uan ika xinechelnamikikan” (1 Cor. 11:23-25, TNM).

6. ¿Toni kiyeknextij Jesús keman ika tajtoj pan uan vino?

⁶ Keman Jesús takuajtoya iniuan itatitaniluan uan amo sepaok kichiuaskia, kinmelauilij toni kijtosnekia pan uan vino. Keman kinmakak pan kijtoj: “Nijin pantsin; yejua ya nijin nonakayo”. Uan keman kinmakak vino kijtoj: “Nijin vino, yejua ya noesyo, uan de ne yejika kitenextilia ke [...] noesyo mimilauis uan nimikis para ijkon makisaske miakke tagayot” (tejuan tiktalilijkej cursivas; Mar. 14:22-24). Sekin kinemiliaj ke Jesús, ika ichikaualis Dios, kichiuak maj pan mokepani inakayo uan vino maj mokepani iesyo. Sayoj ke inakayo Jesús ompa yetoya, ininixpan itatitaniluan akin amo kikauayaj, uan no ompa moajsia pan tein amo kipiaya tein ika xokoyas tein yaya kikuatij. Ika nejin, moyekita ke pan uan vino sayoj katkaj ixneskayomej.

7. ¿Toni kiixnextia pan tein amo kipia tein ika xokoyas tein mokui itech iTakualis toTekotsin?

⁷ Nejon youak, Jesús kikuik pan tein amo kipiaya tein ika xokoyas tein mokuia itech Pascua (Éx. 12:8). Itech Biblia, tein ika xokoya teisa kemansa kiixnextia tajtakol (Mat. 16:6, 11, 12; Luc. 12:1). Yejua ika, pan tein amo kipiaya tein ika xokoyas tein Jesús  kikuik kiixnextia inakayo tein amo kipiaya tajtakol (Heb. 7:26). Yejua ika axkan tikuij pan tein amo kipia tein ika xokoya keman tikelnamikij imikilis Cristo.

8. ¿Toni kiixnextia vino tein mokui itech iTakualis toTekotsin?

⁸ Vino tein Jesús kikuik kiixnextia iesyo. Axkan no yejua nejon kiixnextia vino tein mokui keman moelnamiki imikilis Cristo. Jesús toka momikilij ompakauin itech altepet Jerusalén uan ijkon tejuan ueliskiaj ‘techtapojpoluiskej totajtakoluan’ (Mat. 26:28; 27:33). ¿Keniuj uelis tiknextiskej ke tiktasojkamatij tein kichiuak? Komo tikchiuaj seki taman tein motelneki achto ke tikchiuaskej iTakualis toTekotsin. Maj tikitakan toni nejin taman.

9. 1) ¿Keyej moneki tikixtajtoltiskej tein Jesús kichiuak achto ke momikiliskia? 2) ¿Toni tikonmachilia ijkuak tikonita nepaleuil tein kiualkui taxtauil tein motemakak?

⁹ Se taman tein moneki tikchiuaskej yejua maj tikixtajtoltikan itech Biblia tein Jesús kichiuak achto ke momikiliskia. ¿Keniuj uelis tikchiuaskej? Se taman yejua keman tikuiskej tein ixyetok moixtajtoltis tein moajsi itech amaix Maj timomachtikan iTajtol Dios mojmostaj. Motelneki maj tikixtajtoltikan nejon tajkuilolmej tein moajsij itech Biblia porin techpaleuia maj tiknemilikan keniuj inemilis Jesús tein kitemakak techpaleuia tisejsemej. Nejin se taman tein motelneki tikchiuaskej achto ke timonechikoskej keman moelnamikis imikilis Cristo. Se tokniuj siuat kijkuiloj: “Tikchiaj ika ueyi yolpakilis iTakualis toTekotsin. Xijxiujtika tikitaj ke okachi moneki”. Yejua kiixmatia nochi tajkuilolmej itech Biblia tein ika tajtouaj inemilis Jesús tein kitemakak uan no kimatia keniuj kimelauas. Sayoj ke kijtoua ke ijkuak momikilij ipopaj, kiajsikamatik keniuj yekmelauj tapaleuia imikilis Jesús. Nejon semi kiyolseuij.

10. ¿Toni okse taman uelis tikchiuaskej achto ke timonechikoskej keman moelnamikis imikilis Cristo?

¹⁰ Okse taman tein uelis tikchiuaskej achto yejua maj okachi titanojnotsakan. Xa uelis tikchiuaskej tekit kemej precursor  auxiliar itech nejon metsti. Ijkon uelis tikinyoleuaskej okachi taltikpakneminij maj touan monechikokan nejon tonal. Keman tikinmatiltiskej oksekin toni kichiua Dios, iKonetsin uan ke uelis nemiskej nochipaya, tiyolpakiskej porin tikchiujtokej tein Dios kineki (Sal. 148:12, 13).

11. ¿Keyej kijtoj Pablo ke seki tokniuan akin nemiaj Corinto kinextiayaj ke amo kipoujkaitayaj iTakualis toTekotsin keman kikuayaj pan uan tayiaj vino?

¹¹ Keman tikchiuaskej tein moneki achto ke timonechikoskej keman moelnamikis imikilis Cristo, no moneki tiknemiliskej tein tatitanil Pablo kiniluij tokniuan akin nemiaj Corinto (xikonixtajtolti 1 Corintios 11:27-34, TNM). Yejua kijtoj ke komo aksa amo kinextiskia poujkaitalis ijkuak kikuaskia pan uan tayiskia vino itech iTakualis toTekotsin, kinextijtoskia ke amo kipoujkaitaya inakayo uan iesyo Jesús. Maj tiknemilikan ke se tokniuj taixpejpenal kichiua tein amo kuali, uan maski ijkon, kikua pan uan tayi vino. Kemej kijtoj Pablo, nejin tokniuj motanilijtoskia se ueyi tatsakuiltilis. Itech itonaluan Pablo, miakej tokniuan akin nemiaj Corinto kichiujtoyaj tein amo kuali. Sekin xa hasta ixkokochtoyaj keman kichiuayaj iTakualis toTekotsin porin tel takuayaj uan tel tayiaj achto oso keman mochiujtoya nechikol. Nejon tokniuan kinextiayaj ke nion tepitsin kipoujkaitayaj iTakualis toTekotsin. Akin ijkon kichiuayaj, Dios amo kinseliaya.

12. 1) ¿Keniuj kijtoj Pablo ke tamati iTakualis toTekotsin? 2) ¿Toni kinnejmachtij akin kinyoleuaj? 3) ¿Toni moneki kichiuas se tokniuj akin kikua pan uan tayi vino komo tajtakoua?

¹² Pablo kijtoj ke iTakualis toTekotsin tamati kemej ijkuak aksa kinyoleua sekin maj takuatij ichan. Uan kinnejmachtij akin kinyoleuaj: “Amo uelis nantayitoskej icopa Jiova uan inincopa amokuali ejekamej; amo uelis nanyetoskej itech ‘imesa Jiova’ uan itech ininmesa amokuali ejekamej” (1 Cor. 10:16-21, TNM). Komo se tokniuj taixpejpenal kichiua se ueyi tajtakol, moneki kinmatiltis tayekananij uan ijkon kipaleuiskej (xikonixtajtolti Santiago 5:14-16, TNM). Uan komo kinextia ke moyolnonotsa, uelis kikuas pan uan tayis vino itech iTakualis toTekotsin. Amo kinextijtoskia ke amo kipoujkaita inemilis Jesús tein kitemakak (Luc. 3:8).

13. ¿Keyej tinochin moneki tikchiuaskej netataujtil uan tiknemiliskej kani tikchiaj tinemiskej?

¹³ Achto ke timonechikoskej keman moelnamikis imikilis Cristo, tinochin moneki tikchiuaskej netataujtil uan kuali tiknemiliskej kani kineki Dios maj tinemikan satepan. Amo tiknekij tiknextiskej ke amo tikpoujkaitaj inemilis Jesús tein kitemakak. Yejua ika, komo aksa amo senkis kimati ke taixpejpenal, moneki amo kikuas pan nion tayis vino itech iTakualis toTekotsin. Komo ijkon, ¿akonimej kemaj uelis kichiuaskej nejon?

14. ¿Toni kichiuaj itech iTakualis toTekotsin akin pouij itech yankuik netenkaualis?

¹⁴ Jiova kichiujka se netenkaualis iniuan israelitas. Nejin moixmati kemej netenkaualis ika Tanauatil. Sayoj ke satepan, Dios kijtoj ke kichiuaskia se yankuik netenkaualis  (xikonixtajtolti Jeremías 31:31-34). Keman Jesús takuajtoya iniuan itatitaniluan uan amo sepaok kichiuaskia, kijtoj nejin keman kinmakak vino: “Nejin copa kijtosneki yankuik netenkaualis ika noesyo” (1 Cor. 11:25, TNM). Itech nejin yankuik netenkaualis yetokej Dios uan tokniuan taixpejpenalmej (Gál. 6:15, 16). Keman kitemakak inemilis, Jesús kichiuak maj kipia chikaualis nejin yankuik netenkaualis (Luc. 22:20, TNM). Yejua tapaleuia maj mochiua nejin netenkaualis tein Dios kichiuak iniuan taixpejpenalmej. Uan nejin tokniuan akin amo kikauaj Dios iuan yetoskej Jesús ompa iluikak (Heb. 8:6; 9:15). Taixpejpenalmej senkis kiyekmatij ke pouij itech nejin yankuik netenkaualis. Yejua ika kikuaj pan uan tayij vino itech iTakualis toTekotsin.

15. 1) ¿Akonimej pouij itech netenkaualis ika Tekiuajyot? 2) ¿Toni tatiochiualis kipiaskej komo amo kikauaj Dios?

¹⁵ Tokniuan taixpejpenalmej kimatij ke no pouij itech netenkaualis ika Tekiuajyot (xikonixtajtolti Lucas 12:32, TNM). Jesús kichiuak nejin netenkaualis iniuan itatojtokakauan taixpejpenalmej akin amo keman kikaujkej uan motemakakej tajyouiskej kemej yejua (Filip. 3:10). Axkan, tokniuan taixpejpenalmej akin amo kikauaj Dios no pouij itech nejon netenkaualis. Nochin kipiaskej tatiochiualis tekitiskej kemej tekiuanij ompa iluikak uan taixyekanaskej iuan Jesús nochipaya (Apoc. 22:5). Yejua ika kinamiki maj kikuakan pan uan maj tayikan vino keman moelnamiki imikilis Cristo.

16. Ika amo miak tajtolmej, xikonmelaua Romanos 8:15-17.

¹⁶ Tokniuan taixpejpenalmej no senkis kiyekmatij ke Dios kinseliani kemej ikoneuan uan ke uelis kikuaskej pan uan tayiskej vino itech iTakualis toTekotsin (xikonixtajtolti Romanos 8:15-17). Pablo kijtoj ke taixpejpenalmej kinotsaj Dios: “Abba”, tein itech tajtol arameo kijtosneki “noTajtsin”. Nejin se tajtol tein aksa kikui tein ika kinextia ke kitasojta uan kipoujkaita ipopaj. Keman taixpejpenalmej ijkon kinotsaj Dios, kinextia kuali uikalis tein kipiaj iuan keman kimachiliaj ke kinselia kemej ikoneuan. Yektikatsin espíritu kichiua maj kimatikan ke yejuan taixpejpenalmej. Yejua ika, nejin tokniuan nion tepitsin omeyolouaj ke Dios kinselij kemej ikoneuan. Amo kijtosneki ke amo kinekij nemiskej nikan taltikpak. Sayoj ke kimatij ke komo taxikouaj hasta keman momikiliskej, tekiuajtiskej ompa iluikak iuan Jesús. No kimatij ke kinixpejpenak Jiova, akin yektik. Axkan amo miakej tokniuan taixpejpenalmej mokauajok nikan taltikpak, akin pouij iniuan 144,000 (1 Juan 2:20, TNM; Apoc. 14:1). Kimachiliaj ke iuan yetokej Jiova, yejua ika kinotsaj: “Abba”, tein kijtosneki “noTajtsin”.

17. 1) ¿Toni motenkaua Dios ke kinmakas tokniuan taixpejpenalmej? 2) ¿Keniuj kimatij ke taixpejpenalmej?

¹⁷ Dios motenkaua iniuan tokniuan taixpejpenalmej ke kinmakas nemilis nochipaya ompa iluikak. Komo tejuatsin tiontaixpejpenal, miakpa ika tiontajtos nejin netenkaualis keman tikonchiuas netataujtil. No tikonmachilis ke seki tajkuilolmej itech Biblia mitsonnamiki tejuatsin. Kemej neskayot, keman ika tajtoua inenamiktilis Jesús ompa iluikak iuan “tesiuajtan”, oso novia, tikonmati ke tejuatsin tionpoui ompa uan tikonnejneki maj  mochiua (Juan 3:27-29; 2 Cor. 11:2; Apoc. 21:2, 9-14). Oso keman ika tajtoua netasojtalis tein Dios kinpialia taixpejpenalmej, tikonmati ke Dios mitsonnojnotstok tejuatsin. Uan keman kinnauatia seki taman tokniuan taixpejpenalmej, yektikatsin espíritu mitsonolinia xikontakamati. Iespíritu Dios mitsonmatiltia ke yejuatsin mitsonixpejpenak xionnemi ompa iluikak.

18. 1) ¿Toni motenkaua Dios ke kinmakas ‘okseki ichkamej’? 2) ¿Toni kimachiliaj ‘okseki ichkamej’ porin Jiova kinmakas nejon kualtsitsin tatiochiualismej?

¹⁸ Dios motenkaua iniuan “uel miak tagayot” kampa pouij ‘okseki ichkamej’ ke kinmakas nemilis nochipaya itech se xochital nikan taltikpak (Apoc. 7:9; Juan 10:16). Komo tejuatsin tionpoui iniuan ‘okseki ichkamej’, mitsonyolpaktia tikonixtajtoltis keniuj kimelaua Biblia ke yeski Xochital. Tikonnejneki tionnemis ika yolseuilis nikan taltikpak iniuan mochankauan uan motasojikniuan. Tikonneki tikonitas keniuj tami mayan, tatasojtilis, tajyouilis, kokolismej uan mikilis (Sal. 37:10, 11, 29; 67:6; 72:7, 16; Is. 33:24). Tikonyolnejneki maj ejko tonal keman moajokuiskej akin tikontasojtaya uan ijkon kuali tikonselis (Juan 5:28, 29). Tejuatsin semi tikontasojkamatilia Jiova maj motenkaua ke mitsonmakas nejin kualtsitsin tatiochiualismej. No semi tikontasojkamati maj Jesús toka momikiliani. Yejua ika, maski amo tikonkua pan nion tiontayi vino, tionmonechikoua keman moelnamiki imikilis Cristo.

19, 20. 1) ¿Toni moneki tikchiuaskej komo tiknekij tinemiskej nochipaya? 2) ¿Keyej amo tikonneki tiontapolos keman moelnamikis imikilis Cristo?

¹⁹ Tinochin uelis tinemiskej nochipaya. Sekin nemiskej ompa iluikak uan oksekin nikan taltikpak. ¿Toni moneki tikchiuaskej komo tiknekij tinemiskej nochipaya? Moneki titakuaujtamatiskej iuan Jiova, iuan Jesucristo uan itech inemilis tein kitemakak. Yejua ika, keman mochiuas iTakualis toTekotsin, maj titanemilikan itech nemilis tein Dios motenkaua techmakas tisejsemej uan keyej motelneki inemilis Jesús tein kitemakak. Itech tonal viernes 3 metsti abril xiuit 2015 satepan ke pankalakis Tonaltsin, tel miakej taltikpakneminij noyampa taltikpak kichiuaskej iTakualis toTekotsin. Nejin mochiuas itech Kalmej kampa tiMosentiliaj oso okseko.

²⁰ Achto ke timonechikoskej keman moelnamikis imikilis Cristo, moneki tiknemiliskej keyej tel tapaleuia inemilis tein kitemakak. Nejon techolinis maj tiktasojkamatilikan tein kichiuak. Uan komo kuali tikakij tamachtilis tein motemakas, tiknejnekiskej tikinnextiliskej netasojtalis oksekin keman tikintapouiskej ueyi netasojtalis tein techpialia Dios uan tein motenkaua kinmakas taltikpakneminij (Mat. 22:34-40). Tikyekmatij ke nion semej tiknekij titapoloskej keman moelnamikis imikilis Cristo.