1. ¿Keyej kinamiki maj tiktasojkamatilikan Jiova?

JIOVA techtayokolia miak taman tein kuali (Sant. 1:17). Uan no, ika netasojtalis techmaka tein techpaleuia maj tiksentokakan tinemikan, ijkon kemej se tajpixkej kinyekpia iichkauan (Sal. 23:1-3). Techyekpia uan techmaka chikaualis keman tikpiaj kuejmolmej (Sal. 46:1). Keman tiknemiliaj nochi tein Jiova techmaka, timomachiliaj kemej semej akin kijkuiloj Biblia: “Xiktasojkamatilikan Jiova, porin yejuatsin yolkuali”. Nejin tajkuilojkej no kijtoj ke Dios nochipa yeski yolkuali (Sal. 106:1). Moyekita ke Dios kinamiki maj tiktasojkamatilikan nochi tein techmaka.

2, 3. 1) ¿Toni panos komo amo timotasojkamatij? 2) ¿Katiyejua netajtanilmej tiknankiliskej itech nejin tamachtilis?

² ¿Keyej moneki tiknemiliskej tiktasojkamatiliskej Jiova? Ne uejkauj, Biblia kijtoj ke itech totonaluan miakej amo teyi ika motasojkamatiskiaj, uan ijkon mochiujtok (2 Tim. 3:2). Miakej amo kitasojkamatij miak taman tein kuali tein Jiova kinmakani. Yejuan sayoj kitemouaj kikouaskej miak taman tein kemansa amo kinpoloua, sayoj ke amo yolpakij ika tein kipiajya. Komo tejuan no  amo timotasojkamatij, uelis timochiuaskej kemej israelitas. Uelis amo tiktasojkamatiskejok nochi tein Jiova techmakani uan tikpoloskej tokuali uikalis iuan (Sal. 106:7, 11-13).

³ Komo amo timotasojkamatij, no techouijmakas tikixnamikiskej kuejmolmej. ¿Keyej? Porin sayoj tikitaskej kuejmolmej uan amo tikitaskejok nochi tein kuali tein no tikpiaj (Sal. 116:3). Itech nejin tamachtilis tiknankiliskej ome netajtanilmej: ¿Keniuj uelis tiksentokaskej timotasojkamatiskej? ¿Uan keniuj uelis tikitaskej tein kuali maski tikpiaskej kuejmolmej?

4. ¿Toni moneki tikchiuaskej uan ijkon uelis tiktasojkamatiliskej Jiova?

⁴ Moneki timochikauaskej uan ijkon uelis tiktasojkamatiliskej Jiova nochi tein techmakani. Yekinika, moneki tiknemiliskej toni kichiuani tein ika techpaleuiani tisejsemej. Satepan, moneki tiknemiliskej keniuj nochi nejon kinextia ke Dios semi techtasojta. Keman semej akin kijkuiloj Biblia kichiuak nejon, semi kimoujkaitak nochi tein Jiova kichiuak tein ika kipaleuij (xikonixtajtolti Salmo 40:5 uan 107:43).

5. Komo tiknekij timotasojkamatiskej kemej Pablo, ¿toni moneki tikchiuaskej?

⁵ Tein kichiuak Pablo techmachtia maj timotasojkamatikan. Yejua miakpa tanemiliaya itech nochi tein Jiova kimakaka. ¿Keniuj tikmatij? Porin miakpa kitasojkamatiliaya itech inetataujtiluan. Kemej neskayot, yejua kijtoj ke achto semi moueyinekia uan tel kualania, uan ke kintajyouiltij uan kintakajkayauilij tokniuan. Yejua ika kitasojkamatiliaya Dios maj kitapojpoluiani uan maj kikauani maj tanojnotsa (xikonixtajtolti 1 Timoteo 1:12-14). Pablo no kitasojkamatiliaya Jiova porin moajsiaj tokniuan akin katkaj yolkualmej uan amo kikauayaj Dios (Filip. 1:3-5, 7; 1 Tes. 1:2, 3). No kitasojkamatiliaya Dios nochipa keman tokniuan kipaleuiayaj keman kipiaya kuejmolmej (Hech. 28:15; 2 Cor. 7:5-7). Yejua ika,  kiniluiaya tokniuan maj kitasojkamatilianij Dios uan maj mosenkuikatianij iixpan yejuatsin tein ika moyolchikauaskiaj (Col. 3:15-17).

6. ¿Toni tikonpia tejuatsin tein kinamiki xikontasojkamatili Dios?

⁶ Ijkon kemej Pablo, tejuan no uelis titanemiliskej itech nochi tein Jiova kichiuani tein ika techpaleuiani (Sal. 116:12). Maj timotajtanikan: “¿Toni nikpia tein kinamiki maj niktasojkamatili Dios?”. Uelis titanemiliskej itech kuali uikalis tein tikpiaj iuan oso itech inemilis iKonetsin tein kitemakak uan ijkon techtapojpoluia totajtakoluan. No uelis tiknemiliskej keniuj techpaleuianij itekitikauan ijkuak tikpiaj ouijkayomej. Uan komo tikpiaj tonamik oso tokoneuan, uelis titanemiliskej keniuj timotasojkamatij porin tikinpiaj tochankauan. Maj tiknemilikan keniuj Dios techpaleuiani. Nejon techolinis maj mojmostaj tiktasojkamatilikan (xikonixtajtolti Salmo 92:1, 2).

7. 1) ¿Keyej moneki tikchiuaskej netataujtil kampa tiktasojkamatiliskej Dios? 2) ¿Keniuj techpaleuia ijkuak tiktasojkamatiliaj Jiova keman tikchiuaj netataujtil?

⁷ Ijkuak titanemiliaj itech nochi tein kuali tein tikpiaj, tiknekiskej tikchiuaskej netataujtil kampa tiktasojkamatiliskej Dios (Sal. 95:2; 100:4, 5). Sekin sayoj kitataujtiaj ijkuak kinekij maj kinmaka teisa. Sayoj ke yejuatsin no kiyolpaktia maj tikchiuakan netataujtil porin tiknekij tiktasojkamatiliskej tein tikpiajya. Yejua nejon kichiujkej miakej takamej uan siuamej akin ixnesij itech Biblia, kemej Ana uan Ezequías (1 Sam. 2:1-10; Is. 38:9-20). Tejuan no ijkon uelis tikchiuaskej uan tiktasojkamatiliskej Dios nochi tein ika techpaleuiani (1 Tes. 5:17, 18). Nejon techyolchikauas, okachi tiktasojtaskej Jiova uan okachi kuali timouikaskej iuan (Sant. 4:8).

8. ¿Toni uelis kichiuas maj amo timotasojkamatikanok?

⁸ Komo amo timoyekpiaj, uelis peuas amo tiktasojkamatiskej tein Jiova techtayokolia. Moajsi ome taman tein uelis kichiuas nejon. Yekinika, kemej titajtakouanij, totech yetok maj amo timotasojkamatikan.  Keman Dios kinchijchiuak Adán uan Eva, kinmakak nochi tein monekia. Yejuan ueliskiaj nemiskej nochipaya itech se xochital kampa tel takualtsinkan (Gén. 1:28). Sayoj ke amo kitasojkamatkej tein Dios kinmakak. Kinekiaj kipiaskej okseki taman, sayoj ke satepan kipolojkej nochi (Gén. 3:6, 7, 17-19). Ojpatika, tinemij iniuan akin amo teyi ika motasojkamatij. Nejon uelis techmauas uan techuikas maj amo tiktasojkamatikanok tein Jiova techmaka, kemej kuali uikalis tein tikpiaj iuan uan tipouiskej iniuan tokniuan akin moajsij noyampa taltikpak (1 Juan 2:15-17). ¿Toni techpaleuis maj amo techijtako nejon ome taman tein kichiua maj amo se motasojkamati? Moneki nochipa titanemiliskej itech nochi tein Jiova kichiuani tein ika techpaleuiani uan maj tikchiuakan netataujtil kampa tiktasojkamatiliskej (xikonixtajtolti Salmo 27:4).

9. Keman tikpiaskej uejueyi kuejmolmej, ¿keyej moneki titanemiliskej itech nochi taman tein kuali tein Jiova techmaka?

⁹ Komo timotasojkamatij no semi techpaleuia keman tikpiaj uejueyi kuejmolmej. Kemansa, amo tikmatij toni tikchiuaskej ijkuak ijsiujka mopata tein tikpanouaj itech tonemilis. Xa tonamik techkajkayauak iuan okse, tikokolispeujkej, momikilij aksa akin tiktasojtayaj oso techijtakoj se tetsauit. Komo titanemiliaj itech nochi tein kuali tein Jiova techmaka, tiyolseuiskej uan techpaleuis maj tikxikokan kuejmolmej. Maj tikitakan keniuj nejin kinpaleuiani seki tokniuan.

10. ¿Keniuj Irina kipaleuiani ijkuak kinemilia keniuj kitiochiuani Jiova?

¹⁰ Irina * nemi Estados Unidos uan kichiua tekit kemej precursor regular. Itakauj, akin katka tayekankej, kikajkayauak iuan okse uan kinkaujteuak yejua uan ikoneuan. ¿Toni kipaleuia maj kisentoka kitekitili Jiova? Yejua kijtoua: “Nimotasojkamati porin Jiova nechyekpia uan noka motekipachoua. Ijkuak mojmostaj niknemilia keniuj nechtiochiua, nikita ke se ueyi tatiochiualis maj nikpia Dios kemej noTajtsin akin nechixmati uan nechyekpia. Nikmati ke amo keman nechkauas”. Irina kipiani uejueyi kuejmolmej. Sayoj ke kemej kiita tein kuali tein kipia, kipaleuiani maj taxiko uan no maj kinyolchikaua oksekin.

11. ¿Toni kipaleuiani se tokniuj siuat akin nemi Asia maj kixiko se ueyi kokolis?

¹¹ Kyung-sook, akin nemi Asia, kiuikaya panoua 20 xiujmej kemej precursor iuan itakauj. Sayoj ke se tonal, tapajtianij kiluijkej ke kipiaya cáncer itech ipulmón tein semi chikauak uan ke sayoj nemiskia eyi oso chikuasen metsti. Maski tokniuj uan itakauj achto kipiakaj okseki kuejmolmej,  amo keman kipiayaj se kokolis kemej nejon. Tokniuj siuat kijtoua: “Semi nechijtakoj keman nikmatik ke nikpiaya nejon kokolis. Nikmachilij ke nikpoloj nochi uan nimotelmoujtij”. ¿Toni kipaleuiani maj taxiko? Nochipa keman tayoua, achto ke kochitiuj, tejko kalkuako kichiuati netataujtil. Kitasojkamatilia Jiova ika tajtol chikauak makuil taman tein kuali tein kipanok nejon tonal. Nejin kiyolseuia uan kiolinia maj kisentoka kinextili Jiova ke kitasojta. Nejon netataujtilmej tein kichiua kipaleuiani maj kiita ke yejuatsin nochipa techpaleuia keman tikpiaj ouijkayomej uan ke itech tonemilis nochipa tikpiaj okachi miak taman tein kuali ke tein amo kuali.

12. ¿Toni kipaleuij Jason maj kixiko tayokol satepan ke momikilij inamik?

¹² Jason, akin tekiti itech se sucursal tein kipiaj itaixpantijkauan Jiova ompa África, panoua 30 xiujmej miakkan kitekitiliani Dios. Sayoj ke inamik kipiak cáncer uan momikilij chikome xiuit achtoya. Semi kitayokoltiaya ijkuak kinemiliaya keniuj tajyouij inamik. ¿Toni kipaleuiani maj kixiko nejon tayokol? Se tonal kielnamikik se taman tein kipanokej kemej namikuanij tein semi kinyolpaktij uan kitasojkamatilij Jiova nejon. Semi kiyolseuij uan yejua ika peuak kitasojkamatilia Jiova nejon tein kielnamikia tein semi kinyolpaktiaya. Tokniuj kijtoua ke ijkuak motasojkamati kipaleuia maj kipia se kuali tanemilil. Semi kitayokoltiaok maj amo nemiok inamik, sayoj ke axkan okachi kuali momachilia. Semi kipaleuiani maj kitasojkamatili Jiova maj tel yolpakini iuan inamik uan maj kikauani maj iuan kitekitiliani akin kiteltasojtaya yejuatsin.

13. ¿Toni kipaleuia Sheryl maj amo yolkualani?

¹³ Sheryl kipiaya sayoj 13 xiujmej keman kiouaejekat Haiyan tauejueloj itech seki xolalmej tein pouij Filipinas itamian xiuit 2013. Keman panok  kiouaejekat kipoloj ichan. Uan no, momikilij ipopaj, imomaj uan eyi iikniuan. ¿Toni kipaleuia Sheryl maj amo yolkualani? Yejua tanemilia itech nochi taman tein kuali tein kipia, uan nejon kiolinia maj kitasojkamatili Dios. Kiitak ke tokniuan takamej uan siuamej kinpaleuiayaj uan kinyolchikauayaj akin tajyouijtoyaj. Kimatia ke tokniuan akin moajsij noyampa taltikpak no kitataujtiayaj Dios maj kipaleuiani yejua. Sheryl kijtoua: “Niktasojkamati maj Jiova nouan moajsi. Yejuatsin nochipa techmaka tein techpoloua”. Kemej tikitaj, ijkuak tiktasojkamatij nochi tein kuali tein tikpiaj, amo tiyolkualanij. Uan no, ueli tikxikouaj tein yeski kuejmol tein tikpiaskej (Efes. 5:20; xikonixtajtolti Filipenses 4:6, 7).

14. ¿Toni motenkaua Jiova ke kichiuas? (Xikonita taixkopin ipeujyan tamachtilis.)

¹⁴ Itekitikauan Jiova nochipa kitasojkamatilianij yejuatsin porin kinpaleuiani. Kemej neskayot, ijkuak Jiova kiixpoloj akin tekiuajtia Egipto itech ueyiat Chichiltik uan ijkon kinmakixtij israelitas, yejuan kitasojkamatilijkej ika se nekuikatil (Éx. 15:1-21). Itech totonaluan, Dios motenkaua ke kichiuas se taman tein kualtsin. Kijtoua ke amo uejkaua kitamis nochi tein techtajyouiltia (Sal. 37:9-11; Is. 25:8; 33:24). Maj timonemilikan keniuj timomachiliskej ijkuak Dios kinixpolos nochin akin kitauelitaj uan tejuan tinemiskej itech yankuik taltikpak kampa onkas melaujkayot uan yolseuilis. ¿Melauj ke tiknekiskej tiktasojkamatiliskej Jiova? (Apoc. 20:1-3; 21:3, 4.)

15. ¿Toni tiknekij tikchiuaskej itech xiuit 2015?

¹⁵ Tikyekmatij ke tikseliskej kualtsitsin tatiochiualismej itech xiuit 2015. Sayoj ke xa tikpiaskej kuejmolmej. Maski ijkon, tikmatij ke Jiova amo keman techkauas (Deut. 31:8; Sal. 9:9, 10). Yejuatsin kisentokas techmakas tein techpaleuis maj amo tikauakan. Yejua ika maj tikchiuakan kemej tanauatijkej Habacuc. Yejua kijtoj ke maski kipiaskia tepitsin tein kimajseuas uan kipiaskia uejueyi kuejmolmej, yolpakiskia porin kipiaya inepaleuil Jiova (Hab. 3:17, 18). Itech xiuit 2015 maj titanemilikan itech nochi tein kuali tein Dios techmaka uan maj tikchiuakan tein techyolmajxitia texto tein mokuis nejin xiuit: “Xiktasojkamatilikan Jiova, porin yejuatsin yolkuali” (Sal. 106:1).