1-3. ¿Toni kuejmolmej kipanouaj namikuanij? (Xikonita taixkopimej ipeujyan tamachtilis.)

SE TOKNIUJ takat akin kiuika 38 xiujmej namikej kijtoua: “Komo yekmelauj se mochikaua uan se kinextia ke se kineki maj kuali se yeto iuan se inamik, Jiova tepaleuia”. Moyekita ke namikuanij uelis yolpakiskej maski kipanoskej ouijkayomej (Prov. 18:22).

² Nochin namikuanij kipiaj kuejmolmej, oso kemej kijtoua Biblia, “ouijkayot tech ninnemilispan” (1 Cor. 7:28). Kemej neskayot, tein mojmostaj kipanouaj uelis kichiuas maj motekipachokan. Kemansa, takat uan siuat tekitij uan no moneki kiniskaltiskej ininkoneuan. Nochin omen tajtakouanij uan kemansa moiluiaj tein kinyolxokolia. Oso kemansa amo moajsikamatij uan kipiaj kuejmolmej (Sant. 3:2, 5, 8). Kipiaj miak taman tein moneki kichiuaskej uan tel sioujtokej, yejua ika amo uelijok kichiuaj tein kinpaleuis maj kuali mouikakan. Uan no, ijkuak amo kinajsi tomin, kipiaj se kokolis oso okseki taman uelis kichiuas maj yolik kaxantiuj netasojtalis uan poujkaitalis tein mopialiaj. Biblia no ika tajtoua  “totanejnekilis ten kuika tajtakol”. Nejin yejua kemej ijkuak akin kipia inamik moteka iuan okse, keman takat moteka iuan okse takat oso se siuat iuan okse siuat, senkis amo kipoujkaitaj itanauatiluan Jiova, tanajnankiliaj, moteuiaj, monexikoluiaj, mokualantiaj uan motajtolteuiaj (Gál. 5:19-21). Komo namikuanij kichiuaj seki taman kemej nejin uelis kintelijtakos maski moita ke kuali moajsij.

³ Uan amo sayoj nejon, ta itech nejin itamian tonalmej tel miakej sayoj yejuan motasojtaj uan amo kipoujkaitaj Dios (2 Tim. 3:1-4). Nejin uelis kintelijtakos namikuanij. Uan no, Amokuali kineki kinxelos namikuanij. Tatitanil Pedro tanejmachtij: “Satanás namechtauelitstinemi, uan yejua ne tsajtsitinemi uan namechyeualojtinemi keme yeskia se kuoutajtekuani ten kitemo[j]tinemi akoni kixi[j]xikos” (1 Ped. 5:8; Apoc. 12:12).

4. ¿Keniuj namikuanij uelis kiyektaliskej kuejmolmej uan yolpakiskej?

⁴ Se tokniuj takat kayot Japón kijtoua ke yejua uan inamik kemansa motajtolteuiayaj porin amo kuali momachiliayaj. Yejua motekipachojtoya porin amo kinajsia tomin, sayoj ke amo kiluiaya inamik. Inamik kiitaya nejon uan no motekipachouaya. Uan no, tepitsin achto kokolispeujka. Kemej tikitaj, namikuanij kipiaskej kuejmolmej. Maski ijkon, uelis kiyektaliskej uan yolpakiskej. ¿Keniuj? Ika inepaleuil Jiova (xikonixtajtolti Salmo 127:1). Itech nejin tamachtilis tikitatij makuil taman tein kinpaleuia namikuanij maj kuali mouikakan uan maj yolpakikan. No tikitaskej keniuj tapaleuia netasojtalis.

5, 6. ¿Toni moneki kichiuas takat uan inamik uan ijkon Jiova uelis kinyekanas?

⁵ Komo takat uan siuat kinekij kuali mouikaskej uan yolpakiskej moneki kitasojtaskej uan kitakamatiskej Jiova. Biblia kijtoua ke yejuatsin moneki moajsis iniuan kemej namikuanij (xikonixtajtolti  Eclesiastés 4:12). Nejon panos komo kichiuaj kemej Jiova tayolmajxitia. Isaías 30:20, 21 kimelaua ke Dios techyekana uan techiluia keniuj timonejnemiltiskej. Uan namikuanij kikauaj maj Jiova kinyekana keman kisenixtajtoltiaj Biblia (Sal. 1:1-3). Moneki maj nochipa mosenmachtikan tein kinyolchikauas, uan mojmostaj maj kisenchiuakan netataujtil. Nejon kinpaleuia maj kuali mouikakan kemej namikuanij uan kimatij keniuj kiixnamikiskej tayejyekolis tein onkak nikan taltikpak kampa taixyekantok Satanás.

⁶ Maj tikitakan tein kichiua se tokniuj takat kayot Alemania. Kijtoua ke nochipa keman yejua uan inamik kipiaj se kuejmol oso amo moajsikamatij, kichiuaj kemej Biblia tayolmajxitia. Nejon kinpaleuiani maj amo yolijsiuikan uan maj okachi motapojpoluikan. Yejua kijtoua ke nejin ome taman kintelpaleuia namikuanij maj kuali yetokan. Ijkuak takat uan inamik mochikauaj maj Dios moajsi iniuan, okachi kuali mouikaj kemej namikuanij.

7. ¿Keniuj takat moneki mouikas iuan inamik?

⁷ Namikuanij no kinpaleuia maj okachi kuali mouikakan uan maj yolpakikan komo takat kuali mouika iuan inamik. Biblia kijtoua: “Cristo Yejuatsin kinyekantinemi itaneltokakauan. Uan [...] teyokich, yejua ne kiyekantinemi isiuau” (1 Cor. 11:3). Nejin kijtosneki ke takat moneki mouikas iuan inamik ijkon kemej Cristo kichiuak iniuan imomachtijkauan. Yejua amo keman ininka mauiltij nion kinchikaujkanojnotsak. Nochipa kinextij ke katka tetasojtakej, yolkuali, teajsikamatia uan yolyemanik (Mat. 11:28-30).

8. ¿Toni moneki kichiuas takat uan ijkon inamik kitasojtas uan kipoujkaitas?

⁸ Takat akin kichiua kemej Cristo amo kitajtania inamik maj kipoujkaita, ta ‘kimouiskapia isiuauj porin yejua okachi amo kipia chikaualis’ (1 Ped. 3:7). Nejin kijtosneki ke nochipa kuali mouika iuan inamik. No kinojnotsa ika poujkaitalis uan mouika iuan ika teiknelilis keman yetokej ininselti uan no keman moajsij iniuan oksekin. Ijkon kinextia ke tel kuali kiita inamik (Prov. 31:28). Keman takat mouika ika netasojtalis iuan inamik, yejua kitasojta uan kipoujkaita itakauj, uan Jiova kintiochiua kemej namikuanij.

9. ¿Keniuj kinextia siuat namikej ke kipoujkaita tanauatil tein kipia Jiova?

⁹ Komo yekmelauj tiktasojtaj Jiova, tiknextiskej yolyemanilis, tikitaskej ke yejuatsin okachi ueyichiujkej uan tiktakamatiskej (1 Ped. 5:6). Dios kinnauatia siuamej: “Moneki ximotekauilikan ma namechyekanakan namoyokichuan” (Col. 3:18). Komo siuat kineki kinextis ke kipoujkaita tanauatil tein kipia Jiova, moneki kipaleuis itakauj. Kemansa xa amo kiyolpaktis tein yejua kiixtalia maj mochiua. Sayoj ke komo tein moixtalia mochiuas amo kitapanauilia itanauatiluan Dios, moneki kipaleuis itakauj (1 Ped. 3:1).

10. ¿Keyej motelneki maj siuat kipoujkaita tein itakauj kiixtalis maj mochiua?

¹⁰ Dios kimaka siuat se tekit tein kuali uan tein motelneki. Yejua uan itakauj mosenpaleuiaj (Mal. 2:14). Yejua ika, keman moixtalia toni kichiuaskej kemej kalyetouanij, siuat uelis kijtos ika poujkaitalis  tein kinemilia uan tein kimachilia. Sayoj ke satepan keman monojnotsaj, kipoujkaita tein itakauj kiixtalia maj mochiua. Kemaj, se takat tamatkej kikaki inamik (Prov. 31:10-31). Komo siuat kitasojta uan kipaleuia itakauj, nochin kalyetouanij kinualkuilia tein kuali. Nochin yolpakij uan kuali mouikaj. Uan no, namikuanij okachi yolpakij porin kimatij ke Dios kiyolpaktia tein kichiuaj (Efes. 5:22).

11. ¿Keyej namikuanij moneki motapojpoluiskej?

¹¹ Namikuanij no kinpaleuia maj okachi kuali mouikakan komo motapojpoluiaj. Biblia techiluia maj tikintapojpoluikan oksekin (Col. 3:13, TNM). Komo namikuanij amo moelkauiliaj tein amo kuali tein kichiujkej uan satepan oksepa kielnamikij keman mokualantiaj, yolik peuaj mouejkatiliaj. Ijkuak moyolxokolijtokej uan kualantokej tamati kemej se tepankali tein kipolojtiuj chikaualis porin ixtajtapani. Nejon kichiua maj okachi ouij motapojpoluikan uan maj amo kisentokakan sentekitikan. Okachi kuali maj mochikauakan motapojpoluiskej, kemej Jiova kintapojpoluia yejuan. Ijkon okachi kuali mouikaskej (Miq. 7:18, 19).

12. ¿Keniuj netasojtalis techpaleuia maj ‘okachi ueli tiktapojpoluikan’ aksa?

¹² Komo yekmelauj tiktasojtaj aksa, amo tikelnamikiskej tein amo kuali tein techchiuilis, ta netasojtalis techpaleuis maj ‘okachi ueli tiktapojpoluikan’ (1 Cor. 13:4, 5; xikonixtajtolti 1 Pedro 4:8). Nejin kijtosneki ke nochipa moneki titetapojpoluiskej. Se tonal, tatitanil Pedro kitajtanij Jesús kanachpa monekia kintapojpoluis oksekin. Yejua kinankilij: “Xiktapojpolui miakpa, uan amo xikpoua kanachpa tiktapojpoluis mokniu” (Mat. 18:21, 22). Jesús kijtosnekia ke nochipa moneki titetapojpoluiskej (Prov. 10:12). *

13. ¿Toni uelis kinpaleuis namikuanij maj motapojpoluikan?

¹³ Se tokniuj siuat kayot Alemania akin itokay Annette kimelaua keyej motelneki maj se tetapojpolui. Kijtoua ke keman namikuanij amo motapojpoluiaj, amo moelkauiliaj tein amo kuali tein kichiujkej uan amo takuaujtamatijok se iuan okse. Nejin semi kinijtakoua namikuanij. Sayoj ke komo motapojpoluiaj, okachi kuali mouikaj. ¿Toni uelis kinpaleuis maj motapojpoluikan? Moneki maj nochin omen motasojkamatikan. Sejse moneki kitemos tein kuali tein kichiua okse uan kimatiltis (Col. 3:15). Komo mochikauaj motapojpoluiskej, amo kinkuejmolos inintanemilil, okachi kuali mouikaskej uan kimatiskej ke Jiova kiyolpaktia tein kichiuaj (Rom. 14:19).

14, 15. 1) ¿Toni Jesús tamachtij tein motelixmati? 2) ¿Keniuj kinpaleuia namikuanij komo kitojtokaj nejin tamachtilis?

¹⁴ Tinochin tiknekij maj techpoujkaitakan. Tikuelitaj maj techkakikan uan maj kiajsikamatikan keniuj timomachiliaj. Maski ijkon, tinochin tikakinij maj aksa kijto: “No ijkon nikchiuiliti kemej kichiuak nouan”. Kemansa tikajsikamatij keyej sekin ijkon kijtouaj. Sayoj ke Biblia  techiluia: “Amo xikijto: ‘Nikchiuiliti ijkon kemej yejua nechchiuilij’” (Prov. 24:29). Komo ijkon, ¿keniuj uelis okachi kuali tikmelauaskej se kuejmol? Jesús kijtoj: “Xikinchiuilikan mopueblojkauan ijkon keme no namejuan nankinekiske ke yejuan ma namechchiuilikan” (Luc. 6:31). Ika nejin tamachtilis tein motelixmati, Jesús kinextijtoya ke moneki tikinchiuiliskej oksekin kemej tiknekij maj techchiuilikan, uan amo kemej yejuan techchiuiliaj. ¿Keniuj nejin tamachtilis uelis kikuiskej namikuanij? Sejse moneki mouikas iuan inamik kemej kineki maj iuan mouika.

¹⁵ Komo sejse mochikaua amo kiyolxokolis inamik, okachi kuali mouikaj kemej namikuanij. Se tokniuj takat kayot Sudáfrica kijtoua ke yejua uan inamik nochipa mochikauaj kichiuaskej tein Jesús tamachtij. Yejua kijtoua: “Kemansa timokualantiaj, sayoj ke tisejsemej timochikauaj timopoujkaitaskej ijkon kemej tiknekij maj techitakan”.

16. ¿Toni amo kuali yetok maj kichiuakan namikuanij?

¹⁶ Amo kuali yetok maj namikuanij kintapouikan oksekin tein amo kuali tein kichiua inamik, nion maj ininixpan oksekin kijto toni amo kiuelita tein kichiua inamik, maski sayoj kikamanalijtos. Namikuanij amo kitemouaj kiitaskej akoni okachi chikauak, akoni okachi tetsatsajtsilia oso akoni okachi ueli teyolxokolia. Maski tikmatij ke tinochin titajtakouanij uan kemansa tikijtouaj oso tikchiuaj tein oksekin kinkuejmoloua, amo kuali yetok maj namikuanij mopinaujtikan oso moiluikan tein kinyolxokolis. Uan okachiok amo kuali yeskia komo motopeuaj oso moteuiaj (xikonixtajtolti Proverbios 17:27 uan 31:26).

17. Komo se takat kichiua kemej Jesús tamachtij, ¿toni amo keman kichiuas?

¹⁷ Itech seki uejueyi altepemej, taltikpakneminij kinemiliaj ke se yekmelauj takat yejua akin kitsajtsilia uan kiteuia inamik. Sayoj ke amo yejua nejon tamachtia Biblia, ta kinextia ke takat akin amo ijsiujka kualani okachi kuali ke se takat akin tel chikauak. Uan no kijtoua ke akin mochikaua amo niman kualanis okachi kuali ke takat akin ueli kitani se altepet (Prov. 16:32). Moneki maj se motelchikaua uan ijkon uelis amo niman se kualanis uan amo se kiteuis aksa. Jesucristo, takat akin kikauak okachi kuali neskayot, nochipa mochikauak amo niman kualanis. Tekiuaj David no kinextij chikaualis uan yolchikaualis. Yejua kijtoj: “Xikualanikan, sayoj ke amo xitajtakokan. Ximoyoliluikan tein nankinekiskej, kampa nankochij, uan amo xikakistikan” (Sal. 4:4). Yejua ika, komo takat kiteuia inamik kinextia ke amo chikauak, ta amo ueli kitsakuilia ijkuak yolkualani. Uan Jiova amo kuali mouika iniuan takamej kemej yejuan.

18. ¿Keyej moneki maj namikuanij motasojtakan?

¹⁸ (Xikonixtajtolti 1 Corintios 13:4-7.) Moneki maj namikuanij kinextikan ke teikneliaj, kualtakamej, yolyemankej, yolkualmej, uan amo yolijsiuij. Sayoj ke Biblia kijtoua toni okachi moneki  kinextiskej: “Ximotakentikan ika ne tetasojtalis kachi ok. Porin ne tetasojtalis techsepanpoualtia se uan okse” (Col. 3:12, 14). Motelneki maj namikuanij kinextikan netasojtalis. Jesús kinteltasojtaya taltikpakneminij hasta ininka motemakak. No yejua nejon moneki kinextiskej namikuanij. Ijkon uelis kisentokaskej kuali mouikaskej maski kichiuaskej seki taman tein kinkuejmolos, ueyi kokolispeuaskej, amo kinajsis tomin oso kipiaskej ouijkayomej iniuan ichankauan inamik.

19, 20. 1) ¿Toni moneki kichiuaskej namikuanij tein kinpaleuis maj kuali mouikakan uan maj yolpakikan? 2) ¿Toni tikitaskej itech okse tamachtilis?

¹⁹ Komo namikuanij kinekij kuali mouikaskej uan yolpakiskej, moneki motasojtaskej, amo mokauaskej uan mochikauaskej maj kuali moajsikan. Komo kipiaj kuejmolmej, moneki amo mosenkauaskej nion mokakauaskej, ta maj okachi kuali mouikakan. Keman nochin omen kitasojtaj Jiova uan motasojtaj se iuan okse, mochikauaj kimelauaskej kuejmolmej. ¿Keyej? Porin “tetasojtalis, yejua ne amo keman tamis” (1 Cor. 13:8; Mat. 19:5, 6; Heb. 13:4).

²⁰ Itech nejin itamian tonalmej kemansa ouij maj namikuanij kuali mouikakan uan maj yolpakikan (2 Tim. 3:1). Sayoj ke timomachtijkej ke uelis yolpakiskej ika inepaleuil Jiova. Maski ijkon, namikuanij moneki moyekpiaskej. Kemej neskayot, nikan taltikpak miakej sayoj kinyolnotsa nochi tataman auilnemilis. Itech okse tamachtilis tikitaskej toni uelis kichiuaskej takat uan siuat tein kinpaleuis maj kisentokakan kuali mouikakan.