1, 2. 1) ¿Toni moneki tikchiuaskej komo tiknekij tinemiskej nochipaya? 2) ¿Toni techpaleuis maj amo tikauakan Jiova hasta keman ejkos tamilis?

SE MOCHIUAS se itatojtokakauj Cristo tamati kemej ijkuak peua tinejnemij itech se ojti. Nejin ojti teajxitia itech nemilis nochipaya. Jesús kijtoj: “Akin taxikos hasta ijkuak ejkos tamilis yejua akin makisas” (Mat. 24:13, TNM). ¿Toni moneki tikchiuaskej komo tiknekij tinemiskej nochipaya? Moneki amo tikauaskej Jiova hasta keman timomikiliskej oso hasta keman tamis tein amo kuali tein mochiujtok nikan taltikpak. Sayoj ke onkak seki taman tein uelis techtapololtis uan kichiuas maj tikauakan Jiova (1 Juan 2:15-17). ¿Toni techpaleuis maj amo tikauakan Jiova hasta keman ejkos tamilis?

² Moneki tikchiuaskej kemej Jesús kichiuak. Biblia techmachtia keniuj katka yejua. Komo timomachtiaj keniuj tamati Jesús, tiktasojtaskej uan iuan titakuaujtamatiskej (xikonixtajtolti 1 Pedro 1:8, 9). Tatitanil Pedro kijtoj maj  tiktojtokakan ineskayo Jesús ika miak nejmachkayot (1 Ped. 2:21, TNM). Ijkon uelis titaxikoskej hasta keman ejkos tamilis. * Tamachtilis tein achto tikitakej technextilij keniuj timochiuaskej tiyolyemankej uan titeyolikneliskej kemej Jesús. Itech nejin tamachtilis tikitaskej keniuj timochiuaskej tiyolchikaujkej uan kuali titaixpejpenaskej kemej yejua.

3. 1) ¿Toni kijtosneki maj se yolchikauak? 2) ¿Toni techpaleuis maj tiyolchikaujkej?

³ Maj se yolchikauak kijtosneki ke se chikauak uan se taxikoua keman se kipanoua ouijkayomej. No kijtosneki se kipaleuis tein kuali, uan se yolseujtos uan amo se kikauas Dios keman se kipia kuejmolmej. Kemej tiyolchikaujkej uan amo tiknekij tikyolkokoskej Dios, amo tikauaj maj moujkayot techijtako (1 Sam. 11:7; Prov. 29:25). Komo tiyolchikaujkej uan titakuaujtamatij ke Jiova kichiuas tein motenkaua, titanemiliskej itech kualtsin nemilis tein tikpiaskej satepan uan amo itech kuejmolmej tein tikpanouaj (Sal. 27:14). Uan komo tiyolchikaujkej uan tikintasojtaj oksekin, tikinpaleuiskej maski uelis tikpoloskej tonemilis (Juan 15:13). ¿Toni techpaleuis maj tiyolchikaujkej? Komo titakuaujtamatij iuan Jiova uan tikchiuaj kemej Jesús (Sal. 28:7).

4. ¿Keniuj kinextij Jesús itech templo ke katka yolchikauak? (Xikonita taixkopin ipeujyan tamachtilis.)

⁴ Se tonal, Jesús kinextij yolchikaualis keman tokotsyetoya itech templo tatajko kampa moajsiaj tamachtianij itech taneltokalis (xikonixtajtolti Lucas 2:41-47). Yejua yekin kipiaya 12 xiujmej, uan nejon tamachtianij kitelixmatiaj Tanauatil tein kiselij Moisés. No kitelixmatiaj inintamachtilis judíos, tein kichiuaya maj oksekin kinouijmakani kitakamatiskej Tanauatil. Sayoj ke Jesús amo kinmouiliaya tamachtianij itech taneltokalis. Yejua ika kinchiuilij miak netajtanilmej. Sayoj ke amo katkaj netajtanilmej tein kichiuaskiaj okseki okichpipil. Moajsikamati ke katkaj netajtanilmej tein kintanemililtiaya tamachtianij uan kichiuaya maj kuali kikakinij Jesús. Xa tamachtianij kichiuilijkej netajtanilmej tein taoliniskia maj motajtolteuianij, sayoj ke amo uelkej. Akin kikakkej Jesús, hasta tamachtianij, kitelmoujkaitayaj keniuj kimatia miak taman uan keniuj tajtouaya. Jesús katka yolchikauak uan kipaleuij tamachtilis tein melauak.

5. ¿Keniuj kinextij Jesús ke katka yolchikauak keman tanojnotsaya?

⁵ Jesús ika miak taman kinextij ke katka yolchikauak keman tanojnotsaya. Kemej neskayot, amo mouik kiniluis taltikpakneminij ke tamachtianij itech taneltokalis kinmachtijtoyaj tein amo melauak (Mat. 23:13-36). Amo no kikauak maj taltikpakneminij kichiualtianij maj amo kitakamatini Dios (Juan 16:33). Kisentokak tanojnotsak maski kitemouayaj kimiktiskej (Juan 5:15-18; 7:14). Uan no, ojpa kinkixtij itech templo tanamakanij akin ompa motomintijtoyaj (Mat. 21:12, 13; Juan 2:14-17).

6. ¿Keniuj Jesús kinextij yolchikaualis itech tonal keman tamiskia inemilis nikan taltikpak?

⁶ Maj tikitakan keniuj Jesús kinextij yolchikaualis itech tonal keman tamiskia  inemilis nikan taltikpak. Yejua kimatia toni kichiuiliskiaj keman Judas kitemaktiskia. Maski ijkon, kiluij: “Nochi ten tikyolnemilijtok tikchiuas, yejua ne niman xiyo xikchiuati ya” (Juan 13:21-27). Keman tateuianij kikitskitoj, Jesús amo motatij. Maski kimatia ke kipoloskia inemilis, motemakak uan kiniluij tateuianij maj kinkauanij imomachtijkauan (Juan 18:1-8). Keman okachi uejueyi tamelauanij judíos kichiuilijkej netajtanilmej, yejua kinextij yolchikaualis uan kiniluij ke katka Cristo uan iKonetsin Dios. Tayekankatiopixkat kitemojtoya kiajxilis se taman tein kinextiskia ke kinamiki maj miki, sayoj ke Jesús amo momoujtij (Mar. 14:60-65). Yejua amo keman kikauak Dios hasta keman kimiktijkej. Yejua ika, keman yaya momikilitiya, kijtoj: “Nochi notekiuan niktamichiuak ya axkan” (Juan 19:28-30).

7. 1) Telpoch oso ichpoch ¿keniuj timomachilia porin tiitaixpantijkauj Jiova? 2) ¿Keniuj uelis tiknextis ke tiyolchikauak?

⁷ ¿Keniuj tokniuan telpochmej uan ichpochmej uelis kinextiskej yolchikaualis kemej Jesús itech kaltamachtiloyan? Miakej kiniluiaj akin iniuan momachtiaj uan tamachtianij ke yejuan itaixpantijkauan Jiova. Komo tejua titelpoch oso tiichpoch, uelis tiknextis yolchikaualis komo tikijtoua ke tiitaixpantijkauj Jiova maski kampa timomachtia mitskejkeloskej. Ijkon tiknextis ke mitsmaka pakilis timoteixmatiltis kemej itaixpantijkauj Jiova (xikonixtajtolti Salmo 86:12). Uan no, xa seki tamachtianij kinekiskej xikneltoka ke nemilis iselti peuak. Sayoj ke uelis titakuaujtamatis ke Biblia nochipa kijtoua tein melauak. Komo aksa mitstajtania keyej tikneltoka ke moajsi akin tachijchiuak, uelis tiknankilis ika folleto El origen de la vida (1 Ped. 3:15). Ijkon kuali timomachilis porin tikpaleuij ika yolchikaualis tein kijtoua Biblia.

8. ¿Keyej uelis tiknextiskej yolchikaualis keman titanojnotsaj?

⁸ No tiknextiaj ke tiyolchikaujkej keman titanojnotsaj (Hech. 14:3). ¿Keyej uelis tiknextiskej yolchikaualis keman tikchiuaj nejin tekit? Yekinika, porin titetapouiaj tein tamachtia Biblia. Uan Biblia kijtoua tein melauak (Juan 17:17). Ojpatika, porin “iuan titekitij Dios”, uan yejuatsin techpaleuia ika iespíritu (1 Cor. 3:9, TNM; Hech. 4:31). Uan expatika, porin tiktasojtaj Jiova uan taltikpakneminij. Nejon techolinia maj titanojnotsakan nochi tein tiueliskej (Mat. 22:37-39). Kemej tiyolchikaujkej, tiksentokaj titanojnotsaj. Tikixtalijtokej tikinmachtiskej tein melauak akin tamachtianij itech taneltokalis kinkajkayauanij (2 Cor. 4:4). Tiksentokaskej titanojnotsaskej maski amo kinekiskej techkakiskej uan hasta techtajyouiltiskej (1 Tes. 2:1, 2).

9. ¿Keniuj uelis tiknextiskej ke tiyolchikaujkej ijkuak tikpiaj ouijkayomej?

⁹ No uelis tiknextiskej ke tiyolchikaujkej keman tikpanouaj ouijkayomej. Komo titakuaujtamatij iuan Jiova, yejuatsin techmaka yolchikaualis uan takuaujtamatilis tein techpaleuia maj titaxikokan. Kemej neskayot, komo momikilia se akin tiktasojtayaj, titayokoyaj, sayoj ke tiksentokaj titakuaujtamatij ke oksepa tikitaskej. Tikmatij ke Jiova techmakas chikaualis, porin yejuatsin Dios akin teyolseuia (2 Cor. 1:3, 4; 1 Tes. 4:13). Komo tikpiaj se kokolis,  uan maski semi techtajyouiltia, amo tikseliaj nion se taman tapajtilis tein kitapanauilia itanauatiluan Dios (Hech. 15:28, 29). Oso komo timoteltayokoltiaj, xa toyolo techtajtakoltis teisa, sayoj ke amo timosenkauaj. Tikmatij ke Jiova nochipa kinpaleuia akin tajyouijtokej (Sal. 34:18; 1 Juan 3:19, 20). *

10. 1) ¿Toni moneki tikchiuaskej tein techpaleuis maj kuali titaixpejpenakan? 2) Komo kuali titaixpejpenaj, ¿keniuj tiknextiskej ika tein tikijtouaj uan ika tein tikchiuaj?

¹⁰ Kuali se taixpejpenas kijtosneki se kiajsikamatis toni kuali uan toni amo kuali uan tikixpejpenaskej tein kuali (Prov. 15:21; Heb. 5:14). Komo kuali titaixpejpenaj, tiknextiskej ika tein tikijtoskej uan ika tein tikchiuaskej. ¿Keniuj? Keman kuali tikixpejpenaj tajtolmej tein tikijtoskej uan ijkon amo kinyolxokolis oksekin, ta kinpaleuis. Yejua nejon kineki Dios maj tikchiuakan (Prov. 11:12, 13). No tiknextiskej ke kuali titaixpejpenaj komo amo niman tikualanij (Prov. 14:29). Keman kuali titaixpejpenaj, okachi kuali timouikaj iuan Dios. ¿Toni uelis techpaleuis maj kuali titaixpejpenakan? Moneki timomachtiskej Biblia uan tikchiuaskej tein techiluia (Prov. 2:1-5, 10, 11). No techpaleuis komo timomachtiaj keniuj monejnemiltij Jesús uan tikchiuaskej kemej yejua.

11. ¿Keniuj Jesús kuali taixpejpenaya keman tajtouaya?

¹¹ Maj tikitakan eyi taman kemej Jesús kinextij ke kuali taixpejpenaya. Yekinika, kuali kiixpejpenaya tein kijtouaya. Keman tanojnotsaya, kualtsin tamachtiaya. Yejua ika miakej kimoujkakakiaj itamachtilis (Mat. 7:28; Luc. 4:22). Uan no, nochipa kiixtajtoltiaya uan ika tajtouaya tajkuilolmej tein kipia Biblia. Yejua kimatia katiyejua tajkuilolmej kikuiskia keman monekiskia (Mat. 4:4, 7, 10; 12:1-5; Luc. 4:16-21). Uan keman kimelauaya tajkuilolmej, ajsia itech ininyolo taltikpakneminij. Kemej neskayot, satepan ke Jesús moajokuik, monojnotsak iniuan imomachtijkauan keman yajtoyaj itech se xolal. Nejon tonal kinmelauilij tajkuilolmej tein ika tajtojkaj yejua. Nejon kintelyolchikauak, yejua ika kijtojkej: “Semi tiyolpaktiualayaj tech in ojti [...] kuak in Jesús technojnotstiualaya” (Luc. 24:27, 32).

12, 13. ¿Toni tein kichiuak Jesús kinextia ke amo niman kualania uan teajsikamatia?

¹² Ojpatika, Jesús kinextij ika itanemilil ke kuali taixpejpenaya. Yejua amo ijsiujka kualania (Prov. 16:32). Okachi kuali, mochikauaya motsakuilis uan katka yolnejmach (Mat. 11:29). Amo no yolijsiuia keman imomachtijkauan kipiayaj nepololmej (Mar. 14:34-38; Luc.  22:24-27). Uan hasta keman kitajyouiltijtoyaj kisentokak yolseujtoya (1 Ped. 2:23).

¹³ Jesús no teajsikamatia. Kemej neskayot, maj itech titanemilikan siuat akin “esmeyaya” (xikonixtajtolti Marcos 5:25-34). Yejua panotiyajki tatajko kampa moajsiaj miakej uan iikankopa Jesús kimatokilij itaken. Ijkon kemej kijtouaya Tanauatil, siuat monekia amo akin kimatokas (Lev. 15:25-27). Sayoj ke Jesús amo kiajuak. Yejua kimatia keyej Dios kitemakaka Tanauatil. Kimatia ke kualneskayomej kemej netasojtalis uan teiknelilis okachi monekiaj ke kitakamatis sejse taman tein kijtouaya Tanauatil (Mat. 23:23). Yejua ika Jesús kiluij: “Siuat, ika por nojon motakuautamatilis ten tikpia, tejua tipajtik ya. Uan axkan xiyo ya xiyolseutiu, uan ximokaua pajtik ya de ne tajyouilis”. ¡Tel kuali neskayot techkauilij!

14. 1) ¿Toni kiitaya Jesús ke okachi tayekantoya? 2) ¿Toni kiixpejpenak kichiuas Jesús tein kipaleuiskia maj kitayekanalti tanojnotsalis?

¹⁴ Expatika, Jesús kinextij ika tein kichiuaya ke kuali taixpejpenaya. Yejua kiitaya ke tanojnotsalis okachi tayekantoya itech inemilis (Luc. 4:43). Yejua ika kiixpejpenak kichiuas tein kipaleuiskia maj kitayekanalti nejon tekit. ¿Kemej toni kiixpejpenak kichiuas? Amo kitemoj kipias miak taman itech inemilis uan ijkon itonaluan uan ichikaualis ueliskia kikuis itech tanojnotsalis (Luc. 9:58). No kinnextilij imomachtijkauan keniuj kichiuaskiaj nejon tekit uan ijkon kisentokaskiaj tanojnotsaskiaj satepan ke momikiliskia (Luc. 10:1-12; Juan 14:12). Uan no, motenkauak iniuan ke kisentokaskia kinpaleuiskia hasta keman ejkoskia tamilis (Mat. 28:19, 20, TNM).

¹⁵ Kemej tikitakej achto, no uelis tikchiuaskej kemej Jesús komo kuali tikixpejpenaj tein tikijtouaj. Keman iniuan timonojnotsaj tokniuan, tikuij tajtolmej tein kinyolchikauas, amo tein kinyolxokolis (Efes. 4:29). Keman titanojnotsaj, moneki titajtoskej “ika ne iteiknelilis”,  oso ika poujkaitalis (Col. 4:6). Timochikauaj tikmatiskej toni kinpoloua uan toni kinyolnotsa taltikpakneminij uan ijkon ueli kuali tikixpejpenaj tein tikijtoskej. Komo tikuij kualtsitsin tajtolmej, taltikpakneminij xa techkakiskej uan tamachtilis ajsis itech ininyolo. Uan nochipa keman ueli, tikuij Biblia ijkuak tikmelauaj tein tikneltokaj. Ijkon tikchiuaj porin tein kijtoua Biblia okachi kipia chikaualis ke tein yeski tein uelis tikijtoskej (Heb. 4:12).

16, 17. 1) ¿Toni techpaleuis maj amo ijsiujka tikualanikan? 2) ¿Keniuj tiknextiaj ke titeajsikamatij? 3) ¿Toni techpaleuis maj tiktayekanaltikan tanojnotsalis?

¹⁶ No tiknextiaj ika totanemilil ke kuali titaixpejpenaj. ¿Keniuj? Komo timotsakuiliaj ijkuak tiyolkualanij. ¿Toni techpaleuis maj amo ijsiujka tikualanikan? (Sant. 1:19.) Keman aksa techiluia oso techchiuilia teisa tein techyolxokolia, maj timochikauakan tikajsikamatiskej keyej ijkon kichiuak. Nejon techpaleuis maj amo techtelouijmaka tiktapojpoluiskej (Prov. 19:11). No moneki tiknextiskej ke titeajsikamatij. ¿Keniuj? Komo amo tikchiaj maj nion keman mopolokan tokniuan. Maj tikelnamikikan ke yejuan uelis kipiaskej kuejmolmej tein amo senkis tikajsikamatiskej. No uelis tiknextiskej ke titeajsikamatij komo tikakij keman techiluiaj tein kinemiliaj. Moneki amo tiktelnekiskej maj nochipa mochiua teisa kemej tejuan tiknekij (Filip. 4:5).

¹⁷ Uan no tiknextiaj ika tein tikchiuaj ke kuali titaixpejpenaj. Tikitaj ke se ueyi tatiochiualis maj titanojnotsakan. ¿Toni techpaleuis maj tiktayekanaltikan tanojnotsalis? Komo tikitaj ke moneki tiktayekanaltiskej itekiyo Jiova itech tonemilis uan amo tiktemoskej tikpiaskej miak taman. Nejon techpaleuis maj totonaluan uan tochikaualis tikuikan itech tanojnotsalis achto ke ejkos tamilis (Mat. 6:33; 24:14, TNM).

18. ¿Toni moneki tikchiuaskej komo tiknekij tinemiskej nochipaya?

¹⁸ Semi techpaleuij maj tikitanij keniuj Jesús yolyemanik, teyoliknelijkej, yolchikauak uan kuali taixpejpena. Uan no ijkon techpaleuis komo tiksentokaj timomachtiaj okseki kualneskayomej tein kipia. Yejua ika, maj tiksentokakan tikchiuakan kemej Jesús kichiuak. Ijkon okachi timotokiskej iuan Jiova uan uelis tinemiskej nochipaya.