ITECH totonaluan, okachi tayekantok maj titetapouikan iTekiuajyo Dios. Keman titanojnotsaj, tikixnextiaj Jiova uan yejua nejon okachi ueyi tatiochiualis tein tikpiaj. Sayoj ke kemansa techouijmaka tikchiuaskej maj kisentoka techyolpakti titanojnotsaskej. ¿Keyej?

Seki tokniuan kinekij mosenkauaskej porin miakej amo yetokej kalijtik uan amo akin ueli kinojnotsaj. Uan ijkuak kemaj kinajsij, miakej amo kinekij kinkakiskej oso hasta kinixnamikij. Okseki tokniuan kipiaj miak xolalmej kampa moneki tanojnotsaskej uan kinajsij tel miakej akin kinekij kinkakiskej, sayoj ke kinekij mosenkauaskej porin kiitaj ke amo keman uelis kinnojnotsaskej nochin. Uan oksekin ijkon momachiliaj porin miak xiujmejya tanojnotsanij, sayoj ke kisentoka amo ejko tamilis.

Keman tikpanouaj seki taman kemej nejin uelis kichiuas maj amo techyolpaktiok titanojnotsaskej. Kemej tinemij itech nejin taltikpak kampa Satanás taixyekantok, tikmatij ke ouij tiksentokaskej titanojnotsaskej (1 Juan 5:19).

Xa tejuatsin no tikonpanoua okseki ouijkayomej itech tanojnotsalis. Sayoj ke uelis tikonyekmatis ke Jiova mitsonpaleuis. ¿Keniuj uelis tikonchiuas maj okachi mitsonyolpakti tiontanojnotsas? Maj tikitakan seki taman tein uelis tikonchiuas.

Nochi xiujmej tel miakej moauiaj uan mochiuaj itaixpantijkauan Jiova. Komo tejuatsin yankuixtok tionmoauij, uelis tikonitas keniuj tekitij akin uejkaujya moauijkej. Uan komo uejkaujya tionmoauij, uelis tikonmachtis akin yankuikej. Nejon mitsonpaleuis okachi xionyolpaki.

Jesús kimatia ke monekiskia maj imomachtijkauan kinpaleuianij maj mochiuanij kuali tamachtianij. Yejua ika kinnextilij keniuj tanojnotsaskej (Luc. 8:1). No ijkon axkan, akin yankuikej moneki  maj kinnextilikan keniuj mochiuaskej kuali tamachtianij.

¿Keniuj uelis tikinpaleuiskej akin yankuikej? Maj tikelnamikikan ke nion se tanojnotskej ueli mochiua kuali tamachtijkej sayoj komo youi tanojnotsati. Moneki maj se tokniuj akin uejkaujya tanojnotsani kinextili ika netasojtalis uan maj amo yolijsiui iuan. Komo tejuatsin uejkaujya tiontanojnotsani, yekinika xikonnextili tokniuj akin yankuik maj kiita keniuj peuas tajtos uan maj momamachti. Ojpatika, xikonnextili keniuj tajtos iniuan taltikpakneminij. Expatika, xikonnextili keniuj kitenextilis amaixmej. Naujpatika, xikonnextili keniuj uelis oksepa kinkalpanos akin kinekij kimatiskej okachi. Uan makuiltika, xikonnextili keniuj kipeualtis nemachtilmej ika Biblia. No monekis xikonilui toni kuali kichiuak uan xikonyolmajxiti kampa monekis (Ecl. 4:9, 10). Komo yankuik tanojnotskej kiita uan kichiua kemej tokniuj akin uejkaujya tanojnotsani, mochiuas se kuali tamachtijkej (Luc. 6:40). Uan kipaleuis maj amo yolmoui porin kimati ke aksa uelis kipaleuis keman monekis.

Maski tiktelnekiskej titajtoskej iuan aksa, kemansa amo ueli tiknojnotsaj nion akin. Yejua ika sayoj ueli titajtouaj iuan tokniuj akin iuan titekitij. ¿Mitsonpanouani nejon? Xikonelnamiki ke Jesús kintitanik imomachtijkauan “ojome” (Luc. 10:1). Ijkon ueliaj mopaleuiayaj uan ‘moyolmajxitiayajʼ oso moyolchikauayaj (Rom. 1:12).

¿Toni uelis ika nanmonojnotsaskej? Uelis tikontapouis teisa tein kuali tein tikonpanok itech tanojnotsalis, teisa tein tikonajsik itech monemachtil kemej kalyetouanij oso moselti, oso teisa tein tikonkakik itech se nechikol tein mitsonyolchikauak. ¿Uan komo tiontanojnotstok iuan se tokniuj akin amo tikonyekixmati? Uelis tikontajtanis keniuj kiixmatik Jiova, keyej kiyekneltoka ke moajsi itech taneltokalis tein melauak, kani kitekitiliani Dios oso toni tekimej kipiani. No uelis ika nantajtoskej teisa tein se tonal nansemej nankipanokej itech tanojnotsalis. Ijkon, maski amo uelis nion akin nankinojnotsaskej, nanomen uelis nanmoyolchikauaskej (1 Tes. 5:11).

Moneki xionmochikaua kuali tionmomachtis Biblia moselti nochi semanas uan ijkon kisentokas mitsonyolpaktis tanojnotsalis. Takeual takuaujtamach uan tamatkej kikixtiani miak taman tein uelis timomachtiskej tosejselti (Mat. 24:45). Kemej neskayot, uelis tikontemos keyej motelneki titanojnotsaskej. Seki taman moijtoua itech recuadro “ ¿Keyej motelneki titanojnotsaskej?”.

 Xikonixtajtolti tanemililmej tein kipia recuadro uan xikonnemili tein kijtosneki. Nejon mitsonpaleuis okachi xikonnejneki tiontanojnotsas. Uan no, xikontemo itech Biblia okseki taman keyej moneki maj titanojnotsakan. Komo tikonixtalia tiontanemilis itech nejon tein tikonajsi, okachi tionyolpakis itech tanojnotsalis.

Inechikol Jiova techyolchikaua maj amo sayoj titanojnotsakan kajkalpan, ta no onkak okseki taman kemej uelis titanojnotsaskej. Kemej neskayot, techiluia ke uelis tikijkuiloskej se amat, titanojnotsaskej ika teléfono, itech ojti, kampa miakej moajsij oso kampa tekitij. No uelis tikixtaliskej titapaleuitiuij kampa amo moajsij miakej tanojnotsanij oso nion se.

¿Tikonuelitaskia tiontanojnotsas kemej nikan moijtoua? Miakej tokniuan kichiuanij uan semi kuali tein mochiuani. Maj tikitakan eyi neskayomej.

Se tokniuj siuat kiitak itech amaix ITekiyo Dios tein Tikchiuaj se tamachtilis tein kinextiaya keniuj uelis titeiluiskej ke titemakaj nemachtilmej ika Biblia uan kinekik ijkon kichiuas. Yejua ika kiniluij eyi siuamej akin iniuan tekitia ox kiuelitaskiaj kiseliskej se nemachtil ika Biblia. Kimoujkaitak porin nochin eyin kiselijkej uan peujkej youij nechikolmej.

Inechikol Dios no techyolchikauani maj timotajtanikan akonimej kinyolnotsaskia tataman tamachtilis tein kiualkui revistas. Ompa Estados Unidos, se tokniuj takalpanojkej kiixtajtoltij se tamachtilis itech ¡Despertad! kampa ika tajtouaya llantas tein kikuij teposmej. Yejua ika kinemilij kinkauilis akin taixyekanayaj kampa kinamakaj  llantas tein ompakauin moajsiaj. Yejua uan inamik no kinemilijkej kikauaskej amaix tein kiualkuia tamachtilis “Los retos del médico de hoy” itech panoua 100 tapajtiloyamej. Tokniuj kijtoua ke nejon kinpaleuia taltikpakneminij maj okachi kiixmatikan tekit tein tikchiuaj uan amaixmej tein titemakaj. No kijtoua ke yejua uan inamik okachi kuali kinixmatij akin ompakauin nemij uan okachi uelij oksepa kinkalpanouaj akin kinekij kimatiskej okachi.

Okse tokniuj siuat kititanik se amat itech ueyi kali kampa techixyekanaj porin kinekia kitasojkamatis maj techyolchikauakan maj titanojnotsakan ika teléfono. Kijtoj ke imomaj kipiaya 86 xiujmej uan semi mokokouaya, yejua ika tanojnotsaya ika teléfono. Nejon kipaleuij maj uelini kimachtiani ika Biblia se siuat akin kipia 92 xiujmej.

Tein techyolmajxitiaj itech amaixmej keniuj titanojnotsaskej kemaj tapaleuiaj. Yejua ika xikontekitilti. Nejon mitsonpaleuis maj kisentoka mitsonyolpakti uan xikonuelita tiontanojnotsas.

¿Toni moneki tikchiuaskej uan ijkon kuali kisas totanojnotsalis? Sekin kinemiliaj ke moneki tikauaskej miak amaixmej, maj miakej tikinmachtikan ika Biblia, oso maj tikinpaleuikan miakej maj mochiuakan itaixpantijkauan Jiova. Sayoj ke nejon amo melauak. Xikonnemili tein kipanok Noé. ¿Tapaleuij itanojnotsalis? Kemaj. Sayoj ke ¿kanachin kinpaleuij maj mochiuanij itekitikauan Jiova? ¡Sayoj ichankauan! Nejin techmachtia ke okachi moneki maj amo tikauakan Jiova (1 Cor. 4:2).

Miakej tokniuan kiajsikamatij ke kinpaleuis maj kisentoka kinyolpakti tanojnotsalis komo kiixtaliaj kichiuaskej seki taman tein taixejekol. ¿Kemej toni? Tikonajsis seki neskayomej itech recuadro “ Xikonixtali tikonchiuas tein taixejekol”.

Xikontajtani Jiova maj mitsonpaleui maj mitsontelyolpakti tanojnotsalis. Keman tikonchiuas tein tikonixtalij, kuali tionmomachilis porin tikonchiujtok nochi tein tionueli.

Semi melauak ke kemansa techouijmakas titanojnotsaskej. Sayoj ke moajsi miak taman tein mitsonpaleuis xikonsentoka xionyolpaki. Iuan xionmonojnotsa tokniuj akin iuan tiontekiti. Xionmochikaua kuali tionmomachtis Biblia nochi semanas. Xikontekitilti tein techyolmajxitia takeual takuaujtamach. Xikonixtali tikonchiuas tein taixejekol. Uan tein okachi moneki, xikonelnamiki ke Jiova mitsonmakatok tatiochiualis xiontanojnotsa uan xionmochiua semej itaixpantijkauan (Is. 43:10). Yejua ika, komo kisentoka mitsonyolpaktia tanojnotsalis semi kuali tionmomachilis.