1, 2. 1) ¿Toni tataman tanojnots Jesús kintapouij itasojikniuan? (Xikonita taixkopin ipeujyan tamachtilis.) 2) ¿Keyej motelneki maj tikmatikan tein kijtosneki tanojnots kampa ininka motajtoua ichkamej uan cabras?

SE TONAL, Jesús kintapouijtoya itasojikniuan Pedro, Andrés, Santiago uan Juan teisa tein kinyolnotsaya. Kintapouij tanojnots kampa ika tajtoj takeual takuaujtamach, majtakti ichpochmej uan talentos. Ompa kintapouij okse tanojnots. Ika kinnojnotsak aksa akin motokaytiaya “Yektagatsin”, oso iKonetsin taltikpaknenkej, uan no keman ualaskia uan kijtoskia toni kinnamiki kiseliskej taltikpakneminij. Itech nejin tanojnots, iKonetsin taltikpaknenkej kinxeloua “nochi in pueblojuani de nochi pueblojme den taltikpak” itech ome olochmej. Se oloch, Jesús kintokaytia “ichkame” uan okse oloch kintokaytia “chivos” oso cabras. Itech nejin tanojnots no moajsi se expatika oloch tein no motelneki: iikniuan “tayekanke” oso tekiuaj (xikonixtajtolti Mateo 25:31-46).

² Tejuan no techtelyolnotsa nejin tanojnots. ¿Keyej? Porin Jesús  kijtoj ke sekin kiseliskej nemilis nochipaya, sayoj ke oksekin ixpoliuiskej. Yejua ika motelneki tikmatiskej toni kijtosneki nejin tanojnots uan toni moneki tikchiuaskej komo tiknekij tikseliskej nemilis nochipaya. No motelneki maj tikmatikan itanankililuan nejin netajtanilmej: ¿Keniuj techpaleuiani Jiova maj tikajsikamatikan nejin tanojnots? ¿Keniuj tikmatij ke nejin tanojnots kinextia ke motelneki tanojnotsalis? ¿Akonimej moneki tanojnotsaskej? ¿Keyej moneki maj tinochin amo tikauakan tekiuaj uan iikniuan?

3, 4. 1) ¿Toni eyi taman moneki tikmatiskej uan ijkon uelis tikajsikamatiskej tanojnots kampa ininka motajtoua ichkamej uan cabras? 2) ¿Keniuj amaix Tanejmachtijkej itech xiuit 1881 kimelauak tanojnots kampa ininka motajtoua ichkamej uan cabras?

³ Moneki tikmatiskej eyi taman uan ijkon uelis tikajsikamatiskej tein kijtosneki tanojnots kampa ininka motajtoua ichkamej uan cabras. Yekinika, ¿akoni kiixnextia iKonetsin taltikpaknenkej, tekiuaj, iikniuan tekiuaj, uan ichkamej uan cabras? Ojpatika, ¿kemanian kiixejekoua iKonetsin taltikpaknenkej akonimej ichkamej uan akonimej cabras? Uan expatika, ¿keyej kiixejekoua ke seki taltikpakneminij ichkamej uan okseki cabras?

⁴ Itech xiuit 1881, amaix Tanejmachtijkej kimelauak ke iKonetsin taltikpaknenkej uan tekiuaj kiixnextiaj Jesús. ¿Akonimej kinixnextiayaj iikniuan? Nejin amaix kijtouaya ke iikniuan tekiuaj kinixnextiayaj taltikpakneminij akin tekiuajtiskej ne iluikak iuan Jesús uan no akin nemiskej nikan taltikpak keman amo yeskijok tajtakouanij. ¿Kemanian kiixejekoskia Jesús akonimej ichkamej uan akonimej cabras? Itech itekiuajyo Cristo tein uejkauas 1,000 xiuit. ¿Uan keyej kiixejekoskia ke seki taltikpakneminij yeskiaj ichkamej? Porin yejuan kinextijkej inetasojtalis Dios itech nochi tein kichiujkej.

5. ¿Keniuj nejin amaix itech xiuit 1923 kimelauak tanojnots kampa ininka motajtoua ichkamej uan cabras?

⁵ Miak xiujmej satepan, Jiova kinpaleuij itekitikauan maj okachi kuali kiajsikamatikan nejin tanojnots. Nejin amaix, ika tapoual 15 de octubre de 1923, kikuik seki tajkuilolmej tein kipia Biblia tein ika kitemakak se yankuik taajsikamatilis. ¿Akoni kiixnextiaya iKonetsin taltikpaknenkej? Yejua Jesús. ¿Akonimej kinixnextiayaj iikniuan tekiuaj? Sayoj akin tekiuajtiskiaj ne iluikak iuan Jesús. ¿Akonimej kinixnextiayaj ichkamej? Taltikpakneminij akin nemiskej nikan taltikpak keman taixyekantos Jesús. ¿Kemanian kiixejekoskia Jesús ke yejuan ichkamej? Mochiuaskia keman iikniuan yetoskiajok nikan taltikpak, achto ke peuaskia itekiuajyo tein uejkauas 1,000 xiuit. ¿Keyej? Porin tanojnots kijtoua ke akin nemiskiaj nikan taltikpak kinpaleuiskiaj iikniuan tekiuaj, uan nejon sayoj mochiuaskia keman iikniuan tekiuaj yetoskiaj nikan taltikpak iniuan nejon taltikpakneminij. ¿Uan keyej kintokaytiskiaj ichkamej? Nejin amaix kimelauak ke yeskia porin takuaujtamatiskiaj iuan Jesús uan ke iTekiuajyo kiualkuis se okachi kuali nemilis.

6. ¿Keniuj itech xiuit 1995 mopatak kemej tikmelauaj nejin tanojnots?

⁶ Itech miak xiujmej tiknemilijkej ke taltikpakneminij katkaj kemej ichkamej oso cabras ijkon kemej tanankiliskiaj keman kinnojnotsaskiaj itech itamian tonalmej. Komo kuali tanankiliayaj, katkaj  ichkamej uan komo amo kuali tanankiliayaj katkaj cabras. Sayoj ke itech xiuit 1995 tikpatakej kemej tikmelauaj nejin tanojnots. Nejin amaix kiitak tein kijtoua Mateo 24:29-31 iuan tein kijtoua Mateo 25:31, 32 (xikonixtajtolti). Uan kimelauak ke Jesús kijtos toni kinnamiki kiseliskej taltikpakneminij keman ualas “ika chikaualis keme ueyi chiuke de rey” itech okachi ueyi tajyouilis. *

7. Xikonmelaua tanojnots kampa ininka motajtoua ichkamej uan cabras.

⁷ Axkan tel kuali tikajsikamatij nejin tanojnots. ¿Akoni kiixnextia iKonetsin taltikpaknenkej uan tekiuaj? Yejua Jesús. ¿Akonimej kinixnextiaj iikniuan tekiuaj? Akin Jiova kinixpejpenak ika iespíritu. Yejuan tekiuajtiskej ne iluikak iuan Jesús (Rom. 8:16, 17). ¿Akonimej kinixnextiaj ichkamej uan cabras? Taltikpakneminij itech nochi altepemej. ¿Kemanian moixejekos toni kinnamiki kiseliskej? Itamiampa okachi ueyi tajyouilis, tein amo uejkaua peuas. ¿Uan keyej kintokaytiskej ichkamej oso cabras? Jesús kiixejekos akonimej ichkamej uan akonimej cabras ijkuak kiitas ox kinpaleuianij taixpejpenalmej akin moajsijok nikan taltikpak. Tiktasojkamatiliaj Jiova maj techpaleui maj tikajsikamatikan nejin tanojnots uan okseki tein moajsi itech Mateo 24 uan 25.

8, 9. ¿Keyej Jesús kintokaytij ‘yolkualime’ akin yeskiaj ichkamej?

⁸ Jesús amo kikuik tajtol tanojnotsalis keman ininka tajtoj ichkamej uan cabras. Sayoj ke tikmatij ke nejin tanojnots techmachtia ke motelneki tanojnotsalis. ¿Keniuj tikmatij?

⁹ Uelis tikajsikamatiskej komo tikelnamikij ke tanojnots sayoj se neskayot. Jesús amo ininka tajtojtoya yekmelauj ichkamej uan cabras. No ijkon, amo kijtosnekik ke akin kinekij mochiuaskej kemej ichkamej yekmelauj moneki kinmakaskej taixpejpenalmej tein motaliliskej oso tein kimajseuaskej, kinyekpiaskej keman kokolispeuaskiaj oso kinkalpanoskej keman kintsakuaskiaj. Komo ijkon, ¿toni kijtosnekik? Ke sayoj kinnotsaskia ichkamej akin kinitaskiaj taixpejpenalmej kemej iikniuan Jesús uan kinpaleuiskiaj itech itamian tonalmej. Yejua ika Jesús no kintokaytij ‘yolkualime’ (Mat. 10:40-42; 25:40, 46; 2 Tim. 3:1-5).

10. ¿Keniuj ichkamej uelis kinpaleuiskej iikniuan Cristo?

¹⁰ Sayoj ke ¿keyej monekiskia maj kinpaleuikan iikniuan Jesús? Maj tikitakan. Achto ke Jesús kintapouiskia tanojnots kampa ininka tajtoj ichkamej uan cabras, kiniluijtoya imomachtijkauan tein panoskia itamian tonalmej (Mat. 24:3, TNM). Kiniluijka ke itech nejon tonalmej monekiskia motetapouis iTekiuajyo Dios noyampa taltikpak (Mat. 24:14). No kintapouijka tanojnots kampa  ika tajtoj talentos. Ika nejon tanojnots kiniluij taixpejpenalmej ke monekia tel tekitiskej itech tanojnotsalis. Sayoj ke ¿keniuj ueliskiaj tanojnotsaskej noyampa taltikpak achto ke ejkoskia tamilis komo axkan amo miakejok taixpejpenalmej mokauaj? Itech tanojnots kampa Jesús ininka tajtoj ichkamej uan cabras kijtoj ke ichkamej kinpaleuiskiaj taixpejpenalmej. ¿Keniuj? Se taman tein motelneki yejua keman kinpaleuiskiaj itech tanojnotsalis. Komo ijkon, ¿sayoj moneki kinyolchikauaskej oso temakaskej tomin tein tapaleuis maj mosentoka motanojnotsa, oso moneki kichiuaskej teisaok?

11. ¿Toni uelis timotajtaniskej?

¹¹ Axkan moajsij chikueyi millones imomachtijkauan Jesús. Uan tel miakej amo taixpejpenalmej. Jesús amo kinmakak talentos yejuan, tein kijtosneki, tein kinmatiltia ke moneki tanojnotsaskej, ta nejon sayoj kinmakak taixpejpenalmej (Mat. 25:14-18). Yejua ika, xa timotajtaniskej: “Komo Jesús kinmakak talentos taixpejpenalmej, ¿moneki tanojnotsaskej ichkamej?”. Kemaj. Maj tikitakan naui taman tein kinextia nejon.

12. ¿Toni techmachtia tein Jesús kijtoj itech Mateo 28:19, 20?

¹² Yekinika, Jesús kinnauatij nochin imomachtijkauan maj tanojnotsakan. Satepan ke Jesús moajokuik kiniluij imomachtijkauan maj tanojnotsakan uan maj kinmachtikan taltikpakneminij maj kichiuakan nochi tein kinnauatijka. Yejua ika, akin mochiuaskiaj imomachtijkauan no monekiskia tanojnotsaskej ijkon kemej Jesús tanauatij (xikonixtajtolti Mateo 28:19, 20, TNM). ¿Toni techmachtia nejin? Ke nochin imomachtijkauan Cristo moneki tanojnotsaskej, yeskij taixpejpenalmej oso amo (Hech. 10:42).

13. ¿Toni techmachtia amatajkuilol Apocalipsis?

¹³ Ojpatika, amatajkuilol Apocalipsis kinextia ke amo sayoj taixpejpenalmej tanojnotsaskiaj. Dios kiitaltij tatitanil Juan se “novia” akin kinyoleua taltikpakneminij maj tayikan “at tein kitemaka nemilis”. Novia kinixnextia 144,000 taixpejpenalmej akin tekiuajtiskej ne iluikak iuan Jesús (Rev. 14:1, 3; 22:17, TNM). At kiixnextia inemilis Jesús tein kitemakak, tein kinkixtilis taltikpakneminij tajtakol uan mikilis (Mat. 20:28; Juan 3:16; 1 Juan 4:9, 10). Taixpejpenalmej kinmachtiaj taltikpakneminij keniuj uelis kiseliskej nepaleuil tein kitemaka inemilis Jesús tein kitemakak (1 Cor. 1:23). Sayoj ke itech tein kiitaltijkej Juan no monextiaj oksekin akin amo taixpejpenalmej uan kichiaj nemiskej nikan taltikpak. Yejuan no kinnauatiaj maj kinyoleuakan okseki taltikpakneminij maj tayikan at tein kitemaka nemilis. Nejon kichiuaj ijkuak tanojnotsaj. Kemej tikitaj, tein Juan kiitaltijkej kinextia ke nochin akin kiseliaj tamachtilis moneki tanojnotsaskej.

14. ¿Toni moneki tikchiuaskej uan ijkon tiktakamatiskej “tanauatil de Cristo”?

¹⁴ Expatika, nochin akin kitakamatij  “tanauatil de Cristo” moneki tanojnotsaskej (Gál. 6:2). Jiova kitemaka tanauatilmej tein moneki kitakamatiskej nochin akin kiueyichiuaj. Ne uejkauj, Dios kichiaya maj israelitas uan akin amo israelitas akin iniuan nemiaj kitakamatinij itanauatiluan (Éx. 12:49; Lev. 24:22). Kemej tikmatij, axkan amo moneki tiktakamatiskej tanauatilmej tein Jiova kinmakak israelitas. Sayoj ke moneki tiktakamatiskej “tanauatil de Cristo”, yeski titaixpejpenalmej oso amo. Semej tanauatilmej tein okachi moneki tein Jesús techmachtij yejua tein kinextia ke moneki titetasojtaskej (Juan 13:35; Sant. 2:8). Moneki tiktasojtaskej Jiova, Jesús uan taltikpakneminij. Uan okachi ueli tiknextiaj ke tikintasojtaj taltikpakneminij keman tikintapouiaj iTekiuajyo Dios (Juan 15:10; Hech. 1:8).

15. ¿Keyej tikmatij ke Jesús kineki maj nochin itekitikauan tanojnotsakan?

¹⁵ Naujpatika, seki taman tein Jesús kiniluij seki imomachtijkauan no monekia kichiuaskej oksekin. Kemej neskayot, Jesús motenkauak iniuan 11 imomachtijkauan ke iuan tekiuajtiskej ne iluikak. Sayoj ke sennochin yeskiaj 144,000 akin iuan tekiuajtiskej (Luc. 22:29, 30; Apoc. 5:10; 7:4-8). Uan satepan ke Jesús moajokuik sayoj kiniluij seki imomachtijkauan maj tanojnotsanij (Hech. 10:40-42; 1 Cor. 15:6). Sayoj ke nochin imomachtijkauan itech yekinika siglo tanojnotskej (Hech. 8:4; 1 Ped. 1:8). Yejua ika tejuan no moneki titanojnotsaskej maski amo tiyetoyaj keman  Jesús kitemakak tanauatil. Tein melauj, axkan chikueyi millones itaixpantijkauan Jiova titanojnotsaj uan ijkon tiknextiaj ke titakuaujtamatij iuan (Sant. 2:18).

16-18. 1) ¿Keniuj uelis tikinpaleuiskej tokniuan taixpejpenalmej? 2) ¿Keyej moneki axkan tikinpaleuiskej taixpejpenalmej?

¹⁶ Satanás okachi kinixnamiki taixpejpenalmej akin mokauajok nikan taltikpak. Uan no, kimati ke amo miak tonalmejok kipia (Apoc. 12:9, 12, 17). Sayoj ke amo ueli kitsakuilia maj taixpejpenalmej kisentokakan kiixyekanakan tanojnotsalis. Tein melauj, axkan okachi miakej kinnojnotstokej kemej amo keman mochiujtoya. Moyekita ke Jesús kinixyekantok uan kinpaleuijtok taixpejpenalmej (Mat. 28:20, TNM).

¹⁷ Se ueyi tatiochiualis maj tikinpaleuikan taixpejpenalmej itech tanojnotsalis. Sayoj ke ¿itech toni okseki taman uelis tikinpaleuiskej? Kemej neskayot, uelis titemakaskej tomin uan titekitiskej kampa mochijchiuaj kalmej kampa timonechikouaj uan sucursales. No uelis tikinpaleuiskej taixpejpenalmej keman tikintakamatij tayekananij uan okseki tokniuan akin takeual takuaujtamach kinixtaliani (Mat. 24:45-47; Heb. 13:17).

¹⁸ Amo uejkaua, taixpejpenalmej akin mokauajok nikan taltikpak senkis kinseliskej kemej taixpejpenalmej. Ompa peuas okachi ueyi tajyouilis (Apoc. 7:1-3). Uan achto ke peuas Armagedón, Jesús kinuikas taixpejpenalmej ne iluikak (Mat. 13:41-43). Yejua ika, komo tiknekij maj Jesús kiixejeko ke tiichkamej, moneki axkan tikinpaleuiskej iikniuan.