1. ¿Keyej moneki tikchikauaskej tokuali uikalis iuan Jiova?

TIITAIXPANTIJKAUAN Jiova tikpiaj se taman tein kitelpia ipatiuj. Kuali timouikaj iuan Jiova. Motelneki maj tiktemokan tikchikauaskej nejon kuali uikalis nochi tein tiueliskej. ¿Keyej? Porin tein onkak nikan taltikpak kampa Satanás taixyekantok uan kemej titajtakouanij, uelis kijtakos nejon kuali uikalis.

2. 1) ¿Keniuj ome taltikpakneminij mochiuaj tasojiknimej? (Xikonita nota.) 2) ¿Keniuj uelis okachi tikchikauaskej tokuali uikalis iuan Jiova?

² ¿Tikonita Jiova kemej se yekmelauj motasojikniuj? ¿Tikonuelitaskia okachi tikonchikauas mokuali uikalis iuan? Santiago 4:8 techiluia keniuj uelis tikchiuaskej: “Ximotokikan iuan Dios uan Yejuatsin no motokis namouan”. Kemej tikitaj, tejuan uan Jiova moneki tikchiuaskej teisa uan ijkon uelis kuali timouikaskej. * Komo tejuatsin tionmotokia iuan  Jiova, yejuatsin motokis mouan. Keman okachi tionmotokis iuan, okachi mochikauas mokuali uikalis iuan uan okachi tikonitas kemej yekmelauj motasojikniuj. Uan tejuatsin tionmomachilis kemej Jesús keman kijtoj: “Akin nechualtitanik yekmelauj nemi”. Uan no kijtoj: “Nejua nikixmati” (Juan 7:28, 29, TNM). Maj tikitakan toni moneki tikchiuaskej uan ijkon uelis timotokiskej iuan Jiova.

3. ¿Keniuj uelis titajtoskej iuan Jiova?

³ Komo tiknekij timotokiskej iuan Jiova, motelneki maj nochipa titajtokan iuan. ¿Keniuj tikchiuaj nejon? Maj tikijtokan se neskayot. Komo ome tasojiknimej akin uejka nemij kinekij monojnotsaskej, ¿toni uelis kichiuaskej? Uelis nochipa motajkuilouiliskej oso tajtoskej ika teléfono. No ijkon panoua ika tokuali uikalis iuan Jiova. ¿Keniuj uelis titajtoskej iuan? Komo nochipa tiktataujtiaj (xikonixtajtolti Salmo 142:2). Uan yejuatsin technojnotsa ika Biblia. Yejua ika, moneki nochipa tikixtajtoltiskej uan tiknemiliskej tein tikixtajtoltiaj uan ijkon uelis tikakiskej tein Jiova techiluia (xikonixtajtolti Isaías 30:20, 21). Kemej tikitaskej itech nejin tamachtilis, komo nochipa titajtouaj iuan Jiova, tikitaskej ke yekmelauj kuali timouikaj iuan.

4, 5. 1) ¿Keniuj Jiova technojnotsa ika Biblia? 2) Xikonmelaua ika se neskayot.

⁴ Tikyekmatij ke tein Biblia tamachtia uelis kinpaleuis nochin taltikpakneminij. Sayoj ke Biblia no uelis techpaleuis tisejsemej maj timotokikan iuan Dios. Yejua ika, moneki tikyekitaskej keniuj timomachiliaj keman tikixtajtoltiaj uan timomachtiaj Biblia. No moneki tiknemiliskej keniuj uelis tikchiuaskej itech tonemilis tein tikixtajtoltiaj. Keman tikchiuaj nochi nejin, kemej yeskia Jiova technojnotstoskia ika Biblia. Uan keman tikitaj ke yejuatsin techpaleuia, okachi kuali timouikaj iuan (Heb. 4:12; Sant. 1:23-25).

⁵ Maj tikijtokan se neskayot. Itech Mateo 6:19, 20, Jesús kijtoj: “Amo xiksentilikan namoricojyo nikan taltikpak”. Nejin kijtosneki ke moneki tiktayekanaltiskej itanejnekilis Jiova itech tonemilis. ¿Keniuj timomachiliaj keman tikixtajtoltiaj nejin? Komo tikchiujtokejya, tikmachiliskej ke tikyolpaktiaj Jiova. Sayoj ke komo tikitaj ke moneki  tikauaskej seki taman itech tonemilis uan ijkon okachi tiktekitiliskej, tikajsikamatiskej ke yejuatsin techpaleuijtok maj tikitakan tein tejuan moneki tikchiuaskej uan ijkon uelis okachi timotokiskej iuan.

6, 7. 1) ¿Toni panoua ika tokuali uikalis iuan Jiova keman timomachtiaj Biblia? 2) ¿Toni moneki okachi tiktemoskej keman timomachtiaj Biblia?

⁶ Semi melauak ke ijkuak timomachtiaj Biblia, tikajsikamatij toni moneki tikpataskej uan ijkon uelis okachi kuali tiktekitiliskej Dios. Sayoj ke no tikmatij toni kualneskayomej kipia uan toni kiolinia inetasojtalis maj kichiua. Keman tikmatij nochi nejin, okachi tiktasojtaj. Uan yejuatsin no okachi techtasojta. Uan nejon kichiua maj mochikaua tokuali uikalis iuan (xikonixtajtolti 1 Corintios 8:3).

⁷ Komo tiknekij timotokiskej iuan Jiova, motelneki tiktemoskej se taman tein tayekantok keman timomachtiskej Biblia. Jesús kijtoj ke komo tiknekij tinemiskej nochipaya, moneki kuali tikixmatiskej Jiova (Juan 17:3). Semi melauak ke itech Biblia timomachtiaj miak taman tein teyolnotsa. Sayoj ke amo yejua nejon tein moneki okachi tiktemoskej, ta moneki timomachtiskej Biblia porin tiknekij okachi tikixmatiskej Jiova (xikonixtajtolti Éxodo 33:13; Sal. 25:4).

8. 1) Keman sekin kiixtajtoltiaj tein Jiova kichiuilij tekiuaj Azarías, ¿toni ueliskia kinemiliskej? 2) Kemej tejuan kuali tikixmatij Jiova, ¿toni tikyekmatij?

⁸ Komo tikitaj Jiova kemej se yekmelauj totasojikniuj, amo techtekipachos komo itech Biblia kemansa amo kimelaua keyej Dios ijkon kichiuak seki taman. Kemej neskayot, maj tiknemilikan tein panok iuan Azarías, semej akin tekiuajtik Judá. Keman taixyekantoya, israelitas kinueyichiuayaj tiotsitsin. Sayoj ke tekiuaj amo kichiuak kemej yejuan, porin Biblia kijtoua ke yejua “kisentokak kichiuak tein melauak iixpan Jiova” (2 Rey. 15:1-5). Maski ijkon, Dios kitatsakuiltij ika se ueyi kokolis. ¿Keyej? Itech nejin tajkuilol amo momelaua. Sekin ueliskiaj kinemiliskej ke ika mauiltij uan amo onkaya keyej kitatsakuiltis. Sayoj ke tejuan kuali tikixmatij Jiova uan tikyekmatij ke yejuatsin nochipa kichiua teisa ika melaujkayot (Jer. 30:11). Yejua ika, maski amo tikmatiskej keyej Dios kitatsakuiltij nejin tekiuaj, tikyekmatij ke kichiuak tein monekia.

9. ¿Keyej Jiova kitatsakuiltij tekiuaj Azarías?

⁹ Itech okseki tajkuilolmej tein kipia Biblia kimelaua okseki taman tein kichiuak tekiuaj Azarías, akin no moixmati kemej Uzías (2 Rey. 15:7, 32). Itech 2 Crónicas 26:3-5, 16-21 moijtoua ke yejua kichiuak “tein melauak iixpan Jiova”. Sayoj ke no moijtoua ke satepan peuak moueyichiua. Se tonal kinekik kichiuas se taman tein sayoj tiopixkamej ueliaj kichiuayaj. Keman 81 tiopixkamej kiluijkej ke amo kuali tein kichiujtoya uan kinekiaj kitsakuiliskej, tekiuaj kinextij ke motelueyichiuaya porin iniuan kualanik uan amo kinkakik. Kemej tikitaj, nejin techpaleuia maj tikajsikamatikan keyej Jiova kitatsakuiltij.

10. 1) ¿Keyej amo moneki tikmatiskej nochipa keyej Jiova ijkon kichiua teisa? 2) ¿Toni techpaleuis maj titakuaujtamatikan ke Jiova nochipa kichiua tein moneki?

¹⁰ Nejin techmachtia se taman tein  motelneki. Tanojnots kampa ika tajtoua tekiuaj Azarías kimelaua miak taman tein techpaleuia maj tikmatikan keyej Dios kitatsakuiltij. Sayoj ke itech Biblia moajsi okseki tanojnotsmej tein amo kimelaua nochi nejon. Keman ijkon panos, ¿tiomeyolouaskej ox Jiova kichiuak tein monekia? ¿Oso titakuaujtamatiskej ke nochipa kichiua teisa ika melaujkayot? (Deut. 32:4.) Biblia kipia miak tamachtilis tein techpaleuia maj kuali tikixmatikan Jiova uan maj iuan titakuaujtamatikan. Komo tikixmatij uan tiktasojtaj, amo monekis nochipa tikmatiskej keyej ijkon kichiua teisa. ¿Uan toni uelis techpaleuis maj senkis titakuaujtamatikan ke Dios nochipa kichiua tein moneki? Komo timomachtiaj Biblia. Ijkon timochiuaskej yekmelauj tiitasojikniuan Jiova (Sal. 77:12, 13).

11-13. ¿Keniuj tikmatij ke Dios techkaki keman tiktataujtiaj? (Xikonita taixkopin ipeujyan tamachtilis.)

¹¹ Keman tikchiuaj netataujtil, tikueyichiuaj Dios, tiktasojkamatiliaj uan tiktajtaniaj maj techpaleui. Nejon techtokia iuan (Sal. 32:8). Sayoj ke komo tiknekij timochiuaskej yekmelauj tiitasojikniuan Jiova, moneki tikyekneltokaskej ke yejuatsin techkaki keman tiktataujtiaj.

¹² Sekin kijtouaj ke Dios amo kikaki keman se kitataujtia. Kiyekijtouaj ke ijkuak timotataujtiaj sayoj techpaleuia maj okachi kuali timomachilikan. Kijtouaj ke techpaleuia maj titanemilikan itech kuejmolmej tein tikpiaj uan maj  tejuan tikajsikan keniuj tikyektaliskej. Semi melauak ke netataujtil uelis ijkon techpaleuis. Sayoj ke ijkuak tiktataujtiaj Jiova, yejuatsin yekmelauj techkaki. ¿Keniuj tikmatij?

¹³ Maj titanemilikan itech Jesús. Achto ke ualaskia nikan taltikpak, kiitak keniuj Jiova kinnankiliaya itekitikauan keman kitataujtiayaj. Uan keman yetoya nikan taltikpak, Jesús kitataujtij Dios uan kitapouij tein kinemiliaya uan tein kimachiliaya. Se tonal kichiujtoya netataujtil nochi youal (Luc. 6:12; 22:40-46). Uan no, kinmachtij imomachtijkauan keniuj motataujtiskiaj. ¿Kichiuaskia Jesús nochi nejon komo kinemiliskia ke Jiova amo yekmelauj kikaki netataujtilmej? Amo. Yejua kimatia ke Dios kemaj kikaki netataujtilmej. Yejua ika kiluij: “Nimitsontasojkamachilia porin Tejuatsin nachipa tinechonkakilia nonetatatautilis” (Juan 11:41, 42). Tejuan no tikyekmatij ke Jiova techkaki keman tiktataujtiaj (Sal. 65:2).

14, 15. 1) ¿Keyej moneki tikiluiskej Jiova keman tiktataujtiaj itech toni taman tiknekij maj techpaleui? 2) ¿Keniuj se tokniuj siuat kipaleuij keman kitataujtiaya Jiova?

¹⁴ Kemansa uelis amo tikyekitaskej keniuj Jiova kinankilia tonetataujtiluan. Sayoj ke komo tikiluiaj itech toni taman tiknekij maj techpaleui, uelis okachi tikyekitaskej keniuj technankilia. Ijkon, yejuatsin mochiuas okachi kuali totasojikniuj. Komo tiktapouiaj nochi tein techtekipachoua, yejuatsin motokis touan.

¹⁵ Maj tikitakan tein kipanok se tokniuj siuat akin monotsa Carmen. * Yejua kijtoua ke maski yaya tanojnotsati,  tein melauj amo kiyolpaktiaya. Keman kiajxitij xiuit ijkuak amo tekitiaok, se tayekankej kiyolchikauak maj peua kichiua tekit kemej precursor regular. Yejua kijtoua: “Niknemilij nikchiuas, sayoj ke no peuak niktataujtia Jiova mojmostaj maj nechpaleui maj nechyolpaktiani nitanojnotsas”. ¿Kikakik Dios inetataujtiluan? Axkan Carmen kichiujtok tekit kemej precursor eyi xiuitya. Uan kijtoua ke kemej okachi miak tonalmej tanojnotsa uan okseki tokniuan siuamej kipaleuianij, okachi kuali tanojnotsa. ¡Axkan semi kiyolpaktia tanojnotsas! Sayoj ke moajsi tein okachi moneki. Yejua kijtoua: “Jiova uan nejua okachi kuali timouikaj”. Kemej tikitaj, keman kitataujtiaya kipaleuij maj mochiua yekmelauj itasojikniuj Jiova.

16, 17. 1) ¿Toni moneki tikchiuaskej uan ijkon uelis okachi kuali timouikaskej iuan Dios ijkon kemej panoskej tonalmej? 2) ¿Toni tikitaskej itech okse tamachtilis?

¹⁶ Uelis tiksentokaskej timotokiskej iuan Jiova nochipaya. Yejua ika, maj tiksentokakan tikakikan keman mojmostaj timomachtiaj Biblia, uan maj tiksentokakan iuan titajtokan ika netataujtil. Komo tikchiuaj, okachi kuali timouikaskej iuan Dios ijkon kemej panouaj tonalmej. Uan ika inepaleuil, uelis tikxikoskej kuejmolmej tein tikpiaskej.

¹⁷ Sayoj ke, maski nochipa tiktataujtiskej Jiova, uelis tiksentokaskej tikpiaskej kuejmolmej. Uan nejon uelis kichiuas maj amo titakuaujtamatikanok iuan Jiova. Uelis tiknemiliskej ke yejuatsin amo kikaki tonetataujtiluan uan timotajtaniskej ox kisentoka techita kemej tiitasojikniuan. Komo ijkon timomachiliaj, ¿toni uelis tikchiuaskej? Nejin tikitaskej itech okse tamachtilis.