Itech miak xiujmej, toamaixuan kimelauanij ke Biblia kikui tokayit “Gog tein poui Magog” keman ika tajtoua Satanás satepan ke kikixtijkej ne iluikak. ¿Keyej ijkon momelauani? Porin amatajkuilol Apocalipsis kijtoua ke Satanás kichiuas maj noyampa taltikpak kiixnamikikan ixolal Jiova (Apoc. 12:1-17). Yejua ika tikajsikamatiaj ke Gog katka okse tokayit tein ika moixmati Satanás.

Sayoj ke tikpatatij kemej tikmelauayaj. Maj tikitakan keyej. Yekinika, keman Biblia ika tajtoua itamilis Gog, kijtoua ke Jiova kichiuas maj kikuakan totomej tein kikuaj nakat uan koujtajtapialmej (Ezeq. 39:4). Uan no kijtoua ke Jiova kimakas “se tal kampa kipachoskej ompa Israel” (Ezeq. 39:11). Sayoj ke Satanás se espíritu, yejua ika amo uelis kikuaskej tapialmej nion uelis kipachoskej nikan taltikpak. Uan no, Biblia kiyekijtoua ke Satanás kipankajkauaskej itech se ueyi taltekoch 1,000 xiujmej. Nejin kijtosneki ke nion se tapial kikuas Satanás nion kipachoskej (Apoc. 20:1, 2).

Ojpatika, Biblia kijtoua ke itamian 1,000 xiujmej Satanás kisas itech ueyi taltekoch uan kinkajkayauas “nochi xolalmej tein yetokej naujkan kampa tami taltikpak, Gog uan Magog, uan ijkon kinsentilis maj tateuikan itech neteuilis” (Rev. 20:8, TNM). Komo Satanás yeskia Gog, nejon kijtosnekiskia ke Satanás iselti mokajkayauas. Uan nejon amo uelis mochiuas. Yejua ika, keman amatajkuilolmej Ezequiel uan Apocalipsis ika tajtouaj Gog, amo ika tajtojtokej Satanás.

Komo ijkon, ¿akoni Gog tein poui Magog? Moneki timomachtiskej Biblia uan tiktemoskej akoni kiixnamikis ixolal Dios uan ijkon uelis tikmatiskej. Biblia ika tajtoua keman taixnamikij Gog tein poui Magog, “tekiuaj tein poui norte”, uan “tayekanani de nikan taltikpak” (Ezeq. 38:2, 10-13; Dan. 11:40, 44, 45; Apoc. 17:14; 19:19). Nesi ke nejin sayoj se taman taixnamikilis, sayoj ke tataman tokayit kipia. ¿Keyej tikijtouaj nejin? Porin Biblia kijtoua ke nochin xolalmej noyampa taltikpak tapaleuiskej itech nejin taixnamikilis tein ika tamisya, tein ika peuas neteuilis Armagedón (Apoc. 16:14, 16).

Komo tikitaj nochi nejin tajkuilolmej tein ika tajtouaj ijkuak kitamiixnamikiskej ixolal Dios, tikajsikamatij ke “Gog tein poui Magog” amo yejua  Satanás. Gog tein poui Magog kiixnextia seki oloch xolalmej. ¿Kinixyekanas “tekiuaj tein poui norte” nejin xolalmej? Amo tikyekmatij. Sayoj ke uelis ijkon mochiuas, porin Jiova kiluia Gog: “Tiualeuas kampa timoajsi, ne uejka ajkopaka, tejua uan miak xolalmej mouan, nochin yejuan ipanko sejse caballo, se ueyi oloch, tel miakej tateuianij” (Ezeq. 38:6, 15).

Tanauatijkej Daniel no kijtoj se taman kemej nejon keman ika tajtoj tekiuaj tein poui norte: “Motematiltis seki taman tein kikuejmolos, kampa ika kisa tonaltsin uan kampa ika norte, uan yekmelauj yas ika ueyi kualanyot kinmiktitiuj uan senkis kinixpolotiuj miakej. Uan kitalis itakenkaluan kampa taixyekanas kampa ika ueyiat uan yektik tepet tein Kualtsin; uan monekis ajsis hasta itamilis, uan amo akin kipaleuis” (Dan. 11:44, 45). Nejin tein kijtoj Daniel moita ke no ijkon kemej tein kijtoj Ezequiel keman ika tajtoj Gog (Ezeq. 38:8-12, 16).

¿Toni panos satepan ke kitamiixnamikiskej ixolal Dios? Daniel 12:1 kijtoua: “Itech nejon tonalmej moketsas Miguel, ueyi tayekankej, akin ijkatok porin kinpaleuia ikoneuan moxolal”. No kijtoua ke “onkas ueyi tayokol itech seki tonalmej kemej amo keman mochiuani ijkuak mochiuak se xolal hasta nejon tonalmej”. Nikan ika tajtojtok keman mochiuas okachi ueyi tajyouilis. Uan ika tami, tajkuilol kijtoua: “Moxolal makisas, nochin akin ijkuiliujtoskej itech amatajkuilol”. ¿Toni kijtosneki Daniel 12:1? Ke Jesucristo, akin “ijkatok” oso peuak taixyekana itech xiuit 1914, tateuis itech Armagedón uan ijkon techpaleuis. Apocalipsis 19:11-21 no ijkon kimelaua tein kichiuas Jesucristo satepan ke mochiuas taixnamikilis tein ika tamisya.

Sayoj ke ¿akoni Gog uan Magog akin ininka motajtoua itech Apocalipsis 20:8? Nochin taltikpakneminij akin kiixtopeuaskej Jiova uan kinixnamikiskej itekitikauan itech tayejyekolis tein mochiuas itamian 1,000 xiujmej. Nejin taltikpakneminij kitauelitaskej ixolal Dios ijkon kemej kichiuas Gog tein poui Magog. Sayoj ke ijkon kemej Dios kiixpolos Gog tein poui Magog itech Armagedón, no kinixpolos nejin taltikpakneminij (Apoc. 19:20, 21; 20:9). Yejua ika Biblia kintokaytia Gog uan Magog nochin akin kiixtopeuaskej Dios itamian 1,000 xiujmej.

Tiitaixpantijkauan Jiova semi techyolnotsa timomachtiskej Biblia. Yejua ika tikyolnejnekij tikajsikamatiskej akoni yeski “tekiuaj tein poui norte” amo uejkaua. Sayoj ke maski amo tikmatiskej akoni kinixyekanas xolalmej maj techixnamikikan, tikyekmatij ome taman. Yekinika, Gog tein poui Magog uan itateuijkauan kintaniskej uan kinixpoloskej. Uan ojpatika, totekiuaj Jesucristo techmakixtis uan techkauas maj tinemikan itech se yankuik taltikpak kampa onkas yolseuilis uan yekmelauj yekyetolis (Apoc. 7:14-17).