1. ¿Toni kichiuak se ángel akin katka itasojikniuj Jiova?

MOAJSIA se ángel akin yekinika katka itasojikniuj Jiova. Sayoj ke se tonal peuak kinejneki maj taltikpakneminij kiueyichiuakan yejua uan amo Dios. Kemej kisentokaya tanemilijtoya itech nejon, ejkok tonal keman tajtakoj (Sant. 1:14, 15). Kiixnamikik Jiova uan moixmatiko kemej “tetat den nochi nekes ten xolopijtijtinemij” oso takajkayauaj (Juan 8:44). Amo tikmatij keniuj motokaytiaya achto ke taixnamikiskia, sayoj ke axkan tikixmatij kemej Satanás.

2, 3. ¿Keyej akin kiixnamiki Jiova moixmati kemej “Satanás”, “Amokuali”, “kouat” uan “ueyi amokuali tekuani”?

² Satanás yejua akin okachi kitauelita Jiova uan taltikpakneminij. Biblia techpaleuia maj tikitakan ke yejua semi amo yolkuali. Kemej neskayot, kitokaytia Satanás, tein kijtosneki “Taixnamikkej”. Ijkon kitokaytia porin senkis  amo kiuelita maj Jiova taixyekana uan kiixnamiki. Satanás amo kineki maj Jiova taixyekana.

³ Itech Apocalipsis 12:9, nejin akin kitauelita Jiova moixmati kemej “Amokuali”. ¿Keyej? Porin nejin tokayit kijtosneki “Tetakajkayauilijkej”. Uan Satanás kijtouiliani Jiova ke yejuatsin se takajkayaujkej. No moixmati kemej “kouat ten ne achtopa ipa nentiuits” porin ika se kouat kikajkayauak Eva. Uan no kitokaytia “ueyi amokuali tekuani” porin tamati kemej se tapial tamouilil tein tetajyouiltia. Yejua amo kineki maj Jiova kichiua tein motenkauak. Uan no, kineki kinixpolos nochin itekitikauan Dios.

4. ¿Toni tikitaskej itech nejin tamachtilis?

⁴ Kemej tikitaj, Satanás kitauelita Jiova uan ixolal. Yejua kitelneki maj amo tiktekitilikanok Jiova. Yejua ika Biblia technejmachtia: “Ximoyektachilijtokan porin ne amokuali Satanás namechtauelitstinemi, uan yejua ne tsajtsitinemi uan namechyeualojtinemi keme yeskia se kuoutajtekuani ten kitemo[j]tinemi akoni kixi[j]xikos” (1 Ped. 5:8). Itech nejin tamachtilis tikitaskej eyi taman tein kinextia keyej moneki timoyekpiaskej maj amo techijtako Satanás.

5, 6. 1) Xikonijto seki taman tein kinextia ke ángeles kipiaj miak chikaualis. 2) ¿Keyej Biblia kijtoua ke Satanás ueli kichiua maj timomikilikan?

⁵ Ángeles kipiaj miak chikaualis (Sal. 103:20). Okachi kipiaj tamatilis uan okachi chikaujkej ke tejuan. Sayoj ke ángeles akin yolkualmej kichiuaj tein kuali ika ininchikaualis. Kemej neskayot, ne uejkauj, se ángel kinmiktij itech sayoj se youal 185,000 tateuianij akin kintauelitayaj israelitas. Nejon amo keman ueliskia kichiuas se taltikpaknenkej uan no semi ouij yeskia maj kichiuakan se ueyi oloch tateuianij (2 Rey. 19:35). Okse tonal, se ángel kinkixtij itatitaniluan Jesús kampa kintsakkaj. Tatapoj, kinkixtij tatitanilmej uan oksepa tatsakuak uan tajpianij amo kiitakej (Hech. 5:18-23).

⁶ Kemej tikitaj, ángeles akin yolkualmej kichiuaj tein kuali ika ininchikaualis. Sayoj ke Satanás kichiua tein amo kuali ika ichikaualis. Uan yejua kipia miak chikaualis. Yejua ika Biblia kijtoua ke “takitskijtok” uan “tayekantinemi nikan taltikpak” (Juan 12:31; 2 Cor. 4:4). No kijtoua ke “kipia tein ika ueli kichiua maj timomikilikan” (Heb. 2:14, TNM). Nejin amo kijtosneki ke yejua ueli kinmiktia nochin taltikpakneminij. Komo ijkon, ¿keyej kijtoua Biblia ke ueli kichiua maj timomikilikan? Yekinika, porin yejua kichiua maj taltikpakneminij motauelitakan uan maj tateuikan. Ojpatika, porin yejua kichiuak maj Adán uan Eva tajtakouanij uan yejua ika tinochin titajtakouaj uan timomikiliaj (Rom. 5:12). Tikajsikamatij keyej Jesús kijtoj ke Satanás  se temiktijkej (Juan 8:44). Nochi nejin kinextia ke Satanás kipia miak chikaualis.

7. Xikonijto seki tajkuilolmej itech Biblia tein kinextiaj ke amokuali ejekamej kipiaj miak chikaualis.

⁷ Keman tikixnamikij Satanás, no tikinixnamikij itatojtokakauan. Iniuan akin kitojtokaj Satanás pouij amokuali ejekamej, akin kikaujkej Dios (Apoc. 12:3, 4). Itech Biblia moajsij seki tajkuilolmej tein kinextiaj ke yejuan okachi chikaujkej ke taltikpakneminij uan ke uelis kichiuaskej maj semi tajyouikan (Mat. 8:28-32; Mar. 5:1-5). Maj amo keman tikelkauakan ke Satanás uan amokuali ejekamej kipiaj miak chikaualis (Mat. 9:34). Sayoj uelis tikinixnamikiskej ika inepaleuil Jiova.

8. 1) ¿Toni kineki Satanás? (Xikonita taixkopin ipeujyan tamachtilis.) 2) ¿Toni tikonitani tejuatsin tein mitsonnextilia ke itech nejin taltikpak tel miakej no semi tetajyouiltiaj kemej Satanás?

⁸ Satanás semi tetajyouiltia. Kemej tikitakej itech párrafo 4 itech nejin tamachtilis, Biblia kijtoua ke yejua tamati kemej se tekuani tein nanalka porin tel mayana. Yejua taixyekantokya nikan taltikpak, sayoj ke nejon kemej yeskia amo kiixuitia (1 Juan 5:19). Satanás no kineki kinixpolos tokniuan taixpejpenalmej akin mokauajok nikan taltikpak uan ‘okseki ichkamej’ (Juan 10:16; Apoc. 12:17). Yejua ika kichiuani maj kintajyouiltikan yekmelauj itatojtokakauan Cristo itech yekinika siglo uan hasta itech totonaluan.

9, 10. 1) ¿Keniuj Satanás kinekia kiixpolos xolal Israel? 2) ¿Keyej Satanás kitelnekia kichiuas nejon? 3) ¿Keniuj tikonnemilia ke momachilia Satanás keman se itekitikauj Jiova kichiua se ueyi tajtakol?

 ⁹ Se tekuani tein mayantok amo kiiknelia tapial achto ke kimiktia nion satepan. No ijkon, Satanás amo kiniknelia akin kinixnamiki. Maj tiknemilikan keniuj kiixnamikik xolal Israel. Yejua kichiuak maj israelitas kemej Zimrí auilneminij uan maj oksekin kemej Guehazí mokuilianij tein amo ininaxka katka. Nochi nejin kiualkuik miak tajyouilis. Uan tikyekmatij ke Satanás semi kiyolpaktij keman uelik kinchiualtij nejon (Núm. 25:6-8, 14, 15; 2 Rey. 5:20-27).

¹⁰ ¿Keyej Satanás kitelnekia kiixpolos xolal Israel? Porin kimatia ke itech nejon xolal ualaskia Mesías. Uan kimatia ke Mesías kiixpoloskia yejua uan kinextiskia ke sayoj Jiova kinamiki taixyekanas (Gén. 3:15). Satanás amo kinekia maj israelitas kipianij itatiochiualis Jiova, yejua ika kichiuak nochi tein uelik tein ika kitemoj maj tajtakouanij. Yejua nion tepitsin kiiknelij David keman auilnemik. Uan amo no kiiknelij Moisés keman Dios amo kikauak maj kalaki itech tal tein motenkaujka kinmakas israelitas. Tein melauj, Satanás semi yolpaki keman se itekitikauj Dios kichiua se ueyi tajtakol. Keman panoua nejon, ika kikejkeloua Jiova (Prov. 27:11).

11. ¿Keyej Satanás xa kinekia kichiuas maj Sara tajtakouani?

¹¹ Satanás okachi kintauelitaya kalyetouanij akin inintech ualeuaskia Mesías. Kemej neskayot, maj tikelnamikikan se taman tein panok keman Jiova kiluij Abrahán ke ikoneuan yeskiaj “se ueyi altepet” (Gén. 12:1-3). Keman Abrahán uan Sara moajsiaj Egipto, tekiuaj itech nejon altepet kiuikak Sara ichan porin kinekia iuan monamiktis. Sayoj ke Jiova kimakixtij Sara (xikonixtajtolti Génesis 12:14-20). Okse tekiuaj no kitemoj kichiuas se taman kemej nejon itech xolal Guerar achto ke yoliskia Isaac (Gén. 20:1-7). ¿Uelis tikijtoskej ke Satanás kichiuak maj nejin tekiuanij kinekinij monamiktiskej iuan Sara? Biblia amo kijtoua. Sayoj ke maj tikelnamikikan ke Sara kikaujka kuali nemilis tein kipiaya itech xolal Ur uan peuak nemi itech takenkalmej. Xa Satanás kinekia kichiuas maj kiixnekini kuali nemilis tein kipiayaj tekiuanij uan ijkon kichiuas maj kikauani inamik uan Jiova. Satanás semi kiyolpaktiskia maj Sara amo pouiniok iniuan ichankauan Mesías. Amo kitekipachouaya kiuejuelos ikuali uikalis iuan inamik, kemej kiixmatiaj uan ikuali uikalis iuan Jiova. ¡Satanás semi amo yolkuali!

12, 13. 1) ¿Toni kichiuak Satanás keman yolik Jesús? 2) ¿Keniuj tikonnemilia tejuatsin ke Satanás kinita telpochmej akin axkan kitekitiliaj Jiova?

¹² Jesús yolik tel miak xiujmej satepan. Satanás amo kiuelitak maj nejin konetsin kuakualtsin yeskia. Yejua kimatia ke pouia iniuan ichankauan  Abrahán uan ke yejua yeskia Mesías. Uan no, Jesús kiixpoloskia nochi tein Amokuali kichiuani (1 Juan 3:8). ¿Kinemilij Satanás ke semi amo kuali yeskia maj kimiktikan se konetsin? Amo. Yejua amo kiixejekoua toni kuali oso toni amo kuali. Tein melauj, amo omeyolouak kichiuas maj kimiktikan Jesús. ¿Toni kichiuak?

¹³ Keman tekiuaj Herodes kimatik ke “tayekanke den judíos” yolkaya, tel kualanik uan kiixtalij kimiktis (Mat. 2:1-3, 13). Yejua ika tanauatij maj kinmiktianij nochin konemej akin kipiayaj ome xiuit oso ayamo kiajxitiayaj akin nemiaj Belén uan xolalmej tein kiyoualouayaj (xikonixtajtolti Mateo 2:13-18). Maski panok nejon, Jesús amo kimiktijkej. Sayoj ke ¿toni kinextia nejin kemej tamati Satanás? Ke iixpan, tonemilis amo kipia ipatiuj, nion ininnemilis konemej. Yekmelauj, Satanás tamati kemej se tekuani tein nanalkatinemi. Maj amo keman tikelkauakan ke yejua semi tetajyouiltia.

14, 15. ¿Keniuj Satanás kinkajkayaua taltikpakneminij?

¹⁴ Jiova se Dios akin semi tetasojta (1 Juan 4:8). Satanás sayoj ueli kichiua maj taltikpakneminij kiixnamikikan Dios keman kinkajkayaua. ¿Keniuj? Kichiua maj taltikpakneminij amo “[kimachilikan] ke moneki motokiskej iuan Dios” (Mat. 5:3, TNM). Amokuali kinkajkayauani tel miakej taltikpakneminij porin amo kineki maj kiixmatikan keniuj yekmelauj tamati Dios (2 Cor. 4:4).

¹⁵ Satanás kimati ke Jiova kineki maj sayoj yejuatsin tikueyichiuakan (Éx. 20:5). Yejua ika, okachi kinkajkayaua taltikpakneminij ika taneltokalismej tein amo melaujkej. Semi yolpaki keman kichiua maj taltikpakneminij kinueyichiuakan ininuejkaujtatuan, tein onkak iluikak uan taltikpak, tapialmej uan okseki taman, sayoj ke amo Jiova. Akin kichiuaj nejon kinemiliaj ke Dios kiyolpaktia, sayoj ke tein kineltokaj uan tein ika taueyichiuaj amo teyi kualtia. Itech itonaluan tanauatijkej Isaías no ijkon panouaya iniuan israelitas. Jiova kitemoj kinpaleuis keman kijtoj ke taneltokalis tein amo melauak tamati kemej takual tein amo kuali. Yejuatsin kiniluij ke amo taixejekol katka maj kiixtaujtoskiaj teisa tein amo kinixuitiskia. Uan no kijtoj: “Xinechkakikan ika nejmachkayot, uan xikuakan tein kuali” (Is. 55:2).

16, 17. 1) ¿Keyej Jesús kiluij Pedro: “Titanemilijtok keme Satanás”? 2) ¿Keniuj kineki techkajkayauas Satanás?

¹⁶ Satanás no ueli kinkajkayaua itekitikauan Dios akin amo kikauaj. Kemej neskayot, maj tikelnamikikan tein kipanok Jesús keman kiniluij itekitikauan ke amo uejkaua yaya momikiliti. Pedro kiteltasojtaya Jesús, yejua ika kiluij maj moikneliani. Sayoj ke Jesús kiluij: “Ximijkuani de nikan noixpan,  Pedro, porin majya titanemilijtok keme Satanás” (Mat. 16:22, 23). ¿Keyej kiluij nejon? Porin Jesús kimatia ke monekia momikilis uan ijkon kinmakixtis taltikpakneminij uan kinextis ke Satanás se takajkayaujkej. Nejon tonal semi monekia. Yejua ika, amo ueliskia sayoj itech tanemilis. Tikyekmatij ke Satanás kitelyolpaktiskia maj Jesús kipatani itanemilil.

¹⁷ Nochi tein amo kuali tein mochiujtok amo uejkaua tamiti. Yejua ika tejuan no timoajsij itech seki tonalmej tein motelnekij. Sayoj ke Satanás kineki maj sayoj totech titanemilikan uan maj tiktemokan sayoj tejuan timoyolpaktiskej ika tein onkak nikan taltikpak. Kineki maj tikneltokakan ke uejkauaok poliui keman ejkos tamilis oso hasta ke amo keman ejkos. Sayoj ke nejon se takajkayaualis. Maj titachixtokan uan maj amo tikelkauakan ke tinemij itech itamian tonalmej (Mat. 24:42).

18, 19. 1) ¿Toni kineki Satanás maj tiknemilikan? 2) ¿Keniuj techpaleuia Jiova?

¹⁸ Satanás no kineki maj tikneltokakan ke Jiova amo techtasojta uan ke amo keman techtapojpoluis. Sayoj ke nejon no se takajkayaualis. Biblia kijtoua: “Yejuatsin amo keman kelkauatiu de keniu namejuan nanmotekitiltijke para Dios. Uan no Yejuatsin amo keman kelkauatiu de keniu [nankitasojtaj]” (Heb. 6:10). Kemej tikitaj, Jiova kipatiuita nochi tein tikchiuaj keman tiktekitiliaj (xikonixtajtolti 1 Corintios 15:58). Tein melauj, yejua Satanás akin Jiova amo kitasojta uan akin amo kitapojpoluis. Yejua ika maj amo timokauakan maj Amokuali techkajkayaua.

¹⁹ Itech nejin tamachtilis tikitakej ke Satanás kipia miak chikaualis, tetajyouiltia uan kineki techkajkayauas. Sayoj ke uelis tikixnamikiskej porin Jiova techpaleuia. Itech Biblia yejuatsin techiluia ke Satanás kitekitiltia tataman tamekauilis, uan nejin techpaleuia maj titachixtokan porin “tikmatinemij de keniu in Satanás tekajkayautinemi” (2 Cor. 2:11). Sayoj ke amo moneki sayoj tikmatiskej katiyejua nejon tamekauilis. Moneki tiktemoskej keniuj amo techuetsiltis. Yejua ika Biblia kijtoua: “Xikixtopeuakan in amokuali Satanás uan ijkon yejua namechtapatauilis [oso namechtalkauis]” (Sant. 4:7). Itech okse tamachtilis tikitaskej keniuj uelis tikixnamikiskej eyi tamekauilis tein kikui Satanás.