1. ¿Keyej kijtoj Pablo ke Cristo yejua ichikaualis Dios?

KEMAN Jesús yetoya nikan taltikpak, kichiuak miak uejueyi tachiualismej tein se kimoujkaita. Komo tikixtajtoltiaj itech Biblia kampa ika tajtoua nejon uejueyi tachiualismej, okachi mochikauas totakuaujtamatilis (Mat. 9:35; Luc. 9:11). Jesús uelik kichiuak nejon uejueyi tachiualismej porin Jiova kimakak ichikaualis. Yejua ika tatitanil Pablo kijtoj ke “Cristo yejua ne kualkui in chikaualis [...] de Dios” (1 Cor. 1:24). Sayoj ke ¿toni techmachtia uejueyi tachiualismej tein kichiuak Jesús?

2. ¿Toni techmachtiaj uejueyi tachiualismej tein kichiuak Jesús?

² Uejueyi tachiualismej tein kichiuak Jesús techmachtiaj miak taman (Hech. 2:22). Kemej neskayot, techmatiltiaj ke ijkuak Jesús tekiuajtitos 1,000 xiujmej, kichiuas uejueyi tachiualismej tein kinpaleuis nochin akin nemiskej nikan taltikpak. No techpaleuiaj maj okachi kuali tikixmatikan ikualneskayouan yejua uan Jiova. Itech nejin tamachtilis ika  titajtoskej eyi uejueyi tachiualismej tein kichiuak Jesús uan tikitaskej keniuj uelis techpaleuiskej axkan uan satepan.

3. 1) ¿Toni panok itech se nenamiktilis tein mochiuak itech xolal Caná? 2) ¿Keyej Jesús kichiuak nejin ueyi tachiualis?

³ Jesús kichiuak iyekinika ueyi tachiualis itech se nenamiktilis tein mochiuak itech xolal Caná. Amo se kimati keyej, sayoj ke vino amo kinajsiskia nochin akin kinyoleujkaj itech iluit. Nejin kinpinaujkataliaya namikuanij, porin yejuan monekia kintakachiuaskej nochin akin kinyoleujkaj. Yejua ika, María kitajtanij Jesús maj kinpaleuiani namikuanij. ¿Keyej? Yejua kuali kiixmatia tein achtook moijtojka ke kichiuaskia Jesús uan kimatia ke kitokaytiskiaj “ikoneu de Totajtsin Dios in kachi ueyi chiuke” (Luc. 1:30-32; 2:52). Yejua ika María xa kinemiliaya ke Jesús ueliskia kinpaleuis. Tein kemaj tikyekmatij yejua ke María uan Jesús kinekiaj kinpaleuiskej nejon namikuanij. Yejua ika, Jesús kichiuak maj tel miak litro at mokepani itech tel kuali vino (xikonixtajtolti Juan 2:3, 6-11). Jesús amo kipiaya keyej kichiuas nejon ueyi tachiualis, sayoj ke kichiuak porin ininka motekipachouaya taltikpakneminij. Yejua kichiujtoya ijkon kemej Jiova, akin kiuelita kitemakas teisa.

4, 5. 1) ¿Toni techmachtia keman Jesús kichiuak maj miak at mokepani vino? 2) ¿Toni techyekmatiltia nejin ueyi tachiualis?

⁴ Ika ichikaualis Jiova, Jesús kichiuak maj onkani tel miak vino tein okachi kuali, kemej kinajsiskia tel miakej taltikpakneminij. Nejon ueyi tachiualis techmachtia ke Jiova uan Jesús kiuelitaj kitemakaskej teisa uan kiitaj tein tikmachiliaj uan techpaleuiaj. Uan no, techyekmatiltia ke Jiova kinmakas akin nemiskej itech Xochital miak tein kikuaskej (xikonixtajtolti Isaías 25:6).

⁵ Maj itech titanemilikan nejon. Keman tinemiskej itech Xochital, Jiova kiitas maj amo teyi techpolo. Tinochin tikpiaskej se kualtsin kali uan kuali takual. Semi timotasojkamatij keman itech titanemiliaj nochi tein kuali tein Jiova techmakas.

6. 1) ¿Keniuj Jesús kitekitiltiaya ichikaualis? 2) ¿Keniuj uelis tikchiuaskej kemej Jesús?

⁶ Jesús amo keman kitekitiltij ichikaualis kemej ueliskia mopaleuis yejua. Kemej neskayot, ¿toni kichiuak keman Amokuali kitemouaya maj tajtakouani keman kiluij maj seki tet kikepani pan? Amo kinekik kichiuas (Mat. 4:2-4). Yejua  kitekitiltiaya ichikaualis keman kichiuaya tein kuali tein ika kinpaleuiaya oksekin. ¿Keniuj uelis tikchiuaskej kemej yejua? Jesús kijtoj ke moneki timomatiskej tikchiuaskej tein kuali tein ika tikinpaleuiskej oksekin (Luc. 6:38). ¿Uan toni uelis tikchiuaskej? Uelis tikinyoleuaskej maj takuatij tochan. No uelis tepitsin iniuan tiyetoskej satepan ke tamis nechikol, xa keman tikakiskej aksa akin moneki momamachtis se tanojnots. Uan xa uelis tikinpaleuiskej akin momachtijtokej keniuj tanojnotsaskej. Nochipa keman tikuelitaj titemakaskej teisa uan tikinpaleuiaj oksekin, tikchiujtokej ijkon kemej Jesús.

7. ¿Toni kuejmol nochipa onkas ijkuak Satanás taixyekantosok?

⁷ Axkan moajsij miakej akin kipanouaj tatasojtilis noyampa taltikpak. Sayoj ke nejin kuejmol ipa onkayaya ne uejkauj. Jiova kiniluij israelitas: “Nochipa moajsis aksa akin kipanoua tatasojtilis itech taltikpak” (Deut. 15:11). Uan miak xiujmej satepan, Jesús kijtoj: “Nachipa namouan yetoske ne naken amo teyi kipia” (Mat. 26:11). ¿Kijtosnekia ke nochipa moajsiskej akin kipanouaj tatasojtilis oso amo teyi kipiaj? Amo. Yejua kinekia kijtos ke moajsiskej akin kipanouaj tatasojtilis ijkuak Satanás taixyekantosok. Sayoj ke itech Xochital nochi taman yeski. Ompa nochin kipiaskej toni kikuaskej uan amo akin kipanos tatasojtilis.

8, 9. 1) ¿Keyej Jesús kintamakak tel miakej taltikpakneminij? 2) ¿Keniuj tionmomachilia keman itech tiontanemilia nejin ueyi tachiualis?

⁸ Salmo 145:16 kijtoua ke Jiova kitapoua imay uan kimaka nochi tein yoltok tein kipoloua. Keman Jesús yetoya nikan taltikpak, kichiuak ijkon kemej iTajtsin uan kinmakak miakej taltikpakneminij tein kinpolouaya. Sayoj ke nejon amo kichiuak porin kinekia kinextis ke kipiaya miak chikaualis. Kichiuak porin yekmelauj kinekia kinpaleuis. Kemej neskayot, maj tikitakan tein kijtoua Mateo 14:14-21 (xikonixtajtolti). Tel miakej taltikpakneminij akin ualeuayaj itech tataman xolalmej ojtokakej uan ajsitoj kampa moajsia Jesús (Mat. 14:13). Keman tapoyauik, imomachtijkauan kiitakej ke taltikpakneminij sioujtoyaj uan mayanayaj. Yejua ika kiluijkej Jesús maj kiniluiani nochin maj yanij uan maj mokouilianij tein kikuaskiaj. ¿Toni kichiuak Jesús?

⁹ Jesús kintamakak nejon tel miakej taltikpakneminij ika sayoj makuil pan uan ome amichimej. ¿Keyej kichiuak nejin ueyi tachiualis? Porin yejua kintasojta taltikpakneminij uan ininka motekipachoua. Uan kinmakak miak takual, porin Biblia kijtoua ke nochin takuajkej hasta ixuikej. Tein kikuajkej kinmakak chikaualis tein kinpaleuiskia maj taxikouanij keman mokepaskiaj ininchan kampa semi uejka katka (Luc. 9:10-17). Mokauak miak takual, ta imomachtijkauan kipexontijkej 12 chikiujmej.

10. ¿Toni panos amo uejkaua ika tatasojtilis?

 ¹⁰ Tel miakej taltikpakneminij kipanouaj tatasojtilis porin tekiuanij amo kichiuaj tein melauak uan sayoj kitayekanaltiaj inintanejnekilis. Hasta seki itaixpantijkauan Jiova amo semi kipiaj toni kikuaskej. Sayoj ke Dios ueli uan kineki kinmakas nochin taltikpakneminij tein ika moixpanoltiskej. Yejuatsin motenkaua ke kitamis tatasojtilis (xikonixtajtolti Salmo 72:16). Amo uejkaua, akin kitakamatij Dios nemiskej itech se taltikpak kampa nion akin kichiuas tein amo melauak uan nion akin kipanos tatasojtilis.

11. 1) ¿Keyej ueli tikyekmatij ke amo uejkaua Cristo kitekitiltis ichikaualis uan ijkon kinpaleuis nochin taltikpakneminij? 2) ¿Toni tiknekij tikchiuaskej keman itech titanemiliaj tein Cristo kichiuas?

¹¹ Keman Jesús yetoya nikan taltikpak, eyi xiuit uan tajko kichiuak uejueyi tachiualismej itech sayoj seki xolalmej (Mat. 15:24). Sayoj ke axkan moajsi kemej tekiuaj, uan keman taixyekantos 1,000 xiujmej uelis kinpaleuis nochin taltikpakneminij (Sal. 72:8). Ika uejueyi tachiualismej tein kichiuak, Jesús kinextij ke kineki kitekitiltis ichikaualis uan ijkon techpaleuis. Yejua ika tikyekmatij ke amo uejkaua kichiuas. Keman itech titanemiliaj nejon, tiknekij tikuiskej totonaluan uan tochikaualis kemej uelis tikinpaleuiskej oksekin (Sal. 45:1; 49:3). Semi melauak ke tejuan amo tiuelij tikchiuaj uejueyi tachiualismej. Sayoj ke kemaj ueli tikintapouiaj taltikpakneminij tein kuali tein Dios motenkaua kichiuas. Tein melauj, yejua nejon moneki tikchiuaskej (Rom. 1:14, 15).

12. ¿Keniuj tikyekmatij ke Jesús kuali kiajsikamati keniuj tekiti nochi tein onkak itech taltikpak?

¹² Biblia kijtoua ke ijkuak Dios kichijchiuak taltikpak, Jesús iuan yetoya uan kipaleuijtoya kemej se tel kuali tekitikej (Prov. 8:22, 30, 31; Col. 1:15-17, TNM). Yejua ika Jesús kuali kiajsikamati keniuj tekiti nochi tein onkak itech taltikpak uan kimati keniuj kitsakuilis chikaualis tein kipia itachijchiualis Dios, kemej ejekat uan ueyiat.

13, 14. Xikonijto se neskayot tein kinextia ke Jesús ueli kitsakuilia tetsaujmej.

¹³ Keman Jesús yetoya nikan taltikpak, kinextij ke uelia kitsakuiliaya chikaualis tein kipia itachijchiualis Dios. Kemej neskayot, se tonal kitekitiltij chikaualis tein Dios kimakak uan kitamatilij se “ueyi tetsaukaejekat” (xikonixtajtolti Marcos 4:37-39). Se tamatkej kijtoua ke tajtol griego tein nikan mokuik kemej “tetsaukaejekat” kiteajsikamatiltia se chikauak kiouaejekat, keman tel tatileui, chikaujkaejeka, tatitikuini uan tel kioui. Nejon yejua tetsaujkakiouit tein tel tauejueloua. Tatitanil Mateo no ika tajtoj nejon tetsaujkaejekat (Mat. 8:24).

 ¹⁴ Xikonnemili tein panotoya. Ueyiat kiuiuitekia barco uan tel taakalakia. Tetsaujkaejekat kichiuaya maj tel chikauak takakistini, uan at kiuiuikaya barco. Maski ijkon, Jesús kochtoya porin tel sioujtoya. Sayoj ke imomachtijkauan tel mouiaj. Yejua ika kijxitijkej uan kiluijkej ke yayaj momikilitij (Mat. 8:25). ¿Toni kichiuak Jesús? Moketsak uan kiluij ejekat uan ueyiat: “Ximotamatili” (Mar. 4:39). ¡Uan tetsaujkaejekat motamatilij! Nejin kiyeknextia ke Jesús ueli kitsakuilia chikaualis tein kipia itachijchiualis Dios.

15. ¿Keniuj tikmatij ke Jiova kitsakuilia chikaualis tein kipia itachijchiualis?

¹⁵ Jiova kimakak Cristo chikaualis tein kipaleuij maj kitsakuiliani chikaualis tein kipia itachijchiualis yejuatsin. Yejua ika tikyekmatij ke Jiova no ueli kitsakuilia. Kemej neskayot, achto ke mochiuaskia Tetsaujkakiouit, yejuatsin kijtoj: “Poliui sayoj chikome tonal uan nitakiouiltiti itech taltikpak omepoual tonal uan omepoual youal” (Gén. 7:4). Uan no, Éxodo 14:21 kijtoua ke Dios kichiuak maj “se chikaujkaejekat tein ualeuaya tonalkisayampa” kitajkoxelouani se ueyiat. Uan Jonás 1:4 kijtoua ke okse tonal kichiuak maj “tel tetsaujkakioui itech ueyiat”. Semi techyolseuia tikmatiskej ke itech Xochital Dios kitsakuilis chikaualis tein kipia itachijchiualis.

16. ¿Keyej techyolseuia tikmatiskej ke Jiova uan Jesús kitsakuiliaj chikaualis tein kipia itachijchiualis yejuatsin?

 ¹⁶ ¿Keyej techyolseuia tikmatiskej ke Jiova uan Jesús kitsakuiliaj chikaualis tein kipia itachijchiualis yejuatsin? Porin nejon kijtosneki ke ijkuak Cristo taixyekantos 1,000 xiujmej, amo kiouaejekas, ueyiat amo motelajkotamotas, sektepemej amo kikixtiskej tit uan amo talolinisok. Amo tikmouiliskej maj mochiua tetsaujmej, porin Jiova kinyekpias nochin taltikpakneminij (Apoc. 21:3, 4). Tikyekmatij ke Cristo kitekitiltis chikaualis tein Dios kimakatok uan ika nejon kitsakuilis chikaualis tein kipia itachijchiualis yejuatsin.

17. ¿Keniuj uelis tikchiuaskej kemej Dios uan Cristo?

¹⁷ ¿Keniuj uelis tikchiuaskej kemej Jiova uan Cristo? Tejuan amo tiuelij tikchiuaj uejueyi tachiualismej, sayoj ke kemaj tiuelij tikchiuaj tein kijtoua Proverbios 3:27 (xikonixtajtolti). Keman tokniuan tajyouiaj, uelis tikinmakaskej tein kinpoloua uan tikinyolseuiskej (Prov. 17:17). Nejin uelis tikchiuaskej satepan ke mochiua se tetsauit. Kemej neskayot, satepan ke panok se chikauak kiouaejekat, ichan se tokniuj siuat akin amo nemiok itakauj tel uejueliuik. Keman tokniuan kipaleuijkej, yejua kijtoj ke semi kitasojkamati pouis kemej itaixpantijkauj Jiova, amo sayoj porin kimakakej miak taman, ta okachi porin kipaleuijkej maj mochikaua ikuali uikalis iuan Jiova. No ijkon kipanok se tokniuj siuat akin iselti. Yejua semi motekipachojtoya porin se chikauak kiouaejekat kiuejueloj ichan. Sayoj ke tokniuan kipaleuijkej maj kiyektaliani. Yejua kijtoj ke amo kimatia keniuj kimelauas kemej momachiliaya. Uan ompa kijtoj: “Tasojkamatik, Jiova”. Tinochin tiktasojkamatij maj moajsikan tokniuan takamej uan siuamej akin toka motekipachouaj. Sayoj ke okachi tiktasojkamatiliaj Jiova uan Jesucristo porin techyekpiaj.

18. Keman tikonnemilia keyej Jesús kichiuak uejueyi tachiualismej, ¿toni tikonmoujkaita?

¹⁸ Keman Jesús yetoya nikan taltikpak, kinextij ke “yejua ne kualkui in chikaualis [...] de Dios”. Sayoj ke amo keman kichiuak uejueyi tachiualismej porin kinekia maj kiueyichiuanij oso sayoj yejua mopaleuis. Yejua nochipa kichiuak uejueyi tachiualismej porin yekmelauj kintasojtaya taltikpakneminij uan kinekia kinpaleuis. Itech okse tamachtilis okachi ika titajtoskej nejon.