1. ¿Toni kinemiliaj miakej taltikpakneminij itech nejin tonalmej?

ITECH nejin tonalmej, tel miakej amo kipoujkaitaj itanauatiluan Dios tein kinextiaj keniuj moneki se monejnemiltis. Kinemiliaj ke kuali yetok maj se takat uan se siuat mosentekakan maski amo namikuanij oso maj mosentekakan takamej iniuan takamej oso siuamej iniuan siuamej. Itech miak películas, amatajkuilolmej, nekuikatilmej uan kampa moteixmatiltia teisa ixnesij taltikpakneminij akin kichiuaj nejin (Sal. 12:8). Maski itech nejin tonalmej semi moita auilnemilis, Jiova uelis techpaleuis maj tichipaujkanemikan (xikonixtajtolti 1 Tesalonicenses 4:3-5).

2, 3. 1) ¿Keyej moneki maj timoijkuanilikan amo kuali tanemililmej? 2) ¿Toni tikitaskej itech nejin tamachtilis?

² Tinochin titajtakouanij. Yejua ika uelis techyoltilanas seki taman tein amo kuali, ijkon kemej amichimej kinyoltilana takual tein ika kinkitskiaj. ¿Toni moneki tikchiuaskej komo tiknemiliaj teisa tein amo kuali? Moneki niman timoijkuaniliskej nejon tanemilil. Komo amo timoijkuaniliaj, nejon tanejnekilis okachi  moskaltis. Uan keman timoajsiskej kampa uelis tikchiuaskej tein tiknemiliaj, xa titajtakoskej (xikonixtajtolti Santiago 1:14, 15). Yejua ika, komo tiknekij tikyolpaktiskej Jiova, motelneki maj timoijkuanilikan amo kuali tanemililmej.

³ Kemej tikitaj, moneki timoyekpiaskej ika tein tiknemiliaj. Komo timoijkuaniliaj amo kuali tanejnekilis, amo tiauilnemiskej nion tikijyouiskej tein amo kuali tein kiualkui nejon tajtakol (Gál. 5:16). Itech nejin tamachtilis tikitaskej eyi taman tein techpaleuis maj timoijkuanilikan amo kuali tanejnekilis. Yekinika, tokuali uikalis iuan Jiova. Ojpatika, tayolmajxitilis tein kitemaka Biblia. Uan expatika, ininnepaleuil tokniuan akin kipiaj kuali taixejekolis.

4. ¿Keniuj techpaleuia tokuali uikalis iuan Dios?

⁴ Biblia kiniluia akin kinekij kuali mouikaskej iuan Jiova: “Xikchipauakan nanmomauan” uan “ximoyolchijchipauakan” (Sant. 4:8). Nejin kijtosneki ke akin kuali timouikaj iuan Jiova tikchiuaj uan tiknemiliaj tein yejuatsin kiyolpaktia. Kemej tiknekij tiksentokaskej kuali timouikaskej iuan, timochikauaj amo tikchiuaskej nion teyi tein kiyolxokolis uan sayoj itech titanemiliskej tein chipauak (Sal. 24:3, 4; 51:6; Filip. 4:8). Semi melauak ke Jiova kimati ke titajtakouanij uan ke kemansa uelis peuas tikpiaskej amo kuali tanejnekilis. Sayoj ke kemej amo tiknekij tikyolxokoliskej, timochikauaj timoijkuaniliskej uan sayoj itech titanemiliskej tein chipauak (Gén. 6:5, 6).

5, 6. ¿Keniuj techpaleuia netataujtil maj timoijkuanilikan amo kuali tanejnekilis?

⁵ Komo nochipa tiktataujtiaj Jiova, yejuatsin techpaleuis maj timoijkuanilikan amo kuali tanejnekilis. Techmakas yektikatsin espíritu uan chikaualis tein techpaleuis maj tichipaujkanemikan. Keman tiktataujtiskej uelis tikiluiskej ke sayoj tiknekij tiknemiliskej tein yejuatsin kiyolpaktia (Sal. 19:14). Uan no, uelis tiktajtaniskej ika yolyemanilis ox kiita teisa tein amo kuali itech toyolo tein uelis techuikas maj titajtakokan (Sal. 139:23, 24). No uelis tiktajtaniskej maj techpaleui maj amo tiauilnemikan, okachiok ijkuak timoajsiskej kampa uelis titajtakoskej (Mat. 6:13).

⁶ Uelis yeski ke achto ke timochiuaskiaj tiitaixpantijkauan Jiova tikuelitayaj tikchiuaskej seki taman tein amo kuali. Uan kemansa xa tikyolnejnekijok tikchiuaskej. Sayoj ke Jiova uelis techpaleuis maj timopatakan. Yejua nejon kipanok tekiuaj David. Yejua motekak iuan se siuat akin amo katka inamik. Sayoj ke satepan moyolnonotsak uan kitajtanij Jiova maj kimakani “se yolo chipauak” uan maj kipaleuiani maj tatakamatini (Sal. 51:10, 12). Yejua ika, komo tejuatsin tionmochikaujtok tionmoijkuanilis amo kuali tanejnekilis, xikontajtani Jiova maj mitsonpaleui. Yejuatsin mitsonpaleuis okachi xikonyolnejneki xikontakamati uan amo xikonpia amo kuali tanemililmej (Sal. 119:133).

7. ¿Keniuj techpaleuia Biblia maj timoijkuanilikan amo kuali tanejnekilis?

⁷ Jiova ueli kinankilia tonetataujtiluan ika tayolmajxitilis tein kitemaka Biblia. Ompa tikajsij itamatilis Dios, tein chipauak (Sant. 3:17). Komo mojmostaj tikixtajtoltiaj Biblia, sayoj itech titanemiliskej tein chipauak (Sal. 19:7, 11; 119:9, 11). Itech Biblia no tikajsij tayolmajxitilismej uan neskayomej tein techpaleuiaj maj timoijkuanilikan amo kuali tanejnekilis.

8, 9. 1) Kemej kijtoua Proverbios capítulo 7, ¿keyej se telpoch motekak iuan se siuaauilnenkej? 2) ¿Toni taman semi tamouilil?

 ⁸ Itech Proverbios 5:8, Biblia technejmachtia maj amo timoajsikan kampa uelis tiauilnemiskej. Uan itech capítulo 7 tikixtajtoltiaj tein kipanok se telpoch akin keman tayouak nenemito kampa ika nemia se siuaauilnenkej. Siuat ijkatoya ojtenoj uan takentoya kemej se siuaauilnenkej. Keman kiitak telpoch, motokij kampa yetoya, kipitsoj oso kitennamikik uan kiluij seki tajtolmej tein kichiuak maj kinejnekini iuan motekas. Keman telpoch kisak ichan amo kinemilijtiyaya tajtakos. Sayoj ke kemej amo moijkuanilij amo kuali tanejnekilis, tajtakoj. Uan kijyouij tein amo kuali tein kiualkuilij nejon tajtakol. Komo kinemiliani ke ueliskia mokalakis itech se ueyi ouijkayot, amo yaskia kampa ika moajsia nejon siuat (Prov. 7:6-27).

⁹ Tejuan no uelis tikchiuaskej tein amo kuali komo amo tiknemiliaj ke semi tamouilil maj timoajsikan kampa uelis titajtakoskej. Kemej neskayot, uelis yeski tamouilil maj tikpapatakan canal itech televisión keman youakya sayoj porin tiknekij tikitaskej toni kipanoltijtokej okseko. ¿Keyej? Porin uelis timoajsiskej ika neixpetanilis kampa moita auilnemilis. Uan komo tiktekitiltijtokej Internet, semi tamouilil maj tiktapokan teisa maski amo tikmatij toni moitas, oso maj tiktapokan páginas kampa moita auilnemilis oso kampa moteixmatiltia seki taman tein uelis se kiixtauas tein mouika ika auilnemilis. Komo tikchiuaj nejon, uelis tikitaskej seki taman tein kichiuas maj tikpiakan amo kuali tanejnekilis uan techuikas maj amo tiktakamatikan Jiova.

10. ¿Toni uelis techpanos komo amo tikchiuaj tein kijtoua 1 Timoteo 5:2? (Xikonita taixkopin ipeujyan tamachtilis.)

 ¹⁰ Biblia no techiluia keniuj moneki mouikaskej takamej uan siuamej (xikonixtajtolti 1 Timoteo 5:2). Itaixpantijkauj Jiova akin namikej sayoj inamik kinextilia ke kitasojta. Uan akin iselti sayoj kinextilia ke kitasojta akin kineki iuan monamiktis. Sekin kinemiliaj ke komo se takat uan se siuat amo monetechouaj, kuali yetok komo kinextiaj ke moixuelitaj kemej moixuetskiliaj, kemej moixitaj oso ika tein kichiuaj. Sayoj ke keman omen kichiuaj nejon, uelis peuas kipiaskej amo kuali tanejnekilis uan nejin uelis kinuikas maj auilnemikan. Nejin kinpanokya oksekin, uan no uelis techpanos tejuan.

11. ¿Toni techmachtia ineskayo José?

¹¹ Uelis techtelpaleuis kuali neskayot tein kikauak José. Inamik iteko kitemouaya kichiuas maj José iuan motekani. José kiluij ke amo, sayoj ke siuat kisentokaya kitemouaya maj iuan motekani. Mojmostaj kitajtaniaya maj mokauanij ininselti (Gén. 39:7, 8, 10). Se tamatkej kimelaua ke siuat xa kinemiliaya ke komo mokauayaj ininselti, xa yejua José kinemiliskia iuan motekas. Sayoj ke José kiixtalijka amo iuan motasojtas nion mokauas maj kitanejnektiani tein siuat kichiuaya. Nejon kipaleuij maj amo kipiani amo kuali tanejnekilis. Se tonal, siuat kikitskij José itech itilmaj uan kitemoj kichikaujkauis maj iuan motekani. Sayoj ke José “kikauak itaken imako” siuat uan choloj (Gén. 39:12).

12. ¿Keniuj tikmatij ke tein tikitaj uelis kichiuas maj tikpiakan amo kuali tanejnekilis?

¹² Tein tikitaj uelis kichiuas maj tikpiakan amo kuali tanejnekilis. Jesús kijtoj ke komo se takat kiita se siuat akin amo inamik porin kinejneki iuan motekas, kichiuakya nejon tajtakol itech iyolo (Mat. 5:28). Yejua nejon kipanok tekiuaj David. Biblia kijtoua ke “ompa kalkuako kiuejkaitak se siuat akin mopajpaktoya” (2 Sam. 11:2). Siuat kipiaya inamik. Sayoj ke David amo okseko tachiak, ta kisentokak kiitstoya uan itech tanemilijtoya. Ika tamik, iuan motekak nejon siuat.

13. 1) ¿Keyej motelneki tikchiuaskej “se netenkaualis” iuan toixtololouan? 2) ¿Toni kijtosneki tikchiuaskej “se netenkaualis” iuan toixtololouan?

¹³ No uelis techtelpaleuis ineskayo Job. Yejua kijtoj: “Se netenkaualis nikchiuak iuan noixtololouan” (Job 31:1, 7, 9). Motelneki tiktojtokaskej ineskayo uan tikchiuaskej “se netenkaualis” iuan toixtololouan. ¿Keyej? Porin nejon techpaleuis maj amo tikpiakan amo kuali tanejnekilis. Sayoj ke ¿toni kijtosneki tikchiuaskej “se netenkaualis” iuan toixtololouan? Kijtosneki tikixtaliskej amo keman tikitaskej aksa porin tiknejnekij iuan tiauilnemiskej. Uan komo ixnesi auilnemilis itech se computadora, itech se ueyi amat, se amatajkuilol oso kansaika, niman moneki okseko titachiaskej.

14. ¿Toni moneki tikchiuaskej tein techpaleuis maj tichipaujkanemikan?

¹⁴ Komo tikonnemilia ke se taman tein tikitakejya moneki tikonpatas, niman xikonchiua. Komo tiktakamatij Jiova, uelis tikixtopeuaskej auilnemilis uan tichipaujkanemiskej (xikonixtajtolti Santiago 1:21-25).

15. Komo mitsonouijmaka tionmoijkuanilis amo kuali tanejnekilis, ¿keyej moneki tiontajtanis maj mitsonpaleuikan?

¹⁵ Komo mitsonouijmaka tionmoijkuanilis amo kuali tanejnekilis, xikontajtani inepaleuil se tokniuj akin uejkaujya kitekitilijtok Jiova uan uelis kuali mitsonyolmajxitis  ika tein kijtoua Biblia. Semi melauak ke teouijmaka ika se tajtos tein se kimachilia, sayoj ke moneki xikonchiua (Prov. 18:1; Heb. 3:12, 13). ¿Keyej? Porin tokniuan akin kipiaj kuali taixejekolis uelis mitsonpaleuiskej ika tein kijtoua Biblia xikonita toni moneki tikonpatas. Ijkon uelis tikonsentokas kuali tionmouikas iuan Jiova.

16, 17. 1) Xikonmelaua ika se neskayot keniuj tayekananij kinpaleuiaj akin kitemouaj moijkuaniliskej amo kuali tanejnekilis. 2) ¿Keyej motelneki maj akin kiitaj auilnemilis niman tajtanikan maj kinpaleuikan?

¹⁶ Tayekananij itech nechikol yejuan akin okachi kuali uelis techpaleuiskej (xikonixtajtolti Santiago 5:13-15, TNM). Maj tikitakan tein kipanok se telpoch akin nemi Brasil. Yejua kijtoua ke miak xiujmej kiouijmakak kiixtopeuas amo kuali tanejnekilis. Yejua kijtoua: “Nikmatia ke tein niknemiliaya amo kiyolpaktiaya Jiova, sayoj ke semi nimopinaujmatia niktapouis aksa”. Se tayekankej kiitak ke telpoch monekia kiselis nepaleuil, yejua ika kiyolchikauak maj iniuan tajtouani tayekananij. Telpoch kijtoua: “Tayekananij nechnextilijkej netasojtalis uan nechajsikamatkej. Nejon semi nikmoujkaitak, porin nikmachiliaya ke amo nechnamikia maj ijkon kichiuanij nouan. Kuali nechkakkej, kitekitiltijkej Biblia uan ijkon nechelnamiktijkej ke Jiova nechtasojta uan nouan kichiujkej netataujtil. Nochi nejon nechpaleuij maj nikchiuani tein nechyolmajxitijkej ika Biblia”. Axkan kipiaya se kuali uikalis iuan Jiova. Yejua kijtoua: “Axkan nikmati ke okachi kuali maj se kitemo nepaleuil uan amo maj se iselti se mochikaua se moijkuanilis amo kuali tanejnekilis”.

¹⁷ Komo tejuatsin tikonita auilnemilis, motelneki niman xiontajtani nepaleuil. ¿Keyej? Porin komo amo niman tikonchiua, okachi uelis mitsonuikas xiontajtako. Komo panoua nejon, semi tikonijtakos mochankauan uan motasojikniuan. Uan no, tikonchiuas maj taltikpakneminij amo kuali ika tajtokan Dios. Miakej kintajtanianij tayekananij maj kinpaleuikan uan kichiuanij tein kinyolmajxitianij. Nejon kinpaleuiani maj kisentokakan kuali mouikakan iuan Jiova uan maj kisentokakan pouikan itech nechikol (Sal. 141:5; Heb. 12:5, 6; Sant. 1:15).

18. ¿Toni moneki tiksentokaskej tikchiuaskej?

¹⁸ Itech nejin taltikpak kampa Satanás taixyekantok okachi mochiua tein amo kuali. Sayoj ke tiitekitikauan Dios timochikauaj timoijkuaniliskej amo kuali tanejnekilis uan tichipaujkanemiskej. Uan Jiova semi kiyolpaktia tein tikchiuaj. Yejua ika, maj tiksentokakan kuali timouikakan iuan Jiova, maj tikchiuakan kemej techyolmajxitia itech Biblia uan maj tikselikan ininnepaleuil tokniuan akin kipiaj kuali taixejekolis. Komo tikchiuaj, tiyolpakiskej uan tiyolseujtoskej (Sal. 119:5, 6). Satepan, Satanás ixpoliuis uan tejuan tinemiskej nochipaya itech se yankuik taltikpak tein chipauak yeski.