1-3. ¿Keyej se tokniuj siuat kiyekmati ke Jiova kinankilij inetataujtiluan?

LANA, se tokniuj siuat akin kichiua tekit kemej precursor regular, amo keman kielkauas tein kipanok keman yajka Alemania itech xiuit 2012 uan yaya mokepatiya ichan. Yejua kijtoua ke Jiova kinankilij ome inetataujtiluan. Yekinika netataujtil kichiuak keman yaya kampa kisaj aviones. Keman yaya itech tren kitajtanij Jiova maj kipaleui maj kiajsi aksa akin ueliskia kinojnotsas ika iTajtol Dios. Ojpatika netataujtil kichiuak keman ajsik kampa kisaj aviones uan kiluijkej ke avión tein itech mokepaskia kisaskia hasta mostika. Yejua kitajtanij Jiova maj kipaleuiani porin amo semi kipiayaok tomin uan amo kipiaya kani mokauas nejon youak.

² Keman kitamichiuak inetataujtil, aksa kiluij: “Lana, ¿toni tikchiua nikan?”. Katka se takat akin iuan momachtij kaltamachtiloyan. Yejua yetoya iuan imomaj uan iueyinan, akin yajkaj kikauatoj kampa kisaj aviones porin yaya Sudáfrica. Keman Lana kintapouij tein kipanok, nejon siuamej kiyoleujkej maj mokaua ininchan. Uan no, kitajtanijkej miak taman ika tein  kineltoka uan tekit tein kichiua itech tanojnotsalis.

³ Mostika kualkan, Lana kinankilij okachi netajtanilmej ika tein tamachtia Biblia. Uan achto ke mokepaskia ialtepeuj kijkuiloj inintokay, kani nemij uan okseki taman uan ijkon okseki tokniuan ueliskiaj kinkalpanoskej. Axkan kisentoka kichiua tekit kemej precursor uan kiyekmati ke Jiova kinankilij inetataujtiluan (Sal. 65:2).

4. ¿Toni tikitaskej itech nejin tamachtilis?

⁴ Keman tikpiaj kuejmolmej, niman tiktataujtiaj Jiova. Uan yejuatsin techkaki uan techpaleuia ika miak pakilis (Sal. 34:15; Prov. 15:8). Sayoj ke Jesús techmachtij itech padrenuestro ke moajsi okseki taman tein motelneki tein nochipa moneki titajtaniskej keman timotataujtiaj. Itech nejin tamachtilis tikitaskej naui tamanok tein kijtoua padrenuestro uan no tikitaskej keniuj techpaleuia maj nochipa tiktakamatikan Dios (xikonixtajtolti Mateo 6:11-13).

5, 6. ¿Keyej moneki titajtaniskej “totaxkaltsin” maski tikpiaskej toni tikuaskej?

⁵ Jesús amo techmachtij maj tikijtokan “xinechmaka axkan notaxkaltsin tein nechpoloua”, ta techmachtij maj tikijtokan “xitechonmaka axkan totaxkaltsin ten techpoloa”. Se tokniuj takalpanojkej ompa África akin monotsa Victor, kijtoua: “Niktasojkamatilia Jiova porin nonamik uan nejua amo timotekipachouaj tiktemoskej tein tikuaskej nion titaxtauaskej kampa tinemij. Tokniuan akin tikintasojtaj techpaleuiaj maj tikpiakan nejin. Sayoj ke niktajtania Dios maj kinpaleui tokniuan maj kipiakan tein ika moixpanoltiskej maski semi tatasojti itech nejin tonalmej”.

⁶ Tejuan xa amo techpoloua tein tikuaskej, sayoj ke miakej tokniuan kipanouaj tatasojtilis. Uan sekin kipanotokej okseki taman ouijkayomej. Moneki tiktataujtiskej Jiova maj kinpaleui. Sayoj ke no uelis tikchiuaskej seki taman tein ika tikinpaleuiskej. Kemej neskayot, uelis tikinmakaskej seki taman tein tikpiaj. No uelis titemakaskej tomin tein tapaleuia maj mochiua itekiyo Dios semanauak taltikpak. Tikmatij ke tomin tein titemakaj ika kinpaleuiaj tokniuan akin kinpoloua (1 Juan 3:17).

7. ¿Toni neskayot kitemakak Jesús tein ika techmachtia maj amo timoteltekipachokan ika tein moneki tikpiaskej?

⁷ Satepan ke Jesús tamachtij padrenuestro, kitemakak se neskayot tein ika techmachtia maj amo timoteltekipachokan ika tein timoixpanoltiskej. Yejua kijtoj ke xochimej amo kintekipachoua kipiaskej tein moneki porin Jiova kinyekpia. No ijkon, tejuan amo moneki techtekipachos keniuj tikajsiskej tein ika timoixpanoltiskej satepan (Mat. 6:30-34, TNM). Moneki tiyolpakiskej porin tikpiaj tein mojmostaj moneki. Kemej neskayot, uelis tiktajtaniskej Dios maj tikpiakan kani tinemiskej, se tekit tein techpaleuis maj tikpiakan toni tikuaskej uan maj techpaleui maj kuali titaixpejpenakan keman tikpiaskej se kokolis. Sayoj ke, moajsi se taman tein okachi tayekantok tein moneki  titajtaniskej keman timotataujtiskej. ¿Katiyejua?

8. ¿Toni techelnamiktia tajtolmej “xitechonmaka axkan totaxkaltsin ten techpoloa”? (Xikonita taixkopin ipeujyan tamachtilis.)

⁸ Tajtolmej “xitechonmaka axkan totaxkaltsin ten techpoloa” techelnamiktia ke moneki tiktajtaniskej Jiova maj kisentoka techmachti uan maj techpaleui maj tiksentokakan kuali timouikakan iuan. ¿Keyej tikijtouaj nejin? Porin Jesús no kijtoj: “In taka ma nemikan amo sayo ika in takualis san. Ta, no ma yolpepexokatinemikan ika nochi in tajtolme ten Dios techmaktilijtinemi” (Mat. 4:4).

9. ¿Keyej ueli tikijtouaj ke ijkuak titajtakouaj kemej yeskia timotauikaltiaj?

⁹ Itech padrenuestro, Jesús kijtoj: “Xitechtapojpolui tein titauikaj”. Uan okse tonal kijtoj: “Xitechontapojpolui de totajtakoluan” (Mat. 6:12, TNM; Luc. 11:4). Yejua kijtoj nejin tajtolmej porin keman titajtakouaj kemej yeskia timotauikaltiaj. Itech xiuit 1952, amaix La Atalaya kimelauak ke tejuan moneki tiktasojtaskej Dios uan tiktakamatiskej. Keman titajtakouaj, amo tikmakatokej tein moneki. Yejua ika, kemej yeskia timotauikaltiaj iuan. Nejon amaix kijtoj ke komo Jiova kinekiskia, ueliskia amo techitasok kemej tiitasojikniuan. Uan no kijtoj: “Keman titajtakouaj tiknextiaj ke amo tiktasojtaj Dios” (1 Juan 5:3).

10. 1) ¿Keyej Jiova ueli techtapojpoluia? 2) ¿Keniuj timomachiliaj ika tein Jiova toka kichiuani?

 ¹⁰ Moneki mojmostaj tiktajtaniskej Jiova maj techtapojpolui. Yejuatsin techtapojpoluia porin Jesús toka momikilij ajsitokya 2,000 xiujmej. Moneki tiktasojkamatiliskej Jiova porin kitemakak nejin netetayokolil tein kitelpia ipatiuj. Komo Jesús amo toka momikiliani, amo ueliskia techijkuaniliskej tajtakol uan mikilis (xikonixtajtolti Salmo 49:7-9 uan 1 Pedro 1:18, 19). Tajtolmej “xitechontapojpolui de totajtakoluan” techelnamiktia ke nochin tokniuan moneki maj kinpaleui inemilis Jesús tein kitemakak, amo sayoj tejuan maj techpaleui. Moyekita ke Jiova kineki maj no inintech titanemilikan tokniuan uan itech ininkuali uikalis iuan. Se taman kemej uelis tikchiuaskej, yejua keman tikintapojpoluiaj keman techyolxokoliaj. Miakpa, ininnepololuan amo uejueyi. Keman tikintapojpoluiaj tokniuan, tiknextiaj ke tikintasojtaj uan ke tiktasojkamatij maj Jiova techtapojpolui (Col. 3:13, TNM).

11. ¿Keyej moneki tikintapojpoluiskej oksekin?

¹¹ Kemej titajtakouanij, kemansa xa techouijmaka tiktapojpoluiskej se tokniuj (Lev. 19:18). Uan komo no tikintapouiaj oksekin tein tokniuj techchiuilij, xa techpaleuiskej tejuan uan kiixtopeuaskej tokniuj. Uan nejon uelis kichiuas maj itech nechikol moxexelokan. Komo panoua nejon uan amo tikchiuaj nion teyi tein tapaleuis maj moyektali nejon kuejmol, tiknextijtoskej ke amo tiktasojkamatij maj Jesús toka momikiliani (Mat. 18:35). Komo amo tikintapojpoluiaj oksekin, Jiova amo no techtapojpoluis (xikonixtajtolti Mateo 6:14, 15). Sayoj ke komo tiknekij maj Jiova techtapojpolui, moneki amo keman tiueyitajtakoskej (1 Juan 3:4, 6).

12, 13. 1) ¿Toni kipanok Jesús satepan ke moauij? 2) ¿Keyej amo uelis tikintajtakoltiskej oksekin komo tikchiuaj tein amo kuali? 3) ¿Toni kinextij Jesús keman nochipa kitakamatik Dios?

¹² Itech padrenuestro, Jesús kijtoj: “Amo xitechonuika tech in ouijkayot”. Nejin techelnamiktia tein kipanok Jesús satepan ke moauij. Jiova kikauak maj Satanás kitemouani maj Jesús “motajtakolmakani” (Mat. 4:1; 6:13). ¿Keyej kikauak maj panouani nejon? Porin Adán uan Eva kiixtopeujkej Dios kemej taixyekankej uan monekia monankilis nejin netajtanilmej: Keman Jiova kinchijchiuak taltikpakneminij, ¿amo kuali kichiuak teisa? Keman se taltikpaknenkej akin amo kipia tajtakol kiyejyekoskej, ¿uelis amo kikauas Dios? ¿Okachi kuali moajsiskiaj taltikpakneminij komo ininselti moixyekanaj, kemej kiteajsikamatiltij Satanás? (Gén. 3:4, 5.) Jiova kiualtitanik Jesús nikan taltikpak maj kinankiliki nejon netajtanilmej. Sayoj ke nochi nejon netajtanilmej senkis monankilis satepan. Ijkuak, nochin akin nemiskej iluikak uan taltikpak kimatiskej ke yejuatsin Jiova akin okachi kuali taixyekankej.

¹³ Jiova yektik, uan amo kiolinia nion akin maj kichiua tein amo kuali. Tein melauj, yejua Satanás akin kichiua nejon  (Mat. 4:3). Sayoj ke tejuan tikixpejpenaj ox timokauaskej maj techuika maj tikchiuakan tein amo kuali oso amo (xikonixtajtolti Santiago 1:13-15). Maj tiknemilikan tein kichiuak Jesús. Keman Satanás kitemoj kichiuas maj tajtako, Jesús niman kiixtopeuak tayejyekolis tein kitalilij uan kiluij tein kijtoua iTajtol Dios. Jesús kiixtalij amo kikauas Jiova. Sayoj ke Satanás amo mosenkauak. Mochiak hasta keman oksepa ueliskia kiyejyekos (Luc. 4:13). Maski ijkon, Jesús nochipa kitakamatik Dios. Ijkon kinextij ke se taltikpaknenkej akin amo kipia tajtakol, uelis kitakamatis Jiova hasta keman kipanos uejueyi ouijkayomej. Sayoj ke itech nejin tonalmej, Satanás kisentoka techyejyekoua porin kineki maj amo tiktakamatikan Jiova.

14. ¿Toni moneki tikchiuaskej komo tiknekij tikixtopeuaskej tayejyekolis?

¹⁴ Netajtanilmej tein kiskej keman Adán uan Eva kiixtopeujkej Dios kemej taixyekankej ayamo senkis monankiliaj. Yejua ika Jiova kisentoka kikaua maj Satanás kitemo kichiuas maj titajtakokan. Sayoj ke maj tikelnamikikan ke Dios amo techuika maj tikchiuakan tein amo kuali. Yejuatsin totech takuaujtamati uan techpaleuia. Sayoj ke amo techchikaujkauia maj tiktakamatikan. Techkaua maj tejuan tikixpejpenakan ox tiktakamatiskej oso amo. ¿Toni moneki tikchiuaskej komo tiknekij tikixtopeuaskej tein Satanás kitemoua maj tikchiuakan? Moneki kuali timouikaskej iuan Jiova uan nochipa tiktajtaniskej ika netataujtil maj techpaleui. ¿Keniuj technankilis? Maj tikitakan.

15, 16. 1) ¿Katiyejua seki taman tayejyekolis moneki tikixtopeuaskej? 2) ¿Akoni itajtakol komo amo tikixtopeuaj se tayejyekolis?

 ¹⁵ Jiova techpaleuia ika iyektikatsin espíritu maj tikixtopeuakan tayejyekolis tein Satanás techtalilia. No technejmachtia ika Biblia uan itech nechikol toni taman tein tamouilil uelis tikpanoskej. Kemej neskayot, techyolmajxitia maj amo tiktelkuikan tochikaualis, totonaluan uan tomin itech seki taman tein amo techpoloua. Maj tikitakan tein kinpanoua Espen uan Janne, akin namikuanij. Yejuan nemij itech se altepet tein poui Europa kampa amo teouijmaka se kitanis tomin. Itech miak xiujmej yejuan kichiujkej tekit kemej precursor itech se xolal kampa monekiaj okachi tanojnotsanij. Sayoj ke axkan kipiaj ome konemej uan amo uelijok kichiuaj tekit kemej precursor. Tokniuj takat kijtoua: “Miakpa tiktajtaniaj Jiova maj techpaleui maj tikixtopeuakan tayejyekolis axkan ke amo semi tiuelijok tikchiuaj itekiyo Dios. Tiktajtaniaj maj techpaleui maj kisentoka chikauak tokuali uikalis iuan yejuatsin uan maj tiksentokakan titanojnotsakan ika yolpakilis”.

¹⁶ Okse tayejyekolis tein moneki tikixtopeuaskej yejua maj se kiita auilnemilis. Sekin kiitaj auilnemilis porin amo moijkuaniliaj amo kuali tanemililmej. Yejua ika, komo peua tikitaj auilnemilis, amo uelis tiktajtakoltiskej Satanás oso taltikpak kampa taixyekantok. ¿Keyej? Porin yejuan amo uelis techchikaujkauiskej maj tikchiuakan tein amo kuali. Sayoj ke miakej tokniuan takamej uan siuamej kiixtopeuanij nejin tayejyekolis. Nejin kijtosneki ke no tiueliskej (1 Cor. 10:12, 13, TNM).

17. 1) ¿Keniuj tiknextiaj ke tiknekij maj Jiova techpaleui maj Satanás amo techuika maj tikchiuakan tein amo kuali? 2) ¿Toni kichiuas Jiova amo uejkaua?

¹⁷ Keman tikijtouaj “xitechonajchiuili den chikaualis den amokuali”, tiktajtanijtokej Jiova maj techpaleui maj Satanás amo techuika maj tikchiuakan tein amo kuali. ¿Keniuj tiknextiaj ke tiknekij maj techpaleui? Keman timochikauaj ‘amo tipoujtinemiskej ok iuan in taltikpakuanij’ nion tiktasojtaj tein onkak nikan taltikpak (Juan 15:19; 1 Juan 2:15-17). Amo uejkaua, Jiova kitsakuas Satanás uan kiixpolos tein amo kuali tein mochiujtok itech nejin taltikpak. Sayoj ke, hasta maj ejko nejon tonal, moneki tikelnamikiskej ke Satanás tel kualantok porin kimati ke amo kipiaok miak tonalmej. Kichiuas tein yeski uan ijkon kitemos maj amo tiksentokakan tiktekitilikanok Jiova. Yejua ika moneki tiksentokaskej tiktajtaniskej Dios maj techpaleui maj Satanás amo techuika maj tikchiuakan tein amo kuali (Apoc. 12:12, 17).

18. ¿Toni moneki tikchiuaskej komo tiknekij tinemiskej keman amo moajsisok Satanás?

¹⁸ Komo tiknekij tinemiskej keman amo moajsisok Satanás, moneki timonejnemiltiskej ijkon kemej kijtoua padrenuestro. ¿Keniuj? Maj tiksentokakan tiktajtanikan Dios maj uiki iTekiuajyo, maj moueyitali itokay uan maj mochiua itanejnekilis nikan taltikpak. Maj titakuaujtamatikan ke yejuatsin mojmostaj techmakas tein techpoloua tein ika timoixpanoltiskej uan tein techpaleuis maj tiksentokakan tiktakamatikan.