KEMAN Andrea mochiuak itaixpantijkauj Jiova, inamik tel kualanik. * Yejua amo kikauaya maj youi nechikolmej nion maj kijtouani itokay Dios. Uan tel kualania komo kikakia ke kijtouaya tokayit Jiova.

Uan no, inamik kitakaualtij maj kinmachtiani ikoneuan ika Biblia oso maj kinuikani nechikolmej. Nochi nejin semi ouij katka, porin tokniuj siuat monekia ichtaka kinmachtis ikoneuan.

¿Tikonpanouani tejuatsin se taman kemej nejon? Xa se mochankauj mitsonixnamiki porin tionitaixpantijkauj Jiova, uejkaujya tikonpia se kokolis, xa momikilij se mokonetsin oso monamik, oso xa se mochankauj kikauak Jiova. Komo tikonpanouani se taman kemej nejin, ¿toni uelis tikonchiuas uan ijkon tikonsentokas tikontekitilis Jiova?

Tatitanil Pablo kijtoj: “Moneki xikyolikaxijxikojtiyakan tajyouilisme” (Heb. 10:36). Komo ijkon, ¿toni uelis techpaleuis maj titaxikokan?

Keman tikonpanotos kuejmolmej, xikontemo inepaleuil Jiova uan ijkon tiontaxikos. Yejua ika moneki tikonchiuas netataujtil. Yejua nejon kichiuak se tokniuj siuat itokay Ana keman inamik ijsiujkamikik. Kiuikayaj 30 xiujmej kemej namikuanij. Yejua kijtoua: “Yajki tekitito uan amo keman mokepakok. Yekin kipiaya 52 xiujmej”.

Ana monekik peuas tekitis, uan nejon kipaleuij, porin nejon tekit kipaleuiaya maj amo semi tanemiliani itech okseki taman. Maski ijkon, kisentokaya motayokoltiaya. ¿Toni kichiuak? Yejua kijtoua: “Niktapouiaya Jiova keniuj nimomachiliaya uan niktataujtiaya maj nechmakani chikaualis”. Yejua kiyekmati ke Jiova kipaleuij, porin satepan ijkuak kichiuaya netataujtil kuali momachiliaya. Uan kiyolseuia kimatis ke Jiova kiajokuis inamik itech Xochital (Filip. 4:6, 7).

Jiova kinyekmatiltia itekitikauan ke yejuatsin nochipa kikaki ininnetataujtiluan (Sal. 65:2). Uan no, kinmaka tein kinpoloua uan ijkon uelis  kisentokaskej kitekitiliskej. Ika nejin tikitaj ke no uelis mitsonpaleuis xikonsentoka xikontekitili maski tikonpias ouijkayomej.

Jiova no techpaleuia maj titaxikokan ika ininnepaleuil tokniuan itech nechikol. Kemej neskayot, xiontanemili itech tokniuan akin nemiaj itech xolal Tesalónica. Yejuan semi kintajyouiltiayaj, yejua ika monekik maj mosenpaleuianij uan maj mosenyolchikauanij porin ijkon amo kikauaskiaj Jiova (1 Tes. 2:14; 5:11). ¿Keniuj kichiuayaj? Monechikouayaj uan moyekpiayaj ika netasojtalis. ¿Keniuj no uelis tikchiuaskej kemej yejuan?

Moneki kuali timouikaskej iniuan tokniuan itech nechikol uan timoyolchikauaskej se iuan okse. Nejin okachi moneki keman tikpanouaj ouijkayomej (Rom. 14:19). Tatitanil Pablo kitajyouiltijkej uan no kipanok okseki uejueyi ouijkayomej. Sayoj ke Jiova kipaleuij maj taxiko ika ininnepaleuil tokniuan itech nejon tonalmej. Yejua ika Pablo kijtoj ke yejuan semi kiyolchikaujkaj (Col. 4:10, 11). Ijkon kinextijkej ke kitasojtayaj Pablo. ¿Tikonelnamiki tejuatsin se tonal keman tokniuan itech monechikol kijtojkej oso kichiujkej se taman tein ika mitsonyolchikaujkej?

Jiova no techpaleuia inintechkopa tokniuan tayekananij itech nechikol. Yejuan kitekitiltiaj Biblia uan ijkon techyolchikauaj uan techyolmajxitiaj. Biblia kijtoua ke yejuan tamatij “kemej kampa se motatis keman taejeka uan kampa se mopaleuis keman kiouaejeka, kemej miak at tein motaloua kampa tauaktok, kemej iyekauil se ueyi tepejxit kampa tel tauaktok” (Is. 32:2). ¿Melauj ke semi techyolseuia maj moajsikan tayekananij itech nechikol? Yejua ika, keman tikonpias ouijkayomej, iniuan xiontajto. Nejin tokniuan mitsonpaleuiskej xikonsentoka xikontekitili Jiova.

Sayoj ke tayekananij no tajtakouanij (Hech. 14:15). Yejua ika amo uelis techpaleuiskej itech nochi tokuejmoluan. Maski ijkon, uelis touan kichiuaskej netataujtil, uan nejon techpaleuis maj okachi kuali timomachilikan (Sant. 5:14, 15, TNM). Itech ueyi altepet Italia, se tokniuj miak xiujmejya kipia se ueyi kokolis. Sayoj ke taxikouani. ¿Toni kipaleuiani? Yejua kijtoua ke tokniuan miakpa kikalpanouaj uan kinextiliaj ke kitasojtaj. Yejua ika, komo tikpanotokej ouijkayomej, Jiova techyoleua maj tiktemokan ininnepaleuil tokniuan tayekananij.

Komo amo tiksekokauaj itekiyo Jiova maski tikpanotoskej ouijkayomej, yejuatsin techpaleuis. Yejua nejon kipanok se tokniuj itokay Juan akin kipia 39 xiujmej. Tapajtianij kiajxilijkej cáncer. Kinemiliaya ke amo kinamikia kipias se ueyi kokolis porin ayamo xiuej katka. Semi kitekipachouaya tein kipanoskia inamik uan ikonetsin, akin kipiaya sayoj eyi xiuit. Yejua kijtoua: “Axkan nonamik amo sayoj monekia kiyekpias tokonetsin, ta no nejua, uan no monekia nechpaleuis keman niyaya nikitati tapajtijkej”. Nochi taman pajti tein kitaliliayaj semi kisioujtiaya uan kielmoyaualtiaya. Uan amo sayoj nejon, ta no monekia kiyekpiaskej ipopaj porin motelkokouaya uan yaya momikilitiya.

¿Toni kipaleuij Juan uan ichankauan? Maski yejua miakpa tel sioujtoya, mochikauaya maj nochin kisentokanij kitekitilianij Jiova. Yejua kijtoua: “Kemansa ouij katka, sayoj ke nochipa tiyayaj nechikolmej uan tiyayaj titanojnotsatij, uan tikpiayaj totaueyichiualis kemej kalyetouanij”. Yejua kiajsikamatik ke semi monekia maj kichikauakan ininkuali uikalis iuan Dios. Maski yekinika semi momoujtiaya, kimachilij ke Jiova kipaleuij uan kimakak yolseuilis uan yolchikaualis tein kipolouaya. Juan kijtoua ke Jiova uelis kinyolchikauas itekitikauan ijkon kemej kichiuak iuan. Jiova no uelis mitsonpaleuis tejuatsin amo xionmoteltekipacho nion xiontelmoui.

Keman tikonpanos ouijkayomej, xikonelnamiki tein kijtoj tatitanil Pablo: “Moneki xikyolikaxijxikojtiyakan tajyouilisme”. Yejua ika, xikontataujti Jiova, amo xionmouejkatili iniuan tokniuan, xikontemo ininnepaleuil tayekananij uan amo xikonsekokaua itekiyo Jiova. Yejuatsin mitsonpaleuis ika tein yeski ouijkayot tein tikonpias axkan uan tein tikonpias satepan.