KATKA metsti junio xiuit 1970. Nejua nimoajsia kaltapajtiloyan itech xolal Pensilvania (Estados Unidos). Nikpiaya 20 xiujmej, katka nitateuijkej uan nechkuika se kokolis tein tel teijtakoj. Se telpoch akin kinpaleuiaya tapajtianij, kitamachiuaya nopresión tatajko hora. Nejon telpoch nechyekanaya tepitsin, uan nikitak ke semi motekipachouaya porin kiitaya ke okachi kaxania nopresión. Yejua ika niktajtanij: “Amo keman tikitani maj momikili aksa, ¿melauj?”. Yejua senixpochiniak uan nechnankilij: “Amo, amo keman”. Moitaya ke yaya nimomikiliti, sayoj ke nipajtik. ¿Tikonuelitaskia tikonmatis okachiok tein nikpanok?

Itech metsti julio xiuit 1969 niyajki neteuilis itech ueyi altepet Vietnam. Kemej tel tonaya uan taman hora katka, keman niajsik amo nitekitik se semana porin nejon nechpaleuiskia maj amo ouij nechkisa nimomatis. Nikuelitaya nikinpaleuis akin mokokouayaj uan akin takojkokolmej, uan niknekia nimochiuas se tapajtijkej akin teteki. Yejua ika nitekitik kemej tapaleuijkej kampa kintekiaj akin mokokouayaj. Itech nejon tekit nechkuik kokolis tein nikijtoj achto.

Nitekitik itech se kaltapajtiloyan kampa kinpajtiayaj tateuianij. Miakej helicópteros kinualkuiaj tateuianij takojkokolmej. Nejua niktasojtaya xolal kampa nikayot, uan nikuelitaya nitekitis. Yejua ika, nimochikauaya nikinpaleuis akin no kayomej kampa nejua nikayot. Kampa kintekiaj tateuianij tatsaktoya sayoj ika tepos uan ejekat taseselijtoya. Ome tapajtianij uan ome akin kinpaleuiayaj mochikauayaj kinpaleuiskej maj makisakan. Nejua nikitaya ke nejon helicópteros no kiuikayaj seki tiltik bolsas. Nechiluijkej ke amo kintemoltiayaj porin inintech moajsiaj ininnakayo tateuianij akin bombas kinkokototsak. Yejua nejon tein tel amo kuali tein mochiuaya itech neteuilis.

Nikinixmatik itaixpantijkauan Jiova keman katka nitelpoch. Yejuan kimachtiayaj nomomaj ika Biblia. Yejua amo keman moauij, sayoj ke nejua nikuelitaya nikakis tein kimachtiayaj. Se tonal,  notakpatat uan nejua tipanokej kalixpan kampa mosentiliayaj itaixpantijkauan Jiova. Niktajtanij toni mochiuaya itech nejon kali. Nechiluij maj nion niknemiliani nimotokis iniuan. Kemej semi niktasojtaya uan itech nitakuaujtamatia, niktajtolkakik uan amo nitajtojok iniuan itaixpantijkauan Jiova.

Kemej nikpanok miak taman ompa Vietnam, keman nimokepak noxolal nikelnamikia miak taman tein nechyolkokouaya. Nikitaya ke amo akin kiajsikamatia tein ompa panotoya. Moijtouaya ke tateuianij kayomej Estados Unidos kinmiktijtoyaj konemej akin amo teyi tauikayaj, uan nikelnamiki ke taltikpakneminij mosentiliayaj itech ojmej uan kiteixmatiltiayaj ke tel amo kuali tein kichiuayaj tateuianij. Nochi nejin kichiuak maj nikmachili ke monekia niktemos Dios.

Kemej niktemojtoya Dios, peuak nimosentilia itech tataman taneltokalismej. Nochipa nikmachilij ke niktasojtaya, sayoj ke amo nikuelitaya tein mochiuaya itech nejon taneltokalismej. Satepan, niyajki itech se Kali kampa Mosentiliaj iTaixpantijkauan Jiova itech xolal Delray Beach (Florida). Nikelnamiki ke katka se tonal domingo metsti febrero xiuit 1971.

Kemej tanojnots tein ika peuak tantoyaya keman niajsik, nimokauak porin peuaskia nemachtil ika amaix Tanejmachtijkej. Sayoj nitachixtoya uan nitakaktoya. Amo nikelnamiki toni ika tajtouaya tamachtilis, sayoj ke nikelnamiki ke konemej kitemouayaj tajkuilolmej itech ininBiblias. Nejon semi nikmoujkaitak. Achto ke nikisaskia, nechtajpaloko se tokniuj takat akin kipiaya kemej 80 xiujmej. Monotsaya Jim Gardner. Nechmakak amatajkuilol La verdad que lleva a vida eterna. Nikselij ika miak pakilis, uan timokaujkej tipeuaskej timomachtiskej jueves kualkan.

Satepan ke tamik nechikol, nitekitito. Nitekitia itech se kaltapajtiloyan itech xolal Boca Ratón (Florida). Nikalakia 11 hora youak uan nikisaya 7 hora kualkan. Kemej nejon youak amo semi onkaya tekit peuak nikixtajtoltia amatajkuilol tein nechmakakej. Se siuat akin kinpaleuiaya tapajtianij nechitak keman nikixtajtoltijtoya. Nechajsiko, nechmakuilij amatajkuilol uan ika kualanyot nechtajtanij ox niknemiliaya nimochiuas itaixpantijkauj Jiova. Nikuilij noamatajkuilol uan nikiluij ke maski yekin tajko nikixtajtoltiaya, niknemilijtoyaya nimochiuas itaixpantijkauj Jiova. Siuat yajki, uan uelik niktamiixtajtoltij amatajkuilol nejon youak.

Yekinika tonal keman nimomachtij iuan tokniuj Gardner, niktajtanij: “¿Toni timomachtitij?”. Yejua nechiluij: “Amatajkuilol tein nimitsmakak”. Nikiluij ke niktamiixtajtoltijkaya. Ompa nechyemankailuij: “Maj sayoj tikitakan yekinika tamachtilis”. Ijkon kemej timomachtijtiyayaj, semi nikmoujkaitak maj miak taman amo nikitani keman  nikixtajtoltij. Yejua nechiluiaya maj niktemojtiyani miak tajkuilolmej itech noBiblia. Axkan kemaj uelia nikmatia toni tamachtia Dios akin melauak, Jiova. Nejon kualkan tikitakej eyi tamachtilis. Uan nochi jueves timomachtiayaj ejeyi tamachtilis. Semi nikuelitaya tein nimomachtijtoya. Nikitak kemej se ueyi tatiochiualis maj nechmachtiani nejon tokniuj, porin katka taixpejpenal uan kiixmatka tokniuj Russell.

Seki semanas satepan, peuak nitanojnotsa. Nimouia nitanojnotsas kajkalpan, sayoj ke Jim nechyolchikauak (Hech. 20:20). Kemej niksentokaya iuan nitanojnotsaya, satepan no nechyolpaktij nikchiuas nejon. Nikmachilia ke okachi ueyi tatiochiualis tein nikpia yejua maj nikinmachti oksekin maj kiixmatikan Dios. Semi nikuelita nitapaleuis iuan Jiova itech nejin tekit (1 Cor. 3:9).

Axkan nimitsontapouiti se teisa tein okachi nikpatiuita. Nejin panok keman peuak niktasojta Jiova (Apoc. 2:4). Keman nikelnamiki tein mochiuaya itech neteuilis, nejin netasojtalis nechpaleuia maj amo semi nechijtako uan maj nikxiko miak tataman kuejmolmej (Is. 65:17).

Itech xiuit 1971 amo nikpiayaok kani ninemis. Notatuan nechtaneujtijtoyaj se kali, sayoj ke notakpatat nechiluij ke ichan amo ueliskia nemis se itaixpantijkauj Jiova. Nejua amo semi nikpiaya tomin, uan itech kaltapajtiloyan kampa nitekitia nechtaxtauiayaj ojome semana. Niktamijtoyaya notomin porin nikoujka taken tein nimotaliliskia keman nikisaskia tanojnotsalis, porin niknekia kuali nikixnextis Jiova. Nikpiaya tepitsin tomin, sayoj ke nikeujtoya itech xolal Míchigan, kampa nimoskaltij. Yejua ika monekik ninemis miak tonalmej itech notepos. Nimopajpakaya uan  nimokanximaya itech nekalauiloyan tein moajsiaj kampa kinamakaj gasolina.

Ijkuak ninemiaok itech notepos, se tonal keman nikisak notekipan niyajki itech Kali kampa tiMosentiliaj. Ompa mochiuaskia nechikol achto ke tikisaskiaj tanojnotsalis. Sayoj ke tokniuan ajsiskiaj seki hora satepan. Keman nikinchixtoya tokniuan, peuak nikelnamiki tein mochiuaya Vietnam: taltikpakneminij ejeskistokej, keniuj moijnekuia ininnakayo taltikpakneminij akin chichinaujtoyaj, uelia nikinitaya uan nikinkakia tateuianij akin nechtataujtiayaj maj nikinpaleui uan nechtajtaniayaj ox makisaskiaj. Maski nikmatia ke yaya momikilitij, nikinyolseuiaya uan nikinyolchikauaya. Keman nitanemilijtoya itech nejon, semi nimotayokoltij.

Semi nichokak uan niktataujtij Jiova (Sal. 56:8). Peuak nitanemilia itech neajokuilis. Amo keman niknemilijtoya ke tel kualtsin nejon nechialis. Jiova kinajokuis nejon telpochmej akin nikinitak momikilijkej, uan uelis kiixmatiskej. Keman nejon panos, tikelkauaskej nochi tajyouilis tein tikpanokej itech neteuilis (Hech. 24:15). Keman nikajsikamatik nejon, nechpaleuij maj okachi niktasojta Jiova. Niksentoka nikelnamiki nejon tonal. Nochipa keman nikpia se kuejmol, nikelnamiki netasojtalis tein ijkuak peuak nikpialia Jiova.

Keman taltikpakneminij youij neteuilis, kichiuaj miak taman tein amo kuali. Nejua no nikchiuak nejon. Sayoj ke semi nechpaleuiani keman nitanemilia itech ome tajkuilolmej. Yekinika yejua Apocalipsis 12:10, 11. Ompa kijtoua ke iesyo Jesús uan totanojnotsalis kitanij Amokuali. Ojpatika yejua Gálatas 2:20, tein nechelnamiktia ke Jesús no noka momikilij. Ika inemilis Cristo tein kitemakak, Jiova nechtapojpoluiani tein nikchiuak. Axkan notanemilil amo nechkuejmoloua uan nikyolnejneki nikintapouis oksekin ke Jiova se Dios akin techiknelia (Heb. 9:14).

Keman itech nitanemilia tein nikpanouani, senkis nikita ke Jiova nochipa nechyekpiani. Kemej neskayot, keman tokniuj Jim kimatik ke ninemia itech notepos, nechuikak iuan se tokniuj siuat akin kipiaya kani se mokauas uan se kitaxtauiaya. Nikyekmati ke inintechkopa Jim uan tokniuj siuat, Jiova nechmakak kani ninemiskia. Jiova semi yolkuali uan nochipa kinyekpia itekitikauan akin amo kikauaj.

Itech metsti mayo xiuit 1971 monekik niyas xolal Míchigan. Achto ke nikisaskia Florida, nikalakij itech notepos miak amaixmej uan ijkon ueliskia nitanojnotsas itech ojti. Maski ayamo niyaya tajko ojti niktamikaujkaya amaixmej tein nikuikaya. Noyampa nitanojnotsaya ika miak yolpakilis. Nitanojnotsak itech cárceles uan hasta nikinmakak amaixmej takamej akin iniuan nimoajsia itech nekalauiloyamej tein moajsij itech kalmej kampa moseuijtikisaj ojtokanij. Nimotajtaniaok ox semej nejon taltikpakneminij kiixmatik Jiova (1 Cor. 3:6, 7).

Moneki nikijtos ke ijkuak peuak nimomachtia Biblia, amo nitajtouaya ika kualtakayot keman nitanojnotsaya. Okachiok keman nitajtouaya iniuan nochankauan. Kemej semi nikintasojta nokniuan John uan Ron, nikinchikaujkauiaya maj no mochiuanij itaixpantijkauan Jiova. Satepan nikintajtanij maj nechtapojpoluikan. Niksentoka niktajtania Jiova maj se tonal kiselikan tamachtilis tein melauak. Axkan okachi nikualtakat keman nitanojnotsa uan nitamachtia porin Jiova nechpaleuiani maj ijkon nikchiua (Col. 4:6).

Nokuali uikalis iuan Jiova yejua tein okachi nikpatiuita itech nonemilis. Sayoj ke no moajsij oksekin akin no nikinteltasojta. Semi niktasojta  nonamik, Susan. Nejua niknekia nimonamiktis iuan se siuat akin nechpaleuiskia maj niksentoka niktekitilijto Jiova. Nonamik Susan yolchikauak uan kiteltasojta Jiova. Keman timoixmattoyaj, se tonal nikalpanoto ichan. Keman niajsik, yejua momachtijtoya amaix Tanejmachtijkej ika iBiblia. Nechtelyolpaktij nikitas ke kitemojtoya nochi tajkuilolmej maski amo kiixtajtoltijtoya se tamachtilis tein timomachtiaj itech nechikol. Uelik nikitak ke kitelpatiuitaya ikuali uikalis iuan Jiova. Timonamiktijkej itech metsti diciembre xiuit 1971. Semi nimotasojkamati maj nonamik nochipa nechtelpaleui. Maski nonamik nechtasojta, semi nikuelita maj okachi kitasojta Jiova.

Jiova techmakani ome konemej, Jesse uan Paul. Yejuan mokauanij maj Jiova kinojtokalti uan kuali mouikaj iuan (1 Sam. 3:19). Nejon semi techyolpaktia Susan uan nejua. Nochin omen kitekitilianij Jiova itech tekit kemej precursor uan Betel panoua 20 xiujmej. Uan kisentokaj kitekitiliaj Jiova porin kitasojtaj. No niktasojkamati maj monamiktianij iniuan ome kualtsitsin siuamej akin no kitasojtaj uan kitekitiliaj Jiova (Efes. 6:6). Motokaytiaj Stephanie uan Racquel, akin semi nikintasojta uan no nikinita kemej nokoneuan.

Nitapaleuij 16 xiujmej itech xolal Rhode Island. Ompa nikinixmatik miakej akin kuali iniuan nimouika. Nikinelnamikiok tokniuan tayekananij tetasojtanij akin iniuan nitekitik. Semi nikintasojkamatilia tokniuan takalpanouanij akin nechpaleuijkej nejon xiujmej. Nikita kemej se ueyi tatiochiualis nitekitis iniuan nejon takamej akin amo keman kikauanij Jiova uan semi kitasojtaj. Itech xiuit 1987, timokaltalitoj itech xolal Carolina  del Norte porin tiknekiaj titapaleuiskej itech tanojnotsalis. Ompa no tikinixmatkej miakej akin kuali iniuan timouikaj. *

Itech metsti agosto xiuit 2002, Susan uan nejua techyoleujkej maj titekitikan itech kali Betel ompa Estados Unidos tein moajsi itech xolal Patterson. Nitekitik Kampa kiitaj iTekiyo Dios, uan Susan kampa tapakaj. Yejua semi kiuelitaya nejon tekit. Itech metsti agosto xiuit 2005 nikselij tatiochiualis nipouis iniuan tokniuan Oloch Taojtokaltianij. Nikmachiliaya ke amo ueliskia nikchiuas nejon tekit. Susan kitekipachouaya ueyi tekit tein monekiskia mochiuas. Uan no, yejua amo keman kiuelitak yas itech avión. Sayoj ke axkan nochipa moneki itech tiyaskej. Susan semi kipaleuij tein kiyolmajxitijkej ininnamik okseki tokniuan akin pouij iniuan Oloch Taojtokaltianij. Yejua kiixtalijtok nechpaleuis, uan nejon kichiua maj okachi niktasojta.

Kampa nitekiti nikpia miak taixkopimej tein nechelnamiktiaj ke semi kualtsin tein nikpanouani itech nonemilis. Jiova nechtatiochiuiani porin niksentoka niktasojta.