1, 2. 1) ¿Keyej tiitekitikauan Dios amo timokalakiaj itech kuejmolmej tein kichiuaj maj taltikpakneminij moxexelokan? (Xikonita taixkopin ipeujyan tamachtilis.) 2) ¿Keniuj miakej taltikpakneminij kiitaj ininaltepeuj, kemej nemij oso mauiltianij akin kinpaleuiaj? 3) ¿Toni panoua keman taltikpakneminij kinemiliaj ke okachi ueyichiuanimej ke oksekin?

 ITECH nejin tonalmej, miakej taltikpakneminij moxexelouaj porin kinemiliaj ke ininaltepeuj okachi kuali, moueyichiuaj porin taman ixtamatij oso taman kemej nemij. Sayoj ke tiitekitikauan Jiova amo ijkon titanemiliaj uan amo timokalakiaj itech kuejmolmej tein kichiuaj maj taltikpakneminij moxexelokan. ¿Keyej? Porin tiktasojtaj Jiova uan tiknekij tiktakamatiskej (1 Juan 5:3). Tiktakamatij itanauatiluan uan amo tiktayekanaltiaj kani tinemij oso kani tiyolkej. Tejuan tikitaj ke okachi tayekantok tikpaleuiskej Jiova uan itaixyekanalis (Mat. 6:33, TNM). Yejua ika ueli tikijtouaj ke “amo no [ti]poutinemij nikan taltikpak” (xikonixtajtolti Juan 17:11, 15, 16; Is. 2:4).

² Miakej kinemiliaj ke ininaltepeuj uan kemej nemij okachi kuali ke okseki. Oksekin no ijkon kinitaj mauiltianij akin kinpaleuiaj. Nejin kichiua maj miakej motatanikan, motauelitakan uan hasta maj kinmiktikan akin amo tanemiliaj kemej yejuan. Maski tiitaixpantijkauan  Jiova amo timokalakiaj itech nejon kuejmolmej, no uelis techijtakos tejuan uan tochankauan. Xa hasta toka mauiltiskej. Uan nejon semi teyolkokoua, porin Jiova techchijchiuak kemej uelis tikmatiskej ox teisa mochiua ika melaujkayot oso amo (Gén. 1:27; Deut. 32:4). Yejua ika, keman se tekiuajyot kichiua tein amo melauak, xa tiknekiskej amo kuali ika titajtoskej. Keman panoua nejon, ¿ueli tiknextiaj ke amo tikpaleuiaj nion se tekiuajyot?

3, 4. 1) ¿Keyej amo tikpaleuiaj nion se tekiuajyot nikan taltikpak nion titapaleuiaj itech neteuilis? 2) ¿Toni tikitaskej itech nejin tamachtilis?

³ Axkan, tekiuanij kinchikaujkauiaj taltikpakneminij maj kinpaleuikan keman mochiuaj kuejmolmej, sayoj ke tejuan amo tikpaleuiaj nion se tekiuajyot nikan taltikpak nion titapaleuiaj itech neteuilis porin tikchiuaj kemej Cristo (Mat. 26:52). Amo tiknemiliaj ke nikan taltikpak kampa Satanás taixyekantok okachi kuali kemej taixyekana se tekiuajyot ke okse (2 Cor. 2:11). Yejua ika amo timokalakiaj itech nion se taman kuejmol tein mochiua (xikonixtajtolti Juan 15:18, 19).

⁴ Kemej titajtakouanij, xa sekin tiksentokaj amo tikinyekitaj taltikpakneminij akin amo ixtamatij kemej tejuan (Jer. 17:9; Efes. 4:22-24). Itech nejin tamachtilis tikitaskej keniuj Biblia uelis techpaleuis maj timoijkuanilikan nejon tein tikmachiliaj tein kichiua maj taltikpakneminij moxexelokan. No tikitaskej toni techpaleuis maj tikinitakan oksekin kemej Jiova uan Jesús kinitaj. Nejon techpaleuis maj tiksentokakan tikpaleuijtokan iTekiuajyo Dios.

5, 6. 1) ¿Keniuj kinitaya Jesús tataman taltikpakneminij? 2) ¿Keyej Jesús ijkon tanemiliaya?

⁵ Keman mitsonouijmakas amo tikonpaleuis nion se tekiuajyot, xionmotajtani: “¿Toni kichiuaskia Jesús?”. Keman Jesús yetoya nikan taltikpak, akin nemiaj Judea, Galilea uan Samaria amo kuali mouikayaj. Kemej neskayot, judíos uan samaritanos amo monotsayaj (Juan 4:9). Fariseos uan saduceos nochipa motajtolteuiayaj (Hech. 23:6-9). Judíos akin momachtijkaj tanauatil tein kiselij Moisés kinemiliayaj ke okachi ueyichiuanimej katkaj ke akin amo momachtijkaj (Juan 7:49). Uan miakej kintauelitayaj romanos uan akin kisentiliayaj impuestos (Mat. 9:11). Sayoj ke Jesús amo mokalakij itech nejon kuejmolmej. Semi melauak ke yejua tamachtiaya keniuj yekmelauj tamati Jiova uan kimatia ke Dios kinixpejpenka judíos kemej ixolal. Sayoj ke amo keman kinmachtij itatojtokakauan ke yejuan okachi ueyichiuanimej katkaj ke oksekin (Juan 4:22). Okachi kuali, kinmachtij maj kintasojtakan nochin taltikpakneminij (Luc. 10:27).

⁶ Jesús amo kiitaya ke seki taltikpakneminij katkaj okachi ueyichiuanimej ke oksekin. ¿Keyej? Porin keman Jiova kinchijchiuak taltikpakneminij kinekia maj momoyauanij noyampa taltikpak uan maj kinpianij konemej akin tataman ixtamatiskiaj (Gén. 1:27, 28). Yejua ika Jiova uan Jesús amo kinemiliaj ke okachi kuali se taman altepet, se taman tajtol oso kemej  ixtamatij seki taltikpakneminij (Hech. 10:34, 35; Apoc. 7:9, 13, 14). Tejuan no moneki ijkon titanemiliskej (Mat. 5:43-48).

7, 8. 1) ¿Akoni tikpaleuiaj akin tikchiuaj kemej Cristo, uan keyej? 2) ¿Toni moneki tikelnamikiskej ika kuejmolmej tein mochiua nikan taltikpak?

⁷ Akin tikchiuaj kemej Cristo amo tikpaleuiaj nion se taltikpaktekiuajyot. Sayoj tikpaleuiaj Jiova uan iTekiuajyo. ¿Keyej? Porin tiknemiliaj ke yejuatsin okachi kuali taixyekankej. Itech xochital tein moajsia Edén, Satanás kijtoj ke Jiova amo kinamiki kinixyekanas taltikpakneminij. Yejua kinemilia ke ijkon kemej kichiua teisa okachi kuali ke ijkon kemej kichiua Dios uan kineki maj taltikpakneminij no kinemilikan nejon. Jiova kikaua maj sejse taltikpaknenkej kiixpejpena akoni kipaleuis kemej taixyekankej. Yejua ika xionmotajtani: “¿Niktakamati Jiova porin niknemilia ke yejuatsin okachi kuali taixyekankej? ¿Senkis nikneltoka ke sayoj itaixyekanalis Dios uelis kiyektalis nochi kuejmolmej tein onkak? ¿Oso niknemilia ke amo moneki maj Dios techixyekana?” (Gén. 3:4, 5).

⁸ Kemej neskayot, ¿toni tiontanankiliskia komo aksa mitsontajtania keniuj tikonita se tekiuajyot oso se taman nechikol? Semi melauak ke seki tekiuanij oso akin pouij itech nejon nechikolmej kipiaj kuali tanemilil uan yekmelauj kinekij kinpaleuiskej taltikpakneminij. Sayoj ke maj tikelnamikikan ke sayoj iTekiuajyo Jiova uelis kiyektalis kuejmolmej tein onkak itech taltikpak uan kichiuas maj amo onkaok teikamauiltilis. Yejua ika sayoj tikpaleuiaj Jiova. Komo amo tikchiuaskiaj, itech nechikol nochin moxexeloskiaj.

9. 1) ¿Toni kuejmol mochiuak itech nechikol tein moajsia Corinto? 2) ¿Toni kiniluij Pablo nejon tokniuan?

⁹ Itech yekinika siglo mochiuak se kuejmol itech nechikol tein moajsia Corinto. Seki tokniuan motajtolteuiayaj porin sekin kijtouayaj ke pouiaj iuan Pablo, oksekin iuan Apolos, oksekin iuan Cefas uan oksekin iuan Cristo. Pablo semi motekipachoj keman kimatik tein panotoya. Nejon katka se ueyi kuejmol porin itech nechikol tein moajsia Corinto ueliskiaj senkis moxexeloskej. Yejua ika Pablo kiniluij: “Ximoyektajtoluiyakan sanse uan ma amo ximokualankaxexelokan kampa namejuan nanmosepansentiliaj. Ta, namechilia xisenyekyetokan se uan okse uan xiyeksentanemilitokan sanse uan no xisentaixejekojtiyakan”. Axkan no moneki tikchiuaskej tein Pablo tayolmajxitij. Moneki maj amo keman timoxexelokan itech nechikol (1 Cor. 1:10-13; xikonixtajtolti Romanos 16:17, 18).

10. ¿Toni kinekia tamachtis Pablo keman kijtoj ke tokniuan taixpejpenalmej tamatij kemej akin kiixnextiaj ininaltepeuj?

¹⁰ Okse tonal, Pablo kinelnamiktij tokniuan taixpejpenalmej ke yejuan pouij ompa iluikak uan ke amo moneki kitayekanaltiskej tein onkak nikan taltikpak (Filip. 3:17-20, TNM). * No kijtoj ke taixpejpenalmej  kemej yeskia kiixnextiaj Dios uan Cristo. Keman se aksa akin kiixnextia ialtepeuj moajsi itech okse ueyi altepet, amo mokalakia itech kuejmolmej tein onkak ompa nion itech inintaixyekanalis. No ijkon, tokniuan taixpejpenalmej amo mokalakiaj itech kuejmolmej tein onkak nikan taltikpak nion kipaleuiaj nion se tekiuajyot (2 Cor. 5:20). Tokniuan akin kichiaj nemiskej nikan taltikpak amo no mokalakiaj itech kuejmolmej tein onkak. Sayoj kipaleuiaj iTekiuajyo Dios.

11, 12. 1) ¿Toni moneki amo keman tiknemiliskej komo tiknekij tikpaleuiskej iTekiuajyo Dios? 2) ¿Keniuj se tokniuj siuat kinitaya seki taltikpakneminij? 3) ¿Toni kipaleuij nejin tokniuj siuat maj moijkuanili nejon tein amo kuali tein kimachiliaya?

¹¹ Miakej taltikpakneminij kuali momachiliaj iniuan akin kayomej itech ininaltepeuj, porin kiixmatij tein panouani ompa, nemij kemej yejuan nemij uan tajtouaj inintajtol. Miakpa, kimachiliaj ke ininaltepeuj okachi kuali. Sayoj ke moneki timoyekpiaskej uan amo keman tiknemiliskej ke okachi tiueyichiuanimej ke oksekin. Komo ijkon titanemiliaj, moneki timopataskej. Nejin techpaleuis maj amo keman tiknekikan tiknextiskej ke kampa tikayomej okachi kuali ke oksekin. ¿Toni uelis techpaleuis maj tikpatakan totanemilil?

¹² Maj tikitakan tein kipanok se tokniuj siuat akin monotsa Mirjeta. * Yejua yolik itech se ueyi altepet tein monotsaya Yugoslavia. Moskaltij itech se xolal kampa taltikpakneminij kintauelitayaj akin katkaj kayomej Serbia. Sayoj ke kiajsikamatik ke Jiova amo kinemilia ke seki taltikpakneminij okachi ueyichiuanimej ke oksekin, uan ke Satanás kineki maj taltikpakneminij motauelitakan. Yejua ika tokniuj siuat mochikauak kipatas itanemilil. Sayoj ke ijkuak peuak se neteuilis itech ueyi altepet, Mirjeta oksepa peuak amo kinyekita akin katkaj kayomej Serbia. Nion kinekia kintapouis kuali tanauatilmej. Yejua kimatia ke nejon amo kuali katka, yejua ika kitajtanij Jiova maj kipaleuiani maj moijkuaniliani nejon tein kimachiliaya. Uan no, kitajtanij maj kipaleuiani maj ueli kichiua tekit kemej precursor. Yejua kijtoua ke tanojnotsalis semi kipaleuiani. Amo kimachiliaok nejon tein amo kuali, porin keman tanojnotsa mochikaua kinextis inetasojtalis Jiova.

13. 1) ¿Toni kipanok se tokniuj siuat akin monotsa Zoila? 2) ¿Keniuj momachilij nejin tokniuj siuat? 3) ¿Toni techmachtia tein kipanok Zoila?

¹³ Se tokniuj siuat akin monotsa Zoila uan kayot México, yajki nemito Europa. Itech nechikol kampa mosentilia moajsij tokniuan akin kayomej itech okseki xolalmej tein pouij América Latina. Yejua kijtoua ke sekin nejon tokniuan ika mokejkelouayaj ialtepeuj, tein momattokej kichiuaskej ompa uan inintatsotson. Nejon semi kiyolxokoliaya. Sayoj ke kitajtanij Jiova maj kipaleuiani maj amo ijkon momachiliani. ¿Toni techmachtia tein kipanok Zoila? Ke xa seki tokniuan kinouijmaka amo moyolxokoliskej keman aksa amo kuali ika tajtoua ininaltepeuj. Yejua ika amo keman moneki tikijtoskej oso tikchiuaskej teisa tein kichiuas maj nesi ke seki taltikpakneminij okachi ueyichiuanimej ke oksekin. Amo tiknekij tikchiuaskej maj moxexelokan tokniuan oso maj amo kuali mouikakan okseki taltikpakneminij (Rom. 14:19; 2 Cor. 6:3).

14. ¿Toni uelis mitsonpaleuis xikonita oksekin kemej Jiova kinita?

 ¹⁴ Tiitekitikauan Jiova noyampa taltikpak kuali timouikaj. Yejua ika amo keman moneki tiknemiliskej ke se xolal oso se ueyi altepet okachi kuali ke okse. Xa tochankauan oso kampa timoskaltijkej kichiujkej maj tiktasojtanij toaltepeuj. Uan xa kisentoka techouijmaka tikinyekitaskej akin kayomej itech okseki altepemej, akin taman kemej nemij, tajtouaj okse tajtol oso taman kemej ixtamatij. Komo mitsonpanoua nejon, ¿toni uelis mitsonpaleuis xikonpata kemej tiontanemilia? Xikonnemili keniuj Jiova kinita taltikpakneminij akin kimachiliaj ke ininaltepeuj okachi kuali uan kinemiliaj ke okachi ueyichiuanimej ke oksekin. Xikontemo tamachtilis tein ika tajtoua nejin taman keman tionmomachtis moselti oso iniuan mochankauan. Uan xikontajtani Jiova maj mitsonpaleui xikonita oksekin kemej yejuatsin kinita (xikonixtajtolti Romanos 12:2).

15, 16. 1) ¿Keniuj techitaj seki taltikpakneminij porin taman timonejnemiltiaj? 2) ¿Keniuj tetatmej uelis kinpaleuiskej ininkoneuan maj kiueyitalikan Jiova?

¹⁵ Kemej tiktakamatij Jiova, kemansa tochankauan, akin nemij kampa ika tejuan tinemij uan akin iniuan titekitij oso iniuan timomachtiaj kiitaj ke semi taman timonejnemiltiaj (1 Ped. 2:19). Jesús kijtoj ke sekin hasta techtauelitaskiaj porin amo timonejnemiltiaj kemej yejuan. Sayoj ke maj tikelnamikikan ke miakej nion tepitsin kiixmatij iTekiuajyo Dios. Yejua ika  amo kiajsikamatij keyej tikitaj ke motelneki tikpaleuiskej sayoj nejon Tekiuajyot.

¹⁶ Komo tiknekij tikueyitaliskej Jiova, moneki timochikauaskej nochipa tiktakamatiskej maski oksekin techiluiskej oso techchiuiliskej tein amo kuali (Dan. 3:16-18). Telpochmej uan ichpochmej xa kinouijmaka amo monejnemiltiskej kemej oksekin. Sekin xa mouij amo kitajpaloskej bandera oso amo tapaleuiskej keman kichiuaj teisa tein ika kiueyitaliaj altepet. Yejua ika tetatmej moneki kinpaleuiskej maj kinextikan yolchikaualis kampa momachtiaj. ¿Keniuj? Keman taueyichiuaj kemej kalyetouanij uelis ika tajtoskej keniuj kiita Jiova maj se kitajpalo bandera uan okseki taman kemej nejon. Uan no, uelis kinmachtiskej maj kuali kimelauakan tein kineltokaj uan ika poujkaitalis (Rom. 1:16). Uan komo moneki, tetatmej uelis kinnojnotsaskej tamachtianij uan kinmelauiliskej tein tikneltokaj.

17. 1) ¿Toni moneki amo tiknemiliskej? 2) ¿Keyej moneki amo tiknemiliskej ke ijkon kemej tikchiuaj teisa okachi kuali ke tein kichiuaj oksekin?

¹⁷ Tinochin techyolpaktia tataman takual, tajtol, tein momattokej kichiuaskej uan tein onkak kampa timoskaltijkej. Sayoj ke moneki amo tiknemiliskej ke tein tikuelitaj tejuan okachi kuali ke tein kiuelitaj oksekin. ¿Keyej? Porin Jiova kichiuak miak taman tein ika tiyolpakiskej tinochin (Sal. 104:24; Apoc. 4:11). Yejua ika amo teyi ika tapaleuia maj tiknemilikan ke ijkon kemej tikchiuaj teisa okachi kuali ke tein kichiuaj oksekin.

18. ¿Keniuj techpaleuia komo tikinitaj oksekin kemej Jiova kinita?

¹⁸ Jiova kineki maj nochi tataman taltikpakneminij kiixmatikan, kiueyichiuakan uan maj nemikan nochipaya (Juan 3:16; 1 Tim. 2:3, 4). Yejua ika moneki tikakiskej tein kinemiliaj tokniuan komo amo kitapanauilia tein kijtoua Jiova, maski amo tanemiliskej kemej tejuan. Komo ijkon tikchiuaj, okachi tiyolpakiskej uan kuali timouikaskej iniuan tokniuan. Kemej tikitakejya, sayoj tikpaleuiaj Jiova uan iTekiuajyo. Yejua ika, amo timokalakiaj itech kuejmolmej tein onkak nikan taltikpak, amo timoueyichiuaj nion timotatanij iniuan oksekin. Semi tiktasojkamatij maj Jiova techmachti maj tiktemokan maj onka yolseuilis uan maj tiyolyemankej. Timomachiliaj ijkon kemej akin kijkuiloj Salmo 133:1, tein kijtoua: “¡Semi kuali uan semi teyolpaktij maj tokniuan kualtsin sennemikan!”.