1, 2. 1) ¿Keyej senkis tikonneltoka ke Jiova kintasojta itekitikauan? 2) ¿Toni tikmachiliaj ke moneki tikpiaskej tinochin?

¿SENKIS tikonneltoka ke Jiova kintasojta itekitikauan? Xiontanemili itech nejin neskayomej. Se tokniuj siuat akin monotsa Taylene nochipa kimachiliaya ke amo keman uelia kichiuaya tein moneki, uan nejon semi kitayokoltiaya. Miak xiujmej, tokniuan kiyolchikaujkej ika netasojtalis maj amo ijkon tanemiliani. Yejua kijtoua ke komo Jiova amo kitasojtaskia, amo semi kiyolchikauaskia nion kiyolmajxitiskia. Okse tokniuj siuat akin monotsa Brigitte momikilij inamik uan mokauak iniuan ome ikoneuan. Yejua kijtoua ke se kiniskaltis konemej itech nejin tonalmej se taman tein tel ouij, okachiok komo sayoj semej tetatmej kiniskaltia, kemej yejua kipanoua. Sayoj ke senkis kineltoka ke Jiova kitasojta porin kipaleuiani maj kixiko tayokol, uan porin amo kikauani maj tajyoui okachi ke tein uelis taxikos (1 Cor. 10:13, TNM). Okse tokniuj siuat akin motokaytia Sandra kipia se kokolis tein amo pajti.  Itech se ueyi nechikol, se tokniuj siuat akin amo kiixmatia yajki kitajpaloto uan iuan tajtoj. Inamik Sandra kijtoua ke nejon semi kitasojkamatkej. Kijtoua ke yejua kimachilia inetasojtalis Jiova hasta keman tokniuan kichiuaj seki taman tein amo uejueyi tein ika kinnextiliaj ke kintasojtaj.

² Nochin taltikpakneminij tikmachiliaj ke moneki titetasojtaskej uan maj techtasojtakan, porin ijkon techchijchiuak Jiova. Sayoj ke komo timokokouaj, tikpiaj kuejmolmej ika tomin oso amo akin techkaki itech tanojnotsalis, uelis tiyolkuetauiskej uan tiknemiliskej ke Jiova amo techtasojtaok. Komo techpanoua nejon, moneki tikelnamikiskej ke yejuatsin toka motekipachoua uan ke kineki techpaleuis. Yejuatsin amo keman techkauas komo tejuan amo tikauaj (Is. 41:13; 49:15).

3. ¿Toni techpaleuis maj tikneltokakan ke Jiova techtasojta?

³ Tokniuan akin ininka titajtojkej achto senkis kineltokaj ke Dios kinpaleuij keman kipanotoyaj ouijkayomej. Tejuan no uelis senkis tikneltokaskej ke Jiova kineki techpaleuis (Sal. 118:6, 7). Komo titanemiliaj itech nochi tein kuali tein toka kichiuani, senkis tikneltokaskej ke yejuatsin techtasojta (xikonixtajtolti Salmo 77:11, 12). Itech nejin tamachtilis tikitaskej naui netetayokolilmej tein Jiova techmakani uan keniuj tiktasojkamatiliskej: itachijchiualis, Biblia, netataujtil uan imikilis Jesús tein techmakixtia (xikonita kampa kijtoua “Tein okachi momelaua”).

4. ¿Toni tikajsikamatij keman tikitaj itachijchiualis Dios?

⁴ Keman tikitaj itachijchiualis, tikajsikamatij ke Jiova semi techtasojta (Rom. 1:20). Kemej neskayot, yejuatsin techtalij itech taltikpak ika nochi tein moneki uan ijkon tiyolpakiskej. Uan no, kichijchiuak tataman takual uan ijkon techyolpaktis tein tikuaskej (Ecl. 9:7). Itech ueyi altepet Canadá, se tokniuj siuat akin motokaytia Catherine kijtoua ke kiyolpaktia kiitas keniuj nochi taselia satepan keman panoua tonalmej keman tasekuetsi uan ejko primavera. Kiuelita kiitas keniuj taxochiyoua uan keniuj totomej mokepaj porin kicholuijkaj sesek. Uan semi kiyolpaktia keman se uitsiki kikuaki tein yejua kikauilia itech ventana kampa takualchiua. Yejua kijtoua ke kemej Jiova techmaka miak taman tel kualtsitsin, kijtosneki ke techteltasojta. Totajtsin kitelyolpaktia tein kichijchiuak uan kineki maj tejuan no techyolpakti (Hech. 14:16, 17).

5. ¿Toni okse taman kinextia ke Jiova techtasojta?

⁵ Jiova kinchijchiuak taltikpakneminij kemej ueliskej kichiuaskej se tekit tein kinyolpaktis uan kimachiliskej ke ueli tapaleuiaj (Ecl. 2:24). Kintalij nikan taltikpak maj kinpiakan konemej, maj kiyekpiakan taltikpak uan tapialmej uan okseki taman tein yoltok (Gén. 1:26-28). Uan no, techchijchiuak kemej tiueliskej tiknextiskej ikualneskayouan tein kualtsitsin (Efes. 5:1).

6. ¿Keyej moneki timotasojkamatiskej porin tikpiaj Biblia?

⁶ Jiova techmakak Biblia porin techtasojta. Moneki tiktasojkamatiskej nejin netetayokolil, porin techpaleuia maj tikmatikan keniuj tamati yejuatsin uan keniuj kinita taltikpakneminij. Kemej neskayot, Biblia kimelaua keniuj kinitaya israelitas maski miakpa amo kitakamatiaj. Salmo 78:38 kijtoua: “Yejuatsin kinikneliaya; kintapojpoluiaya inintajtakoluan uan amo kinixpolouaya. Yejuatsin miakpa kitsakuilij ikualanyo uan amo kikixtij nochi ikualanyo”. Titanemiliskej itech nejin tajkuilol techpaleuia maj titakuaujtamatikan ke Jiova semi techtasojta uan toka motekipachoua maski timopolouaj (xikonixtajtolti 1 Pedro 5:6, 7).

7. ¿Keyej Biblia kitelpia ipatiuj?

⁷ Tejuan tikitaj Biblia kemej se taman  tein kitelpia ipatiuj. ¿Keyej? Porin Jiova ika technojnotsa. Keman se tepopaj uan ikonetsin kuali monojnotsaj, okachi motasojtaj uan okachi takuaujtamatij se iuan okse. Jiova yejuatsin toTajtsin akin semi techtasojta. Uan maski amo ueli tikitaj nion tikakij, yejuatsin kemej yeskia technojnotsa ika Biblia. Yejua ika, moneki kemej yeskia kuali tikakiskej tein techiluia (Is. 30:20, 21). Keman tikixtajtoltiskej Biblia okachi tikixmatiskej uan titakuaujtamatiskej iuan Jiova, akin techixyekana uan techyekpia (xikonixtajtolti Salmo 19:7-11 uan Proverbios 1:33).

8, 9. 1) ¿Toni kineki Jiova maj tikmatikan? 2) ¿Toni techmachtia tein kipanok Jehosafat?

⁸ Jiova kineki maj tikmatikan ke amo sayoj kiita tonepololuan, ta okachi kiita nochi tein kuali tein tikchiuaj (2 Crón. 16:9). Maj tikitakan tein kipanok se takat akin tekiuajtik Judá akin motokaytij Jehosafat. Yejua amo kuali taixejekoj keman kipaleuij Acab, akin tekiuajtia Israel, ijkuak moteuito iniuan akin kayomej Siria. Cuatrocientos tanauatianij akin amo melaujkej kiluijkej Acab ke tataniskia. Sayoj ke se tanauatijkej akin melauak akin motokaytiaya Micaya kiluij Acab uan Jehosafat ke komo yayaj tateuitij, tapoloskiaj. Uan yejua nejon panok. Acab momikilij itech neteuilis, uan Jehosafat tekit makisak. Ompa, Jiova kititanik Jehú maj kimelauati Jehosafat porin amo kuali taixejekojka, sayoj ke no kinauatij maj kilui: “Moajsi seki taman tein kuali tein mitsajxilijkej” (2 Crón. 18:4, 5, 14-22, 33, 34; 19:1-3).

⁹ ¿Toni tein kuali kichiujka tekiuaj Jehosafat? Keman peuak taixyekana kinnauatijka uejueyi chiuanimej, levitas uan tiopixkamej maj yanij itech nochi xolal Judá uan maj kinmachtianij taltikpakneminij itanauatiluan Dios. Nejin semi tapaleuij, porin hasta akin katkaj kayomej itech okseki altepemej kiixmatkej Jiova (2 Crón. 17:3-10). Maski satepan Jehosafat amo kuali taixejekoj, Jiova amo kielkauak nochi tein kuali tein kichiujka. ¿Toni techmachtia nejin neskayot? Ke maski tinochin timopolouaj, komo timochikauaj tiksentokaskej tiktekitiliskej Jiova, yejuatsin kisentokas techtasojtas uan amo kielkauas tein kuali tein tikchiujkej.

10, 11. 1) ¿Keyej tikijtouaj ke netataujtil se netetayokolil tein Jiova techmaka? 2) ¿Keniuj uelis technankilis Jiova keman tiktataujtiaj? (Xikonita taixkopin ipeujyan tamachtilis.)

¹⁰ ¿Toni kichiua se kuali tepopaj keman ikonetsin kineki iuan tajtos? Kemej ika motekipachoua ikonetsin, kikaua tein kichiujtok uan kikaki uan ijkon ueli kimati tein kimachilia. Jiova toTajtsin, uan yejuatsin yekmelauj kineki techpaleuis. Yejua ika, keman tiktataujtiaj, techkaki ika miak nejmachkayot. Tein melauj, se ueyi tatiochiualis maj ueli titajtokan iuan Jiova.

¹¹ Netataujtil se netetayokolil tein techmaka Jiova. ¿Keyej? Porin nochipa keman tiknekij ueli iuan titajtouaj. Yejuatsin totasojikniuj uan nochipa techkaki. Itech yekinika párrafo ika titajtojkej se tokniuj siuat itokay Taylene. Yejua kijtoua ke ueli tiktapouiaj Jiova tein yeski. Keman tiktapouiaj tein tikmachiliaj, yejuatsin tataman kemej uelis technankilis. Uelis technankilis ika se tajkuilol itech Biblia, itech semej toamaixuan oso keman techyolchikauas se tokniuj. Jiova techkaki uan techajsikamati hasta keman  amo akin ijkon kichiua. Ijkuak technankilia keman tiktataujtiaj, yejua okse taman kemej kinextia ke techteltasojta.

12. ¿Keyej semi techpaleuis komo timomachtiaj netataujtilmej tein moajsij itech Biblia? ¿Katiyejua seki nejon netataujtilmej?

¹² Netataujtilmej tein tikixtajtoltiaj itech Biblia uelis techmachtiskej miak taman. Yejua ika, techtelpaleuis komo kemansa timomachtiaj nejon keman titaueyichiuaj kemej kalyetouanij. Kemej neskayot, uelis timomachtiskej netataujtil tein Jonás kichiuak ika yolyemanilis keman moajsia iijtik ueyi amichij (Jon. 1:17–2:10). No uelis timomachtiskej netataujtil tein Salomón kichiuak ika nochi iyolo keman peuak mokui templo (1 Rey. 8:22-53). Uan no uelis titanemiliskej itech netataujtil tein tamachtij Jesús (Mat. 6:9-13, TNM). Komo tikixtaliaj titanemiliskej itech netataujtilmej kemej nejin, okachi kuali tikchiuaskej tonetataujtiluan. Uan no, maj amo tikelkauakan ke motelneki nochipa tikchiuaskej netataujtil, porin ijkon “yolseuilis ten kachi kuika uelilis hasta amo uelis se kajsikamatis” kiyekpias totanemilil uan toyolo. Komo nochipa tikchiuaj netataujtil, okachi tiktasojkamatiskej maj Jiova techtasojta (Filip. 4:6, 7).

13. ¿Toni ika techpaleuia imikilis Jesús?

¹³ Okse taman kemej Jiova kinextiani ke techtasojta, yejua keman kiualtitanik iKonetsin “para maj tejuan tikpiakan ne nachipa nemilis” (1 Juan 4:9). Tatitanil Pablo kimelauak: “Semi oui de tikneltokaj ke aksa taltikpaktagat momikilis para kipaleuis de okse tagat ten yolchipauak. Pero acha ueliskia onkaskia se aksa ten moixeuis de ijkon kichiuas, de momikiliskia para kipaleuiskia se tagat ten melau yolkuali”. Sayoj ke no kijtoj ke Dios technextilij ke semi techtasojta keman kiualtitanik iKonetsin maj toka momikiliki “maski tejuan tech ne tonal tikatkaj semi titajtakolejke” (Rom. 5:6-8). Imikilis Jesús techpaleuia maj timochiuakan tiitasojikniuan Dios uan nejon yejua tein okachi kinextia ke techteltasojta.

14, 15. 1) ¿Keniuj kinpaleuia imikilis Jesús tokniuan taixpejpenalmej? 2) ¿Keniuj kinpaleuia imikilis Jesús akin amo kichiaj yaskej iluikak?

¹⁴ ¿Keniuj kinpaleuia imikilis Jesús tokniuan taixpejpenalmej? Nejin tokniuan akin amo miakej kimachiliaj inetasojtalis Jiova ika okse taman (Juan 1:12, 13; 3:5-7). Dios kinixpejpenak ika iyektikatsin espíritu uan yejua ika axkan ikoneuan (Rom. 8:15, 16). Pablo kijtoj ke nochin yejuan tokotsyetokej “iuan Cristo tech in lugares de eluiyaktsinko porin iuantsin [pouij]” (Efes. 2:6). Sayoj ke kemej seki tokniuan taixpejpenalmej yetokejok nikan taltikpak, ¿toni kijtosnekia Pablo? Ke Jiova kinmatiltijya nochin nejon tokniuan ke kichiaj nemiskej nochipaya ne iluikak (Efes. 1:13, 14; Col. 1:5).

¹⁵ ¿Uan keniuj kinpaleuia imikilis Jesús akin amo kichiaj yaskej iluikak? Komo takuaujtamatij ke yekmelauj kinpaleuia imikilis Jesús, yejuan uelis mochiuaskej  itasojikniuan Dios. Uan no, satepan Dios no uelis kinselis kemej ikoneuan uan nemiskej nochipaya nikan taltikpak. Kemej tikitaj, imikilis Jesús kinextia ke Jiova kintasojta nochin taltikpakneminij (Juan 3:16). Techtelyolpaktia tikmatiskej ke komo amo tikauaj Dios, yejuatsin techmakas okachi kuali nemilis itech Xochital. Tikyekmatij ke imikilis Jesús yejua tein okachi kinextia ke Jiova techtasojta. Yejua ika, maj tiksentokakan tiknextikan ke tiktasojkamatij ika nochi toyolo.

16. ¿Toni tikchiuaskej komo titanemiliaj keniuj Jiova technextilia ke techtasojta?

¹⁶ Jiova technextilia inetasojtalis ika okseki miak taman. Tekiuaj David kijtoj: “¡Nejua nikita ke semi kualtsitsin motanemililuan! ¡NoDios, tel amo ueli se kinpoua! Komo niktemoskia nikinpouas, okachi miakej ke xal” (Sal. 139:17, 18). Komo titanemiliaj itech nochi taman kemej Jiova kinextia inetasojtalis, okachi tiktasojtaskej uan timochikauaskej okachi kuali tiktekitiliskej.

17, 18. ¿Keniuj uelis tiknextiliskej Jiova ke tiktasojtaj?

¹⁷ ¿Keniuj uelis tiknextiliskej Jiova ke tiktasojtaj? Se taman, keman tikteixmatiltiaj ika yolpakilis tein kichiuati iTekiuajyo (Mat. 24:14; 28:19, 20, TNM). Okse taman, keman amo tikauaj ijkuak tikpanouaj ouijkayomej kampa moneki tiknextiskej ox tiksentokaskej titakuaujtamatiskej iuan (xikonixtajtolti Salmo 84:11 uan Santiago 1:2-5). Maski tikpiaskej uejueyi ouijkayomej, Jiova kimati tein tikpanotokej uan techpaleuis porin techteltasojta (Sal. 56:8).

¹⁸ Itech nejin tamachtilis tikitakej sayoj seki taman kemej uelis tiknextiliskej Jiova ke tiktasojtaj. Yekinika, ijkuak titanemiliaj itech nochi itachijchiualis tein kualtsin. Ojpatika, keman kuali timomachtiaj Biblia. Expatika, keman nochipa tikchiuaj netataujtil porin tiktemouaj okachi kuali timouikaskej iuan Jiova. Uan naujpatika, keman titanemiliaj itech imikilis Jesús tein kitelpia ipatiuj (1 Juan 2:1, 2). Komo tikchiuaj nejin, senkis tikneltokaskej ke Jiova techtasojta uan okachi tiktasojtaskej.