1, 2. ¿Toni nochipa kichiuanij itekitikauan Dios?

IJKON kemej panouanij xiujmej, Jiova achtook kitematiltiani toni mochiuas satepan. Uan itekitikauan nochipa kichianij ika nejmachkayot maj mochiua. Kemej neskayot, Jeremías kijtojka ke babilonios kiixpoloskiaj Judá. Uan yejua nejon mochiuak itech xiuit 607 achto itech totonaluan (Jer. 25:8-11). Isaías kijtojka ke Jiova kinpaleuiskia judíos maj kisanij Babilonia uan maj mokepanij ininaltepeuj. Uan kijtoj: “Yolpakij nochin akin kisentokaj kichiaj maj kichiua” (Is. 30:18). Miqueas no senkis kineltokaya ke mochiuaskia tein achtook moijtojka. Yejua ika kijtoj: “Niksentokas nitachixtos itech Jiova” (Miq. 7:7). Uan itekitikauan Dios tel miak xiujmej kichixtoyaj maj ejkoni Mesías akin moijtojka ualaskia (Luc. 3:15; 1 Ped. 1:10-12). *

² No ijkon, tejuan tikchixtokej maj mochiua tein moijtojka ika iTekiuajyo Dios. Jesús yejua tekiuaj itech nejon Tekiuajyot uan amo uejkaua techmakixtis itech nejin taltikpak kampa  mochiujtok tein tel amo kuali. Keman ejkos tamilis, kinixpolos akin amo yolkualmej uan kijkuanis nochi tein techtajyouiltia (1 Juan 5:19). Tamilis ijsiujka motokijtok, yejua ika moneki tikchiujtoskej tein moneki.

3. Komo miak xiujmejya tikchixtokej maj ejko tamilis, ¿toni uelis timotajtaniskej?

³ Semi tikyolnejnekij maj ejko tonal keman mochiuas itanejnekilis Dios nikan taltikpak (Mat. 6:10, TNM). Sayoj ke komo miak xiujmejya tikchixtokej maj ejko tamilis, uelis timotajtaniskej ox moneki tiksentokaskej titachixtoskej uan tikchiujtoskej tein moneki.

4. ¿Keyej moneki tiksentokaskej titachixtoskej uan tikchiujtoskej tein moneki?

⁴ ¿Keyej moneki tiksentokaskej titachixtoskej uan tikchiujtoskej tein moneki? Onkak miak taman tein motelneki tein kinextia keyej. Se taman, porin Jesús technauatij maj titachixtokan uan maj tiijsatokan (Mat. 24:42; Luc. 21:34-36). Uan no, itech inechikol Jiova miakpa techiluianij maj tiksentokakan titachixtokan uan maj tikchiujtokan tein moneki tein techpaleuis keman ejkos tamilis uan maj tikelnamiktokan ke Jiova motenkaua kichiuas se Xochital (xikonixtajtolti 2 Pedro 3:11-13, TNM).

5. ¿Keyej no moneki maj titachixtokan?

⁵ Yekinika itatojtokakauan Cristo monekia tachixtoskej uan kichiujtoskej tein monekia tein kinpaleuiskia keman ejkoskia itonal Jiova. Sayoj ke axkan tejuan okachi moneki maj titachixtokan. ¿Keyej? Porin Jesús peuak taixyekana itech xiuit 1914, uan ijkuak peuak timoajsij itech itamian tonalmej. ¿Uan keyej senkis tikneltokaj nejin? Porin tein Jesús kijtojka ke mochiuaskia itech itamian tonalmej mochiujtokya. Kemej neskayot, okachi mochiua tein amo kuali uan noyampa taltikpak moteixmatiltijtok kuali tanauatilmej (Mat. 24:3, 7-14, TNM). Jesús amo kijtoj kanachi uejkauaskia itamian tonalmej. Yejua ika, okachi moneki maj tikchiujtokan tein moneki porin tamilis ejkos keman amo tikmattoskej.

6. ¿Keniuj tikmatij ke okachi mochiuas tein amo kuali?

⁶ Itech nejin tonalmej, okachi mochiujtiyas tein tel amo kuali. ¿Keniuj tikmatij? Porin Biblia kijtoua ke taltikpakneminij okachi mochiuaskej tel amo yolkualmej itech itamian tonalmej (2 Tim. 3:1, 13; Mat. 24:21; Apoc. 12:12). Yejua ika, maski ipa mochiujtokya tein amo kuali, tikmatij ke kisentokas okachi motaouijkantalis. Sayoj ke ¿kijtosneki nejon ke achto ke ejkos tamilis moneki okachi mochiuas tein amo kuali?

7. ¿Toni tikajsikamatij keman tiknemiliaj tein kijtoua Mateo 24:37-39?

⁷ Sekin xa kinemiliskej ke achto ke peuas okachi ueyi tajyouilis, itech nochi uejueyi altepemej moneki onkas mayan, kokolismej uan neteuilismej (Apoc. 7:14). Sayoj ke nejon amo panos. ¿Keyej? Porin komo panoskia nejon, nochin taltikpakneminij kiajsikamatiskiaj ke mochiujtokya tein achtook moijtojka. Hasta akin amo kineltokaj tein Biblia kijtoua kiitaskiaj nejon. Sayoj ke Jesús kijtoj ke tel miakej taltikpakneminij amo kiajsikamatiskej ke nentokej itech itamian tonalmej. Yejua kijtoj ke nion kimattoskej keman ejkos tamilis porin monejnemiltijtokej kemej yeskia amo teyi panoti (xikonixtajtolti Mateo 24:37-39). ¿Toni tikajsikamatij keman tiknemiliaj tein kijtoj Jesús? Ke amo moneki tikchiaskej maj okachi motaouijkantali achto ke peuas okachi ueyi tajyouilis, uan hasta maj nochin taltikpakneminij  kineltokakan ke ejkotokya tamilis (Luc. 17:20, TNM; 2 Ped. 3:3, 4).

8. ¿Toni senkis tikneltokaj tiitekitikauan Dios?

⁸ Jesús kijtoj tein panoskia itech itamian tonalmej porin nejon kinpaleuiskia sayoj akin tachixtoskiaj maj kiajsikamatikan ke nentokej itech tonalmej keman ejkosya tamilis. Tiitekitikauan Dios tiksentokanij titachixtonij (Mat. 24:27, 42). Yejua ika, itech xiuit 1914 uan hasta axkan tikitanij keniuj mochiua nochi tein achtook moijtojka. Senkis tikneltokaj ke tinentokej itamiampa nochi tein amo kuali tein mochiujtok itech taltikpak. Uan Jiova kiixtalijya kemanian kiixpolos.

9. ¿Keyej moneki tiksentokaskej titachixtoskej uan tikchiujtoskej tein moneki?

⁹ Kemej tikitaj, moneki tiksentokaskej titachixtoskej uan tikchiujtoskej tein moneki. ¿Keyej? Yekinika, porin tiknekij tiktakamatiskej Cristo. Uan ojpatika, porin tikneltokaj ke mochiujtokya tein kijtojka ke panoskia itech itamian tonalmej. ¿Keyej tikneltokaj nejon? Amo porin tikneltokaj tein yeski taman tein tikakij, ta porin onkak tein kinextia ke tein achtook moijtojka itech Biblia mochiujtokya.

10, 11. 1) ¿Keyej Jesús kiniluij imomachtijkauan maj kisentokanij tachixtonij? 2) ¿Toni moneki tikchiuaskej komo tamilis okachi uejkaua ke tein tikchiayaj? (Xikonita taixkopimej ipeujyan tamachtilis.)

¹⁰ Miakej itaixpantijkauan Jiova miak xiujmejya kichixtokej maj ejko tamilis. Sayoj ke maski uejkaujya peuak tiktekitiliaj Dios, moneki tiksentokaskej titachixtoskej. Moneki maj tikchiujtokan tein moneki keman Jesús ualas kiixpolokiuj tein amo kuali tein mochiujtok nikan taltikpak kampa Satanás taixyekantok. Maj tikelnamikikan ke Jesús kiniluij imomachtijkauan maj kisentokanij tachixtonij porin amo kimatiaj kemanian ejkoskia tamilis. Uan no kiniluij: “Keme yeskia se tagat yajtoskia uejka. Uan achto kitepialtijteuak nichan, uan kintanajnauatijteuak nitakeualuan. Uan kitekimaktijteuak nochi sejse. Uan kinauatijteuak naken tatapoa ma tajpia tech in kali ijkuin: ‘Xiixpetantokan porin amo nankimatij keman nejuatsin nipatrón de nijin kali niejkos, takan tapoyauteno, oso takan tajkoyouan, oso keman tsajtsis in piotsin, oso kuak ne tanestiuits ya, para ma amo santajma niejkos uan namechajsikiu nankochtokke’. Uan ten namechilia namejuan, no nikinilia nochi ten nouan yektakuautamatij: Xiixpetantokan” (Mar. 13:33-37).

¹¹ Keman tokniuan kiajsikamatkej ke Jesús peuak taixyekana itech xiuit 1914, kiajsikamatkej ke tamilis amo uejkaua ejkoskia. Yejua ika peuak kichiuaj tein monekia keman peujkej okachi kiteixmatiltiaj iTekiuajyo Dios. Itech Marcos capítulo 13, Jesús kijtoj ke ininteko takeualmej ueliskia ejkos okachi satepan ke tein yejuan kinemiliayaj. Sayoj ke yejuan monekia kisentokaskej tachixtoskej maski amo kimatiskiaj kemanian ejkoskia. Nejin techmachtia ke komo miak xiujmejya tikchixtokej maj ejko tamilis, nejon amo kijtosneki ke uejkauasok oso ke amo tikitaskejok. Moneki tiksentokaskej titachixtoskej.

12. 1) ¿Toni Habacuc kitajtanij Jiova? 2) ¿Toni Jiova kinankilij Habacuc?

 ¹² Maj tiknemilikan tein kipanok tanauatijkej Habacuc. Yejua mochiak ika nejmachkayot uan kisentokaya kinnejmachtiaya taltikpakneminij ke Jerusalén kiixpoloskiaj. Achto ke yejua kichiuaskia nejon, okseki tanauatianij miak xiujmej no tanejmachtijkej nejon. Uan Habacuc kiitaya ke taltikpakneminij okachi kichiuayaj tein amo kuali. Yejua ika kitajtanij Jiova maj kipaleuiani. Kitajtanij: “¿Hasta kemanian, Jiova, moneki nitajtanis nepaleuil, sayoj ke amo tikaki?”. Maski Jiova amo kiluij kemanian kiixpoloskiaj Jerusalén, kinauatij maj tachixtoni uan motenkauak iuan: “Amo ejkos tiotak” (xikonixtajtolti Habacuc 1:1-4 uan 2:3).

13. 1) ¿Toni ueliskia kinemilis Habacuc? 2) Komo Habacuc ijkon tanemiliani, ¿toni ueliskia kipanos?

¹³ Xikonnemili toni panoskia komo Habacuc amo kisentokani mochiani uan kinemiliani: “Miak xiujmejya nikchixtok maj kiixpolokan Jerusalén. Xa poliuiok miak xiujmej, yejua ika amo moneki niksentokas nikteixmatiltis nejin. Maj oksekin kichiuakan”. Komo Habacuc ijkon tanemiliani, ¿toni ueliskia kipanos? Kipoloskia ikuali uikalis iuan Dios. Uan komo ijkuak kiixpoloskiaj Jerusalén amo kichiujtoskia tein moneki, kipoloskia inemilis.

14. ¿Keniuj timomachiliskej itech Xochital?

¹⁴ Keman tiyetoskejya itech Xochital, tikitaskejya keniuj mochiuak nochi tein Jiova kijtojka ke panoskia itech itamian tonalmej. Yejua ika, ¿keniuj timomachiliskej? Senkis titakuaujtamatiskej iuan Jiova uan senkis tikneltokaskej ke yejuatsin kichiuas nochi okseki taman tein motenkauak (xikonixtajtolti Josué 23:14). Semi tiktasojkamatiliskej Jiova porin kiualkuik tamilis keman okachi monekia uan porin kinnauatij itekitikauan maj tachixtonij uan maj kichiujtonij tein monekia (Hech. 1:7; 1 Ped. 4:7).

15, 16. ¿Keyej moneki tiktayekanaltiskej tanojnotsalis?

¹⁵ Itech inechikol Jiova kisentokaskej techelnamiktiskej ke okachi moneki tiktayekanaltiskej itech tonemilis tiktekitiliskej Dios. Nejon techpaleuis maj tiksentokakan tiktekitilijtokan, sayoj ke okachi techpaleuis maj amo tikelkauakan ke motelneki tiksentokaskej tikteixmatiltiskej kuali tanauatilmej. Senkis tikneltokaj ke tein Jesús kijtojka ke mochiuas itech itamian tonalmej mochiujtokya uan ke amo uejkaua ejkos tamilis. Yejua ika,  moneki okachi tiktayekanaltiskej tiktekitiliskej Jiova uan tikteixmatiltiskej iTekiuajyo (Mat. 6:33, TNM; Mar. 13:10).

¹⁶ Amo uejkaua ixpoliuiti tein amo kuali tein mochiujtok nikan taltikpak kampa Satanás taixyekantok. Keman titanojnotsaj, tikinpaleuiaj taltikpakneminij maj momakixtikan. Maj tikitakan se neskayot kampa moita ke motelneki tiktayekanaltiskej tikinpaleuiskej taltikpakneminij maj makisakan. Itech xiuit 1945, se barco tein kichijchiujkej Alemania pankalakik itech ueyiat uan momikilijkej tel miakej taltikpakneminij. Se takat uan se siuat namikuanij akin satepan mochiujkej itaixpantijkauan Jiova makiskej. Tokniuj siuat kielnamiki ke ijkuak barco pankalaktoya, se siuat tsajtsia porin nochi tein kiuikaya uan okseki taman tein patiyoj pankalaktoya itech ueyiat. Sayoj ke oksekin akin ompa yayaj kiajsikamatiaj ke okachi monekia kinpaleuiskej okseki taltikpakneminij maj makisakan. Itech nejin tonalmej, miakej taltikpakneminij no uelis kipoloskej ininnemilis. Yejua ika moneki tiktayekanaltiskej tanojnotsalis porin tikmatij ke tein tikteixmatiltiaj uelis kinpaleuis maj makisakan. Tiknekij tikchiuaskej nochi tein tiueliskej uan ijkon tikinpaleuiskej taltikpakneminij maj momakixtikan.

17. ¿Keniuj tikmatij ke tamilis uelis ejkos keman amo tikmattoskej?

¹⁷ Senkis moita ke tein achtook kijtojka Biblia mochiujtokya uan ke tamilis ejkos keman amo tikmattoskej.  Amo uejkaua, Organización de las Naciones Unidas uan tekiuajyomej tein kipaleuiaj kinekiskej kintamiixpoloskej taneltokalismej tein amo melaujkej (Apoc. 17:16). Amo moneki tiknemiliskej ke poliuiok miak tonalmej keman mochiuas nejon. Maj tikelnamikikan ke Dios kichiuas maj tekiuajyomej kinekikan kinixnamikiskej taneltokalismej. Yejuatsin ijsiujka uelis kichiuas nejon uan keman amo tikmattoskej (Apoc. 17:17). Amo uejkaua ixpoliuis tein amo kuali tein mochiujtok nikan taltikpak kampa Satanás taixyekantok. Yejua ika, maj tikchiuakan tein Jesús tayolmajxitij: “Ximoyekpiakan namejuan san para ma amo kejkepto namotakuautamatilis. Uan amo xikneltatakuajtinemikan uan amo xitauantinemikan. Uan amo xiyoltanemilijtinemikan den namonemilis de nikan taltikpak. Porin komo ijkon nankichiutokke, ijkuakon namechmoukaichtakauikiu ne tonal” (Luc. 21:34, 35; Apoc. 16:15). Maj tiksentokakan titachixtokan uan maj tiktayekanaltikan tiktekitiliskej Jiova. Maj titakuaujtamatikan ke yejuatsin kinmakixtis akin tachixtokej uan kichiujtokej tein moneki (Is. 64:4).

18. ¿Toni netajtanil tiknankiliskej itech okse tamachtilis?

¹⁸ Keman tikchixtokej maj ejko tamilis, maj tikchiuakan tein tayolmajxitij Judas, se imomachtijkauj Jesús. Yejua kijtoj ke moneki okachi tikchikauaskej totakuaujtamatilis, nochipa tikchiuaskej netataujtil uan tikyekpiaskej tokuali uikalis iuan Dios keman tikchixtokej maj ejko tonal keman yejuatsin techtayokolis nemilis nochipaya (Jud. 20, 21). ¿Keniuj uelis tiknextiskej ke yekmelauj tikchiaj tinemiskej itech Xochital tein amo uejkaua mochiuas? Tikitaskej itech okse tamachtilis.