1. ¿Itech toni tonalmej tinemij?

TINEMIJ itech tonalmej tein semi ouijkej. Itech xiuit 1914 peuak itamian tonalmej nochi tein amo kuali tein mochiua nikan taltikpak. Uan ijkon kemej panouaj tonalmej okachi motaouijkantalia (2 Tim. 3:1-5). Uan tikmatij ke okachi ouij yeski, porin itech Biblia achtook moijtojka ke itech nejin tonalmej taltikpakneminij okachi kichiuaskiaj tein amo kuali (2 Tim. 3:13).

2. ¿Ika toni moixpetaniaj axkan miakej taltikpakneminij? (Xikonita taixkopimej ipeujyan tamachtilis.)

² Itech nejin tonalmej, miakej taltikpakneminij moixpetaniaj ika miak taman tein Jiova kitauelita, kemej tateuilis, auilnemilis oso naualot. Itech Internet, televisión, películas uan amaixmej nochi nejin monextia kemej yeskia kuali yetok. Itech seki uejueyi altepemej, kipatanij tanauatilmej uan axkan kinkauaj taltikpakneminij maj kichiuakan seki taman tein achto kiitayaj ke amo kuali yetoya. Sayoj ke Jiova amo kipatatok itanauatiluan uan kisentoka kitauelita nejon  amo kuali tachiualismej (xikonixtajtolti Romanos 1:28-32).

3. ¿Keniuj techitaj miakej taltikpakneminij porin tiktakamatij itanauatiluan Dios?

³ Itech inintonaluan yekinika itatojtokakauan Cristo, taltikpakneminij no moixpetaniayaj ika tateuilis uan auilnemilis. Sayoj ke tokniuan amo kichiuayaj nejon, porin yejuan kitakamatiaj itanauatiluan Dios. Yejua ika kinijijtouayaj uan kintajyouiltiayaj. Tatitanil Pedro kijkuiloj: “Nekes ten amo taneltokaj iuan Cristo, yejuan nojonkes namechmoukaitaj kuak namejuan amo nankichiutinemij ok ijkon keme yejuan kuelitaj. [...] Uan no yejuan namechkejkeloaj porin namejuan amo iuan nannentinemij ok” (1 Ped. 4:4). Itech nejin tonalmej, tejuan no tiktakamatij itanauatiluan Dios uan yejua ika miakej amo kuali techitaj. Biblia tanejmachtia ke nochin akin kichiuaskej kemej Cristo kintajyouiltiskej (2 Tim. 3:12).

4. ¿Toni amo uelis tikchiuaskej komo tiknekij tiktakamatiskej Dios?

⁴ Komo tiknekij tiktakamatiskej Dios, amo uelis tiktasojtaskej “tajtakolnemilis de nikan taltikpak nion teyi ten eua itech ne tajtakolnemilis” (xikonixtajtolti 1 Juan 2:15, 16). Biblia kijtoua ke Satanás taixyekana nikan taltikpak. Yejua kinkui taneltokalismej, tekiuajyomej, tanamakalis uan nochi tein ika moteixmatiltia teisa uan ika kinkajkayaua taltikpakneminij (2 Cor. 4:4; 1 Juan 5:19). Komo amo tiknekij maj techkajkayaua tein onkak nikan taltikpak, moneki kuali tikixpejpenaskej akoni iuan timouikaskej. Yejua ika, Biblia technejmachtia maj amo timokauakan maj techkajkayauakan uan techiluia: “Takan timouikatinemij iuan nekes ten amo yolchipauke, ijkuakon nojonkes techmajmauaske ika tajtakolme” (1 Cor. 15:33). (Xikonita kampa kijtoua “Tein okachi momelaua”.)

5, 6. 1) ¿Akonimej moneki maj amo tikinpiakan kemej totasojikniuan? 2) ¿Keyej moneki amo timouikaskej iuan akin kichiua tein amo kuali?

⁵ Komo tiknekij tiksentokaskej kuali timouikaskej iuan Dios, moneki maj amo timouikakan iniuan akin kichiuaj tein amo kuali. Moneki maj amo no timouikakan iniuan akin kijtouaj ke kitekitiliaj Jiova sayoj ke amo kitakamatij. Yejua ika, komo semej kichiua se ueyi tajtakol uan amo moyolnonotsa, amo iuan titajtouajok nion timouikaj iuan (Rom. 16:17, 18).

⁶ Komo timouikaj iuan akin kichiua tein amo kuali, satepan uelis no tikchiuaskej tein yejua kichiua. ¿Keyej? Porin okachi miakej taltikpakneminij kinekij kichiuaskej tein kichiuaj inintasojikniuan uan maj kuali kinitakan yejuan. Kemej neskayot, komo kuali timouikaj iuan akin auilnemi, satepan no uelis ijkon tikchiuaskej tejuan. Nejon  kinpanouani seki itaixpantijkauan Jiova. Sekin moyolnonotskej, sayoj ke sekin amo uan kinkalankixtijkej itech nechikol (1 Cor. 5:11-13). Uan komo amo mopataj, kinpanos tein kijtoua 2 Pedro 2:20-22 (xikonixtajtolti).

7. ¿Akonimej moneki iniuan kuali timouikaskej?

⁷ Melauak ke moneki tikintakachiuaskej nochin. Sayoj ke moneki amo timouikaskej iniuan akin amo kitakamatij Dios. Kemej neskayot, amo kuali yeskia maj se itaixpantijkauj Jiova peua moixmati iuan aksa akin amo itaixpantijkauj Jiova. Okachi moneki maj kuali timouikakan iuan Dios ke kuali timouikaskej iuan akin amo kitasojta Jiova. Sayoj moneki yeskij totasojikniuan akin nemij kemej Dios kiyolpaktia. Jesús kijtoj: “Nochi naken kitakamatiske ten Dios kimonekiltia, yejuan nijinkes nikinpouas keme [nokniuan]” (Mar. 3:35).

8. ¿Toni kinpanok israelitas porin mouikakej iniuan akin kichiuayaj tein amo kuali?

⁸ Akin mouikaj iniuan akin amo kuali monejnemiltiaj mokalakiaj itech uejueyi kuejmolmej. Kemej neskayot, keman israelitas yayaj ajsitij itech Tal tein Jiova motenkaujka kinmakas, kinnauatij maj amo mosentilianij iniuan akin nemiaj ompa. Yejuatsin kijtoj: “Moneki amo timoixpilos ininixpan inintiotsitsin nion maj mitstanejnektikan xikintekitili, uan moneki amo xikchiua tein yejuan kichiuaj, ta moneki tikinuetsiltis uan tikinpostekis kalikximej tein kiueyichiuaj. Namejuan moneki nankitekitiliskej Jiova nanmoDios” (Éx. 23:24, 25). Sayoj ke miakej israelitas amo kitakamatkej uan satepan kichiujkej uejueyi tajtakolmej (Sal. 106:35-39). ¿Toni panok okachi satepan? Jiova kiixtopeuak xolal Israel uan kiixpejpenak nechikol kampa kichiuaj kemej Cristo kemej ixolal (Mat. 23:38; Hech. 2:1-4).

9. ¿Keyej moneki semi timoyekpiaskej ika tein tikitaj uan tikakij?

⁹ Miak taman tein moita itech televisión, itech Internet, tein kipiaj películas, amaixmej uan nekuikatilmej uelis kijtakos tokuali uikalis iuan Dios. Tamatij kemej amo kuali tasojiknimej tein uelis kichiuaskej maj titakuaujtamatikan itech tein onkak nikan taltikpak kampa taixyekana Satanás uan maj amo titakuaujtamatikan iuan Jiova uan itech tein motenkaua kichiuas. Yejua ika moneki semi timoyekpiaskej. Maj amo keman tikitakan, tikakikan nion maj tikixtajtoltikan teisa tein kichiuas maj tiknejnekikan tein amo kuali (Tito 2:12).

10. ¿Toni panos ika tein amo kuali tein moita itech Internet, películas uan amaixmej?

¹⁰ Amo uejkaua, itaixyekanalis Satanás tamis uan tein amo kuali tein moita itech Internet, películas uan amaixmej amo onkasok. Biblia kijtoua ke nochi tein amo kuali ixpoliuis, sayoj ke akin kichiuaj tein Dios kiyolpaktia nemiskej nochipaya (1 Juan 2:17, TNM). Amatajkuilol Salmos no kijtoua ke akin amo yolkualmej ixpoliuiskej, sayoj ke akin yolkualmej nemiskej ika yolpakilis nochipaya nikan taltikpak kampa sayoj onkas yolseuilis (Sal. 37:9, 11, 29).

11. ¿Keniuj techpaleuia Jiova maj amo keman tikauakan?

¹¹ Itech se netataujtil, Jesús kijtoj ke komo tiknekij tinemiskej nochipaya  moneki kuali tikixmatiskej Jiova uan iKonetsin (Juan 17:3). Dios techpaleuia maj tikixmatikan uan maj amo keman tikauakan. ¿Keniuj? Itech inechikol mochijchiuaj amaixmej, videos uan nepaleuilmej itech Internet tein techmachtia toni moneki tikchiuaskej uan ijkon tinemiskej nochipaya. Nejin amo kichiuaj akin amo kitakamatij Dios. Uan no, itech inechikol Dios tikseliaj tamachtilis itech panoua 110,000 nechikolmej noyampa taltikpak. Tein tikakij itech nechikolmej uan itech uejueyi nechikolmej techpaleuia maj okachi titakuaujtamatikan iuan Jiova uan itech tein motenkaua kichiuas (Heb. 10:24, 25).

12. ¿Toni kijtosneki se monamiktis sayoj iuan se “taneltokakke”?

¹² Akin kichiuaj kemej Cristo moneki kuali kinixpejpenaskej inintasojikniuan, sayoj ke okachi moneki kuali kiixpejpenaskej akoni iuan monamiktiskej. Biblia tayolmajxitia maj amo tipeuakan timoixmatikan iuan aksa akin amo kitekitilia Jiova, “porin amo ueli tichipaukanemij komo tochipaukanemilis iuan yetinemis ne pitsotik nemilis. Uan in tanextsin amo uelis yetos komo no ongak tayouayanilot” (2 Cor. 6:14). Biblia no techiluia ke moneki timonamiktiskej sayoj iuan se “taneltokakke” (1 Cor. 7:39). Nejin kijtosneki ke sayoj moneki timonamiktiskej iuan se itaixpantijkauj Jiova akin moauijya uan kitakamati itanauatiluan Dios. Komo timonamiktiaj iuan aksa akin kitasojta Jiova, yejua techpaleuis maj amo tikauakan Dios.

13. ¿Toni Jiova kinnauatij israelitas?

¹³ Jiova kimati toni techpaleuis uan techyolpaktis. Uan nochipa kinnauatiani itekitikauan maj sayoj monamiktikan iuan akin kitekitiliaj yejuatsin. Kemej neskayot, Jiova kinnauatij israelitas maj amo monamiktianij iniuan akin kinueyichiuayaj tiotsitsin. ¿Keyej? Porin yejuan kichiuaskiaj maj israelitas no kinueyichiuanij tiotsitsin. Uan no, Jiova kinnejmachtij ke komo amo kitakamatiaj, tel kualaniskia iniuan uan kinixpoloskia (Deut. 7:3, 4).

14, 15. ¿Toni kipanok Salomón porin amo kitakamatik Jiova?

¹⁴ Keman Salomón peuak tekiuajti Israel, kitajtanij Jiova maj kipaleuiani maj kipiani tamatilis. Jiova kinankilij inetataujtil, uan Salomón tel uejka kiixmatkej kemej se tekiuaj tel tamatkej uan ke kampa taixyekanaya amo akin kipanouaya tatasojtilis. Biblia kijtoua ke hasta se siuat akin tekiuajtia itech okse ueyi altepet kikalpanoto porin kitapouijkaj ke katka semi tamatkej uan tominpixkej. Uan keman kiixmatik, semi kimoujkaitak nochi (1 Rey. 10:7). Maski ijkon, Salomón satepan kichiuak se taman tein techmachtia toni uelis techpanos komo amo titatakamatij uan timonamiktiaj iuan aksa akin amo kitekitilia Jiova (Ecl. 4:13).

 ¹⁵ Maski Jiova kimakak Salomón miak taman tein kuali, yejua amo kitakamatik uan monamiktij iniuan “miakej siuamej analtekojkayomej”. ¡Kinpiak 1,000 siuamej! ¿Toni kipanok porin amo kitakamatik Jiova? Keman xiuejya katka, amo senkis kitekitilijok Jiova porin nejon siuamej kiuikakej maj kichiua tein amo kuali (1 Rey. 11:1-6). Komo nejin kipanok Salomón, akin tel tamatkej katka, no uelis techpanos tejuan. Yejua ika moneki maj nion tiknemilikan timonamiktiskej iuan aksa akin amo kitasojta Jiova.

16. ¿Toni kinyolmajxitia Biblia akin ipa monamiktijkajya keman mochiujkej itaixpantijkauan Jiova?

¹⁶ ¿Uan komo aksa mochiua itaixpantijkauj Jiova keman ipa monamiktijkaya? Biblia kijtoua: “Namejuan, nantesiuauan, ximotekauilikan ma namechyekanakan namoyokichuan. Porin takan sekin namoyokichuan amo kitakamatij in Tajtoltsin de Dios, ijkuakon namejuan nantesiuauan nankintaneltoktiske namoyokichuan ika namochipaukanemilis uan amo monekis xikinnojnotstokan” (1 Ped. 3:1). ¿Toni kijtosneki nejin? Ke komo siuat mochikaua kinextis okachi kualneskayomej uan kichiua tein Biblia tayolmajxitia, inamik xa kiitas nejon uan kiixtalis mochiuas itaixpantijkauj Jiova. Nejin kinpanouaniya miakej namikuanij. Uan tokniuan takamej akin ininnamik amo itaixpantijkauj Jiova no moneki kichiuaskej tein kijtoua 1 Pedro 3:1.

17, 18. 1) ¿Toni kipaleuij Noé maj makisa itech Tetsaujkakiouit? 2) ¿Toni kinpaleuij yekinika itatojtokakauan Cristo maj makisakan keman kiixpolojkej Jerusalén?

¹⁷ Amo kuali tasojiknimej uelis kichiuaskej maj amo tiktakamatikan Jiova. Sayoj ke akin kuali tasojiknimej uelis techpaleuiskej maj timelaujkanemikan. Maj tiknemilikan tein kipanok Noé. Itech itonaluan, tel miakej taltikpakneminij nochipa sayoj kinemiliayaj kichiuaskej tein amo kuali (Gén. 6:5). Kemej tel amo yolkualmej katkaj, Jiova kiixtalij kinixpolos nochin. Sayoj ke Biblia kijtoua ke Noé katka yolmelauak uan ke nochipa kitakamatik Jiova (Gén. 6:7-9). ¿Keniuj uelik kichiuak nejon?

¹⁸ Noé amo keman mouikak iniuan akin amo kitasojtayaj Jiova. Okachi kuali, kitemouaya yetos nochipa iuan inamik, ikoneuan uan isiuamouan, uan nochin yejuan kitayekanaltijkej kichijchiuaskej arca uan kiteixmatiltiskej tein yaya mochiuati (2 Ped. 2:5). Nejin kinpaleuij maj makisakan keman mochiuak Tetsaujkakiouit. Itech nejin tonalmej, tinochin tiualeuaj itechkopa Noé uan ichankauan. Yejua ika moneki tiktasojkamatiskej maj yejuan tatakamatinij uan maj amo mouikanij iniuan akin kichiuayaj tein amo kuali. No ijkon, yekinika itatojtokakauan Cristo no tatakamatkej uan amo mouikakej iniuan akin amo kitasojtayaj Jiova. Nejin kinpaleuij maj makisanij keman kiixpolojkej Jerusalén itech xiuit 70 (Luc. 21:20-22).

19. ¿Toni moneki tikchiuaskej komo tiknekij timelaujkanemiskej iixpan Jiova?

¹⁹ Komo tiknekij tiksentokaskej timelaujkanemiskej iixpan Jiova itech nejin itamian tonalmej, ¿toni moneki tikchiuaskej? (1 Cor. 16:13; Prov. 13:20.) Moneki tikchiuaskej kemej Noé, ichankauan uan yekinika itatojtokakauan Cristo. Maj amo keman timouikakan iniuan akin amo kitasojtaj Jiova. Maj tikelnamikikan ke tikinpiaj millones tokniuan akin amo kikauaj Dios uan uelis yeskij totasojikniuan. Yejuan uelis techpaleuiskej maj timelaujkanemikan uan maj timakisakan keman ixpoliuis tein amo kuali uan maj tinemikan itech Xochital. Yejua ika, maj kuali tikinixpejpenakan totasojikniuan itech nejin itamian tonalmej.