1, 2. ¿Toni tiknekij tinochin akin tiktekitiliaj Jiova? Xikonijto se neskayot.

KEMAN tiyouij tanamakaloyan tikouatij takilot, ¿toni tikitaj itech takilot? Xa tikitaj maj amo tel patiyoj. Sayoj ke okachi tikitaj maj uelik uan ajuiyak uan maj ueli se kikuaya. Tikmatij ke takilot tein okachi kuali yejua tein chikauakya.

² Keman tikixmatij Jiova uan timoauiaj, tiknekij timochiuaskej tiyekyolmajsitokej, oso tikpiaskej kualneskayomej uan okachi kuali timouikaskej iuan Jiova. Tatitanil Pablo kiniluij tokniuan akin nemiaj Éfeso ke yejuan ueliskiaj yekyolmajsitoskej kemej Cristo. Komo kinekiaj ijkon mochiuaskej, monekia kuali mouikaskej uan kisentokaskej kiixmatiskej Jesús (Efes. 4:13).

3. ¿Keyej tikijtouaj ke nechikolmej itech nejin tonalmej tamatij kemej nechikol tein moajsia Éfeso?

³ Keman Pablo kintajkuilouilij tokniuan akin pouiaj itech nechikol tein moajsia Éfeso, onkayaj miakej  tokniuan akin yekyolmajsitoyaj uan miak xiujmejya kitekitilijtoyaj Jiova. Sayoj ke no moajsiaj tokniuan akin monekia kichikauaskejok ininkuali uikalis iuan Dios. Nejon no panoua itech miak nechikolmej axkan. Miakej tokniuan miak xiujmejya kitekitilijtokej Jiova. Sayoj ke oksekin ayamo kipiaj chikauak inintakuaujtamatilis, kemej tokniuan akin yekin moauiaj. Nochin yejuan moneki mochikauaskej yeskij tokniuan akin yekyolmajsitokej. ¿Uan tejuatsin? ¿Tikonnextijtok ke tionyekyolmajsitokya? (Col. 2:6, 7.)

4, 5. 1) ¿Sayoj se taman kemej tamatij nochin tokniuan akin yekyolmajsitokej? 2) ¿Keniuj tamatij akin yekyolmajsitokej? (Xikonita taixkopin ipeujyan tamachtilis.)

⁴ Amo nochi takilomej tein chikauayakejya sayoj se taman kemej tamatij. Uelis yeski taman kemej chijchiujtokej, sayoj ke keman chikauayaj kinextiaj seki taman ijkon kemej okseki koujtakilomej. Iniuan tokniuan akin yekyolmajsitokej no ijkon panoua. Amo sayoj se taman kemej tamatij. Xa kipiaj tataman xiujmej, tataman kemej nemij oso tataman tein kiuelitaj, sayoj ke kipiaj kualneskayomej tein kinextia ke yekyolmajsitokej.

⁵ Tokniuan akin yekyolmajsitokej kitojtokaj ika nejmachkayot ineskayo Jesús (1 Ped. 2:21). Yejua kijtoj ke moneki tiktasojtaskej Jiova ika nochi toyolo, ika nochi tonemilis uan ika nochi totanemililis. No kijtoj ke moneki tikintasojtaskej oksekin kemej tejuan timotasojtaj (Mat. 22:37-39). Tokniuan akin yekyolmajsitokej mochikauaj kitakamatiskej nejin tanauatilmej. Kinextiaj kemej monejnemiltiaj ke okachi kitayekanaltiaj yeskij itasojikniuan Jiova uan kintasojtaskej oksekin.

6, 7. 1) ¿Toni okseki kualneskayomej kinextiaj nochin tokniuan akin yekyolmajsitokej? 2) ¿Toni moneki timotajtaniskej?

⁶ Tikitakejya ke tokniuan akin yekyolmajsitokej tetasojtaj. Sayoj ke ¿toni okseki taman no kinextiaj? (Gál. 5:22, 23.) Yolseujtokej, amo yolijsiuij uan kuali se momachilia keman iniuan se yetok. Kimatij kipiaskej se kuali tanemilil keman kipanouaj ouijkayomej uan amo kinemiliaj ke amo teyi ueli mochiuaok keman amo panoua tein kichiayaj. Keman momachtiaj Biblia, kitemouaj tayolmajxitilis tein kinpaleuis  maj kimatikan toni kuali yetok uan toni amo kuali yetok, uan ompa kikuij tein momachtiaj uan ijkon uelis kuali taixpejpenaskej. Yolyemankej uan kimatij ke nochipa okachi kuali maj se kichiua tein techyolmajxitia uan technauatia Jiova. * Uan no, kitetapouiaj kuali tanauatilmej ika yolpakilis uan kichiuaj nochi tein uelij tein tapaleuia maj nochin kuali mouikakan itech nechikol.

⁷ Yeski miak xiujmejya tiktekitilijtokej Jiova oso ayamo, tinochin moneki timotajtaniskej: “¿Toni okachi moneki nikyekchiuas uan ijkon okachi nitamatis kemej Jesús?”. Maj tikitakan eyi taman tein techpaleuis maj tiyekyolmajsitokan kemej Cristo.

8. ¿Keniuj tikmatij ke Jesús kuali kiixmatia uan kiajsikamatia iTajtol Dios?

⁸ Jesucristo kuali kiixmatia uan kiajsikamatia iTajtol Dios. Kemej neskayot, keman kipiaya sayoj 12 xiujmej mokauak itech templo tajtojtoya iniuan tamachtianij ika tein kijtoua iTajtol Dios. Nochin akin kikakiaj kimoujkaitayaj  (Luc. 2:46, 47). Uan xiujmej satepan, akin kiixnamikiaj amo kimatiaj toni kinankiliskej porin tel kuali kitekitiltij iTajtol Dios (Mat. 22:41-46).

9. 1) ¿Keniuj moneki yeski tonemachtil komo tiknekij tiyekyolmajsitoskej? 2) ¿Toni moneki tikchiuaskej keman timomachtiskej Biblia?

⁹ Komo tiknekij tiyekyolmajsitoskej, moneki tikchiuaskej kemej Jesús. Moneki amo tiknemiliskej ke kuali komo sayoj tikixmatij tamachtilismej tein okachi tayekantokej itech Biblia. Moneki tiktemoskej okachi tikajsikamatiskej seki taman keman timomachtiskej Biblia, porin tikmatij ke “tapaloltsin kipaleuia in taka uan siuame ten majsikke ya” (Heb. 5:14). Moneki tikpiaskej se taixmatilis ajsitok ika tein tamachtia Biblia (Efes. 4:13). Yejua ika moneki tikixtaliskej keniuj timomachtiskej uan nochipa ijkon tikchiuaskej. Nejin no kijtosneki tikixtajtoltiskej Biblia mojmostaj uan timomachtiskej toselti uan iniuan tochankauan nochi semanas. Keman timomachtiskej Biblia, moneki tiktemoskej tikajsikamatiskej keniuj tanemilia Jiova uan toni kimachilia, uan ompa moneki tikuiskej nejin keman tikixpejpenaskej tein tikchiuaskej. Komo ijkon tikchiuaj, okachi kuali timouikaskej iuan Jiova.

10. ¿Keniuj kinextiaj tokniuan akin yekyolmajsitokej ke kitasojtaj itanauatiluan uan itayolmajxitilis Dios?

¹⁰ Tokniuan akin yekyolmajsitokej amo sayoj kiixmatij tein kijtoua Biblia, ta no kitasojtaj itanauatiluan uan itayolmajxitilis Dios. ¿Keniuj kinextiaj? Keman mochikauaj nochipa kichiuaskej tein Dios kineki, maski monekis kipataskej kemej monejnemiltiaj, kemej tanemiliaj uan kemej kichiuaj teisa. Yejuan kichiuaj kemej Jesús uan kipataj kemej tamatiaj keman kinextiaj kualneskayomej kemej melaujkayot uan tatakamatilis (xikonixtajtolti Efesios 4:22-24). Maj tikelnamikikan ke Dios ika iyektikatsin espíritu kinixyekanak takamej akin kijkuilojkej Biblia. Yejua ika, keman se tokniuj momachtia Biblia, yektikatsin espíritu kipaleuia maj kipia okachi taixmatilis uan okachi netasojtalis. No kipaleuia maj okachi kuali mouika iuan Jiova.

11. ¿Keniuj katkaj taltikpakneminij keman Jesús nemia nikan taltikpak?

¹¹ Keman Jesús nemia nikan taltikpak, katka yektik. Sayoj ke itatuan, iikniuan uan nochin okseki taltikpakneminij katkaj tajtakouanij. Hasta itatitaniluan kemansa kinextijkej ke moueyinekiaj uan sayoj inintech tanemiliayaj. Kemej neskayot, itech youak keman Jesús yaya momikiliti peujkej motajtolteuiaj porin kinekiaj kiitaskej akoni okachi ueyichiujkej katka (Luc. 22:24). Maski ijkon, Jesús takuaujtamatia ke satepan yejuan yekyolmajsitoskiaj uan tapaleuiskiaj maj mopeualti se nechikol kampa nochin kuali mouikaskiaj. Yejua ika, nejon youak kitajtanij Jiova maj kinpaleuiani imomachtijkauan maj kuali mouikanij ijkon kemej yejuan omen moyekuikayaj. Kiluij: “Yejuan ma sepan poutinemikan ijkon keme Tejuatsin uan Nejuatsin tisepanpoutinemij” (Juan 17:21, 22).

12, 13. 1) ¿Toni moneki tikixtaliskej tinochin? 2) ¿Toni kipaleuij se tokniuj maj kiitani ke monekia tapaleuis maj itech nechikol nochin kuali mouikanij?

¹² Tokniuan akin yekyolmajsitokej mochikauaj tapaleuiskej maj itech nechikol nochin kuali mouikakan (xikonixtajtolti Efesios 4:1-6, 15, 16). Tinochin moneki tikixtaliskej tisentekitiskej iniuan tokniuan uan kuali iniuan timouikaskej. Uelis tikchiuaskej nejin komo tiyolyemankej. Kemej neskayot, komo se tokniuj mopoloua oso kichiua teisa tein techyolxokolia, ¿toni tikchiuaj? ¿Amo iuan titajtouajok? ¿Oso tiktemouaj tikyektaliskej kuejmol? Komo tiyekyolmajsitokej, tiktemoskej tikyektaliskej kuejmolmej uan amo okachi tikueyiltiskej.

¹³ Maj tiknemilikan tein kichiuak se tokniuj akin monotsa Uwe. Yejua semi kualania keman tokniuan mopolouayaj. Sayoj ke se tonal kiixtalij momachtis inemilis David ika inepaleuil Biblia uan amatajkuilol Perspicacia. ¿Keyej kiixpejpenak David? Porin David no kipiak kuejmolmej iniuan okseki itekitikauan Dios. Kemej neskayot, tekiuaj Saúl kitemouaya kimiktis. Okse tonal, seki israelitas kinekkej kitetemaskej uan kimiktiskej. Uan se tonal, hasta inamik kikejkeloj (1 Sam. 19:9-11; 30:1-6; 2 Sam. 6:14-22). Maski ijkon, David kisentokaya kitasojtaya Jiova uan iuan takuaujtamatia. Uan no, semi kinikneliaya oksekin. Ika tein Uwe momachtij, kiajsikamatik ke monekia kichiuas kemej David uan kipatas kemej kiitaya ininnepololuan tokniuan. No kiajsikamatik ke monekia tetapojpoluis uan tapaleuis maj itech nechikol nochin kuali mouikakan. ¿Melauj ke tinochin monekiskia tikchiuaskej kemej nejin tokniuj?

14. ¿Akonimej sayoj iniuan kuali mouikaya Jesús?

¹⁴ Jesucristo katka kualtakat iniuan nochin taltikpakneminij. Kichiuaya maj nochin kuali momachilianij iuan, yeskiaj takamej oso siuamej, konemej oso xiuejkejya. Maski ijkon, yejua amo akin yeski kiixpejpenaya kemej itasojikniuj. Se tonal, kiniluij imomachtijkauan: “Namejuan nanmochiutinemij nannotasojikniuan, komo namejuan [nankitakamatij] nochi ten namechnauatilij ya” (Juan 15:14). Jesús sayoj iniuan kuali mouikaya akin kitakamatiaj yejua uan kitasojtayaj uan kitekitiliayaj Jiova. Motelneki maj tejuan no sayoj kuali iniuan timouikakan akin yekmelauj kitasojtaj Jiova. ¿Keyej?

15. ¿Keyej telpochmej uan ichpochmej kintelpaleuia komo kitemouaj iniuan kuali mouikaskej tokniuan akin yekyolmajsitokej?

¹⁵ Netasojtalis tein technextiliaj tokniuan itech nechikol techpaleuia maj tiyekyolmajsitokan. Kemej neskayot, komo titelpoch oso tiichpoch, ¿tikmattokya toni tikchiuas itech monemilis  satepan? Komo tikneki kuali titaixpejpenas, xiktemo kuali timouikas iniuan tokniuan akin uejkaujya kitekitilijtokej Jiova uan tapaleuiaj maj itech nechikol nochin kuali mouikakan. Yejuan kipanouanij tataman kuejmolmej itech ininnemilis uan uelis mitspaleuiskej xikixpejpena tein okachi mitspaleuis itech monemilis. Komo iniuan kuali timouika, mitspaleuiskej kuali xitaixpejpena uan xiyekyolmajsito (xikixtajtolti Hebreos 5:14).

16. ¿Keniuj tokniuan akin yekyolmajsitokej kipaleuijkej Helga keman katka ichpochok?

¹⁶ Se tokniuj siuat akin monotsa Helga kielnamiki ke itech xiuit keman yaya kisatiya kaltamachtiloyan, miakej akin iniuan momachtiaya ika tajtouayaj toni kichiuaskiaj satepan. Miakej kijtouayaj ke kinekiaj yaskej okachi ueyi kaltamachtiloyan uan momachtiskej tein kinpaleuiskia maj kipiakan se kuali tekit satepan. Sayoj ke Helga kintajtanij seki tokniuan akin yekyolmajsitokej maj kiyolmajxitianij. Miakej kipiayaj okachi xiujmej ke yejua. Helga kijtoua ke semi kipaleuijkej uan ke kiyolchikaujkej maj kiixtaliani senkis kitekitilis Dios. Uan kemej kikakik tein kiyolmajxitijkej, kichiuak tekit kemej precursor makuil xiujmej. Uejkaujya keman panok nejon, sayoj ke Helga amo moyolnonotsa porin kitekitilij Jiova miak xiujmej keman ichpochok katka.

17, 18. ¿Toni moneki tikchiuaskej komo tiknekij tikmakaskej Jiova tein okachi kuali?

¹⁷ Komo tikchiuaj kemej Jesús, tiyeskij tiyekyolmajsitokej. Uan no, okachi kuali timouikaskej iuan Jiova uan okachi tiknekiskej tiktekitiliskej. Ijkon tikmakaskej Jiova tein okachi kuali. Jesús kiniluij itatojtokakauan: “Xikintanextilikan nijin taltikpakuani ika namochipaukanemilis. Uan kuak yejuan kitaske ya den namokualitachiualisuan, ijkuakon yejuan no kimouistiliske Namoueyitajtsin ten yetika ne eluiyaktsinko” (Mat. 5:16).

¹⁸ Kemej tikitaj, tokniuan akin yekyolmajsitokej uelis tel tapaleuiskej itech nechikol. Uan no, se taman tein ika moixmatij yejua ke kuali kitekitiltiaj inintanemilil. ¿Keniuj techpaleuia totanemilil maj kuali titaixpejpenakan? ¿Keniuj tiknextiaj ke tikpoujkaitaj inintanemilil oksekin? Nejin tikitaskej itech okse tamachtilis.