1. 1) ¿Toni techyoleuak tatitanil Juan maj tikchiuakan? 2) ¿Keyej moneki tiknemiliskej keniuj techteltasojta Jiova?

TATITANIL Juan kijtoj: “Xikitakan san de keniu tel techtasojta in Totajtsin Dios” (1 Juan 3:1). Ika nejin tajtolmej, tatitanil techyoleuak maj tiknemilikan keniuj techteltasojta Jiova uan keniuj kinextia. Komo titanemiliaj itech nejon, okachi kuali timouikaskej iuan Dios uan okachi tiktasojtaskej.

2. ¿Keyej sekin kinouijmaka kineltokaskej ke Dios kintasojta?

² Seki taltikpakneminij amo kineltokaj ke Jiova kintasojta. Kinemiliaj ke yejuatsin amo ininka motekipachoua uan ke sayoj kitalia miak tanauatilmej uan kintatsakuiltia akin amo kitakamatij. Seki taneltokalismej tamachtiaj ke Dios se aksa akin semi tetajyouiltia. Yejua ika miakej kinemiliaj ke amo uelis tiktasojtaskej. Sayoj ke, oksekin kinemiliaj ke Dios kintasojta nochin taltikpakneminij maski kichiuaskej miak taman tein amo kuali. Sayoj ke tejuan timomachtianij Biblia uan tikmatij keniuj yekmelauj tamati Jiova. Biblia techiluia ke yejuatsin semi techtasojta uan yejua ika kiualtitanik iKonetsin maj toka momikiliki (Juan 3:16; 1 Juan 4:8). Maski  ijkon, seki itekitikauan Jiova xa kinouijmaka kineltokaskej ke yejuatsin kintasojta. Xa ijkon kinemiliaj porin teisa kinpanouani itech ininnemilis.

3. ¿Keyej ueli tikijtouaj ke Jiova techtasojta?

³ ¿Keyej ueli tikijtouaj ke Jiova techtasojta? Porin yejuatsin techchijchiuak uan techmakak tonemilis (xikonixtajtolti Salmo 100:3-5). Yejua ika itech Biblia moijtoua ke “Adán katka ikoneu de Dios” (Luc. 3:38). Uan no, keman Jesús technextilij keniuj timotataujtiskej, techmachtij ke Jiova toTajtsin (Mat. 6:9). Ika nejin tikitaj ke Jiova techtasojta kemej se kuali tepopaj kintasojta ikoneuan.

4. 1) ¿Keniuj Jiova okachi kuali tepopaj akin uelis tikpiaskej? 2) ¿Toni tikitaskej itech nejin tamachtilis uan itech okse?

⁴ Seki taltikpakneminij ininpopaj kintajyouiltij keman katkaj konemej. Yejua ika yejuan xa kinouijmaka kinemiliskej ke se tepopaj tetasojta. Sayoj ke Jiova amo keman techtajyouiltis. Tein melauj, yejuatsin okachi kuali tepopaj akin uelis tikpiaskej (Sal. 27:10). Yejuatsin semi techtasojta uan techyekpia ika miak taman. Uan ijkon kemej okachi tikmachiliskej inetasojtalis, okachi tiktasojtaskej (Sant. 4:8). Itech nejin tamachtilis tikitatij naui taman kemej Jiova technextilia ke techtasojta. Uan itech okse tamachtilis tikitaskej naui taman keniuj tejuan uelis tiknextiliskej ke tiktasojtaj yejuatsin.

5. ¿Toni techmaka Jiova tinochin?

⁵ Keman tatitanil Pablo takalpanoto xolal Atenas, kiitak ke itech nejin xolal tel onkayaj tiotsitsin uan ke taltikpakneminij kineltokayaj ke nejon tiotsitsin kitemakayaj nemilis. Yejua ika Pablo kiniluij ke Jiova “kichijchiuak in taltikpak uan nochi miak tataman ten ongak”. No kijtoj ke Dios “techmakatok tonemilis nikan taltikpak, uan no Yejuatsin techmaka toijiyo. Uan nochi ten tikpiaj tomako ya, Yejuatsin techmakatok”, uan ke ika itatiochiualis “nochi tejuan tinentinemij uan tinejnentinemij uan tiyoltinemij” (Hech. 17:24, 25, 28). Jiova techmaka nochi tein techpoloua tein ika tiyoltoskej uan tiyolpakiskej. Maj tikitakan seki taman tein techmakani porin techtasojta.

6. ¿Keniuj chijchiujtok taltikpak kampa Jiova kiixtalij maj tinemikan? (Xikonita taixkopin ipeujyan tamachtilis.)

⁶ Kemej neskayot, Jiova techchijchiuilij nejin kualtsin taltikpak kampa tinemiskej (Sal. 115:15, 16). Itech nochi planetas tein kichijchiuak, nesi ke amo onkak okse kemej taltikpak. Tamatinij kiajsinij miak planetas. Sayoj ke ayamo kiajsinij se maj kipia tein moneki tein tapaleuis maj onka nemilis. Jiova kichijchiuak taltikpak ika nochi tein moneki tein tapaleuia maj tiyoltokan, sayoj ke no kichijchiuak maj takualtsinkan, maj kuali se momachili se nemis nikan uan maj se yolseujto porin nejon kichiuas maj tiyolpakikan (Is. 45:18). Keman tiknemiliaj keniuj kualtsin chijchiujtok taltikpak, tikitaj ke Jiova yekmelauj techtasojta (xikonixtajtolti Job 38:4, 7 uan Salmo 8:3-5).

7. ¿Keniuj no kinextij Jiova ke techtasojta?

⁷ Jiova no kinextij ke techtasojta keman techchijchiuak kemej uelis tiknextiskej kualneskayomej tein yejuatsin kipia (Gén. 1:27). Yejua ika ueli tikmachiliaj ke  techtasojta uan no ueli tiktasojtaj. Yejuatsin kimati ke nejon yekmelauj techyolpaktia, porin konemej yolpakij keman kimachiliaj ke inintatuan kintasojtaj. Uan no, Jesús techmachtij ke tiyolpakiskej komo iuan timotokiaj Jiova (Mat. 5:3). Biblia kijtoua ke yejuatsin “technenkajtatiochiuilia san ika de miak tataman para ma ijkon timoyolpaktijtiyakan” (1 Tim. 6:17). Moyekita ke Jiova techmaka tein techpoloua uan techtasojta (Sal. 145:16).

8. ¿Keyej tiknekij maj Jiova techmachti?

⁸ Se kuali tepopaj akin kintasojta ikoneuan kitemoua kinmachtis tein kinpaleuis maj kipiakan se kuali nemilis. Sayoj ke miakej tetatmej itech nejin tonalmej amo kipoujkaitaj tein kijtoua Biblia. Yejua ika amo ueli kinmachtiaj ininkoneuan tein yekmelauj kuali yetok oso tein amo kuali yetok. Nejon kichiua maj nochin kalyetouanij amo kimatikan  toni kichiuaskej uan maj amo yolpakikan (Prov. 14:12). Sayoj ke Jiova kiniluia ikoneuan tein okachi kinpaleuia, ta yejuatsin “Dios akin kijtoua tein melauak” (Sal. 31:5). Yejuatsin techmachtia keniuj yekmelauj tamati uan techiluia keniuj tikueyichiuaskej. No techmachtia keniuj okachi kuali tinemiskej (xikonixtajtolti Salmo 43:3). Maj tikitakan toni techmachtiani Jiova tein kinextia ke semi techtasojta.

9, 10. 1) ¿Keyej Jiova techmachtia tein melauak kemej yejuatsin tamati? 2) ¿Toni techmachtia Jiova tein moneki tikchiuaskej?

⁹ Yekinika, Jiova techmachtia miak taman tein motelneki kemej yejuatsin tamati porin kineki maj tikixmatikan (Sant. 4:8). Yejua ika techmachtia katiyejua itokay, tein ixnesi itech Biblia okachi miakpa ke okse tokayit. Jiova no techmachtia katiyejua ikualneskayouan. Kemej neskayot, komo tikitaj itachijchiualis, tikajsikamatij ke yejuatsin semi tamatkej uan kipia miak chikaualis (Rom. 1:20). Uan keman tikixtajtoltiaj Biblia, tikitaj ke yejuatsin melauak uan ke techtasojta. Ijkon kemej okachi tikixmatij Jiova, okachi kuali timouikaj iuan.

¹⁰ Jiova no techmachtia okseki taman tein motelneki ika tein moneki tikchiuaskej. Techiluia ke tipouij iniuan ichankauan akin moajsij iluikak uan taltikpak. No techmelauilia toni moneki tikchiuaskej uan ijkon tiktekitiliskej ika yolseuilis uan kuali timouikaskej iniuan tokniuan. Biblia kijtoua ke Jiova amo techchijchiuak kemej uelis toselti tikixtaliskej tein kuali yetok uan tein amo kuali yetok (Jer. 10:23). Yejuatsin kimati tein okachi techpaleuis. Yejua ika, sayoj komo tiktakamatij uan tikpoujkaitaj uelis tiyolpakiskej uan tikpiaskej yolseuilis. Jiova techmachtiani nejin taman tein motelneki porin techtasojta.

11. ¿Toni motenkaua Jiova techmakas satepan?

¹¹ Se kuali tepopaj kitemoua maj ikoneuan kipiakan se kuali nemilis satepan uan kineki maj yolpakikan. Sayoj ke tein melauj miakej taltikpakneminij itech nejin tonalmej amo kimatij toni kinpanoti satepan. Kitayekanaltiaj tel tekitiskej uan kipiaskej miak taman tein amo uejkauas (Sal. 90:10). Sayoj ke akin tiktekitiliaj Jiova timotasojkamatij porin yejuatsin techmachtiani keniuj tiyolpakiskej axkan uan motenkaua techmakas miak tatiochiualismej satepan.

12. ¿Keniuj Jiova kipaleuij Caín uan Baruc?

¹² Keman Jiova kiitak ke Caín yaya kichiuati se taman tein tel amo kuali, kitemoj kipaleuis. Kiluij maj kitsakuiliani ikualanyo uan maj kipatani itanemilil. Komo ijkon kichiuaya, Jiova kitatiochiuiskia (Gén. 4:6, 7). Sayoj ke Caín amo kitakamatik uan yejua ika semi tajyouij (Gén. 4:11-13). Okse tonal, Jiova kiitak ke se itekitikauj akin motokaytiaya Baruc sioujtoya uan semi yolkuetaujtoya porin kinemilijtoya tein amo kipaleuiaya. Yejua ika Jiova kiluij ke monekia  kipatas itanemilil. Baruc kitakamatik, uan nejon kipaleuij maj makisa (Jer. 45:2-5).

13. ¿Toni kiajsikamatkej itekitikauan Dios akin nenkej ne uejkauj keman kipanokej ouijkayomej?

¹³ Jiova techyekana uan techmelaua porin techtasojta. Yejuatsin techmelaua keman moneki, uan no techpaleuia maj tikpiakan okachi kualneskayomej (Heb. 12:6). Jiova kinpaleuij itekitikauan akin nenkej ne uejkauj maj kinextianij okachi kualneskayomej. Kemej neskayot, kikauak maj José, Moisés uan David kipanouanij uejueyi ouijkayomej. Itech nejon ouijkayomej kiajsikamatkej miak taman tein kinpaleuij keman Jiova kinmakak okachi uejueyi tekimej. Keman tikixtajtoltiaj itech Biblia ke Jiova kinpaleuia itekitikauan uan kinmachtia miak taman, tikitaj ke semi techtasojta (xikonixtajtolti Proverbios 3:11, 12).

14. ¿Keniuj technextilia Jiova ke techtasojta keman timopolouaj?

¹⁴ Keman timopolouaj, Jiova technextilia ke techtasojta komo tikseliaj itamelaualis. ¿Keniuj kinextia? Tanauatijkej Isaías kijtoj ke Jiova senkis techtapojpoluia (Is. 55:7). Uan tekiuaj David kuali kimelauak keniuj Jiova techtapojpoluia ika nejin tajtolmej: “Yejuatsin mitstapojpoluia nochi monepololuan uan kipajtia nochi tein mitskokoua; yejuatsin tajtani monemilis itech talkoyok uan mitsueyitalia ika iueyi netasojtalis tein amo tami uan teiknelilis” (Sal. 103:3, 4, 12). Kemej tikitaj, Jiova nochipa kineki techtapojpoluis. Sayoj ke tejuan moneki tikseliskej itaixyekanalis uan itamelaualis uan tikpataskej tein monekis. Maj tikelnamikikan ke Jiova techmelaua porin techtasojta (Sal. 30:5).

15. ¿Keniuj Jiova no kinextia ke techtasojta?

¹⁵ Se kuali tepopaj kinyekpia ikoneuan ika tein uelis kinijtakos. Yejua nejon tein Jiova kichiua. Salmo 97:10 kijtoua ke yejuatsin kinmatampauia itekitikauan akin amo kikauaj uan kinpaleuia maj amo teyi kinchiuilikan akin amo yolkualmej. Xiontanemili itech nejin neskayot. Keman tikitaj ke se teisa uelis kijtakos toixtololouan, nimantsin timoixtsakuaj porin tikinyekpiaj. No ijkon, Jiova ijsiujka kichiua tein moneki uan ijkon techmatampauia ika tein uelis techijtakos. Yejuatsin kichiua nejon porin techtasojta (xikonixtajtolti Zacarías 2:8).

16, 17. ¿Keniuj Jiova kinmatampauia itekitikauan?

¹⁶ Jiova nochipa kintekitiltiani ángeles maj kinmatampauikan itekitikauan (Sal. 91:11). Kemej neskayot, se ángel kinmiktij 185,000 tateuianij itech sayoj se youal uan ijkon kimakixtij ixolal Dios (2 Rey. 19:35). Itech inintonaluan yekinika itatojtokakauan Cristo, ángeles kikixtijkej Pedro uan oksekin kampa tsaktoyaj (Hech. 5:18-20; 12:6-11). Ayamo uejkaua mochiuak se ueyi neteuilis itech se  ueyi altepet tein poui África. Tel miakej tateuiayaj, tachtekiaj, ininka mauiltiayaj oksekin uan temiktiayaj noyampa. Maski nion se itaixpantijkauj Jiova momikilij, miakej kipolojkej nochi tein kipiayaj. Maski ijkon, yejuan kimachiliayaj ke Jiova kinmatampauijtoya. Yejuan semi yolpakiaj maski semi tajyouijkej. Keman itech ueyi kali kampa techixyekanaj kititankej se tokniuj maj ompa takalpanoti, yejua kintajtanij keniuj moajsiaj. Yejuan kinankilijkej ke nochi kuali moajsia ika inepaleuil Jiova.

¹⁷ Kemaj, seki itekitikauan Dios momikilianij porin amo kikauaj yejuatsin. Nejon kipanok Esteban uan okseki itatojtokakauan Cristo. Ika nejin tikitaj ke Jiova amo nochipa kitsakuilia maj itekitikauan momikilikan. Sayoj ke kemaj kinmatampauia senoloch itekitikauan keman kinnejmachtia ika tataman tamekauilis tein Satanás kitalia toixpan (Efes. 6:10-12). Uelis tikajsiskej nejin tanejmachtilismej itech Biblia uan itech amatajkuilolmej tein mochijchiua itech inechikol Dios. Kemej neskayot, Jiova technejmachtia keniuj uelis techijtakos seki taman tein onkak itech Internet, komo tiktayekanaltiaj timotomintiskej uan keniuj no techijtakoua auilnemilis uan tateuilis tein moita itech seki películas, amatajkuilolmej uan videojuegos. Moyekita ke Jiova techtasojta uan kineki techmatampauis.

18. ¿Keniuj timomachiliaj keman tikmatij ke Jiova techtasojta?

¹⁸ Keman Moisés tanemilij itech nochi xiujmej tein kitekitilij Jiova, senkis kimatik ke Dios kitasojtaya. Yejua ika kijtoj: “Xitechmaka kualkanpa moueyi netasojtalis tein amo tami, uan ijkon tiyolpakkatsajtsiskej uan tiyolpakiskej itech nochi totonaluan” (Sal. 90:14). Maj tikelnamikikan tajtolmej tein kijtoj tatitanil Juan: “Xikitakan san de keniu tel techtasojta in Totajtsin Dios” (1 Juan 3:1). ¿Melauj ke se ueyi tatiochiualis tikmatiskej uan tikmachiliskej ke Jiova techtasojta?