1, 2. ¿Keniuj techmachtiani Jiova maj titetasojtakan?

SE KUALI tepopaj kinmachtia ikoneuan ika neskayot tein kinkauilia. Keman kinnextilia ke kintasojta, kinmachtia maj tetasojtakan. Yejua nejon tein kichiua Jiova touan. Amo akin techteltasojta ijkon kemej yejuatsin. Biblia kijtoua ke “Yejuatsin achto techtasojtak” (1 Juan 4:19). Keman Jiova technextilia ke techtasojta, techmachtijtok maj titetasojtakan.

² ¿Keyej kijtoua Biblia ke Jiova achto techtasojtak? Porin kiualtitanik iKonetsin maj toka momikiliki “maski tejuan tech ne tonal tikatkaj semi titajtakolejke” (Rom. 5:8). Jiova kitemakak iKonetsin uan ijkon techmakixtij itech tajtakol uan mikilis. Ijkon techkauilij se kuali neskayot uan techmachtij maj titetasojtakan uan maj tikuelitakan titemakaskej teisa (1 Juan 4:10). Uan no, inemilis Jesús tein kitemakak techpaleuia maj timochiuakan tiitasojikniuan Jiova uan maj tiknextilikan ke tiktasojtaj.

3, 4. ¿Keniuj tiknextiaj ke tiktasojtaj Jiova?

³ Netasojtalis yejua kualneskayot tein okachi kinextia  Jiova. Yejua ika, Jesús kijtoj ke tanauatil tein okachi tayekantok yejua nejin: “Xiktasojtakan in Toueyitekotsin to Dios ika nochi namoyolo uan ika nochi namotanejnekilis, uan ika nochi namotanemililis uan ika nochi namochikaualis” (Mar. 12:30). Jiova kineki maj tiktasojtakan ika nochi toyolo. Tikyolxokoliskiaj komo tiktasojtaj aksa oso teisa okachi ke yejuatsin. Sayoj ke netasojtalis tein tikpialiaj Jiova amo sayoj moneki yeski se taman tein tikmachiliaj. Yejuatsin no kineki maj tiktasojtakan ika nochi totanemilil uan ika nochi tochikaualis, tein kijtosneki, ika tein tiknemiliaj uan tikchiuaj (xikonixtajtolti Miqueas 6:8).

⁴ Yejua ika moneki tiktasojtaskej Jiova ika nochi kemej titamatij uan ika nochi tein tikpiaj. Komo yekmelauj tiktasojtaj, tiktayekanaltiskej yejuatsin itech tonemilis. Itech tamachtilis tein achto tikitakej, timomachtijkej naui taman kemej Jiova kinextia ke techtasojta. Itech nejin tamachtilis tikitaskej keniuj uelis okachi tiktasojtaskej Jiova uan tiknextiliskej.

5. ¿Toni tiknekij tikchiuaskej keman titanemiliaj itech nochi tein Jiova techmaka?

⁵ Keman aksa techtayokolia teisa, tiktemouaj tiknextiliskej ke tiktasojkamatiliaj. Se taman kemej tiknextiaj nejon yejua keman tikuij tein techtayokolij. Santiago kijtoj ke Jiova techmaka miak taman tein kuali (Sant. 1:17). Jiova techmaka nochi tein techpoloua tein techpaleuia maj tiyoltokan uan maj tiyolpakikan. Uan semi tiktasojkamatiliaj maj kichiua nejon. Tikajsikamatij ke Dios semi techtasojta uan tiknekij tiknextiliskej ke tejuan no tiktasojtaj. ¿Ijkon tionmomachilia tejuatsin?

6. ¿Toni monekia kichiuaskej israelitas uan ijkon Jiova kisentokaskia kinmakas miak taman tein kuali?

⁶ Jiova kinmakak israelitas miak taman tein kuali. Itech tel miak xiujmej kinmakak nochi tein kinpolouaya tein kinpaleuij maj yoltokan. No kinmakak tanauatilmej uan ijkon kimatiskiaj toni monekia kichiuaskej (Deut. 4:7, 8). Kemej neskayot, Tanauatil kijtouaya ke yejuan monekia kimakaskej Dios “tein okachi kuali itech yekinika takilomej tein chikauayakejya” (Éx. 23:19). Komo kinekiaj maj Jiova kisentokani kinmakani miak taman tein kuali, monekia kitakamatiskej uan kimakaskej tein okachi kuali. Ijkon kinextiskiaj ke motasojkamatiaj iuan Jiova (xikonixtajtolti Deuteronomio 8:7-11).

7. ¿Keniuj uelis tikuiskej tein tikpiaj tein “kipia ipatiuj” uan ijkon tiknextiliskej Jiova ke tiktasojtaj?

⁷ Tejuan uelis tiknextiliskej Jiova ke tiktasojtaj keman tikmakaj tein tikpiaj “tein kipia ipatiuj” (Prov. 3:9). ¿Keniuj uelis tikchiuaskej nejon? Se taman, keman titemakaj tomin uan ijkon titapaleuiaj maj mochiua itekiyo Dios itech tonechikol uan itech nochi taltikpak. Maski tisekimej amo tikpiaj miak taman, tinochin uelis tikuiskej tein tikpiaj uan ijkon tiknextiliskej Jiova ke tiktasojtaj (2 Cor. 8:12). Sayoj ke no uelis tiknextiliskej ke tiktasojtaj ika okseki taman. Maj tikitakan katiyejua.

8, 9. 1) ¿Katiyejua okse taman kemej tiknextiliaj Jiova ke tiktasojtaj? 2) ¿Toni kichiujkej Mike uan ichankauan?

⁸ Okse taman kemej tiknextiliaj Jiova  ke tiktasojtaj yejua keman iuan titakuaujtamatij. ¿Keyej tikijtouaj nejin? Maj tikelnamikikan ke Jesús techmachtij maj amo techteltekipacho keniuj tikajsiskej tein okachi tayekantok. Jiova motenkaua ke techmakas nochi nejon komo tiktayekanaltiaj tiktekitiliskej itech tonemilis (Mat. 6:31-33). Tejuan titakuaujtamatij ke yejuatsin kichiuas tein motenkaua. Uan nejin taixejekol, porin keman tiktasojtaj aksa, itech titakuaujtamatij. Keman okachi titakuaujtamatij iuan Jiova, okachi tiknextiliaj ke tiktasojtaj (Sal. 143:8). Yejua ika, moneki timochiuiliskej nejin netajtanilmej: “¿Niknextilia Jiova ke niktasojta ijkon kemej nikui notonaluan uan nochikaualis? ¿Niknextia mojmostaj ke nitakuaujtamati ke yejuatsin nechmakas nochi tein nechpoloua?”.

⁹ Maj tikitakan tein kipanok se tokniuj akin monotsa Mike uan ichankauan. Keman katka telpochok, Mike kinekia yas itech okse ueyi altepet tapaleuitiuj itech tanojnotsalis. Satepan ke monamiktij uan kipiakej ome konemej, yejua kisentokaya kinekia yas tapaleuitiuj okseko. Mike uan ichankauan kiixtajtoltijkej kampa ininka tajtoua tokniuan akin yajkej okseko tapaleuitoj itech tanojnotsalis. Yejua ika kiixtalijkej amo kipiaskej miak taman itech ininnemilis. Kinamakakej ininchan uan yajkej nemitoj itech okse kali tein okachi amo ueyi katka. Mike no kichiuak tein monekia uan kiixtalij amo tekitisok miak tonalmej. Axkan, yejua uan ichankauan tapaleuijtokej ika miak yolpakilis itech okse ueyi altepet. Mike kijtoua ke yejuan kiitanij keniuj mochiua tein Jesús kijtoj itech Mateo 6:33.

10. ¿Keyej moneki tikchiuaskej kemej David uan itech titanemiliskej tein Jiova techmachtia?

¹⁰ Tekiuaj David tanemiliaya itech itanauatiluan uan itachijchiualis Jiova. Yejua ika kijtoj: “Iluikak kiteixmatiltijtok iueyiyo Dios”. Uan no, kijtoj ke “itanauatil Jiova” yektik uan takuaujtamach, techyolchikaua uan techpaleuia maj tikpiakan tamatilis. Kemej David itech tanemiliaya nejin, kichiuak maj kinekini kinextilis Dios ke kitasojtaya. Yejua ika kijtoj ke kinekia maj itanemililuan uan itachiualisuan kiyolpaktianij Jiova (Sal. 19:1, 7, 14). Ijkon kemej David, tejuan moneki titanemiliskej itech itachijchiualis Jiova uan tein techmachtia itech Biblia. Ijkon okachi kuali timouikaskej iuan Dios uan tiknextiliskej ke tiktasojtaj.

11. ¿Keniuj uelis tikuiskej tein techmachtia Jiova uan ijkon tiknextiliskej ke tiktasojtaj? (Xikonita taixkopimej ipeujyan tamachtilis.)

¹¹ Itech nejin tonalmej, Jiova techmachtia miak taman kemej tamati yejuatsin, tein kichijchiuak, tein motenkaua uan tein kijtoua Biblia. Itech nejin taltikpak kinextiaj ke motelneki maj  taltikpakneminij momachtikan miak taman itech ueyi kaltamachtiloyan, sayoj ke nejon kichiua maj kipolokan netasojtalis tein kipialiayaj Dios. Sayoj ke, Jiova amo sayoj kineki maj timomachtikan miak taman. No kineki maj tikmatikan kuali titaixpejpenaskej. Yejuatsin kineki maj tikuikan tein techmachtia kemej techpaleuis uan kinpaleuis oksekin (Prov. 4:5-7). ¿Keniuj uelis tikchiuaskej nejon? Se taman, keman tikinpaleuiaj taltikpakneminij maj “kajsikamatikij in melauak Tajtoltsin de Dios” tein kinpaleuis maj makisakan (1 Tim. 2:4). Komo tikinmachtiaj nochin taltikpakneminij tein tiueliskej tein iTekiuajyo Dios toka kichiuas, tiknextiskej ke tiktasojtaj Jiova uan taltikpakneminij (xikonixtajtolti Salmo 66:16, 17).

12. ¿Toni kijtoj se tokniuj ichpoch ika se netetayokolil tein Jiova kimakak?

¹² Telpochmej uan ichpochmej no uelis tanemiliskej itech nochi tein Jiova kinmaka uan kinmachtia. Kemej neskayot, se tokniuj siuat akin monotsa Shannon kielnamiki keniuj momachilij itech ueyi nechikol tein uejkauak eyi tonal tein motokaytij “Devoción Piadosa”. Yejua kipiaya 11 xiujmej uan iikniuj siuat kipiaya 10. Keman yaya motemakati se tanojnots itech ueyi nechikol kiniluijkej nochin telpochmej uan ichpochmej maj motalianij kampa kinxelouilijkaj yejuan. Shannon ompa motalij. Yekinika yolmouia, sayoj ke semi yolpakik keman sejsemej kintayokolijkej amatajkuilol Lo que los jóvenes preguntan. Respuestas prácticas. Yejua kijtoua  ke nejon netetayokolil kichiuak maj kiitani ke Jiova se aksa akin yekmelauj nemi uan kiteltasojta. Uan kitasojkamatilia Dios porin techmaka kualtsitsin netetayokolilmej.

13, 14. ¿Toni moneki tikchiuaskej keman Jiova techmelaua?

¹³ Biblia kijtoua ke Jiova kinmelaua akin kintasojta, “kemej kichiua se tepopaj iuan se konetsin” (Prov. 3:12). ¿Toni moneki tikchiuaskej keman Jiova techmelaua? Xa timotayokoltiskej uan amo kuali timomachiliskej. Sayoj ke nochipa moneki tikseliskej itamelaualis Jiova. Nejon techpaleuis maj tikmatikan tikchiuaskej tein kuali uan tiyolseujtoskej (Heb. 12:11). Maj amo keman tikixtopeuakan tamelaualis nion maj tikualanikan komo amo tikuelitaj tein techiluiskej. Komo tikakij Jiova uan tikpataj tein moneki, tiknextiliskej ke tiktasojtaj.

¹⁴ Itech itonaluan tanauatijkej Malaquías, judíos kimakatoyaj Jiova netetayokolilmej tein amo kuali moajsiaj. Yejua ika Jiova kinmelauak ika chikaujkayot (xikonixtajtolti Malaquías 1:12, 13). Yejuatsin miakpa kichiuak nejon, sayoj ke yejuan amo kikakkej. Ika tamik, Jiova monekik kintatsakuiltis (Mal. 2:1, 2). ¿Toni techmachtia nejin? Ke komo amo tikakij keman Jiova techmelaua oso tiknemiliaj ke amo motelneki, yejuatsin amo kuali touan mouikasok.

15. ¿Toni tanemilil moneki tikixtopeuaskej?

¹⁵ Tel miakej taltikpakneminij itech nejin tonalmej moueyinekij uan sayoj kitayekanaltiaj inintanejnekilis. Miakej amo kiuelitaj maj kinyolmajxitikan oso maj kiniluikan toni moneki kichiuaskej. Uan sekin kikakij tein kinyolmajxitiaj, sayoj ke ika kualanyot. Sayoj ke Biblia kijtoua ke tejuan moneki tikixtopeuaskej nejon tanemilil. Moneki tikmatiskej toni kineki Jiova maj tikchiuakan uan maj tikakikan (Rom. 12:2). Yejuatsin techyolmajxitia itech inechikol keman moneki. Kemej neskayot,  techiluia keniuj moneki mouikaskej se takat uan se siuat, keniuj uelis tikinixpejpenaskej kuali tasojiknimej uan keniuj kuali tikixpejpenaskej tein ika timoixpetaniaj. Keman tikseliaj itamelaualis Jiova uan tikpataj tein moneki tein ika tikyolpaktiskej, tiknextiliaj ke tiktasojkamatij tein techyolmajxitia uan ke tiktasojtaj (Juan 14:31; Rom. 6:17).

16, 17. 1) Achto ke tikixpejpenaskej tikchiuaskej teisa, ¿keyej moneki timochikauaskej tikmatiskej toni kinemilia Jiova? 2) ¿Toni kichiujkej israelitas tein ika kinextijkej ke amo takuaujtamatiaj iuan Jiova?

¹⁶ Konemej kintemouaj inintatuan uan kintajtaniaj maj kinpaleuikan uan maj kinyekpiakan. Hasta akin uejueykejya kemansa kintajtaniaj inintatuan maj kinpaleuikan. ¿Keyej? Porin maski ueli ininselti taixpejpenaj, kimatij ke inintatuan uelis kuali kinyolmajxitiskej. Iuan Jiova no ijkon panoua. Yejuatsin techkaua maj toselti titaixpejpenakan. Sayoj ke kemej iuan titakuaujtamatij uan tiktasojtaj, nochipa tiktajtaniaj maj techpaleui. Uan achto ke tikixpejpenaskej teisa, timochikauaj tikmatiskej toni kinemilia yejuatsin. Keman tiktajtaniaj Jiova maj techpaleui, yejuatsin techmaka iespíritu uan ijkon techpaleuia maj tikchiuakan tein kuali (Filip. 2:13).

¹⁷ Itech itonaluan Samuel, israelitas tapolojtiyayaj keman moteuijtoyaj iniuan filisteos. Sayoj ke amo takuaujtamatkej iuan Jiova uan amo kitajtanijkej toni monekia kichiuaskej, ta kiuikakej arca tein kinelnamiktiaya netenkaualis itech neteuilis. Kinemilijkej ke ijkon Jiova kinpaleuiskia maj tatanikan. Sayoj ke amo kitemojkej kimatiskej toni kinemiliaya yejuatsin. Sayoj kichiujkej tein yejuan kiitakej ke kuali yetoya. ¿Toni kinualkuilij nejon? Momikilijkej 30,000 tateuianij israelitas. Uan tein okachi amo kuali, filisteos mokauilijkej arca (1 Sam. 4:2-4, 10, 11; xikonixtajtolti Proverbios 14:12).

18. Kemej kijtoua Salmo 42:5, 6 uan Proverbios 3:5, 6, ¿toni moneki tikchiuaskej?

¹⁸ Se takat akin kiteltasojtaya Jiova kijkuiloj ke ijkuak kipiaya uejueyi kuejmolmej, takuaujtamatia ke Dios kipaleuiskia uan kimakixtiskia (Sal. 42:5, 6). ¿Ijkon tionmomachilia tejuatsin? Uelis yeski ke tiontakuaujtamatiya iuan Jiova. Maski ijkon, tinochin uelis okachi titakuaujtamatiskej iuan Jiova. Biblia kijtoua: “Xitakuaujtamati iuan Jiova ika nochi moyolo, uan amo ximopaleui itech motaajsikamatilis. Itech nochi tein tikchiuas xiktemo Dios, uan yejuatsin kimelauas moojuan” (Prov. 3:5, 6).

19. ¿Keniuj tikonnextilis Jiova ke tikontasojta?

¹⁹ Kemej tikitakejya, Jiova achto techtasojtak. Ijkon techmachtij maj tiktasojtakan yejuatsin. Nochipa moneki titanemiliskej itech nochi tein yejuatsin toka kichiuani uan ke techteltasojta. Maj tiknextilikan ke tiktasojtaj ika nochi toyolo, tonemilis, totanemilil uan tochikaualis (Mar. 12:30).