1, 2. ¿Toni kinextia ke ininkuatixyo taltikpakneminij amo chijchiujtok kemej ininkuatixyo tapialmej?

ININKUATIXYO taltikpakneminij amo chijchiujtok kemej ininkuatixyo tapialmej. Kemej neskayot, ueli titajtouaj, titajkuilouaj, titaixtajtoltiaj uan tikajsikamatij tein oksekin techiluiaj. No ueli tiktataujtiaj Jiova uan tikueyichiuaj ika nekuikatilmej. Tamatinij ayamo kiajsikamatij keniuj tokuatixyo ueli kichiua nochi nejin taman.

² Jiova amo sayoj techchijchiuak kemej uelis titajtoskej, ta no techmakak okse taman tein amo kipiaj tapialmej (Sal. 139:14; Apoc. 4:11). Kemej techchijchiuak kemej yejuatsin tamati, techkaua maj toselti titaixpejpenakan (Gén. 1:27). Yejua ika ueli tikixpejpenaj ox tikuiskej totajtol uan ijkon tikueyichiuaskej Jiova uan tiktekitiliskej.

3. ¿Toni techmakani Jiova tein techpaleuia maj kuali titaixpejpenakan?

³ Jiova techmakak Biblia tein techpaleuia maj tikmatikan keniuj tikueyichiuaskej uan tiktekitiliskej. Itech totonaluan ueli moixtajtoltia Biblia ajsitok oso sayoj seki amatajkuilolmej itech  panoua 2,800 tajtolmej. Keman tikixtajtoltiaj Biblia uan itech titanemiliaj, techpaleuia maj tiuelikan titanemilikan kemej Jiova (Sal. 40:5; 92:5; 139:17). Uan komo titanemiliaj kemej yejuatsin, uelis kuali titaixpejpenaskej uan tinemiskej nochipaya (xikonixtajtolti 2 Timoteo 3:14-17).

4. 1) ¿Toni panoua keman itech titanemiliaj teisa? 2) ¿Toni netajtanilmej tiknankiliskej itech nejin tamachtilis?

⁴ Keman itech titanemiliaj teisa sayoj yejua tikpiaj itech totsontekon uan tikitaj ika nejmachkayot (Sal. 77:12; Prov. 24:1, 2). Motelneki maj tikixtalikan titanemiliskej itech Jiova uan Jesús (Juan 17:3). Itech nejin tamachtilis tiknankiliskej nejin netajtanilmej: ¿Toni uelis techpaleuis maj titanemilikan? ¿Itech toni uelis titanemiliskej? ¿Toni uelis tikchiuaskej tein techpaleuis maj nochipa titanemilikan uan maj techyolpakti?

5, 6. ¿Toni techpaleuis maj tikelnamikikan uan maj okachi kuali tikajsikamatikan tein tikixtajtoltiaj?

⁵ Tejuan ueli tikchiuaj seki taman maski amo itech titanemilijtoskej, kemej timijyotiskej, tinejnemiskej oso tiyaskej itech bicicleta. Sayoj ke keman titaixtajtoltiaj uelis no ijkon techpanos. Xa titaixtajtoltijtokej uan no titanemilijtokej itech okseki taman. ¿Toni uelis techpaleuis maj amo ijkon techpano? Moneki sayoj titanemiliskej itech tein tikixtajtoltiaj uan no tiknemiliskej toni kijtosneki. Uan keman tiktamiixtajtoltiskej se párrafo oso tiajsij kampa peua okse tanemilil, maj timotajtanikan: “¿Toni nechmachtia tein yekin nikixtajtoltij? ¿Yekmelauj kuali nikajsikamati?”.

⁶ Tamatinij kiajsinij ke okachi ijsiujka se kielnamiki se taman keman ichtaka se taixtajtoltia oso kemej se motenkakis. Uan Jiova kimati nejon, porin yejuatsin techchijchiuak. Yejua ika kiluij Josué maj kiixtajtoltiani amaix tein kipiaya Tanauatil kemej yeskia moichtakanojnotstoskia (xikonixtajtolti Josué 1:8). Komo ijkon tikixtajtoltiaj Biblia techpaleuis maj sayoj tikpiakan itech totsontekon tein tikixtajtoltijtokej uan maj tikelnamikikan.

7. ¿Kani uan kemanian moneki titanemiliskej? (Xikonita taixkopin ipeujyan tamachtilis.)

⁷ Semi melauak ke kemansa techouijmaka maj sayoj tikpiakan itech totsontekon tein timomachtijtokej uan itech titanemiliskej. Xa porin tisioujtokej oso tel takakistitok kampa tiyetokej. Yejua ika moneki titanemiliskej kampa amo teyi techkuejmolos uan keman tikuaseujtoskej. Kemej neskayot, David tanemiliaya youak (Sal. 63:6). Uan Jesús kitemouaya kampa taseltijkan kampa ueliskia tanemilis uan kichiuas netataujtil (Luc. 6:12).

8. 1) ¿Itech toni uelis titanemiliskej? 2) ¿Keniuj momachilia Jiova keman tikiniluiaj oksekin keniuj tamati yejuatsin?

⁸ Amo sayoj uelis titanemiliskej itech  tein tikixtajtoltiaj itech Biblia, ta no itech okseki taman. Kemej neskayot, keman tikitaskej tein Dios kichijchiuak, maj timotajtanikan: “¿Toni nechmachtia kemej tamati Jiova tein yejuatsin kichijchiuak?”. Nejon techolinis maj tiknekikan tikchiuaskej se netataujtil kampa tiktasojkamatiliskej. Uan komo timoajsij iniuan okseki taltikpakneminij uelis tikiniluiskej keniuj timomachiliaj (Sal. 104:24; Hech. 14:17). Jiova techita uan semi yolpaki keman itech titanemiliaj, tiktataujtiaj uan tikintapouiaj oksekin keniuj tamati yejuatsin. Biblia kijtoua: “Se amaix moijkuiloj iixpan yejuatsin tein ika moelnamikij akin kimoujkatokayaj Jiova uan akin tanemiliayaj itech itokay” (Mal. 3:16).

9. 1) ¿Toni Pablo kiluij Timoteo? 2) ¿Itech toni uelis titanemiliskej keman timomachtiskej achto ke titamachtitiuij ika Biblia oso titanojnotsatiuij?

⁹ Tatitanil Pablo kiluij Timoteo maj kinemiliani keniuj ueliskia kinpaleuis oksekin tein yejua kijtouaya, kichiuaya uan tamachtiaya (xikonixtajtolti 1 Timoteo 4:12-16). Tejuan no uelis titanemiliskej itech nejin taman. Kemej neskayot, moneki titanemiliskej keman timomachtiaj achto ke titamachtitiuij ika Biblia. Maj titanemilikan itech se netajtanil oso se neskayot tein uelis kipaleuis akin tikmachtiaj maj mochiua itasojikniuj Dios. Komo titanemiliaj itech nejon techpaleuia maj okachi mochikaua totakuaujtamatilis uan maj titamachtikan ika yolpakilis. No moneki  titanemiliskej achto ke titanojnotsatiuij (xikonixtajtolti Esdras 7:10). Uelis tikixtajtoltiskej se capítulo itech amatajkuilol Hechos oso titanemiliskej itech versículos tein tikixtajtoltiskej oso amaixmej tein titemakaskej. Nejin no techpaleuis maj titanojnotsakan ika okachi yolpakilis (2 Tim. 1:6). Uan no, semi kuali maj tiknemilikan toni uelis kinpaleuis taltikpakneminij kampa titanojnotsaj uan toni uelis tikiniluiskej tein tapaleuis maj kinekikan kimatiskej okachi. Ijkon okachi kuali tiktekitiltiskej Biblia keman titanojnotsaskej (1 Cor. 2:4).

10. ¿Itech toni okseki taman uelis titanemiliskej?

¹⁰ ¿Itech toni okseki taman uelis titanemiliskej? Komo tikijkuilouaj seki tanemililmej tein moijtoua itech nechikolmej oso itech uejueyi nechikolmej, maj oksepa tikixtajtoltikan. Uan maj timotajtanikan: “¿Toni nechmachtia ika tein kijtoua Biblia uan inechikol Dios?”. No uelis titanemiliskej itech tein tikixtajtoltiaj itech amaix Tanejmachtijkej, ¡Despertad! uan itech amaixmej tein kisaj itech uejueyi nechikolmej. Oso keman tikixtajtoltiaj itech Anuario tein kipanok se tokniuj, maj titanemilikan itech nejon uan ijkon tikitaskej keniuj techpaleuis. Keman tikixtajtoltiaj amatajkuilolmej, semi kuali maj tiktsojkuilokan tanemililmej tein okachi tayekantokej oso maj tikijkuilokan teisa tanakastan kampa titaixtajtoltijtokej. Nejin techpaleuis maj tikelnamikikan seki tanemililmej tein motelnekij tein satepan uelis tikuiskej keman timomachtiskej se tanojnots oso keman tikalpanoskej se tokniuj oso aksa akin kineki kimatis okachi tein Biblia kijtoua. Keman titanemiliaj, okachi moneki maj tikuikan tiempo tein monekis uan ijkon tikitaskej keniuj techpaleuis tamachtilis uan tiktasojkamatiliskej Jiova.

11. ¿Toni okachi moneki itech titanemiliskej, uan keyej? (Xikonita nota.)

¹¹ Itech nochi taman tein onkak tein uelis itech titanemiliskej, okachi moneki maj titanemilikan itech Biblia. ¿Keyej? Maj tiknemilikan ke se tonal amo techkauajok maj tikpiakan Biblia. * Maski ijkon, amo akin uelis kitsakuilis maj titanemilikan itech seki taman tein tikelnamikij, kemej tajkuilolmej itech Biblia oso nekuikatilmej tein ika tikueyichiuaj Dios (Hech. 16:25). Jiova techpaleuis ika iyektikatsin espíritu maj tikelnamikikan tein timomachtianij uan maj amo tikauakan yejuatsin (Juan 14:26).

12. ¿Toni uelis tikchiuaskej tein techpaleuis maj ueli tikixtajtoltikan Biblia mojmostaj?

¹² ¿Toni uelis tikchiuaskej tein techpaleuis maj ueli tikixtajtoltikan Biblia mojmostaj? Maj tikitakan se taman tein uelis  tikchiuaskej. Itech semana, seki tonalmej uelis tikixtajtoltiskej tein ixyetok moixtajtoltis itech Escuela tein Techmachtia iTekiyo Dios uan titanemiliskej itech tein tikixtajtoltiaj. Okseki tonalmej uelis tikixtajtoltiskej seki tajkuilolmej tein moajsij itech Mateo, Marcos, Lucas oso Juan, uan titanemiliskej itech tein kichiuak uan tamachtij Jesús (Rom. 10:17; Heb. 12:2; 1 Ped. 2:21). Uan okachi techpaleuiskej nejin tajkuilolmej komo tikuij toamaixuan, kemej amatajkuilol El hombre más grande, tein kimelaua keniuj motojtokatiyajki nochi tein kichiuak Jesús itech inemilis (Juan 14:6).

13, 14. ¿Keyej motelneki maj titanemilikan itech Jiova uan Jesús, uan toni techolinis nejon maj tikchiuakan?

¹³ Titanemiliskej itech Jiova uan Jesús uelis techpaleuis maj tiyekyolmajsitokan uan maj tikpiakan chikauak totakuaujtamatilis (Heb. 5:14; 6:1). Komo amo semi titanemiliaj itech Jiova, timouejkatilijtiyaskej iuan uan xa hasta senkis tikauaskej (Heb. 2:1; 3:12). Jesús tanejmachtij ke akin amo kiseliaj ika nochi ininyolo tein kiixtajtoltiaj itech Biblia, uelis mouejkatiliskej iuan Jiova porin “moyolkuejmolojtinemij” uan “kinyoltilantok ok in ricojyot. Uan no mopakiltijtinemij ok tech nintanejnekilis” (Luc. 8:14, 15).

¹⁴ Yejua ika motelneki maj nochipa titanemilikan itech Biblia uan maj mojmostaj okachi kuali tikixmatikan Jiova. Nejon techolinis maj timochikauakan tiksentokaskej tiknextiskej ikualneskayouan uan tikchiuaskej kemej yejuatsin (2 Cor. 3:18, TNM). Komo timochikauaj, uelis nochipaya tiksentokaskej tikixmatiskej Dios uan kemej tamati. ¡Se tel ueyi tatiochiualis! (Ecl. 3:11.)

15, 16. 1) ¿Keniuj techpaleuia titanemiliskej itech Jiova uan Jesús? 2) ¿Keyej kemansa uelis techouijmakas tikixtaliskej titanemiliskej? 3) ¿Keyej semi kuali maj timochikauakan titanemiliskej?

¹⁵ Keman titanemiliaj itech Jiova uan Jesús no techpaleuia maj tiksentokakan tiktekitilijtokan Jiova ika yolpakilis. Uan nejon yolpakilis kichiuas maj no yolpakikan tokniuan uan taltikpakneminij akin tikinnojnotsaj. Uan no, keman titanemiliaj itech tein Jiova kichiuak keman kiualtitanik iKonetsin maj toka momikiliki, okachi tikajsikamatij ke semi kipia ipatiuj kuali timouikaskej iuan (Rom. 3:24; Sant. 4:8). Se tokniuj akin kayot Sudáfrica uan motokaytia Mark tsaktoya eyi xiuit porin amo kikauak Jiova. Yejua kijtoua ke keman se tanemilia, tamati kemej keman se moixpetaniti kansaika kampa amo se ixmati, sayoj ke semi teyolpaktia tein se kiitstiuj. Keman okachi tanemilia, okachi kiajsikamati miak taman kemej Jiova tamati. Uan no, keman yolkuetaui oso motekipachoua, kiixtajtoltia Biblia uan satepan tanemilia itech tein kiixtajtoltij. Nejon kipaleuia maj moyolseui.

¹⁶ Kemansa uelis techouijmakas tikixtaliskej titanemiliskej itech Biblia. ¿Keyej?  Porin itech nejin taltikpak onkak miak taman tein uelis techtapololtis. Se tokniuj akin kayot África uan motokaytia Patrick kijtoua ke kipia miak taman tein moneki kichiuas mojmostaj. Kemansa onkak seki taman tein kiteltekipachoua. ¿Toni kichiua keman kipanoua nejon? Yekinika kitataujtia Jiova uan kitapouia tein kitekipachoua. Nejon kipaleuia maj okachi yolseujto keman tanemilia. Semi melauak ke amo niman ijsiujka yolseui, sayoj ke kimachilia ke okachi motokia iuan Jiova. Keman tanemilia no kipaleuia maj kiajsikamati tein Dios tamachtia itech Biblia (Sal. 94:19). Kemej tikitaj, semi techpaleuia itech miak taman keman tikixtajtoltiaj Biblia uan itech titanemiliaj mojmostaj. Tein melauj, amo nenkaj nochi tein tikchiuaskej (Hech. 17:11).

17. ¿Kemanian tikonixtalia tejuatsin tiontanemilis?

¹⁷ Sekin kiixtajtoltiaj Biblia, tanemiliaj uan motataujtiaj kualkan, oksekin keman moseuiaj tajkotonal, oksekin xa tiotakpa oso achto ke motekaskej. Uan oksekin xa tepitsin taixtajtoltiskej kualkan uan okse tepitsin youak (Jos. 1:8). Tein yeski hora tein tikchiuaskej, mojmostaj moneki tikixtajtoltiskej Biblia uan itech titanemiliskej uan maj amo tiktayekanaltikan okseki taman tein amo semi moneki (Efes. 5:15, 16).

18. ¿Toni Jiova motenkaua kinmakas nochin akin tanemiliaj itech Biblia uan mochikauaj kichiuaskej tein momachtiaj?

¹⁸ Jiova motenkaua kintatiochiuis nochin akin tanemiliaj itech Biblia uan mochikauaj kichiuaskej tein ompa momachtiaj (xikonixtajtolti Salmo 1:1-3). Jesús kijtoj ke akin kikakij uan kitakamatij tein kijtoua Biblia okachi yolpakij (Luc. 11:28). Sayoj ke komo mojmostaj titanemiliaj itech Biblia, uelis tinemiskej kemej tikueyitaliskej Jiova uan yejua tein okachi moneki. Uan Dios techtatiochiuis axkan ika yolpakilis, uan se nemilis nochipaya itech Xochital (Sant. 1:25; Apoc. 1:3).