KEMAN nikpiaya chiknaui xiuit peuak amo nimoskaltiaok. Axkan nikpia 43 uan sayoj se metro niuejkapantik. Notatuan nechiluijkej maj nitekiti uan ijkon amo nochipa niknemilijtoskia ke amo semi niuejkapantik. Yejua ika peuak niknamaka tataman takilomej nokalixpan. Kemej nochipa tachipaualaj katka, miakej yayaj nechtakouitij.

Sayoj ke maski niteltekitia amo nechpaleuij maj moyektali nokuejmoluan. Kemej neskayot, tekit nimaajsia keman monekia nitaxtauas kampa yaya nitakouati. Nochi chijchiujtoya kemej ajsiskiaj taltikpakneminij akin okachi uejkapantikej ke nejua. Uan nejon semi nechtayokoltiaya. Sayoj ke keman nikpiaya 14 xiujmej, peuak taman nitanemilia.

Se tonal, ome siuamej akin itaixpantijkauan Jiova nechtakouikoj. Yejuan nechiluijkej ox niknekiskia maj nechmachtikan ika Biblia, uan nejua nikiniluij ke kemaj. Nechmachtijkej ke nikixmatis Jiova okachi moneki ke kokolis tein nikpia. Nejon nechtelpaleuij. Peuak okachi nikuelita tein kijtoua Salmo 73:28, tein kijtoua kampa peua: “Semi kuali maj nimotoki iuan Dios”.

Itech nejon tonalmej ninemia iniuan nochankauan itech ueyi altepet Costa de Marfil. Taltikpakneminij akin ompa nemiaj momattoyaj nechitaskej. Sayoj ke se tonal timokalpatakej uan tinemitoj Burkina Faso, uan itech nejon ueyi altepet nonemilis senkis mopatak. Taltikpakneminij nochipa nechsenitayaj, yejua ika amo nikisaya. Miak semanas satepan nikelnamikik keniuj semi nechyolpaktij nikmatis keniuj tamati Jiova. Sayoj ke ompa Burkina amo akin nechmachtiaya ika Biblia. Yejua ika nikintajkuilouilij tokniuan itech sucursal, uan yejuan kititankej se misionera akin motokaytia Nani. Yejua nechitato itech se motocicleta.

Kampa ninemia, amo yekchijchiujtoyaj ojmej, yejua ika ouij se ojtokaya ompa. Uan keman kiouia semi motasokitaliaya. Nani miakpa uetsik itech motocicleta keman yaya nochan, sayoj ke amo keman mosenkauak. Se tonal nechyoleuak maj iuan niyouj itech Kali kampa tiMosentiliaj. Amo nikmatik toni niknankilis, porin monekia nikisas uan nikxikos kemej nechitayaj taltikpakneminij. Uan no, niyas taikampa itech motocicleta okachi kiouijmakaskia Nani kinejnemiltis. Sayoj ke nikiluij ke kemaj. Se taman tein nechyolchikauak yejua nikelnamikis tein kisentoka kijtoua tajkuilol tein okachi nikuelita: “Niktemoua nepaleuil iuan toTajtsin Jiova akin okachi Ueyi Taixyekankej”.

Nani uan nejua miakpa tiuetskej itech sokit. Sayoj ke kemej semi techyolpaktia tiyaskej nechikolmej, amo keman techtekipachoj tiuetsiskej. Itech  ojti, taltikpakneminij taman nechitayaj. Sayoj ke itech nechikol, tokniuan nechixuetskiliayaj. Chiknaui metsti satepan nimoauij.

Tajkuilol tein okachi nikuelita, kampa tami kijtoua: “Nikteixmatiltis nochi motachiualisuan”. Nejin tajkuilol nechelnamiktiaya ke monekia nitanojnotsas, sayoj ke nikmatia ke semi nechouijmakaskia niyas kajkalpan. Itech tonal keman yekinika nitanojnotsato, konemej uan akin uejueykejya nechitayaj, nechtojtokayaj uan nechuetskiliayaj kemej ninejnemi. Nejon semi nechtayokoltij. Keman niknemilij ke nejon taltikpakneminij no kinpoloua kiseliskej tatiochiualismej tein onkas itech Xochital kemej nejua, nechpaleuij maj amo nimosenkaua.

Nimokouilij se triciclo tein niknejnemiltiaya ika nomauan uan ika niyaya nitanojnotsati. Komo tiyayaj kampa tejkolis, tokniuj akin iuan nitanojnotsaya nejon tonal nechtopeujtiyaya. Uan komo katka temolis, yejua no tejkoya itech triciclo nouan. Keman peuak nitanojnotsaya miak taman nechouijmakaya, sayoj ke niman peuak nechyolpaktia. Yejua ika itech xiuit 1998 peuak nikchiua tekit kemej precursor regular.

Nikinmachtij ika Biblia miakej taltikpakneminij, uan nauin mochiujkej itaixpantijkauan Jiova. Uan no, se nokniuj siuat no mochiuak itaixpantijkauj Jiova. Keman nikmati ke seki taltikpakneminij okachi motokiaj iuan yejuatsin nechyolchikauani keman okachi nechpoloua. Kemej neskayot, nejua nikmachtiaya ika Biblia se telpoch akin yaya ueyi kaltamachtiloyan. Satepan nikiluij se tokniuj takat maj kisentokani kimachtiani. Satepan, nejon telpoch mokaltalito Costa de Marfil. Se tonal nikselij se amat tein kiualtitankej ompa Costa de Marfil keman nimokokouaya ika tonauis oso paludismo. Nejon amat kijtouaya ke nejin telpoch peujkaya tanojnotsa. ¡Semi niyolpakik!

Seki taltikpakneminij akin kinpaleuiaj akin amo ueli kichiuaj seki taman porin kipiaj se kokolis peuak nechmachtiaj maj nitajtsoma, porin ijkon ueliskia noselti nimoixpanoltis. Semej tamachtianij kiitak ke niteltekitia. Yejua ika nechiluij ke ueliskiaj nechmachtiskej keniuj nikchijchiuas xapoj. Uan yejua nejon kichiujkej. Axkan nochan nikchijchiua xapoj tein ika se tapaka uan xapoj tein ika se mopajpaka. Akin nechtakouiaj kiuelitaj xapoj tein nikchijchiua uan kiniluiaj oksekin maj no nechkouilikan. Ika se motocicleta tein kipia eyi llanta nikxejxeloua xapoj kampa nechtajtaniaj.

Nechtayokoltia porin okachi nechkokoua nopanko. Yejua ika itech xiuit 2004 monekik nikauas tekit kemej precursor. Sayoj ke nimochikaua nitanojnotsas nochi tein niuelis.

Taltikpakneminij nechiluiaj ke nochipa niixuetskatok. Uan nejon melauak, porin niyolpaki. ¿Tikonmati keyej ijkon nimomachilia? Porin semi kuali maj nimotoki iuan Dios. (Nejin techtapouia Sarah Maiga.)