TOKNIUAN akin pouij iniuan Oloch Taojtokaltianij xejxeliujtokej itech okseki chikuasen tataman oloch tokniuan. * Itech xiuit 1992, Oloch Taojtokaltianij peuak kinixpejpenaj tayekananij akin miak xiujmejya kitekitilianij Jiova maj tapaleuikan itech nejin chikuasen tataman oloch tokniuan. Axkan, nochin nejin tapaleuianij pouij iniuan ‘okseki ichkamej’ (Juan 10:16). Yejuan youij nechikol tein sejse semana kipiaj oloch tokniuan kampa tapaleuiaj, kiteixmatiltiaj seki taman tein moneki kimatiskej Oloch Taojtokaltianij uan kijtouaj tein uelis mochiuas. Yejuan tokniuan Oloch Taojtokaltianij kiixtaliaj toni mochiuas, uan tapaleuianij kiitaj maj mochiua tein moixtalij. Nejin tapaleuianij kichiuaj tein yeski tekit tein kinmakaj. Uan no, youij iniuan Oloch Taojtokaltianij keman mochiua se ueyi nechikol kampa mosentiliaj akin kayomej itech tataman uejueyi altepemej uan okseki uejueyi nechikolmej tein motelnekij. Kemansa itech ueyi kali kampa techixyekanaj no kintitanij maj takalpanotij itech sucursales.

Se tokniuj akin peuak tapaleuia itech xiuit 1992 kijtoua ke keman kuali kichiua tekit tein kipia, tapaleuia maj tokniuan Oloch Taojtokaltianij uelikan kitayekanaltikan tekit tein Dios kinmakatok. Okse tokniuj akin tapaleuijtok 20 xiujmejya kijtoua ke amo keman kinemilij ke kimakaskiaj nejin ueyi tatiochiualis.

Oloch Taojtokaltianij kinmakanij miak tekit nejin tapaleuianij akin kuali kitekitiliaj Dios uan kiteltasojkamatij ueyi tekit tein kichiuaj. Tein melauj, tinochin moneki maj ‘tikinmouiskapouakan nochi nejin takamej’ (Filip. 2:29).