1, 2. ¿Toni techmachtia Biblia keman ika tajtoua netasojtalis?

NETASOJTALIS yejua ikualneskayo Jiova tein okachi kinextia (1 Juan 4:16). Uan Jesucristo tamati kemej iTajtsin. Jiova kichijchiuak Jesús achto ke kichijchiuaskia nochi okseki taman, uan tel miak xiujmej nemini iuan Dios ompa iluikak. Nejon kipaleuij maj kiitani ke Jiova semi tetasojta (Col. 1:15). Jesús no kinextiani nejon netasojtalis itech nochi inemilis, ompa iluikak uan nikan taltikpak. Yejua ika tikyekmatij ke Jiova uan Jesús nochipa techixyekanaskej ika netasojtalis.

² Se tonal, se takat kitajtanij Jesús katiyejua tanauatil tein okachi tayekantok. Jesús kinankilij: “‘Xiktasojta moueyitekotsin Totajtsin Dios ika nochi moyolo, uan ika nochi motanejnekilis, uan ika nochi motanemililis’. Yejua ya nijin in kachi ueyi tanauatil uan de kachi kuika ueyi chikaualis. Uan ika ome tanauatil moneuilia keme ne achtopa tanauatil uan no kijtoa ijkuin: ‘Xiktasojta moknitsin ijkon keme tejuatsin timotasojta’” (Mat. 22:37-39).

3. ¿Akonimej moneki tikintasojtaskej?

 ³ Motelneki maj tikinnextilikan netasojtalis nochin taltikpakneminij. Jesús kijtoj ke moneki tiktasojtaskej Jiova uan taltikpakneminij. Sayoj ke ¿akonimej moneki tikintasojtaskej? Nochin taltikpakneminij akin techyoualouaj. Kemej neskayot, komo tikpiaj tonamik, yejua akin okachi moneki tiktasojtaskej. No moneki tikintasojtaskej tokniuan itech nechikol uan taltikpakneminij akin tikinnojnotsaj. Itech nejin tamachtilis tikitaskej keniuj tiknextiskej ke tikintasojtaj.

4. ¿Keniuj tikmatij ke namikuanij uelis yolpakiskej maski tajtakolejkej?

⁴ Jiova kinnamiktij yekinika takat uan yekinika siuat. Nejin kijtosneki ke yejuatsin kipeualtij nemilis kemej namikuanij. Dios kinekia maj Adán uan Eva yolpakinij uan maj kinpianij konemej akin momoyauaskiaj itech nochi taltikpak (Gén. 1:27, 28). Sayoj ke keman amo kitakamatkej Jiova, kipolojkej yolpakilis. Uan no, tinochin techpanoltilijkej tajtakol uan mikilis (Rom. 5:12). Kemej nochin namikuanij tajtakolejkej, ¿kijtosneki nejon ke amo uelis yolpakiskej? Amo. Namikuanij kemaj uelis yolpakiskej. ¿Keniuj tikmatij nejon? Porin itech Biblia Jiova kinmaka okachi kuali tayolmajxitilis (xikonixtajtolti 2 Timoteo 3:16, 17).

5. ¿Keyej motelneki maj namikuanij monextilikan netasojtalis?

⁵ Biblia tamachtia ke namikuanij uelis yolpakiskej komo monextiliaj netasojtalis. Tatitanil Pablo kimelauak keniuj se kinextia yekmelauj netasojtalis: “Naken kipixtinemi tetasojtalis de Dios, yejua ne yolyemanik uan kixikoa tajyouilis [...,] kipia teiknelilis uan amo no kiyolmachilia nexijkolot [...,] amo moueyinektinemi uan amo no moueyimatinemi [...,] amo kinpinautia ika nitajtoluan uan amo no kinemilijtinemi sayo ten niaxka [...,] amo moyolkualantijtinemi uan amo no kielnamiktinemi tetajtakoluan [...,] amo ika paki ne naken motajtakolmaka [...,] sayo moyolpaktijtinemi ika in yek melauak Tajtoltsin de Dios [...,] kixikojtiu nochi miak tataman tajyouilisme [...,] kineltokatinemi sayo ten kuali [...,] nachipa kiyolikachixtinemi Dios itanejnekilis, uan nachipa kijyouijtinemi tataman ouijkayome. Uan in tetasojtalis, yejua ne amo keman tamis” (1 Cor. 13:4-8). Komo titanemiliaj itech itajtoluan Pablo uan tikchiuaj tein tayolmajxitij, uelis tiyolpakiskej kemej namikuanij.

6, 7. 1) Ijkon kemej kijtoua 1 Corintios 11:3, ¿akoni moneki taixyekanas? 2) ¿Keniuj takat akin kichiua kemej Cristo moneki kiitas inamik?

⁶ Jiova kiixtalij akoni moneki taixyekanas kalijtik. Pablo kimelauak: “Totajtsin Dios, Yejuatsin kiyekantinemi Cristo. Uan in Cristo Yejuatsin kinyekantinemi itaneltokakauan. Uan no ijkon mochiuas ke in taneltokakke teyokich, yejua ne kiyekantinemi isiuau” (1 Cor. 11:3). Kemej tikitaj, takat moneki taixyekanas kalijtik. Sayoj ke nejon amo kijtosneki ke uelis ininka mauiltis ichankauan, ta Jiova kichia maj kinnextili netasojtalis. Uan no, Dios kikauilia takat se kuali neskayot porin, maski Jiova kiixyekana Jesús, nochipa kinextilia netasojtalis uan kipoujkaita tein kinemilia. Yejua ika, Jesús amo kiouijmaka kipoujkaitas Jiova. Yejua kijtoj: “Nejuatsin  niktasojta Notajtsin Dios” (Juan 14:31). Komo Jiova ika mauiltiani Jesús, yejua amo keman kijtoskia nejon tajtolmej.

⁷ Semi melauak ke Biblia kijtoua ke takat kiixyekana inamik. Sayoj ke no kijtoua ke moneki kipoujkaitas (1 Ped. 3:7). ¿Keniuj takat uelis kipoujkaitas inamik? Keman kiita toni kipoloua inamik uan kichiua tein kiyolpaktia nochipa keman ueli. Biblia kiniluia takamej: “Moneki xikintasojtatiyakan namosiuauan ijkon keme Totekotsin Cristo kinyoltasojta itaneltokakauan [...] hasta motemaktij ma kimiktikan para kixtauas den nintajtakoluan” (Efes. 5:25). Kemej tikitaj, Jesús kinteltasojtaya imomachtijkauan hasta motemakak ininka momikilis. Komo takat kichiua kemej Jesús uan kinextilia netasojtalis inamik, siuat okachi amo kiouijmakas kitasojtas, kipoujkaitas uan tapaleuis itech tein kiixpejpenas (xikonixtajtolti Tito 2:3-5).

8. ¿Keniuj moneki tikinitaskej tokniuan?

⁸ Itech nochi taltikpak moajsij tel miakej taltikpakneminij akin kitekitiliaj Jiova. ¿Keniuj moneki tikinitaskej? Biblia kijtoua: “Ma tikinpaleuijtiyakan nochi tagayot. Pero no kachi ok ma tikinpaleuijtiyakan in tokniuan  taneltokani” (Gál. 6:10; xikonixtajtolti Romanos 12:10). Tatitanil Pedro kijkuiloj ke komo tiktakamatij Dios, tikintasojtaskej tokniuan ika nochi toyolo. Uan no kijtoj ke motelneki maj akin tikchiuaj kemej Cristo timonextilikan ueyi netasojtalis (1 Ped. 1:22; 4:8).

9, 10. ¿Keyej kuali timouikaj tiitekitikauan Dios?

⁹ Amo moajsi okse xolal kemej kampa tipouij tiitekitikauan Jiova. ¿Keyej? Porin tikintasojtaj tokniuan ika nochi toyolo. Uan no, tiktasojtaj Jiova uan tiktakamatij itanauatiluan. Uan yejua ika, yejuatsin techmaka iyektikatsin espíritu. Nejin espíritu yejua okachi ueyi chikaualis tein onkak uan techpaleuia maj kuali timouikakan iniuan tokniuan noyampa taltikpak (xikonixtajtolti 1 Juan 4:20, 21).

¹⁰ Pablo kimelauak ke motelneki maj akin tikchiuaj kemej Cristo timonextilikan netasojtalis. Yejua kijkuiloj: “Ximoyankuikatalilikan ne teiknelilis uan ne tetasojtalis. Uan amo no ximoueyinektinemikan. Ta, xikpixtiyakan ne yolyemanilis uan no xikijyouikan nochi tataman ouijkayot”. Uan no kijtoj: “Oksepa namechilia ke ximotakentikan ika ne tetasojtalis kachi ok. Porin ne tetasojtalis techsepanpoualtia se uan okse. Uan no ne tetasojtalis techyolmajxitia para ma amo timoyolkualanuikan” (Col. 3:12, 14). Uan no tayolmajxitij: “Ximotapojpoluikan se uan okse ijkon keme Totajtsin Dios namechtapojpoluilij ya namotajtakoluan porin nanpoutinemij iuan Cristo” (Efes. 4:32). Akin tikchiuaj kemej Cristo kuali timouikaj porin timonextiliaj nejin netasojtalis maski tikayomej itech tataman altepemej. Semi tiktasojkamatij maj ueli timonextilikan nejin netasojtalis.

11. ¿Toni kinextia ke tipouij itech taneltokalis tein melauak?

¹¹ Tiitaixpantijkauan Jiova yekmelauj timotasojtaj uan tel kuali timouikaj. Nejin kinextia ke tipouij itech taneltokalis tein melauak. Jesús kijtoj: “Komo namejuan nanmoyoltasojtatinemij, ijkuakon nochi in taltikpakuani kajsikamatiske ke melau nannomomachtijkauan” (Juan 13:34, 35). Uan tatitanil Juan kijkuiloj ke komo tiknekij tiknextiskej ke tipouij iniuan “ikonetsitsin de Dios”, moneki tiktakamatiskej itanauatiluan uan tikintasojtaskej tokniuan. Uan ompa kijtoj: “Yejua nijin in tanojnotsalis ten achtopa ya namechkakiltijka de ke ma timosenpantasojtakan se uan okse” (1 Juan 3:10, 11). Kemej tiitaixpantijkauan Jiova timotasojtaj uan kuali timouikaj kinextia ke yekmelauj tiitatojtokakauan Cristo. No kinextia ke Dios techkui maj tikteixmatiltikan kuali tanauatilmej ika iTekiuajyo noyampa taltikpak (Mat. 24:14).

12, 13. 1) ¿Toni kichiujtokej axkan “uel miak tagayot”? 2) ¿Keniuj nemiskej amo uejkaua?

¹² Itech nejin tonalmej, tel miakej itaixpantijkauan Jiova pouij iniuan “uel miak tagayot”. Nejin tel miakej taltikpakneminij akin kayomej noyampa taltikpak kipaleuiaj iTekiuajyo  Dios. Biblia kijtoua ke nejin taltikpakneminij makiskej itech okachi ueyi tajyouilis uan “nochi yejuan moyolchipauke ika esyotsin de Yejuatsin ten tamati keme ichkatsin, ijkon keme kuak se kipaka tilma uan pochinia”. Nejin kijtosneki ke kinextiaj ke takuaujtamatij itech inemilis Jesús tein kitemakak. Kitasojtaj Jiova uan kiueyichiuaj “youalitonal” oso mojmostaj, uan no kitasojtaj Jesucristo (Apoc. 7:9, 14, 15).

¹³ Amo uejkaua, Dios kiixpolos tein amo kuali tein mochiujtok itech nejin taltikpak itech “kachi ueyi tajyouilis” (Mat. 24:21; xikonixtajtolti Jeremías 25:32, 33). Sayoj ke Jiova kinteltasojta itekitikauan, uan yejua ika kinmatampauis uan kinkauas maj nemikan itech Xochital. Ijkon kemej motenkauak kemej 2,000 xiujmej achtoya, “kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok”. ¿Tikonnemilia keniuj yeski nemilis keman amo onkasok tajyouilis, mikilis uan tein amo kuali? (Apoc. 21:4.)

14. ¿Kanachi taltikpakneminij pouij axkan iniuan “uel miak tagayot”?

¹⁴ Keman itech xiuit 1914 peuak itamian tonalmej, sayoj moajsiaj kemej 5,000 itekitikauan Dios. Maski kipiakej kuejmolmej, nejon tokniuan taixpejpenalmej kisentokakej kiteixmatiltijkej kuali tanauatilmej porin kintasojtayaj oksekin uan kinpaleuiaya yektikatsin espíritu. ¿Toni kiualkuik nejon? Ke axkan kinsentilijtokej “uel miak tagayot” akin kichiaj nemiskej nochipaya nikan taltikpak. Axkan moajsij kemej chikueyi millones itaixpantijkauan Jiova. Nochin yejuan mosentiliaj itech panoua 115,400 nechikolmej tein moajsij noyampa taltikpak. ¡Uan kisentokaj okachi momiakiliaj! Kemej neskayot, itech metsti septiembre xiuit 2013 hasta metsti agosto xiuit 2014 moauijkej panoua 275,500 taltikpakneminij. Nejin kijtosneki ke sejse semana moauijkej kemej 5,300 taltikpakneminij.

15. ¿Toni techpaleuia maj tikteixmatiltikan kuali tanauatilmej ika Tekiuajyot?

¹⁵ Se kimoujkaita se kimatis ke tel miakej taltikpakneminij kikakinij kuali tanauatilmej ika Tekiuajyot. Se taman tein techpaleuia maj ueli tikinnojnotsakan yejua toamaixuan, tein moajsijya itech panoua 700 tataman tajtolmej. Kemej neskayot, amaix Tanejmachtijkej yejua tein okachi momoyaua itech nochi taltikpak. Sejse metsti moamakixtiaj panoua 52 millones itech 247 tataman tajtolmej. Okse kuali neskayot yejua amatajkuilol ¿Toni yekmelauj tamachtia Biblia? Hasta axkan mochijchiuani panoua 200 millones itech panoua 250 tataman tajtolmej.

16. ¿Keyej kisentokaj momiakiliaj itekitikauan Jiova?

¹⁶ Okachi momiakilijtokej itekitikauan Jiova porin titakuaujtamatij iuan Dios uan tikneltokaj ke yejuatsin itanemililuan tein ijkuiliujtok itech Biblia (1 Tes. 2:13). Maski Satanás techtauelita uan techixnamiki, tiksentokaj tiyolpakij porin kuali timouikaj iuan Jiova (2 Cor. 4:4).

17, 18. ¿Toni kichia Jiova maj tikchiuakan keman aksa amo kineki kikakis kuali tanauatilmej tein tikteixmatiltiaj?

¹⁷ Keman titanojnotsaj, taltikpakneminij tataman kemej tanankiliaj. Sekin techkakij, sayoj ke oksekin amo kinekij kikakiskej kuali tanauatilmej tein tikteixmatiltiaj. ¿Toni kichia Jiova maj tikchiuakan? Maski amo kuali technankiliskej, Jiova kichia maj tikchiuakan tein kijtoua Biblia. Kemej neskayot, Colosenses 4:6 kijtoua ke nochipa moneki titajtoskej ika poujkaitalis iniuan nochin taltikpakneminij.  Uan kemej tikintasojtaj, moneki tikmelauaskej tein tikneltokaj “ika yolyemanalis uan ika mouisyot” (1 Ped. 3:15).

¹⁸ Hasta keman taltikpakneminij kualanij uan amo kinekij kikakiskej kuali tanauatilmej tein tikteixmatiltiaj, tikinnextiliaj netasojtalis uan tikchiuaj kemej Jesús kichiuak. Biblia kijtoua ke ijkuak “kikejkeloayaj Cristo, ijkuakon Yejuatsin amo teyika kinnankiliaya ika takejkelolis. Uan kuak kitajyouiltiayaj Cristo, ijkuakon Yejuatsin amo kinilij ke satepan no momakuepas”, ta kikauak tein kipanotoya imako Jiova (1 Ped. 2:23). Nejin kinextia ke keman taltikpakneminij techchiuiliskej tein amo kuali, moneki tiyeskij tiyolyemankej uan amo timomakepaskej, ta timochikauaskej tikchiuaskej tein kuali tein ika tikinpaleuiskej (1 Ped. 3:8, 9).

19. ¿Keniuj moneki tikinitaskej akin techtauelitaj?

¹⁹ Komo tiyolyemankej, tiktakamatiskej nejin tayolmajxitilis tein kitemakak Jesús: “Nankikakke ya ke ne namouejkautatuan namechnajnauatijke ijkuin: ‘Xiktasojta mokniu uan xiktauelita naken mitstauelita’. Pero Nejuatsin namechnajnauatia ijkuin: Xiktasojtakan naken namechtauelitaske [...]. Uan ximotatatautilikan ika por yejuan ne naken namechkejkeloske uan ten namechtajyouiltiske. Uan ijkon ixnesis ke namejuan nantekoneuan de Namoueyitajtsin ten yetika ne eluiyaktsinko. Porin Yejuatsin kichiua ma pankisa in tonaltsin para kinpaleuis nochi naken yolkualime uan naken amo yolkualime. Uan Yejuatsin no kualtitani in kioutsin para kinpaleuis naken yolchipauke uan naken amo yolchipauke” (Mat. 5:43-45). Akin tiktekitiliaj Dios moneki tikintasojtaskej akin techtauelitaj, maski techchiuiliskej tein amo kuali.

20. ¿Kemanian senkis nochin kitasojtaskej Jiova uan kintasojtaskej oksekin? (Xikonita taixkopin ipeujyan tamachtilis.)

²⁰ Nochipa moneki tiknextiskej ke tiktasojtaj Jiova uan tikintasojtaj oksekin. Hasta komo sekin techtauelitaj oso amo kinekij kikakiskej kuali tanauatilmej tein tikteixmatiltiaj, tikinpaleuiaj keman moneki. Tatitanil Pablo kijkuiloj: “Amo xitauikatinemikan iuan aksame. Ta, sayo moneki ximosepantasojtatiyakan se uan okse. Porin ne ten kinyoltasojtatinemi iikniuan, yejua nojon kajsikatakamatiu nochi in tanauatil de Dios. Porin kuali nankimatij namejuan nijin tanauatilme de Dios ten kijtoa ijkuin: ‘Amo xiauilnentinemikan’, uan ‘amo xitemiktikan’, uan ‘amo xitachtekikan’, uan ‘amo xixolopijtijtinemikan’, uan ‘amo xikyolnejnekikan ten teaxka’. Uan nochi nijin tanauatilme uan in oksekin tanauatilme de Dios kuali se kisepanijtoa ya keme kijtoa in Tajkuilolamatsin de Dios ijkuin: ‘Xiktasojtatinemi moikniu ijkon keme tejua timoyoltasojtatinemi’. Uan nekes ten tetasojtatinemij, yejuan nojonkes amo kitajyouiltijtinemij inikniu. Porin kuak titetasojtatinemij, ijkuakon tejuan tikajsikatakamatinemiske ya nochi in tanauatil de Dios” (Rom. 13:8-10). Satanás kichiua maj taltikpakneminij motauelitakan, sayoj ke tejuan yekmelauj tikintasojtaj nochin (1 Juan 5:19). Keman Jiova kiixpolos Satanás, amo kuali ejekamej uan tein amo kuali, nikan taltikpak nochin kitasojtaskej Jiova uan kintasojtaskej oksekin. ¡Tel ueyi tatiochiualis yeski nejon!