KEMAN tikitaj tachijchiualis, tikajsikamatij ke Jiova se Dios akin semi kiuelita kitemakas teisa (Sant. 1:17). Kemej neskayot, yejuatsin amo kitalij sayoj seki sitalimej ompa iluikak, ta tel miakej millones. No kichiuak maj itech nochi taltikpak onkani kualtsitsin xochimej (Sal. 65:12, 13; 147:7, 8; 148:3, 4).

Ne uejkauj, se itekitikauj Dios semi kitasojkamatiliaya Jiova nochi itachijchiualis uan yejua ika kijkuilouilij se nekuikatil. Uelis tikonixtajtoltis itech Salmo 104. Itech nejon nekuikatil, kijtoj ke kinekia kiueyichiuas Jiova nochi inemilis (Sal. 104:33). ¿No ijkon tionmomachilia tejuatsin?

Jiova kineki maj tikuelitakan titemakaskej teisa kemej yejuatsin. Yejua ika kichiuak maj tatitanil Pablo kijkuilouani ke akin kipiaj tomin moneki amo takuaujtamatiskej ke nejon kinualkuilis yolpakilis. Moneki takuaujtamatiskej iuan Dios, akin techmaka nochi tein kuali. Pablo no kijtoj ke moneki tikinpaleuiskej oksekin, tikuelitaskej titemakaskej teisa uan titemakaskej tein tikpiaj ika yolpakilis. Komo ijkon tikchiuaj, satepan yekmelauj tiyolpakiskej (1 Tim. 6:17-19). Kemej tikitaj, Jiova techiluia miak taman tein kinextia keyej moneki tikuelitaskej titemakaskej teisa.

Keman Pablo kinijkuilouilij ojpatika amat tokniuan akin nemiaj Corinto, kimelauak toni okachi moneki techolinis maj tikuelitakan titemakaskej teisa. Yejua kijtoj: “Cada senme taneltokani ma kitemaka itapaleuilis ijkon keme yejua kinemilij ya ke kitemakas. Uan cada tokniu, ma amo kitemaka itapaleuilis ika ne yolkokolis. Uan amo no ma kitemaka tapaleuilis porin kimachilia ke Dios kifuerzajuia ma kitemaka. Porin Totajtsin Dios kitasojta se tagat ten kitemaka itapaleuilis ika yolpakilis” (2 Cor. 9:7). ¿Akonimej kinpaleuia keman titemakaj teisa? Sekin, yejuan taltikpakneminij akin kiseliaj tein kinpoloua. Uan oksekin, tejuan, porin Jiova techmaka miak taman tein kuali (2 Cor. 9:11-14).

Satepan, Pablo kinelnamiktij akin nemiaj Corinto ke moneki tiktasojkamatiliskej Dios porin techmakani se ueyi netetayokolil (2 Cor. 9:15). Nejin yejua nochi tein kuali tein techmaka itechkopa iKonetsin, Jesucristo. Amo ueli se kimelaua keniuj tel kualtsin nejin netetayokolil tein Jiova techmaka.

¿Keniuj uelis tiknextiskej ke tiktasojkamatij nochi tein Jiova uan Jesús toka kichiuaj uan kichiuaskej satepan? Se taman, keman titemakaj ika nochi toyolo totonaluan, tochikaualis uan okseki taman tein tikpiaj uan ika tiktekitiliaj Jiova uan tikinpaleuiaj oksekin maj kiixmatikan. Tinochin ueli tikchiuaj nejin, yeski tikpiaskej miak taman oso amo (1 Crón. 22:14; 29:3-5; Luc. 21:1-4).