SE TONAL, nomomaj nechiluij: “¡Amo nikajsikamati keyej amo tikneki tikinueyichiuas mouejkaujtatuan! ¿Amo tikajsikamati ke yejuan techmakakej tonemilis? Tel amo timotasojkamati. ¿Keniuj ueli tikijtoua ke amo tikchiuasok tein technextilijkej touejkaujtatuan? Komo amo tikneki tikinueyichiuas, tikuijuikaltijtok totaneltokalis”. Ompa, peuak choka.

Seki metsti achto, itaixpantijkauan Jiova kiluijkaj nomomaj ox kinekia kiselis se nemachtil ika Biblia. Yejua amo kinekia momachtis, sayoj ke kemej kinekia yeski kualtakat iniuan kiniluij maj nechmachtianij nejua. Komo ijkon, ¿keyej axkan tel kualantoya nouan? Porin nejua niknekia niktakamatis Jiova uan nikyolpaktis. Yejua ika amo ueliaok nikchiuaya seki taman tein nomomaj kichiaya maj nikchiuani. Nechouijmakak, sayoj ke Jiova nechmakak chikaualis.

Nochankauan uan nejua tipouiaj itech taneltokalis budismo, kemej miakej taltikpakneminij ompa Japón. Sayoj ke ome metsti satepan keman peuak nimomachtia iniuan itaixpantijkauan Jiova, nikajsikamatik ke Biblia tamachtia tein melauak. Keman nikmatik ke nikpia se noTajtsin ompa iluikak, niknekik nikixmatis. Yekinika, nomomaj uan nejua techyolpaktiaya ika titajtoskej tein nimomachtijtoya. Uan no, peuak niyouj nechikolmej itech tonal domingo. Ika tein nimomachtijtoya, nikiluij nomomaj ke amo nikchiuaskiaok tein mochiua itech taneltokalis budismo. Yejua niman kijtoj: “Semi tepinaujtij maj moajsi itech tochankauan aksa akin amo kinpoujkaita iuejkaujtatuan”. Nechiluij maj amo niyaniok nechikolmej uan maj amo niksentokaniok nimomachtiani Biblia. Amo nikchiaya maj nechiluiani nejon. Yejua amo keman ijkon nechnojnotstoya.

Nopopaj no tanemiliaya kemej nomomaj. Itech Efesios capítulo 6 nimomachtij ke Jiova kineki maj konemej kintakamatikan inintatuan. Nejua niknekia maj kuali timouikanij nochan, uan niknemilij ke komo nikchiuaya tein nechtajtaniayaj, yejuan nechkakiskiaj. Itech nejon tonalmej monekia nimomachtis porin nikchiuaskia seki exámenes tein motelnekiaj kampa nimomachtiaya. Yejua ika nikiniluij ke nikchiuaskia tein nechtajtaniayaj uan amo niyaskia nechikolmej eyi metsti. Sayoj ke nimotenkauak iuan Jiova ke niman ke panoskiaj nejon tonalmej nimokepaskia itech Kali kampa tiMosentiliaj.

Tein nikixpejpenak nikchiuas amo kuali yetoya itech ome taman. ¿Keyej? Yekinika, porin niknemilij ke satepan ke panoskia eyi metsti niksentokaskia nikyolnejnekiskia niktekitilis Jiova. Sayoj ke amo  ijkon panok. Nokuali uikalis iuan ijsiujka moijtakoj. Uan ojpatika, porin itech nejon tonalmej notatuan okachiok nechchikaujkauijkej maj amo niksentokaniok niktekitiliani Jiova.

Itech Kali kampa tiMosentiliaj nikinixmatka miakej itaixpantijkauan Jiova akin no ijkon kinpanotoya. Nechyekmatiltijkej ke Jiova nechmakaskia chikaualis uan nechiluijkej ke komo nitaxikouaya, nochankauan no ueliskiaj kiixmatiskej Dios (Mat. 10:34-37). Nejua niknekia iuan nitakuaujtamatis, yejua ika peuak niktataujtia ika nochi nochikaualis.

Notatuan tataman kemej kitemouayaj maj amo niksentokani nimomachtiani. Kemej neskayot, nechmakakej okachi tekimej uan ijkon amo nikisaskia. Kemansa amo nechkauayaj maj nikalaki kalijtik oso amo nechtamakayaj. Nomomaj nochipa nechtataujtiaya maj amo niksentokaniok nimomachtiani Biblia. Miakpa, amo teyi nikijtouaya. Sayoj ke komo kemansa teisa nikijtouaya, timotajtolteuiayaj porin tiomen tiktemouayaj tiknextiskej ke melauak tein tikijtouayaj. Axkan nikajsikamati ke monekia okachi nikpoujkaitas tein kineltokaya uan tein kimachiliaya. Ijkon xa amo semi kualaniskia.

Nomomaj peuak kintajtania oksekin maj kipaleuianij. Kemej neskayot, iuan tajtoj notamachtijkauj, sayoj ke yejua amo kinekik mokalakis itech kuejmolmej tein tikpiayaj. Satepan nechuikak kampa tekitia uan kitajtanij iteko maj nechitaltiani ke budismo sayoj yejua taneltokalis tein yekmelauj tapaleuia. No kinnotsak miakej tochankauan uan tel chokaya keman kintataujtiaya maj kipaleuianij. Nochi nejin kichiuaya maj tel amo kuali nimomachiliani. Sayoj ke itech nechikolmej, tayekananij nechelnamiktijkej ke keman nomomaj kintapouiaya oksekin tein nikpanotoya, tein melauj kinmatiltijtoya tein Biblia kijtoua.

Notatuan kinekiaj maj niyani ueyi kaltamachtiloyan uan maj nikpiani se kuali tekit. Nochipa ika  timotajtolteuiayaj nejon. Yejua ika nikixtalij nikinijkuilouilis miak amamej kampa nikinmelauiliaya toni niknekia nikchiuas satepan. Se tonal, nopopaj tel kualanik uan nechiluij: “Komo tiknemilia ke uelis tikajsis tekit, xikajsi mosta. Komo amo tikajsi, amo uelisok tinemis itech nejin kali”. Niktataujtij Jiova maj nechpaleuiani. Mostika nitanojnotsato, uan ome tokniuan siuamej seseko nechtajtanijkej maj nikinmachtiani ininsiuapipiluan tein kaltamachtiloyan kinmachtiaj. Nopopaj amo kiyolpaktij nejon uan peuak amo nechnotsaok. Nomomaj kijtoj ke okachi kuali yeskia maj nimochiuani se taltikpaknenkej akin kichiua tein amo kuali ke se itaixpantijkauj Jiova.

Kemansa nimotajtaniaya ox Jiova kuali kiitaya maj tel amo niknekini nikchiuas tein notatuan kinekiaj. Yejua ika niktataujtij uan semi nitanemilij itech tajkuilolmej tein ika tajtouaj keniuj Dios techtasojta. Nejin nechpaleuij maj nikpiani okachi kuali tanemilil uan maj nikajsikamatini ke notatuan noka motekipachouayaj. Jiova nechpaleuij maj nikpatani notanemilil uan maj kuali nitaixpejpenani. Keman okachi nitanojnotsaya, okachi nechyolpaktiaya nikteixmatiltis Dios. Niknekia nimochiuas precursora.

Keman seki tokniuan siuamej kimatkej ke niknekia nimochiuas precursora, nechyolmajxitijkej maj nimochiani hasta maj notatuan tepitsin moyolseuianij. Niktajtanij Jiova maj nechpaleuiani, nimomachtij tein kijtouaj toamaixuan uan niknemilij keyej niknekia nimochiuas precursora. Uan no, nikintajtanij tokniuan siuamej uan takamej akin uejkaujya kitekitilijtoyaj Jiova maj nechyolmajxitianij. Ijkuak nikixtalij ke tein okachi monekia niktayekanaltis itech nonemilis katka nikyolpaktis Jiova. Uan nikajsikamatik ke komo nimochiaya uan ayamo nimochiuaya precursora, amo kijtosnekia ke notatuan mopataskiaj.

Peuak nikchiua tekit kemej precursor itech xiuit keman yaya nikisatiya secundaria. Satepan peuak nikyolnejneki nitapaleuitiuj kansaika kampa monekiaj okachi tanojnotsanij. Sayoj ke notatuan amo kinekiaj maj niyani. Yejua ika nimochiak hasta keman nikajxitij 20 xiujmej. Ompa nitajtanik itech sucursal maj nechtitaninij kampa ika sur ompa Japón, kampa nemiaj seki nochankauan. Ijkon nomomaj amo semi noka motekipachoskia.

Ompa nikpiak yolpakilis nikinpaleuis miakej maj mochiuanij itaixpantijkauan Jiova. No nimomachtij tajtol inglés uan ijkon ueliskia okachi niktekitilis Jiova. Itech nechikol kampa niyetoya moajsiaj ome tokniuan takamej akin kichiujtoyaj tekit kemej precursor especial. Semi nechyolnotsaya nikitas keniuj motelchikauayaj kitekitiliskej Dios uan kinpaleuiskej oksekin. Nikixtalij ke nejua no niknekia nimochiuas precursora especial. Itech nejon tonalmej nomomaj ojpa ueyi kokolispeuak. Uan nochi ojpa nimokepak kalijtik uan ijkon ueliskia nikyekpias. Yejua amo kichiaya maj nikchiuani nejon. Yejua ika peuak nechnextilia tepitsin okachi kualtakayot ke achto.

Chikome xiuit satepan nikselij se amat tein nechtitanilij semej tokniuan takamej akin kichiujtoyaj tekit kemej precursor especial akin ininka nitajtoj achto. Monotsaya Atsushi. Nechiluiaya ke kinemilijtoya monamiktis uan nechtajtaniaya ox tepitsin niktasojtaya. Tein melauj nejua amo niktasojtaya uan niknemiliaya ke yejua amo no nechtasojtaya. Se metsti satepan niknankilij uan nikiluij ke kuali yetoya maj okachi timoixmatinij. Tikitakej ke tein yejua kiixtalijtoya kichiuas satepan no yejua tein nejua nikixtalijtoya. Tiknekiaj tiksentokaskej tiktekitiliskej Jiova miak tonalmej kampa yeski techtitaniskiaj. Yejua ika satepan timonamiktijkej. Notatuan uan okseki nochankauan yetoyaj keman timonamiktijkej uan nejon semi nechyolpaktij.

Nonamik uan nejua tikchiujtoyaj tekit kemej precursor regular. Ompa, itech sucursal peuak kemansa  techtajtaniaj maj tikinkalpanouanij seki nechikolmej. Ompa, peuak tikchiuaj tekit kemej precursor especial, uan satepan Atsushi kiixtalijkej kemej takalpanojkej. Keman yekinika tikintamikalpanojkej nechikolmej, tokniuan itech sucursal technotskej uan techtajtanijkej ox tiknekiskiaj tiyaskej Nepal kampa tiksentokaskiaj tikinkalpanoskej nechikolmej.

Nechtekipachouaya toni kijtoskiaj notatuan keman kimatiskiaj ke tel uejka tiyaskiaj. Sayoj ke keman nikinnotsak, nopopaj nechiluij: “Semi takualtsinkan kampa tiyouj”. Se semana achto, se itasojikniuj kitayokolijka se amaix tein ika tajtouaya Nepal. Satepan ke kiixtajtoltij, nopopaj kinemilij ke tel kualtsin yeskia se ixmatitiuj ompa.

Tikuelitayaj tiyetoskej iniuan akin nemiaj Nepal, akin semi kualtakamej. Satepan techtajtanijkej maj no titakalpanouanij itech nechikolmej tein moajsiaj Bangladesh. Maski nejin altepemej amo uejka yetokej se iuan okse, semi tamamej. Nejon kichiuaya maj tataman titanojnotsanij. Makuil xiujmej satepan oksepa techtitankej Japón. Axkan tiksentokaj tikpiaj tatiochiualis tikinkalpanoskej nechikolmej tein ompa moajsij.

Titapaleuiskej Japón, Nepal uan Bangladesh nechmachtiani miak taman kemej tamati Jiova. Taltikpakneminij itech nejin altepemej tel tataman kemej nemij uan tein momattokej kichiuaskej. Uan sejse taltikpaknenkej tataman kemej tanemilia. Sayoj ke nikitani ke Jiova ueli kipaleuia, kiyekpia uan kiselia akin yeski.

Miak taman moneki niktasojkamatilis Jiova. Nechkauani maj nikixmati uan maj niktekitili, uan nechmakak se tel kuali nonamik akin kichiua kemej Cristo. Uan no, nechmachtiani maj kuali nitaixpejpena. Ika inepaleuil Jiova, nomomaj uan nejua oksepa kuali timouikaj, uan kuali nimouika iniuan okseki nochankauan. Nochipa nikteltasojkamatis maj ueli kuali nimouika iuan Dios uan iuan nomomaj.