Tein tamachtia iTajtol Dios

¿Toni kipanos taneltokalis?

Nejin tamachtilis mitsonpaleuis xikonajsi itech moBiblia itanankilil seki netajtanilmej tein xa tionmochiuiliani. Komo tikonneki, itaixpantijkauan Jiova uelis kiitaskej mouan nejin netajtanilmej.

1. ¿Kinselia Dios nochi taneltokalismej?

Itech nochi taneltokalismej moajsij taltikpakneminij yolmelaujkej tein kinekij kiyolpaktiskej Dios. Yejuatsin kinita uan kintasojkaita. Sayoj ke tetayokoltij tikijtoskej ke sekin, ika taneltokalis, kichiuaj tein amo kuali. Ne uejkauj, sekin tayekananij itech taneltokalis, kintajyouiltiayaj akin amo kiseliayaj tein yejuan kichiuayaj (2 Corintios 4:3, 4; 11:13-15). Uan itech totonaluan, momati ke sekin tayekananij itech taneltokalis tapaleuiaj maj taixnamikikan tamojmoujtianij, kipaleuiaj neteuilis uan ininka mauiltiaj konemej. (Xikonixtajtolti Mateo 24:3-5, 11, 12.)

Biblia tamachtia ke moajsi ome taman taneltokalis; se tein melauak uan se tein amo melauak. Taneltokalis tein amo melauak amo tamachtia tein yekmelauj kijtoua Dios. Sayoj ke Jiova kineki maj taltikpakneminij kiixmatikan tamachtilis tein melauak. (Xikonixtajtolti 1 Timoteo 2:3-5.)

2. ¿Toni kinpanos taneltokalismej tein amo melaujkej?

Dios amo kiyolpaktia taneltokalismej tein kijtouaj kitasojtaj yejuatsin sayoj ke amo tamachtiaj tein yekmelauj tamachtia Dios. Tein melauj, sekin tein yetokej itech nejon taneltokalismej kintelyolpaktia tein onkak nikan taltikpak kampa taixyekana Amokuali Satanás (Santiago 4:4; 1 Juan 5:19). ITajtol Dios kinextia ke taneltokalismej tein amo melaujkej, tein kitojtokaj taltikpaktekiuanij uan amo Dios, tamatij kemej se siuaauilnenkej tein kitokaytia ‘Ueyi Babilonia’. Nejin tokayit ualeua itech se altepet tein ne uejkauj moajsia kampa peuak taneltokalis tein amo melauak satepan ke panok Tetsaujkakiouit. Amo uejkaua, keman amo akin kichixtos, Dios kinixpolos taneltokalismej tein takajkayauaj uan tein kichiuaj maj tajyouikan taltikpakneminij. (Xikonixtajtolti Apocalipsis [Revelación] 17:1, 2, 5, 17 uan 18:8, 23, 24.)

  3. ¿Kemanian kichiuas Dios maj nochin taltikpakneminij kipiakan yolpakilis?

Keman Jiova kinixpolos taneltokalismej tein amo melaujkej, taltikpakneminij amo kipiaskejok tajyouilis. Amo takajkayauaskejok nion taxejxeloskej. Nochin taltikpakneminij kiueyichiuaskej sayoj Dios tein melauak. ¿Melauj ke semi kuali tein mochiuati? (Xikonixtajtolti Isaías 11:9; Apocalipsis 18:20, 21, uan 21:3, 4.)

4. ¿Toni moneki kichiuaskej taltikpakneminij tein yolmelaujkej?

Jiova amo kinelkaua akin yolmelaujkej tein noyampa taltikpak moajsij itech taneltokalismej tein amo melaujkej. Yejuatsin kinsentilijtok nejin taltikpakneminij ika tein yekmelauj tamachtia Biblia. (Xikonixtajtolti Miqueas 4:2, 5.)

Jiova ika miak pakilis kinselia itech inechikol akin kinekij kitekitiliskej. Uan maski akin iniuan timouikayaj oso tochankauan mokuejmolouaj ijkuak peua tiktekitiliaj Jiova, tikseliaj miak tatiochiualismej: tikpiaj se kuali uikalis iuan Dios, uan no tikpiaj ininnetasojtalis itekitikauan tein mochiuaj kemej yeskia tochankauan, uan tikchiaj tikpiaskej nemilis nochipaya. (Xikonixtajtolti Marcos 10:29, 30 uan 2 Corintios 6:17, 18.)

Komo tikonneki tikonmatis okachi, xikonita nejin amaix itech capítulo 15 uan 16, tein kichijchiujkej itaixpantijkauan Jiova.

[Akin iaxka taixkopin itech página 26]

The Complete Encyclopedia of Illustration/​J. G. Heck