Nejin tamachtilis mitsonpaleuis xikonajsi itech moBiblia itanankilil seki netajtanilmej tein xa tionmochiuiliani. Komo tikonneki, itaixpantijkauan Jiova uelis kiitaskej mouan nejin netajtanilmej.

1. ¿Keyej moixpejpenilij Dios se tokayit?

Tinochin tikuelitaj maj kikuikan totokay. ¿Keyej? Porin ika totokay timoteixmatiltiaj, amo ijkon komo sayoj techiluiskiaj “tejuatsin” tein ika kinextiaj ke techpoujkaitaj. Dios no kiixmatij kemej “Ueyi Taixyekankej”, “Dios akin nochi ueli kichiua” uan “Ueyi Tachijchiujkej” (Génesis 15:2; 17:1; Eclesiastés 12:1). Sayoj ke motalilij se tokayit porin ijkon techpaleuia maj okachi tikixmatikan uan maj tikpiakan se kuali uikalis iuan. Itokay itech totajtol yejua Jiova. (Xikonixtajtolti Isaías 42:8.)

Maski miakej tein kitajtolkepkej Biblia kitokaytianij kemej “Dios” oso “toTajtsin”, uan amo tein yekmelauj itokay, nejin tokayit ixnesi kemej 7,000 itech Tajkuilolmej tein ne uejkauj moijkuiloj itech hebreo. Ika nejin moita ke Dios kineki maj tikixmatikan itokay. (Xikonixtajtolti Isaías 12:4.)

2. ¿Keyej motelneki tikixmatiskej itokay Dios?

Tikixmatiskej itokay Dios amo sayoj kijtosneki tikmatiskej katiyejua, ta no kijtosneki ke tikpiaj se kuali uikalis iuan. Tokayit Jiova tein kijtosneki “Yejuatsin Kichiua maj Mochiua”, kiyeknextia ke Dios kichiuas tein monekis uan ijkon mochiuas tein kiixtalijtok. Yejua ika, tikixmatiskej itokay, kijtosneki ke titakuaujtamatij ke yejuatsin nochipa kichiuas tein motenkaua (Salmo 9:10). Akin kiixmatij uan kikuij itokay Dios, itech takuaujtamatij uan yejuatsin tayekantok itech ininnemilis. Uan Jiova kinpaleuia. (Xikonixtajtolti Salmo 91:14.)

  3. ¿Keyej kineki Dios maj kiixmatikan itokay?

Dios kineki maj taltikpakneminij kiixmatikan itokay porin nejin kinpaleuia. ¿Keniuj? Yejuatsin kinkaua maj kuali mouikakan iuan, uan kinpaleuia maj kichiakan se nemilis nochipaya. Yejua ika, Dios kineki maj moteixmatilti itokay. (Xikonixtajtolti Juan 17:3 uan Romanos 10:13, 14.)

Jesús kiteixmatiltij itokay Dios keman kitematiltij keniuj tanemilia Dios uan keniuj itachiualisuan, katiyejua itanauatiluan uan tein motenkaua kichiuas. Axkan, itatojtokakauan Cristo no kichiuaj nejin tekit itech nochi xolalmej. Senolochmej kichiuaj sayoj se xolal tein ‘kitasojtaj itokaytsin’. (Xikonixtajtolti Hechos 15:14 uan Juan 17:26.)

4. ¿Keniuj kichipauas Dios itokay?

Jiova kineki kichipauas itokay porin taltikpakneminij tel amo kuali ika tajtouanij. Miakej kijtouaj ke Dios amo kichijchiuak taltikpak uan yejua ika amo moneki kitakamatiskej. Oksekin kijtouaj ke amo kitekipachoua tein techpanoua uan yejuatsin kipia tajtakol maj tikpiakan kuejmolmej. Sayoj ke nochin nejin taltikpakneminij tein kitakajkayauiliaj Dios amo kisentokaskej kichiuaskej porin yejuatsin kintatsakuiltis akin tel amo kuali ika tajtouaj itokay. (Xikonixtajtolti Salmo 83:17, 18.)

Dios kiueyitalis oso kichipauas itokay keman iTekiuajyo kinixpolos nochin taltikpaktekiuajyomej, uan kichiuas maj sayoj onka yolseuilis uan yekyetolis itech taltikpak (Daniel 2:44). Amo uejkaua, nochin kimatiskej ke sayoj Jiova, Dios akin melauak. (Xikonixtajtolti Ezequiel 36:23 uan Mateo 6:9.)

¿Toni moneki tikonchiuas? Xionmomachti iTajtol Dios uan ijkon tionmotokis iuan, uan no xionmosentili iniuan taltikpakneminij tein kitasojtaj. Amo tiomeyolouaj ke Jiova kinelnamikis itekitikauan tein amo kikauaj keman kiueyitalis itokay (Malaquías 3:16).

Komo tikonneki tikonmatis okachi, xikonita nejin amaix ¿Toni yekmelauj tamachtia Biblia?, itech capítulo 1, tein kichijchiujkej itaixpantijkauan Jiova.

[Taixkopin itech página 10]

Itokay Dios itech se tajkuilol tein ne uejkauj moijkuiloj itech hebreo