Kijtosneki nemilis nochipaya

“Ne nachipa nemilis kijtosneki yejua nijin: Ke in taltikpakuani ma mitsonixmatikan [...] [ke] sayo Tejuatsin tion Dios. Uan [...] ma nechixmatikan Nejuatsin ke ni Jesucristo ten Tejuatsin tinechonualtitanik.” (JUAN 17:3)

TIKIXMATISKEJ teisa tein motelneki, kemansa uelis techpaleuis maj amo timikikan. Keman kokolispeuak konet Nouhou, tein sayoj kipiaya majtakti metsti, imomaj, akin tekiti itech tapajtiloyan tein moajsi itech ixolal ompa Níger, ijsiujka kimatik toni kichiuas. Kikuik chipauakat, kitsopelij uan kipoyelij, uan kitayiltij konetsin porin kimatia ke nejon kipaleuiskia maj oksepa kipia at tein kipolojka. Kemej kijtoua UNICEF, “kitsakuilij kokolis tein kipiaya ikonetsin porin ijsiujka kimatik toni kichiuas uan moajsia se tapajtiloyan”.

Tikixmatiskej tein kijtoua Biblia no techmakixtia. Moisés, akin yekinika kijkuiloj seki amaixmej tein kipia Biblia, kijtoj ke “tajtolmej namechtelpaleuiaj, ta kijtosneki nanmonemilis, uan komo nankitakamatij nejin tajtolmej uelis momiakiliskej nanmotonaluan” (Deuteronomio 32:47). ¿Yekmelauj nejon taixmatilis uelis techpaleuis maj okachi tinemikan? ¿Uan keyej kijtoua ke “kijtosneki nanmonemilis”?

Makuil tamachtilismej tein tikitakej, techmatiltijkej ke amo onkak okse amaix kemej Biblia, porin nochipa mochiua tein achtook kijtoua, kitematiltia tein yekmelauj mochiuak ne uejkauj, mouika ika tein kijtouaj tapajtianij, sayoj se tamachtilis kipia uan tel tapaleuia. Kemej sayoj Biblia kijtoua keniuj uelis okachi tinemiskej uan tikpiaskej nemilis nochipaya, ¿melauj ke semi kuali maj se momachti?

Komo tikonneki tikonpias yolseuilis axkan uan yolpakilis amo uejkaua, timitsonyoleuaj xikonseli taixmatilis ajsitok tein kitemaka Biblia. Itaixpantijkauan Jiova, ika miak pakilis mitsonnextiliskej keniuj tikonpias nejon taixmatilis.

[Recuadro/Taixkopin itech página 9]

Uan no, sayoj Biblia kuali kinankilia nejin netajtanilmej tein motelnekij:

• ¿Keyej tiyetokej nikan?

• ¿Keyej tel onkak tajyouilis?

• ¿Oksepa tikinitaskej akin momikilijkejya?

Tikonajsis tanankililmej tein kitemaka Biblia itech nejin amaix ¿Toni yekmelauj tamachtia Biblia?, tein kichijchiujkej itaixpantijkauan Jiova.