¿Akoni kikaki tonetataujtiluan?

KOMO aksa kikaki tonetataujtiluan, nejon xa yeski akin techchijchiuak uan akin kichijchiuak tokuatixyo. ¿Akoni okse ueliskia kimatis tein tiknemiliaj? ¿Akoni okse ueliskia kinankilis netataujtilmej uan kinmakas taltikpakneminij nepaleuil tein kinpoloua? Sayoj ke xa tionmotajtania: ¿kuali yetok maj se kineltoka Dios?

Miakej kinemiliaj ke komo tikneltokaj ke aksa techchijchiuak, moneki tikixtopeuaskej tein momachtiaj tamatinij. Sayoj ke nejon amo melauak. Xikonita nejin neskayot.

▪ Keman kinchiuilijkej nejin netajtanil 1,646 tamatinij akin tamachtiaj itech 21 uejueyi tamachtiloyamej itech altepet Estados Unidos, nesik ke sayoj 550 amo kineltokayaj Dios.

Tein melauj, miakej tamatinij kineltokaj ke nemi se Dios.

Tein kinextia ke nemi se Dios

¿Moneki tikneltokaskej ke aksa kikaki tonetataujtiluan maski amo tikmatij akoni? Amo. Keman moijtoua ke takuaujtamatilis amo tikseliaj ika tein tikitaj, amo melauak. Biblia kijtoua ke ijkuak titakuaujtamatij “timoyekmatiltiaj ya ke yek melau motamichiuaki nochi ne ten ayamo tikitstinemij” (Hebreos 11:1). Kemej neskayot, maski amo ueli tikitaj ejekat, tein melauj ueli tikitaj tein kichiua, kemej ijkuak kinolinia koujmej. Ijkon tikneltokaj ke onkak ejekat. No ijkon, maski amo ueli tikitaj akin kikaki netataujtilmej, tikitaj miak taman tein kinextia ke melauak nemi.

¿Kani uelis tikitaskej tein kinextia ke Dios yekmelauj nemi? Techpaleuis komo tikitaj tein techyoualoua. Biblia kijtoua: “Aksa [...] kichijchiuak cada kali. Pero Totajtsin  Dios Yejuatsin kichijchiuak nochi ten ongak” (Hebreos 3:4). ¿Tikonita ke kuali yetok nejin tanemilil? Komo tejuatsin tiontanemilia keniuj yekchijchiujtok iluikak uan taltikpak, keniuj mochiua nemilis oso keniuj chijchiujtok tokuatixyo, se taman tein okachi ouij chijchiujtok, xa no tikonnemilis ke moajsi aksa akin okachi ueyichiujkej ke taltikpakneminij. *

Sayoj ke nochi tein tikitaj amo techpaleuia maj senkis tikixmatikan Dios. Ijkuak tikitaj tein Dios kichijchiuak, kemej yeskia sayoj tikakij aksa moualtokia kaltenoj. Tikakij ke aksa uitse, sayoj ke amo tikmatij akoni. Tikmatiskej keman titataposkej. No ijkon, uelis tikmatiskej akoni kichijchiuak nochi tein tikitaj komo kemej yeskia titatapouaj.

Ika Biblia, kemej yeskia titatapouaj uan ijkon tikixmatij Dios. Keman tikitaj seki taman tein achtook moijtojka uan senkis nochi mochiuak, ueli tikitaj ke Dios yekmelauj nemi. * Uan Biblia no kinextia keniuj tamati Dios akin kikaki tonetataujtiluan, keman techtapouia tein yejuatsin kichiuani ininka taltikpakneminij.

¿Keniuj tamati ‘Akin kikaki netataujtil’?

Biblia kijtoua ke Dios, akin kikaki tonetataujtil, amo techikoita uan uelis tikixmatiskej. Uan kemej amo techikoita, ueli techkaki  uan techajsikamati. Yejua ika, nejin tajtolmej techyolchikauaj: “ToTajtsin Akin tikaki netataujtil, mouan motokiskej nochin taltikpakneminij” (Salmo 65:2). Yejuatsin kinkaki akin ika takuaujtamatilis kitataujtiaj, uan no kipia se itokay. Biblia kiyekijtoua: “Jiova tel uejka kinkaua akin amo yolkualmej, sayoj ke kikaki ininnetataujtil akin yolmelaujkej” (Proverbios 15:29).

Biblia kijtoua ke Jiova “teyoltasojta” uan yejuatsin “Dios akin yolpaki” (2 Corintios 13:11; 1 Timoteo 1:11, NM). Yejua ika “moteltayokoltij” porin itech seki tonalmej motelchiuaya tein amo kuali (Génesis 6:5, 6). Uan amo melauak keman moijtoua ke Dios kintajyouiltia taltikpakneminij uan ika kinyejyekoua, ta Biblia kijtoua: “Uejka yetok maj Dios akin melauak kichiua tein tel amo kuali” (Job 34:10). Axkan, xa tionmotajtania: “Komo Dios yejuatsin Tachijchiujkej akin kipia nochi uelilis, ¿keyej kikaua maj onka tajyouilis?”.

Jiova techkaua maj tejuan tikixpejpenakan tein tikchiuaskej, uan nejon tel kuali kiixnextia. ¿Melauj ke moneki tiktasojkamatiskej nejon? Sayoj ke tetayokoltij maj miakej taltikpakneminij tajyouikan uan kintajyouiltikan oksekin porin kichiuaj tein yejuan kinekij. Axkan moajsi se netajtanil tein moneki tiknemiliskej ika nejmachkayot: ¿keniuj kitamis Dios tajyouilis uan kisentokas kinkaujtos taltikpakneminij maj kichiuakan tein kiixpejpenaskej? Nejin netajtanil monankilis itech okse tamachtilis.

[Tajtolmelaualismej]

[Recuadro itech página 5]

¿Amo tikonneltoka Dios porin itech taneltokalismej mochiua tein amo kuali?

Tetayokoltij tikijtoskej, sayoj ke taneltokalismej kichiuaj maj miakej motajtanikan ox moajsi se aksa akin teiknelia uan kikaki netataujtilmej. Hasta taltikpakneminij akin kitelueyichiuayaj Dios amo kineltokajok ke nemi, porin kiitaj ke taneltokalismej tapaleuiaj itech neteuilismej, kinpaleuiaj taixnamikinij tamojmoujtianij, uan amo teyi kichiuaj keman sekin ininka mauiltiaj konemej.

¿Keyej moita ke taneltokalis sayoj kipeualtia kuejmolmej? Porin miakej kichiuaj tein amo kuali uan ika mopaleuiaj inintaneltokalis. Biblia achto kijtojka ke sekin akin pouiskiaj itech taneltokalis tein melauak ika mopaleuiskiaj kichiuaskej tein amo kuali. Tatitanil Pablo kinmakak se tanejmachtilis tayekananij akin kichiuayaj kemej Cristo: “Namejuan [nan]mochiuaske tamachtiani ika xolopijyot san, sayo para ma nochi in taneltokani ma namechtoktilijtiyakan” (Hechos 20:29, 30).

Dios kitauelita nochi tein kichiuanij taneltokalismej tein amo melaujkej. Yejua ika, itech Biblia, tein iTajtol Dios, kijtoua ke taneltokalismej “kinmiktijtiualayaj itaneltokakauan de Dios kampa yeski tech nochi in taltikpak” (Apocalipsis [Revelación] 18:24). Kemej amo kuali kiteixmatiltijkej Dios, akin ikualneskayo tein okachi kiixnextia yejua netasojtalis, yejuatsin kintajtakoltia ke kinmiktijkej akin katkaj itaneltokakauan (1 Juan 4:8).

Dios akin kikaki netataujtil kiniknelia akin kijyouianij tein amo kuali itech taneltokalismej. Kemej yejuatsin kintasojta taltikpakneminij, amo uejkaua, kichiuas maj iKonetsin kinixkomaka taneltokalismej porin amo kuali tein kichiuaj. Jesús kijtoj: “Kuak ne tonal de tatsakuiltilis [...] miakke nechiliske ijkuin: ‘Notekotsin, Notekotsin, tejuan tiktanextiliayaj ika in chikaualis de motokaytsin [...]’. Pero ijkuakon Nejuatsin nikinyekkilis ijkuin: ‘Amo keman namechixmatik; niman ximajchiuakan, namejuan nantachiuani ika ten amo kuali’” (Mateo 7:22, 23).