¿Aksa kikaki netataujtilmej?

“Niomeyolouaya ox nemi se Dios. Maski ijkon, kemansa nikchiuaya netataujtil. Amo nikmatia ox aksa nechkakia, sayoj ke nikchiaya maj aksa nechkakini. Amo niyolpakia uan amo nikmatia toni niknekia itech nonemilis. Amo niknekia nikneltokas ke nemi se Dios porin niknemiliaya ke sayoj taneltokaj akin amo yolchikaujkej.” (PATRICIA, IRLANDA) *

¿KEMANSA tionmomachiliani kemej Patricia? ¿Tikonchiua netataujtil maski amo tikonmati ox nemi se Dios? Komo ijkon, amo sayoj tejuatsin. Xikonita nejin neskayomej.

▪ Keman kintajtanijkej ox kichiuayaj netataujtil 2,200 taltikpakneminij kayomej Gran Bretaña, nesik ke sayoj 22% kineltokaj ke moajsi se Dios akin kichijchiuak taltikpak uan kikaki tonetataujtiluan. Uan 55% kijtojkej ke sayoj kemansa kichiuayaj netataujtil.

▪ Keman no kintajtanijkej 10,000 taltikpakneminij kayomej itech tataman altepemej, nesik ke 30% akin kijtouayaj ke amo kineltokayaj Dios, kichiuaj netataujtil.

¿Keyej semi omeyolouaj?

Se takat kayot Inglaterra, itokay Allan, kimelaua keyej kiyekijtouaya ke amo kineltokaya Dios: “Niknemiliaya ke taneltokalis nesiko porin ika kinixyekanaskiaj taltikpakneminij uan kinkuiliskiaj inintomin. Uan no, niknemiliaya ke komo nemiskia se Dios amo mochiuaskia miak taman tein amo kuali. Maski ijkon, kemansa nimotaliaya uan niknojnotsaya ‘teisa’. No nimotajtaniaya keyej tinemij”.

Onkak miak taman tein kichiua maj sekin omeyolouakan ox aksa kinankilia ininnetataujtil. Miakpa omeyolouaj porin amo ueli kinankiliaj netajtanilmej kemej nejin:

▪ ¿Aksa techchijchiuak?

▪ ¿Keyej moita ke taneltokalismej sayoj kichiuaj maj onka kuejmolmej?

▪ ¿Keyej kikaua Dios maj onka tajyouilis?

Komo tejuatsin tikonmatiskia itanankililuan nejin netajtanilmej, ¿okachi mitsonoliniskia xikonchiua netataujtil?

[Tajtolmelaualis]