Maj timonejnemiltikan kemej akin pouij itech iTekiuajyo Dios

“Ximonejnemiltikan ijkon kemej tamachtia kuali tanauatilmej.” (FILIP. 1:27, NM)

¿TONI TIONTANAKILISKIA?

¿Akonimej uelis pouiskej itech iTekiuajyo Dios?

¿Toni kijtosneki timomachtiskej tajtol tein chipauak, tein mochiujtiualaj itech inechikol Dios uan tikixmatiskej itanauatiluan Tekiuajyot?

¿Keniuj kinextiaj akin pouij itech iTekiuajyo Dios ke kitasojtaj itanauatiluan?

1, 2. ¿Keyej itayolmajxitilis Pablo kinajsikamatiltij tokniuan se taman tein motelnekia?

TATITANIL Pablo kinijkuilouilij itatojtokakauan Cristo tein moajsiaj itech nechikol Filipos nejin tajtolmej: “Ximonejnemiltikan ijkon kemej tamachtia kuali tanauatilmej” (xikonixtajtolti Filipenses 1:27, NM). Tajtol griego tein mokepa “ximonejnemiltikan”, no uelis mokepas kemej “ximonejnemiltikan kemej akin pouij itech se altepet”. Tokniuan kayomej Filipos kinajsikamatiltiaya nejon tajtol se taman tein motelnekia, porin nesi ke ueyi tekiuajyot Roma kiselijka altepet Filipos maj pouini itech itekiuajyo uan maj kiseliani nepaleuil tein kitemakaya. Akin nemiaj Filipos uan nochin tein nemiaj kampa ajsia itaixyekanalis Roma, semi tel yolpakiaj porin kipiayaj se nepaleuil tein sayoj kinmakayaj akin ompa pouiaj.

² Sayoj ke akin pouiaj itech nechikol tein moajsia Filipos okachi monekia yolpakiskej. ¿Keyej? Pablo kinelnamiktij ke poujtoyaj iluikak porin katkaj tokniuan taixpejpenalmej (Filip. 3:20). Kemaj, yejuan poujtoyaj itech iTekiuajyo Dios uan amo itech se ueyi taltikpaktekiuajyot. Yejua ika, nejon tekiuajyot kinpaleuiaya uan kinmakaya tein kuali kemej nion se tekiuajyot ueli kitemaka (Efes. 2:19-22).

3. 1) ¿Akonimej uelij pouij itech iTekiuajyo Dios? 2) ¿Toni tikitaskej itech nejin tamachtilis?

³ Keman Pablo tayolmajxitij maj monejnemiltianij kemej akin pouiaj itech se altepet, yekinika kiniluijtoya akin tekiuajtiskiaj iuan Cristo ne iluikak (Filip. 3:20). Uan ojpatika, akin nemiskej nikan taltikpak uan kinixyekantos iTekiuajyo Dios. ¿Keyej? Porin nochin itatojtokakauan Cristo tein motemaktijkejya kitekitiliaj sayoj se Tekiuaj, Jiova, uan no moneki mokauaskej maj kinyekana itanauatiluan (Efes. 4:4-6). Axkan, miakej taltikpakneminij kichiuaj miak taman tein moneki uan ijkon uelis pouiskej itech se ueyi altepet kampa okachi uelis kitaniskej tomin. Yejua ika, tejuan  okachi moneki timotasojkamatiskej maj ueli tipouikan itech iTekiuajyo Dios. Maj tikitakan ke seki taman tein kintajtaniaj akin kinekij pouiskej itech se ueyi altepet, no tamati kemej tein kintajtaniaj akin kinekij pouiskej itech iTekiuajyo Dios, porin nejon techpaleuis maj okachi tikajsikamatikan tatiochiualis tein tikpiaj. Satepan tikitaskej eyi taman tein moneki tikchiuaskej uan ijkon tiksentokaskej tipoujtoskej itech iTekiuajyo Dios.

TEIN KINTAJTANIAJ AKIN KINEKIJ POUISKEJ ITECH TEKIUAJYOT

4. ¿Toni “tajtol tein chipauak”, uan keniuj titajtouaj nejon tajtol?

⁴ Maj se momachti tajtol. Sekin tekiuanij kintajtaniaj akin kinekij pouiskej itech se ueyi altepet maj momachtikan tajtol tein okachi mokui ompa. Uan maski sekin kinselijkejya itech nejon tekiuajyot, amo niman uelij tajtouaj nejon tajtol kemej moneki. Xa ijsiujka kimatij keniuj moneki tajtoskej, sayoj ke kinouijmaka kuali kijtoskej tajtolmej. No ijkon, iTekiuajyo Dios kintajtania akin ompa pouij maj momachtikan tein Biblia kitokaytia “tajtol tein chipauak” (xikonixtajtolti Sofonías 3:9). ¿Toni nejon tajtol? Yejua melauak tamachtilis tein moajsi itech Biblia tein techyekmatiltia keniuj tamati Dios uan itanejnekilis. Titajtoskej nejon tajtol tein chipauak kijtosneki tiktakamatiskej itanauatiluan Dios uan itayolmajxitilis. Akin tipouij itech iTekiuajyo Dios xa ijsiujka tikajsikamatij tamachtilis tein tayekantok tein moajsi itech Biblia. Sayoj ke maski timoauijkejya moneki maj tinochin timochikauakan maj okachi ueli titajtokan nejon tajtol tein chipauak. ¿Keniuj? Moneki timochikauaskej tikchiuaskej ijkon kemej timomachtiaj itech Biblia.

5. ¿Keyej moneki timomachtiskej nochi tein mochiujtiualaj itech inechikol Jiova nikan taltikpak?

⁵ Maj timomachtikan tein mochiujtiualaj itech altepet. Akin kinekij pouiskej itech se ueyi altepet, xa monekis momachtiskej seki taman tein mochiujtiualaj ompa. No ijkon, akin kinekij pouiskej itech iTekiuajyo Dios moneki momachtiskej uan ijkon uelis kiixmatiskej nejon tekiuajyot. Maj itech titanemilikan se neskayot tein mochiuak ne uejkauj Israel. Ikoneuan Coré kitasojtayaj Jerusalén uan kampa taueyichiuayaj uan kinpaktiaya kitetapouiskej nochi tein mochiujtiualaj itech altepet. Tein okachi kiuelitayaj amo katka ke tel kuali chijchiujtoya, ta porin kampa taueyichiuayaj uan Jerusalén, kiixnextiayaj se taman tein motelnekia. Nejin katka ialtepeuj “ueyi Tekiuaj” Jiova, porin ompa kiueyichiuayaj kemej yejuatsin kiyolpaktiaya. Ompa kampa motamachtiaya iTanauatil Jiova uan yejuatsin katka ueyi Tekiuaj itech nejon xolal kampa kinextij iueyi netasojtalis (xikonixtajtolti Salmo 48:1, 2, 9, 12, 13). ¿No ijkon tikonnejneki tionmomachtis uan tiontetapouis tein mochiujtiualaj itech inechikol Jiova nikan taltikpak? Keman tionmomachtis tein  mochiujtiualaj uan tikonitas keniuj Jiova kinpaleuiani itekitikauan, okachi tikonneltokas ke yekmelauj moajsi iTekiuajyo Dios uan okachi tikonnejnekis tiontetapouis kuali tanauatilmej ika nejon Tekiuajyot (Jer. 9:24; Luc. 4:43).

6. ¿Keyej Jiova kichia maj timomachtikan uan maj tiktakamatikan tanauatilmej uan tayolmajxitilis tein kitemaka iTekiuajyo?

⁶ Maj tikixmatikan tanauatilmej. Taltikpaktekiuajyomej kintajtaniaj akin kinixyekanaj maj kiixmatikan uan maj kitakamatikan tanauatilmej tein kiixtaliaj itech ueyi altepet. Yejua ika, Jiova kichia maj nochin akin tipouij itech iTekiuajyo tikixmatikan uan maj tiktakamatikan tanauatilmej uan tayolmajxitilis (Is. 2:3; Juan 15:10; 1 Juan 5:3). Miak tanauatilmej tein kitaliaj taltikpakneminij amo kiualkui tein kuali uan amo nochin kinpaleuia. Sayoj ke “itanauatil Jiova yektik” (Sal. 19:7). ¿Mitsonyolpaktia itanauatil Dios uan tikonixtajtoltia Biblia mojmostaj? (Sal. 1:1, 2.) Moneki timomachtiskej itanauatil Dios, ta sayoj ijkon uelis tikixmatiskej. Amo uelis tikauiliskej okse maj kichiua tein tejuan moneki tikchiuaskej.

AKIN POUIJ ITECH ITEKIUAJYO DIOS KITASOJTAJ ITANAUATILUAN

7. Tein tipouij itech iTekiuajyo Dios, ¿keniuj tikitaj itanauatiluan?

⁷ Komo tiknekij tiksentokaskej tipoujtoskej itech iTekiuajyo Dios, amo sayoj moneki tikixmatiskej itanauatiluan, ta no moneki tiktasojtaskej. Itech nejin taltikpak, miakej kijtouaj ke kiseliaj tanauatilmej tein moixtalia itech ueyi altepet kampa nemij. Sayoj ke ijkuak se tanauatil amo kinyolpaktia uan kinemiliaj ke amo akin kinita, amo kitakamatij. Miakpa sayoj kichiuaj teisa porin kinekij ‘kinyolpaktiskej’ taltikpakneminij (Col. 3:22). Sayoj ke akin tipouij itech iTekiuajyo Dios amo ijkon tikitaj itanauatiluan. Tiktakamatij ika miak pakilis maski amo akin techitstos. ¿Keyej? Porin tiktasojtaj Akin kitemakak nejon tanauatilmej (Is. 33:22; xikonixtajtolti Lucas 10:27).

8, 9. ¿Keniuj uelis tikonmatis ox yekmelauj tikontasojta itanauatiluan Dios?

⁸ ¿Keniuj uelis tikonmatis ox yekmelauj tikontasojta itanauatiluan Dios? Xikonnemili keniuj tiontanankilia keman mitsonyolmajxitiaj itech se taman tein tikonnemilia ke sejsemej moneki se kiixejekos, kemej itech tilmaj tein tikonkui. Achto ke tionpouiskia itech iTekiuajyo Dios, xa amo tionmotekipachouaya ika moneketsalis oso tionmotaliliaya tilmaj tein kichiuaya maj oksekin tanemilikan itech auilnemilis. Sayoj ke ijkuak moskaltij netasojtalis tein tikonpialia Dios, peuak tionmotilmajtia kemej kiueyitalis itokay (1 Tim. 2:9, 10; 1 Ped. 3:3, 4). Axkan xa tikonnemilia ke kuali yetok tilmaj tein tionmotalilia. Sayoj ke komo se tayekankej mitsoniluiskia ke sekin tanojnotsanij itech nechikol kiitaj ke amo kuali yetok tilmaj tein tionmotalilia, ¿toni tikonchiuaskia? ¿Niman tionmotenpaleuiskia, tionkualaniskia oso tikonijtoskia ke amo tionmopatas? Se tanauatil tein motelneki kitakamatiskej akin pouij itech iTekiuajyo Dios, yejua tein kiniluia maj kichiuakan kemej Cristo (1 Ped. 2:21). Ika nejin, tatitanil Pablo kijkuiloj: “Ma tikinpaleuijtiyakan ne tokniuan taneltokani [...] para ijkon kachi ok yejuan uelis momajxitijtiyaske de nintakuautamatilis. Porin [...] Cristo amo moyolpaktijtinemik de yejua san” (Rom. 15:2, 3). Itatojtokakauj Cristo akin kipia se kuali uikalis iuan Dios, ika miak pakilis inintech tanemilia oksekin uan amo kichiua tein kinkuejmolos, porin kineki maj onka yolseuilis itech nechikol (Rom. 14:19-21).

⁹ Axkan maj no titanemilikan keniuj moneki mouikas se takat iuan se siuat, uan keniuj tikitaj nenamiktilis. Akin amo pouij itech iTekiuajyo Dios xa kiitaj ke kuali yetok maj se takat moteka iuan se takat oso se siuat iuan se siuat, uan no kinemiliaj ke amo kinijtakoua komo kiitaj auilnemilis, uan ke takat oso siuat namikej iselti kiixejekoua ox motekas iuan akin amo inamik oso kitsayanas amat ininixpan tekiuanij. Sayoj ke tein pouij itech iTekiuajyo Dios kiajsikamatinij  ke achto moneki kinemiliskej toni kinualkuilis inintachiualis uan keniuj uelis kinijtakos oksekin. Maski miakej auilnemiaj achto ke mochiuaskiaj itatojtokakauan Cristo, axkan kiajsikamatij keniuj moneki mouikas se takat iuan se siuat, kuali kiitaj nenamiktilis uan kiajsikamatij ke nejin ome taman se netetayokolil tein kitemaka Jiova. Kitasojtaj itanauatiluan Dios uan kiajsikamatij ke akin auilnemij amo uelis poujtoskej itech iTekiuajyo Dios (1 Cor. 6:9-11). Sayoj ke no kiajsikamatij ke toyolo uelis techuikas maj tikchiuakan tein amo kuali (Jer. 17:9). Yejua ika, kitasojkamatij maj kinnejmachtikan itech seki taman tein kinpaleuis maj kisentokakan kitakamatikan itanauatiluan Dios.

AKIN POUIJ ITECH ITEKIUAJYO DIOS KITASOJKAMATIJ TANEJMACHTILIS

10, 11. ¿Toni tanejmachtilis tein motelneki kitemaka iTekiuajyo Dios, uan keniuj tikonita nejon?

¹⁰ Taltikpaktekiuajyomej kemansa kinnejmachtiaj akin kinixyekanaj ke seki taman takual oso pajti uelis taijtakos. Melauak ke amo nochi takual oso pajti taijtakoua. Sayoj ke komo semej uelis taijtakos, taltikpaktekiuajyot xa tanejmachtia porin amo kineki maj moijtakokan taltikpakneminij. Komo amo kichiuaskia, yejua itajtakol yeskia komo teisa panoua. No ijkon, iTekiuajyo Dios technejmachtia ika seki taman tein uelis techuikas maj tiktapanauilikan itanauatiluan oso maj tikijtakokan tokuali uikalis iuan. Kemej neskayot, takeual takuaujtamach miak xiujmejya tanejmachtijtok ke itech Internet kampa moita auilnemilis, uelis kijtakos tokuali uikalis iuan Dios, tinochin tein tipouij itech iTekiuajyo. ¡Semi tiktasojkamatij nejin tanejmachtilis!

¹¹ Axkan semi motekitiltijtok tein moixmati kemej redes sociales, tein semi tapaleuia komo kuali se kitekitiltia. Sayoj ke komo amo tikyektekitiltiaj uelis techtelijtakos porin uelis timouikaskej iniuan amo kuali tasojiknimej (1 Cor. 15:33). Yejua ika, inechikol Jiova techmakani tel kuali tanejmachtilis. ¿Tikonixtajtoltianiya nochi tamachtilis tein takeual takuaujtamach kikixtiani kampa ika tajtoua redes sociales? Komo amo tikixtajtoltiaj nejon tamachtilis achto ke tiktekitiltiskej, uelis timoijtakoskej, ijkon kemej titayiskiaj pajti tein tel chikauak uan amo achto tikixtajtoltiaj tanejmachtilis tein kiualkui. *

12. ¿Keyej semi amo titamatiskiaj komo amo tikakiskiaj tanejmachtilis?

¹² Akin amo kikakij tanejmachtilis tein kitemaka takeual takuaujtamach, moijtakouaj uan kinijtakouaj akin kintasojtaj. Sekin kitelnekij kiitaskej auilnemilis oso yejuan auilnemij, uan mokajkayauaj keman kinemiliaj ke Jiova amo kinita. Semi amo titamatiskiaj komo tiknemiliskiaj ke uelis tiktatiliskej tein tikchiuaj (Prov. 15:3; xikonixtajtolti Hebreos 4:13). Jiova amo kinkauas maj kisentokakan itech iTekiuajyo nochin akin kitapanauiliaj itanauatiluan uan amo moyolnonotsaj, ijkon kemej taltikpaktekiuajyomej amo kinkauaj maj kisentokakan poujtokan itech tekiuajyot akin kichiuaj tein tel amo kuali (1 Cor. 5:11-13). * Sayoj ke Jiova semi teiknelia, yejua ika kinkui tayekananij uan ijkon kinpaleuia nejon taltikpakneminij (Gál. 6:1). Techyolpaktia tikmatiskej ke akin moyolnonotsaj uan kipataj inintachiualis, uelis oksepa kipiaskej itatiochiualis Dios uan kisentokaskej  poujtoskej itech iTekiuajyo (2 Cor. 2:5-8). ¡Se ueyi tatiochiualis tiktekitiliskej se Tekiuaj tein tel tetasojta!

AKIN POUIJ ITECH ITEKIUAJYO DIOS KITASOJKAMATIJ TAMACHTILIS

13. ¿Keniuj kinextiaj akin pouij itech iTekiuajyo Dios ke kitasojkamatij tamachtilis?

¹³ Miak taltikpaktekiuajyomej kiixtalianij keniuj kinpaleuiskej akin kinixyekanaj. Kemej neskayot, kichijchiuaj kalmej kampa uelis kinmachtiskej maj taixtajtoltikan uan maj tajkuilokan, uan kinmachtiaj teisa tekit tein kinpaleuis maj motekipanokan. Itatojtokakauan Cristo kitasojkamatij nejon tamachtilis uan mochikauaj ueliskej, sayoj ke okachi kitasojkamatij tamachtilis tein Jiova kitemaka itech inechikol. Ompa motayolchikaua maj titaixtajtoltikan. Tetatmej kinyolmajxitia maj kinixtajtoltilikan ininkoneuan tein nojnelmej amaixmej kemej Tanojnotsmej itech Biblia. Itech sejse metsti, takeual takuaujtamach kijkuiloua itech amaixmej La Atalaya uan ¡Despertad! miak tamachtilis tein mokixtia itech Biblia. Amaix Tanejmachtijkej no moajsi itech totajtol uan komo tikonixtajtoltia se oso ome página mojmostaj, uelis tikontamiixtajtoltis uan amo tionmopolouilis tamachtilis tein Jiova techmaka.

14. 1) ¿Toni tamachtilis tikseliaj? 2) ¿Toni taman tayolmajxitilis tikonchiuaniya keman nantaueyichiuaj kemej kalyetouanij?

¹⁴ Akin pouij itech iTekiuajyo Dios, nochi semanas kiseliaj nemachtil itech nechikol. Kemej neskayot, Escuela tein Techmachtia iTekiyo Dios panoua 60 xiujmejya kinpaleuijtok momachtianij maj kuali tamachtikan ika iTajtol Dios. ¿Tionijkuiliujtokya itech nejon tamachtilis? Itech nejin xiujmej, takeual melauak uan takuaujtamach kinextiani ke motelneki titaueyichiuaskej kemej kalyetouanij nochi semanas. Nejin kinpaleuia kalyetouanij maj okachi kuali mouikakan. Itech seki amaixmej techyolmajxitiaj keniuj uelis titaueyichiuaskej kemej kalyetouanij, ¿tikonchiuaniya? *

15. ¿Katiyejua semej tatiochiualismej tein okachi ueyi?

¹⁵ Miakej akin taltikpaktekiuajyomej kinixyekanaj kinextiaj senteixtenoj ke kipaleuiaj akin kineki tekiuajtis, uan no tayoleuaj kajkalpan maj oksekin no ijkon kichiuakan. Sayoj ke akin pouij itech iTekiuajyo Dios okachiok kinextiaj ika yolpakilis ke kipaleuiaj iTekiuajyo ijkuak tanojnotsaj itech ojti uan kajkalpan. Uan kemej timomachtijkej itech tamachtilis tein achto tikitakej, amaix tein okachi momoyaua itech taltikpak, yejua Tanejmachtijkej tein kiteixmatiltijtok iTekiuajyo Jiova. Se kitetapouis nejon Tekiuajyot yejua semej tatiochiualismej tein okachi ueyi. ¿Tikonchiua nejin tekit ika ueyi yolpakilis? (Mat. 28:19, 20.)

16. ¿Keniuj uelis tiknextiskej ke timonejnemiltijtokej kemej akin pouij itech iTekiuajyo Dios?

¹⁶ Amo uejkaua, sayoj iTekiuajyo Dios taixyekantos nikan taltikpak. Techyekanas itech nochi tein tikchiuaskej itech tonemilis uan itech totaueyichiualis. ¿Timonejnemiltiskej kemej akin pouij itech iTekiuajyo Dios nejon tonalmej? Axkanya moneki tiknextiskej. Maj nochi tein mojmostaj tikixtaliaj tikchiuaskej, maj kiueyitali Jiova uan maj tiknextikan ke timonejnemiltijtokej kemej akin pouij itech iTekiuajyo Dios (1 Cor. 10:31).

[Tajtolmelaualismej]

[Inetajtaniluan tamachtilis]

[Tanemilil itech página 21]

¿Tikonkaki tanejmachtilis tein techmakaj ika Biblia achto ke tiktekitiltiskej Internet?

[Taixkopin itech página 19]

Ijkon kemej ikoneuan Coré, ¿tikontasojta taueyichiualis tein melauak uan tein mochiujtiualaj itech inechikol Dios?

[Taixkopin itech página 22]

Taueyichiualis kemej kalyetouanij mitsonpaleuis tejuatsin uan mochankauan ximonejnemiltikan kemej akin pouij itech iTekiuajyo Dios