¡Maj timopiakan ika itamekauilis Satanás!
¡Maj timopiakan ika itamekauilis Satanás!
‘Ximochololtikan imako den amokuali Satanás.’(2 TIM. 2:26)
¿TONI TIONTANANKILISKIA?
¿Toni moneki tikchiuaskej komo titeijijtouaj?
¿Keniuj techpaleuia tein kinpanok Pilato uan Pedro maj amo tikmouilikan taltikpaknenkej uan maj titaxikokan keman techchikaujkauiskej?
Komo kisentoka techkuejmoloua totanemilil porin titajtakojkej, ¿toni techpaleuis maj amo techpechi?
1, 2. ¿Toni taman tamekauilis tein kitekitiltia Satanás tikitaskej itech nejin tamachtilis?
AMOKUALI kitemoua keniuj kinuetsiltis itekitikauan Jiova. Sayoj ke amo kichiua porin kineki kinmiktis kemej kichiua se takitskijkej tein kintemoua tapialmej uan kinmiktia. Satanás kineki kinkitskis uan kinchiualtis tein yejua kinekis (xikonixtajtolti 2 Timoteo 2:24-26).
2 Keman se takitskijkej kineki kikitskis se tapial maj yolto, kitekitiltia miak taman tamekauilis. Kemej neskayot, kitemoua keniuj kichiuas maj kisa kampa motatijtok uan ijkon uelis kimekauis, oso kitalia se taman tamekauilis tein tapial amo kimati ke ompa yetok. No ijkon, kemej Amokuali amo kineki techmiktis, kitalia miak taman tamekauilis tein ika kineki techuetsiltis. Komo amo tiknekij maj techuetsilti, moneki kuali titajtachixtoskej uan maj tikakikan keman technejmachtiaj ke uelis tiuetsiskej itech semej. Itech nejin tamachtilis, tikitaskej keniuj uelis tikixtopeuaskej eyi taman tamekauilis tein Amokuali ika kinkitskianiya sekin itekitikauan Dios: 1) tajtolmej tein teyolkokouaj 2) moujkayot uan tachikaujkauilis uan 3) keman timoteltajtakoltiaj tein tikchiujkej. Itech okse tamachtilis tikitaskej ome tamanok.
NENEPIL TAMATI KEMEJ TIT TEIN MONEKI SE KIYEKPIAS
3, 4. ¿Toni uelis panos komo amo tikyekpiaj tonenepil? Xikonijto se neskayot.
3 Ijkuak se tapial motatia xiujtsalan, sekin takitskianij kitikuiltiaj xiuit porin nejon kichiuas maj kisa uan ijkon uelis kikitskiskej. Uelis tikijtoskej ke Amokuali no ijkon kichiua. Itech inechikol Jiova kuali timoajsij. Sayoj ke Amokuali kineki kemej yeskia tatikuiltis uan ijkon kichiuas maj tikisakan uan maj tiuetsikan imako. ¿Keniuj uelis timochiuaskej se tamekauilis tein Satanás kitekitiltia maski amo tikmatiskiaj?
4 Santiago kijtoj ke “tonenepil keme yeskia se tit” (xikonixtajtolti Santiago 3:6-8). Komo amo timoyekpiaj ika tein tikijtouaj, uelis kemej yeskia titatikuiltiskej itech nechikol. ¿Keniuj uelis panos nejon? Maj itech titanemilikan nejin neskayot. Itech se nechikol motematiltia ke se tokniuj siuat kichiujtos tekit kemej precursor regular. Ijkuak tami nechikol, ome siuamej tanojnotsanij peua ika tajtouaj tein moijtoj. Yekinika tanojnotskej, kijtoua ke yolpaki uan kinejnekilia maj kualtsin kichiua itekiuj kemej precursor. Ojpatika tanojnotskej, kijtoua ke xa mochiuak precursor porin kineki moueyichiuas. ¿Akoni tikuelitaskiaj maj mochiua totasojikniuj? ¿Tikitaj akoni uelis kemej yeskia niman tatikuiltis itech nechikol?
5. Komo amo tiknekij maj tonenepil kemej yeskia tatikuilti, ¿toni moneki tikchiuaskej?
5 ¿Keniuj uelis tikchiuaskej maj totajtoluan amo tatikuiltikan? Jesús kijtoj ke tein tikijtouaj ualeua itech toyolo (Mat. 12:34). Yejua ika, achto moneki tikitaskej toni yekmelauj tikmachiliaj itech toyolo. Moneki timoijkuaniliskej nochi taman tein techuikas maj tikijtokan teisa tein uelis ika titeyolxokoliskej. Kemej neskayot, komo tikmatij ke se tokniuj okachi kineki kipias tekimej itech nechikol, ¿tiknemiliaj ke kichiua porin kineki kiyolpaktis Jiova, oso porin kineki kiselis miak taman? Komo tikpiaj nejon tanemilil, semi techpaleuis maj tikelnamikikan ke Satanás no ijkon kijtouilij Job (Job 1:9-11). Okachi kuali maj tiknemilikan keyej tikijijtouaj tokniuj, achto ke tiknemiliskej tein amo kuali. ¿Yekmelauj onkak teisa tein kichiua maj tikijijtokan? Oso, ¿xa tikpolojtokej netasojtalis kemej miakej kinpanotok itech nejin itamian tonalmej? (2 Tim. 3:1-4.)
6, 7. 1) ¿Toni uelis techuikas maj tikijijtokan aksa? 2) ¿Toni moneki tikchiuaskej keman aksa kijtos teisa tein techyolkokos?
6 ¿Toni okseki taman uelis kichiuas maj titeijijtokan? Xa porin tiknekij maj okachi kiitakan tein tikchiuaj, oso tiknekij tiknextiskej ke tejuan tel kuali titekititokej maski tikinpinaujtiskej oksekin. Oso xa amo tikchiujtokej tein monekia tikchiuaskej uan yejua ika tiktemouaj timotenpaleuiskej. Komo titaijijtouaj porin timoueyinekij, titenexikoluiaj, oso tikmachiliaj ke amo akin techpoujkaita, semi titaijtakoskej.
7 Kemansa uelis tiknemiliskej ke uelis tikijijtoskej aksa porin techiluij teisa tein techyolkokoj. Sayoj ke maj tikelnamikikan ke amo kuali maj se momakepa, porin komo tikchiuaskiaj, okachi moueyitaliskia kuejmol. Uan no, amo tikchiujtoskiaj itanejnekilis Dios, ta itanejnekilis Satanás (2 Tim. 2:26). Okachi kuali maj tikchiuakan kemej Jesús: “Kuak kikejkeloayaj [...] amo teyika kinnankiliaya ika takejkelolis. [...] Ta, [...] kimaktilij Dios nitajyouilis porin kimatik ke Totajtsin Dios teixkomakas sayo ika yolchipaualis” (1 Ped. 2:21-23). Jesús takuaujtamatik ke Jiova kichiuaskia tein monekiskia keman kiixtaliskia uan kemej kinekiskia. Tejuan no moneki tikpiaskej nejon takuaujtamatilis. Keman tikinyolchikauaj oksekin ika totajtoluan, titapaleuiaj maj ‘tikpixtinemikan ne yolseuilis se uan okse’ itech nechikol (xikonixtajtolti Efesios 4:1-3).
MAJ AMO TIMOUIKAN UAN MAJ AMO TIMOKAUAKAN MAJ TECHCHIKAUJKAUIKAN
8, 9. ¿Keyej Pilato kitemaktij Jesús maj kimiktikan?
8 Keman se tapial kimekauiaj, amo ueli mooliniaok. No ijkon, keman taltikpaknenkej kipia moujkayot uan kikaua maj kichikaujkauikan oksekin, amo senkis yejuaok kiixyekana inemilis (xikonixtajtolti Proverbios 29:25). Maj tikitakan toni kinpanok ome takamej ijkuak kimouilijkej taltikpaknenkej uan kikaujkej maj kinchikaujkauianij, uan maj tikitakan toni techmachtia.
9 Tekiuaj romano Poncio Pilato kimatia ke Jesús amo kichiujka tein amo kuali, uan nesi ke amo kinekia kichiuilis teisa tein kijtakoskia. Yejua kijtoj: “Amo no teyi [ni]kajxilij [...] tajtakol ten kuika mikilis”. Maski kimatia nejin, Pilato kitemaktij maj kimiktikan. ¿Keyej? Porin kinmouilij taltikpakneminij (Luc. 23:15, 21-25). Yejuan kitsajtsiliayaj: “Komo tejua tiktajtouis nijin tagat para ma tikajkauakan, [...] amo tiktakamati ne ueyi rey” (Juan 19:12). Pilato xa kimouiliaya kipolos itayekanalis oso hasta inemilis komo kitajtouiaya Cristo. Yejua ika, mokauak maj kichikaujkauikan uan kichiuak itanejnekilis Amokuali.
10. ¿Keyej Pedro kijtoj ke amo kiixmatia Jesús?
10 Tatitanil Pedro katka semej iteltasojikniuan Jesús. Yejua amo mouik kijtos senteixtenoj ke Jesús katka Mesías (Mat. 16:16). Keman sekin itatojtokakauan Jesús kikaujteujkej porin amo kiajsikamatkej tein kijtojka, Pedro amo kikauak (Juan 6:66-69). Uan keman taixnamikinij kikitskitoj Jesús, Pedro kikuik se espada tein ika kinekia kipaleuis (Juan 18:10, 11). Sayoj ke satepan kintelmouilij taltikpakneminij uan kijtoj ke amo kiixmatia Jesús. Nejon moujkayot kemej yeskia kimekauij uan amo kipiak yolchikaualis (Mat. 26:74, 75).
11. ¿Toni taman tamekauilis moneki tikixnamikiskej?
11 Akin tikchiuaj kemej Cristo miakpa techchikaujkauiaj maj tikchiuakan teisa tein Dios kitauelita. Itech tekit, akin techixyekana oso akin iuan titekitij, uelis kitemos maj iuan tiauilnemikan oso techchikaujkauis maj titakajkayauakan. Oso xa akin iuan timomachtiaj, techiluia maj titakajkayauakan keman tikchiuaj exámen, maj tikitakan auilnemilis, maj titachichinakan, maj tikuikan drogas, maj titauanakan oso maj tiauilnemikan. ¿Toni uelis techpaleuis maj amo tiuetsikan itech nejin tamekauilis?
12. ¿Toni techmachtia tein kinpanok Pilato uan Pedro?
12 ¿Toni timomachtiaj keman tikitaj tein kinpanok Pilato uan Pedro? Pilato amo semi kiixmatia Jesús, sayoj kimatia ke amo katka kemej oksekin taltikpakneminij uan amo kichiujka nion teyi tein amo kuali. Sayoj ke nejin tekiuaj, amo yolyemanik katka uan amo kitasojtaya Dios tein melauak, uan yejua ika, Amokuali kichiualtij itanejnekilis. Pedro kemaj kiixmatia uan kitasojtaya Dios. Sayoj ke amo nochipa kinextij yolyemanilis uan amo kipiak yolchikaualis, yejua ika amo taxikoj keman kichikaujkauijkej. Kemej neskayot, achto ke kikitskiskiaj Jesús, Pedro kijtoj ika ueyi takuaujtamatilis: “Maski nochi in tagayot moyolxokoliskiaj [‘mitskauaskej’, NM], [...] nejua amo” (Mar. 14:29). Pedro kixikoskia tayejyekolis komo takuaujtamatiskia iuan Dios, ijkon kemej mokuikatij akin kijkuiloj salmo: “Jiova nouan yetok; amo nimouis. ¿Toni uelis nechchiuilis taltikpaknenkej?” (Sal. 118:6). Youak keman Jesús kipiayaok inemilis kemej taltikpaknenkej, kinuikak Pedro uan omenok itatitaniluan itech xochital Getsemaní. Sayoj ke amo kichiujtoyaj tein monekia, ta nochi eyin kochkej. Jesús kinijxitij uan kiniluij: “Xiixpetantokan uan ximotatautilikan iuan Dios para ma amo nanuetsiske itech in ouijkayot” (Mar. 14:38). Maski Jesús kiniluij nejin, Pedro oksepa kochik uan satepan mouik uan mokauak maj kichikaujkauianij.
13. ¿Toni techpaleuis maj tikixnamikikan tachikaujkauilis?
13 Ika tein kinpanok Pilato uan Pedro techmachtia okse taman tein motelneki. Moneki maj tikpiakan taixmatilis ajsitok, maj amo timoueyinekikan, maj tiktasojtakan Jiova uan maj yejuatsin tikmoujkatokakan uan amo taltikpakneminij, nejin techpaleuis maj titaxikokan keman techchikaujkauiskej. Komo totakuaujtamatilis ualeua itech taixmatilis tein ajsitok, tikteixmatiltiskej tein tikneltokaj ika ueyi yolchikaualis. Nejin techpaleuis maj amo timouikan uan maj titaxikokan keman techchikaujkauiskej. Sayoj ke maj amo tiknemilikan ke uelis tikxikoskej nochi. Ta maj tiyolyemankej uan maj tikajsikamatikan ke moneki tikpiaskej inepaleuil Dios. Moneki tiktajtaniskej iespíritu uan maj tikchikauakan netasojtalis tein tikpialiaj, uan nejon techpaleuis maj tiktakamatikan itanauatiluan uan maj amo tikchiuakan teisa tein kichiuas maj amo kuali ika tajtokan itokay Dios. Uan no, motelneki maj achto timomachtikan keniuj tikixnamikiskej tachikaujkauilis. Yejua ika, tel kuali komo tetatmej kichiuaj netataujtil iniuan ininkoneuan, uan momachtiaj iniuan keniuj kinnankiliskej akin iniuan momachtiaj, keman kiniluiskej maj kichiuakan teisa tein amo kuali (2 Cor. 13:7). *
MAJ AMO TIMOSENKAUAKAN IJKUAK TIMOTELTAJTAKOLTIAJ TEIN TIKCHIUJKEJ
14. ¿Toni kiteluelitaskia Satanás maj tikneltokakan ika tajtakolmej tein tikchiujkej?
14 Kemansa takitskianij kipilouaj se tet oso se ueyi kouit itech ojti kampa panouaj tapialmej. Keman se tapial amo kiita tamekauilis uan mokuiltia mekat, uelis kichiuas maj nejon tet oso kouit uetsi uan maj kipechi. No ijkon, keman se itekitikauj Dios kisentoka kikuejmoloua itanemilil porin tajtakoj, uelis kimachilis kemej yeskia teisa ‘kitelpechijtok’ (xikonixtajtolti Salmo 38:3-5, 8). Satanás kiteluelitaskia maj tikneltokakan ke Jiova amo keman techtapojpoluis uan amo keman uelis tiktakamatiskej itanauatiluan.
15, 16. ¿Toni mitsonpaleuis maj amo kisentoka mitsonkuejmolo tajtakol tein tikonchiuak?
15 ¿Toni techpaleuis maj amo tiuetsikan itech nejin tamekauilis? Komo tejuatsin tikonchiuak se ueyi tajtakol, niman xikonchiua tein mitsonpaleuis xikonyektali moyekuikalis iuan Jiova. Xiontajtani ininnepaleuil tayekananij (Sant. 5:14-16). Xikonchiua nochi tein mitsonpaleuis xikonmelaua nepolol (2 Cor. 7:11). Uan komo tikonselia tamejmelaualis, amo xionmosenkaua, ta xikonelnamiki ke nejon kinextia netasojtalis tein Jiova techpialia (Heb. 12:6). Xikonixtali amo tikonchiuasok tein mitsonuikak itech tajtakol uan xikonchiua ijkon kemej tikonixtalia. Satepan ke tionmoyolnonotsas uan tionmokepas itech ojti tein melauak, xiontakuaujtamati ke inemilis Jesús tein kitemakak, yekmelauj kichipaua tajtakolmej (1 Juan 4:9, 14).
16 Sekin kisentoka kinkuejmoloua tajtakol tein kichiujkej maski Dios kintapojpoluijya. Komo tejuatsin ijkon mitsonpanoua, xikonelnamiki ke Pedro uan okseki tatitanilmej kikaujkej Jesús keman okachi monekia maj iuan yetokan uan Jiova kintapojpoluij. Uan no kitapojpoluij se takat tein kikalankixtijkaj itech nechikol Corinto porin tel ueyi tajtakol kichiuak, sayoj ke satepan moyolnonotsak (1 Cor. 5:1-5; 2 Cor. 2:6-8). Itech iTajtol Dios ininka motajtoua miakej taltikpakneminij tein moyolnonotskej uan Dios kintapojpoluij maski kichiujkej uejueyi tajtakolmej (2 Crón. 33:2, 10-13; 1 Cor. 6:9-11).
17. ¿Keniuj uelis techpaleuis inemilis Jesús tein kitemakak?
17 Komo yekmelauj timoyolnonotskejya uan tikneltokaj ke Jiova techiknelis, yejuatsin techtapojpoluis uan kielkauas totajtakoluan. Maj amo keman tiknemilikan ke nion inemilis Jesús tein kitemakak uelis techchipauas. Uan komo ijkon titanemiliskiaj, timokaujtoskiaj maj Satanás techmekaui. Maski Amokuali kineki maj tiknemilikan ke amo techpaleuia, inemilis Jesús tein kitemakak kemaj kichipaua itajtakoluan akin moyolnonotsa (Prov. 24:16). Komo titakuaujtamatij itech inemilis Jesús tein kitemakak, techijkuanilis tajtakol tein kemej yeskia techpechijtok uan tikpiaskej chikaualis tein ika tiktekitiliskej Dios ika nochi toyolo, tonemilis uan totanemilil (Mat. 22:37).
“KUALI TIKMATINEMIJ DE KENIU IN SATANÁS TEKAJKAYAUTINEMI”
18. ¿Toni techpaleuis maj amo tiuetsikan itech itamekauilis Amokuali?
18 Satanás uelis kitekitiltis miak taman tamekauilis porin kineki maj itech semej tiuetsikan. Sayoj ke ueli tikixnamikij itamekauilis, porin “kuali tikmatinemij de keniu in Satanás tekajkayautinemi” (2 Cor. 2:10, 11). Komo tiktajtaniaj Jiova maj techmaka tamatilis tein ika uelis tikixnamikiskej ouijkayomej, Amokuali amo uelis techmekauis. Santiago techyolmajxitia: “Komo aksame [...] kipoloaj in kuali taixejekolis [oso tamatilis], [...] ma kitajtanilikan Totajtsin Dios [...]. Porin Yejuatsin nachipa kitetayokolijtika uan amo aken kinixtopeua” (Sant. 1:5). Komo tiknekij maj Jiova techmaka tamatilis ijkon kemej tiktajtaniaj, moneki timomachtiskej iTajtol uan tikchiuaskej kemej timomachtiaj. Amaixmej tein takeual takuaujtamach uan tamatkej techmaka, techyeknextiliaj katiyejua tamekauilis kitekitiltia Amokuali uan techmachtia keniuj uelis tikixnamikiskej.
19, 20. ¿Keyej moneki tiktauelitaskej tein amo kuali?
19 Keman tikchiuaj netataujtil uan timomachtiaj Biblia, tikmatij tiktasojtaskej tein kuali, uan no, tiktauelitaskej tein amo kuali (Sal. 97:10). No semi techpaleuia maj titanemilikan itech ouijkayomej tein techualkuilis komo tikchiuaj tein amo kuali (Sant. 1:14, 15). Nochi nejin techpaleuis maj amo techyolnotsa tein Satanás ika kineki techuetsiltis, ta maj tikixnamikikan.
20 ¡Tikteltasojkamatiliaj Jiova porin techpaleuia maj ueli tikixnamikikan itamekauilis Satanás! Ika iespíritu, iTajtol uan inechikol, Dios techpaleuia maj amo tiuetsikan itech “chikaualis den amokuali” (Mat. 6:13). Itech okse tamachtilis tikitaskej ome tamanok tamekauilis tein Satanás kitekitiltia, tein ika kineki kinuetsiltis itekitikauan Jiova.
[Tajtolmelaualis]
^ párr. 13 Se taman tein tel tapaleuis, komo itech Youak keman Taueyichiuaj kemej Kalyetouanij, momachtiaj iniuan amaix Lo que los jóvenes preguntan. Respuestas prácticas (volumen 2) itech recuadro “Estrategia contra la presión de grupo”, tein moajsi itech página 132 uan 133.
[Inetajtaniluan tamachtilis]
[Taixkopin itech página 24]
Komo amo timoyekpiaj ika tein tikijtouaj, uelis titatikuiltiskej itech nechikol
[Taixkopin itech página 27]
Ximoijkuanili tein kikuejmoloua motanemilil uan mitsonpechijtok
