“Nejua niyetok mouan”

“Miakej tatemoskej, uan motelmiakilis taixmatilis tein melauak.” (DAN. 12:4)

¿TONI TIONTANANKILISKIA?

¿Keniuj momoyauani “taixmatilis tein melauak” itech totonaluan?

¿Keniuj motelmiakilianij akin kiseliaj tamachtilis tein melauak?

¿Toni tapaleuiani maj motelmiakili taixmatilis tein ajsitok?

1, 2. 1) ¿Toni kinextia ke Jesús yetok iniuan imomachtijkauan axkan uan no yetos iniuan satepan? 2) Kemej kijtoua Daniel 12:4, ¿toni kipiaskiaj akin momachtiskiaj Biblia ika miak nejmachkayot?

XIONMONEMILI ke tionyetokya itech Xochital. Mojmostaj keman tionmeua kuali tionmomachilia uan tikontelneki tikonchiuas miak taman itech nejon tonal. Amo teyi mitsonkokouaok porin amo onkakok kokolismej. Senkis kuali tiontachia, tiontakaki, tiontajnekui, tiontayekoua uan tikonmachilia tein tikonmatoka. Semi tionchikauak, mitsonyolpaktia tekit tein tikonchiua, tikonpia miakej motasojikniuan uan amo teyi ika tionmotekipachoua. Yejua nejin tatiochiualismej tein uelis tikonpias keman taixyekantos iTekiuajyo Dios. Cristo Jesús, Tekiuaj akin kiixtalijkej, kintatiochiuis taltikpakneminij uan kinmachtis tein Jiova kijtoua.

² Dios yetos iniuan itekitikauan tein amo kikauaj, keman yejuan kinmachtiskej oksekin taltikpakneminij tein melauak. Tein melauj, yejuatsin uan iKonetsin yetonij iniuan itatojtokakauan itech miak xiujmej. Achto ke Jesús yaskia iluikak, kinyekiluij imomachtijkauan ke yetoskia iniuan (xikonixtajtolti Mateo 28:19, 20). Uelis tikchikauaskej totakuaujtamatilis itech nejon netenkaualis, komo tikitaj seki tajtolmej tein Daniel achtook kijtojka ijkon kemej Dios kimatiltij, itech ne uejkauj altepet Babilonia, panoua 2,500 xiujmej achto. Keman ika tajtoj “tonalmej keman ejkos tamilis”, tein axkan ompa tinentokej, tanauatijkej Daniel kijkuiloj: “Miakej tatemoskej, uan motelmiakilis taixmatilis tein melauak” (Dan. 12:4). Tajtol hebreo tein nikan mokepa kemej “tatemoskej”, kiteajsikamatiltia ke kiitaj teisa ika nejmachkayot. Yejua ika, akin momachtiskiaj ika nejmachkayot tein kijtoua Biblia, kipiaskiaj taixmatilis tein melauak, oso ajsitok, tein kitemaka iTajtol Dios. Tein kijkuiloj Daniel no kinextia ke miakej kipiaskiaj  nejin taixmatilis. Uan no motelmiakiliskia, tein kijtosneki ke motelmoyauaskia uan amo ouij se kiajsiskia. Ijkon kemej tikitstiyaskej keniuj mochiujtok tein moijtojka, no tikitaskej ke Jesús yetok axkan iniuan imomachtijkauan uan Jiova senkis uelis kichiuas ijkon kemej motenkauak.

MOTEIXMATILTIA “TAIXMATILIS TEIN MELAUAK”

3. ¿Toni panok ika “taixmatilis tein melauak” satepan ke momikilijkej tatitanilmej?

³ Keman tatitanilmej momikilijkej, tamachtilis tein amo melauak, tein Pablo kijtojka ke onkaskia, tel ijsiujka momiakilij uan momoyauak kemej yeskia tit (Hech. 20:28-30; 2  Tes. 2:1-3). Itech miak xiujmej tein kisentokakej, taltikpakneminij nion tepitsin kipiayaj “taixmatilis tein melauak”, nion tein kijtouayaj kitojtokaj Cristo. Maski kijtouayaj kineltokaj tein kijtoua Biblia, tayekananij itech taneltokalis kimoyaujkej tamachtilis tein amo melauak, “tanextililisme den ualeutok imako ne amokuali Satanás”, tein ika kichiuaj maj amo kuali ika motajto Dios (1  Tim. 4:1). Ika nejon kichiujkej maj taltikpakneminij amo yekmelauj kiixmatinij Dios. Seki taman tein amo melauak yejua nejin: tamachtijkej ke eyin mosenchiuaj sayoj se Dios, ijkuak aksa momikilia kisa teisa tein kisentoka yoltok uan sekin tajyouitij miktan kampa nochipa chichinaujtokej.

4. ¿Keniuj peuak kitemouaj “taixmatilis tein melauak” seki itatojtokakauan Cristo, kemej itech xiuit 1870?

⁴ Sayoj ke, ompakauin itech xiuit 1870, kemej 40 xiujmej achto ke peuaskia ‘itamian tonalmej’, sekin itatojtokakauan Cristo tein yolmelaujkej, akin nemiaj Pensilvania (Estados Unidos), mosentilijkej uan momachtijkej Biblia ika nejmachkayot uan kitemojkej “taixmatilis tein melauak” (2  Tim. 3:1). Yejuan motalilijkej tokayit Momachtianij ika Biblia, uan amo poujtoyaj iniuan “taixmatini” akin Jiova kintatilij nejon taixmatilis, ijkon kemej Jesús kijtojka (Mat. 11:25). Yejuan katkaj yolyemankej tein yekmelauj kinekiaj kichiuaskej itanejnekilis Dios. Ika miak nejmachkayot, kiixtajtoltijkej Biblia, moixejekoltijkej, itech tanemilijkej tein momachtijkej uan kitataujtijkej Dios maj kinyekanani. No kiyekitakej tajkuilolmej tein kipia Biblia, uan iuan kiitakej tein kijkuilojkaj oksekin akin no kitemojkaj tamachtilis tein melauak. Nejon Momachtianij ika Biblia, yolik kiajsikamattiyajkej tamachtilis tein miak xiujmej eujtoya.

5. ¿Keyej kikixtijkej seki amatsitsin tein motokaytiayaj The Old Theology (Uejkauj tamachtilis ika Dios)?

⁵ Maski Momachtianij ika Biblia kintelyolpaktiaya tein momachtijtiyayaj, amo moueyichiujkej ika nejon taixmatilis tein kiselijtoyaj, nion kiteiluijtinemiaj ke kiajsikej teisa yankuik (1  Cor. 8:1). Okachi kuali, kikixtijkej seki amaixmej tein motokaytiayaj The Old Theology (Uejkauj tamachtilis ika Dios) porin kinekiaj maj oksekin kiixmatinij tamachtilis tein moajsi itech Biblia. Yekinika amatsin kinpaleuij “maj momachtikan Biblia, uan nejon kinpaleuiskia maj kiixtopeuakan tamachtilis tein amo melauak tein taltikpakneminij tamachtiayaj, uan maj kiselianij uejkauj tamachtilis tein toTekotsin uan itatitaniluan kitemakakej” (The Old Theology, tapoual se, metsti abril xiuit 1889, página 32).

6, 7. 1) Ompakauin itech xiuit 1870 uan hasta axkan, ¿toni tamachtilismej techpaleuiani Jiova maj tikajsikamatikan? 2) ¿Toni tamachtilis okachi mitsonyolpaktij keman tikonajsikamatik?

⁶ Itech nejon xiujmej uan hasta axkan, tikajsikamatinij tel miak tamachtilismej tein melaujkej uan kualtsitsin. * Keman timomachtiaj tein melauak, amo sayoj tikixmatij teisa, ta timomachtiaj miak taman tein semi techyolpaktia uan techpaleuia maj tikpiakan se kuali nemilis. No techmaka yolpakilis uan se nechialis, techpaleuia maj tikixmatikan Jiova uan itanejnekilis. Techmelauilia toni tekit kipia Jesús,  keyej ualajka nikan taltikpak, keyej momikilij, uan toni kichiujtok axkan. Nejin kualtsitsin tamachtilismej techmatiltia keyej kikaua Dios maj onka tein amo kuali, keyej timomikiliaj, keniuj moneki tikchiuaskej netataujtil uan keniuj uelis yekmelauj tiyolpakiskej.

⁷ Axkan tikajsikamatij miak taman tein achtook moijtojka uan ‘eujtoyaj’ itech miak xiujmej, uan mochiujtokya itech nejin tonalmej keman ejkos tamilis (Dan. 12:9). Itech nochi Biblia moajsi miak taman tein achtook moijtojka, uan okachiok kampa ika tajtoua Jesús uan amaix Apocalipsis. Jiova no techmatiltiani tein ne uejkauj mochiuak uan amo uelik tikitakej, kemej ijkuak Jesús mochiuak tekiuaj, neteuilis tein mochiuak iluikak uan keman kiualpantamotkej Satanás nikan taltikpak (Apo. 12:7-12). Dios no techpaleuia maj tikajsikamatikan tein kemaj tikitaj. Techmatiltia keyej onkak neteuilis, talolinilis, kokolismej tein ijsiujka momoyaua, keyej tasojti takual uan keyej moajsij taltikpakneminij tein amo yolkualmej, akin kichiuaj maj nejin tonalmej semi ouijkej uan maj onka “ueyi tajyouilis” (2  Tim. 3:1-5; Luc. 21:10, 11).

8. ¿Akoni tikueyichiuaj porin techpaleuia maj tikajsikamatikan tamachtilis tein melauak?

⁸ Tejuan timomachiliaj kemej tein Jesús kiniluij imomachtijkauan: “Tatiochiualme de Dios [...] nochi nekes ten kitaj nochi chiualisme ten namejuan axkan nankitstokke. Pero no namechilia ke miakke ne uejkau tanauatiani uan miakke uejueyi chiuanimej de Dios kiyolnejnekiaj kitaske in chiualisme ten namejuan axkan nankitstokke pero yejuan amo keman kitakke. Uan [...] kiyolnejnekiaj kikakiske in Tajtoltsin ten namejuan axkan nankikaktinemij. Pero yejuan amo keman kikakke” (Luc. 10:23, 24). Tiimomachtijkauan Jesús tikueyichiuaj Jiova porin techkaua maj tikitakan uan maj tikakikan nochi nejon, uan semi tiktasojkamatiliaj maj techtitaniliani tapaleuijkej oso iyektikatsin espíritu tein ‘techyekantiu para timomachtiskej ika nochi tanextililisme ten melau’ (xikonixtajtolti Juan 16:7,  13). Yejua ika, maj tiktasojtakan taixmatilis tein melauak uan maj tikinmachtikan oksekin ika miak pakilis.

MIAKEJ KISELIAJ “TAIXMATILIS TEIN MELAUAK”

9. ¿Toni tayoleualis kichiuak nejin amaix itech tapoual abril xiuit 1881?

⁹ Itech metsti abril xiuit 1881, nejin amaix keman ayamo kiajxitiaya ome xiuit ijkuak peuak mokixtia, tayoleuak maj onkanij 1,000 tanojnotsanij. Kijtouaya ijkon: “Nochin akin nanueliskej nankikuiskej maski sayoj tajko nanmotiempo itech itekiyo toTajtsin, tiknekij tamechiluiskej [...] nejin: xiyakan itech uejueyi altepemej oso xolalkonemej uan xitekitikan kemej colportores oso tanojnotsanij uan xikintemokan kampa yeski nochin taneltokanij yolmelaujkej. Miakej kitasojtaj Dios, sayoj ke amo kipiaj taixmatilis ajsitok; yejua ika xikintemokan uan xikinmachtikan maj yekmelauj kiixmatikan Dios uan tein kijtoua iTajtol”.

10. ¿Keniuj tanankilijkej miakej keman kiixtajtoltijkej ke motayoleuaya maj moajsinij 1,000 tanojnotsanij tein tonal ajsitok tekitiskiaj?

¹⁰ Nejin tayoleualis kinextij ke Momachtianij ika Biblia kiajsikamatiaj ke tein yekmelauj itatojtokakauan Cristo motelnekia kitetapouiskej kuali tanauatilmej. Ijkuak tayoleujkej maj onkanij 1,000 tanojnotsanij tein tonal ajsitok tekitiskiaj, kinextijkej ke takuaujtamatiaj ke miakej kiseliskiaj nejon tayoleualis, porin keman monechikojkej amo ajsik tapoual tein kiixtalijkaj. Sayoj ke, ijkuak kiixtajtoltijkej se amatsin oso se revista, miakej kiajsikamatkej ke yejua tein melauak uan ika miak pakilis kiselijkej tayoleualis. Kemej neskayot, itech xiuit 1882, keman se takat kayot Londres kiixtajtoltij se amaix tein axkan moixmati kemej Tanejmachtijkej uan se folleto tein kikixtijkej Momachtianij ika Biblia, kijkuiloj: “Uelis nannechiluiskej keniuj nitanojnotsas uan toni niktetapouis, uan ijkon uelis nikchiuas tekit tein Dios kineki maj mochiua”.

11, 12. 1) ¿Keyej uelis tikijtoskej ke tanojnotsanij ne achtopa no kinekiaj kinchiuaskej imomachtijkauan Cristo kemej tejuan? 2) ¿Keniuj tanojnotsanij kipeualtiayaj nechikolmej oso “clases”?

 ¹¹ Itech xiuit 1885 moajsiaj kemej 300 Momachtianij ika Biblia tein katkaj colportores (oso taxelouanij, kemej satepan kinixmatkej). Nejin tokniuan no kinekiaj kinchiuaskej imomachtijkauan Jesucristo, ijkon kemej axkan tikchiuaj. Sayoj ke taman katka kemej kichiuayaj tekit. Axkan, tein okachi tikchiuaj, tikinmachtiaj ika Biblia sejse taltikpaknenkej uan satepan tikyoleuaj akin momachtijtok maj youi nechikolmej tein tikpiaj. Itech nejon tonalmej, tanojnotsanij kimoyauayaj amaixmej uan satepan kinsentiliayaj akin kuali tanankilijkaj uan kinsenmachtiayaj ika Biblia. Ijkon kipeualtiayaj nechikolmej tein kitokaytiayaj “clases”.

¹² Kemej neskayot, itech xiuit 1907, seki tanojnotsanij kiixtalijkej itech se altepet kintemoskej akin kipiayajya semej amaixmej tein motokaytiayaj La Aurora del Milenio (Ipeujyan Mil Xiuit), tein no motokaytiayaj Estudios de las Escrituras (Nemachtil ika iTajtol Dios). Nejin amaix kitematiltij: “[Akin kiuelkakkej] tamachtilis kinyoleujkej maj yakan se nechikol tein mochiuak ichan semej tein kinekiaj momachtiskej. Itech nochi tonal domingo, [tanojnotskej] ika kinmachtij itanejnekilis Dios tein kinpialia taltikpakneminij, uan se domingo satepan kinyoleuak maj kisentokakan kipiakan nejon nechikolmej”. Itech xiuit 1911 mopatak kemej kichiuayaj tekit. Itech nochi Estados Unidos uan Canadá, 58 takalpanouanij kitemakayaj tanojnotsmej, uan kintajtaniayaj inintokay uan kani nemiaj akin yekinika yayaj nechikolmej. Satepan kinxejxelouayaj uan kiixtaliayaj akoni ichan mosentiliskiaj uan ijkon kipeualtiayaj okseki nechikolmej oso “clases”. Itech xiuit 1914, itech nochi taltikpak moajsiaj 1,200 ininnechikoluan Momachtianij ika Biblia.

13. ¿Toni tikonmoujkaita ijkuak tikonkaki kani momoyauakya “taixmatilis tein melauak” itech totonaluan?

¹³ Axkan moajsij kemej 109,400 nechikolmej itech nochi taltikpak, uan tekitij kemej 895,800 precursores. Ajsitokya chikueyi millones tein kiselijkejya “taixmatilis tein melauak” uan kichiuaj kemej momachtiaj (xikonixtajtolti Isaías 60:22). * Okachiok se kimoujkaita nejin tapoualmej keman tikitaj ke Jesús kijtojka ke imomachtijkauan ‘kintauelitaskiaj’ porin kineltokaj itokay uan kinixnamikiskiaj, kintsakuaskiaj uan kinmiktiskiaj (Luc. 21:12-17). Maski Satanás, iamokuali ejekauan uan taltikpakneminij kinixnamikij itekitikauan Jiova, yejuan kisentokaj kinpaleuiaj taltikpakneminij maj mochiuakan imomachtijkauan Jesús ijkon kemej kinnauatijtokej. Axkan tanojnotsaj “tech nochi senmanauak”, kampa takauani hasta kampa taseseya, uan itech xolalkonemej kampa okachi uejka (Mat. 24:14). Amo keman ueliskiaj kichiuaskiaj nejon komo amo kipiaskiaj inepaleuil Dios.

MOTELMIAKILIA “TAIXMATILIS TEIN MELAUAK”

14. ¿Keniuj ika amaixmej motelmoyauani “taixmatilis tein melauak”?

¹⁴ “Taixmatilis tein melauak” motelmiakiliani  porin tel miakej tanojnotsanij kitetapouiaj kuali tanauatilmej, uan no tapaleuia amaixmej tein mokixtiaj. Itech metsti julio xiuit 1879, Momachtianij ika Biblia yekinika kikixtijkej nejin amaix, tein itech nejon tonalmej kitokaytijkej Zion’s Watch Tower and Herald of Christ’s Presence (Uejkapan Tepamit kampa Motajpia tein iaxka Sión uan Kitematiltia iYetolis Cristo). Yejuan tajtankej okseko maj kinkixtilikan 6,000 amaixmej itech tajtol inglés. Charles Taze Russell, akin kipiaya 27 xiujmej, kiixpejpenkej maj taixyekana itech tajkuilolis, uan no kinixtalijkej makuil Momachtianij ika Biblia tein kipiayaj kuali uikalis iuan Dios tein tapaleuiskiaj itech nejon tekit. Axkan, amaix Tanejmachtijkej mokixtia itech 195 tataman tajtolmej. Nejin yejua tein okachi momoyaua itech taltikpak uan mokixtiaj 42,182,000 amaixmej. Uan ojpatika tein no motelmoyaua yejua amaix ¡Despertad!, uan mokixtiaj 41,042,000 amaixmej itech 84 tataman tajtolmej. Uan no, nochin xiujmej mokixtiaj kemej 100 millones libros uan Biblias.

15. ¿Kani mokui tomin tein ika mochijchiuaj amaixmej tein tiktekitiltiaj?

¹⁵ Nejin ueyi tekit mochiua ika tomin tein kitemakaj ika nochi ininyolo (xikonixtajtolti Mateo 10:8). Akin taixyekanaj kampa kichijchiuaj amaixmej semi kimoujkaitaj nejin, porin kimatij ke teposmej tein kitekitiltiaj, amat, tapal uan okseki taman tein moneki, semi patiyojkej. Se tokniuj akin kikoua nochi taman tein ika kikixtiaj amaixmej ompa Betel kijtoj: “Keman takamej tein techtanamakiltiaj kikalpanouaj Betel kampa mochijchiua amaixmej, kimoujkaitaj maj sayoj ika tomin tein taltikpakneminij kitemakaj ika nochi ininyolo, ueli tikpiakan teposmej tein okachi yankuikej uan tein kikixtia tel miak amaixmej. No kimoujkaitaj maj moajsikan tel miakej tekitinij telpochmej tein moita ke tel yolpakij”.

TAIXMATILIS TEIN KITEMAKA DIOS PEXONIS ITECH TALTIKPAK

16. ¿Keyej momoyauani “taixmatilis tein melauak”?

¹⁶ “Taixmatilis tein melauak” motelmiakiliani porin Dios kineki maj “nochi in taltikpakuani ma makisakan [...] [uan maj] kajsikamatik[an] in melauak Tajtoltsin de Dios” (1  Tim. 2:3, 4). Yejuatsin kineki maj taltikpakneminij kiixmatikan tamachtilis tein melauak uan ijkon uelis kiueyichiuaskej kemej kiyolpaktia uan kiseliskej itatiochiualis. Ika tanojnotsalis, Jiova kinsentiliani tokniuan taixpejpenalmej. Uan no kinsentilijtok “uel miak tagayot” tein ualeuaj itech “nochi tataman paísme uan de nochi tataman tagayot, uan [...] nochi tataman pueblojme uan [...] nochi tataman tajtolisme” tein kichiaj nemiskej nochipaya nikan taltikpak (Apo. 7:9).

17. ¿Toni technextilia keman tikitaj ke motelmiakilianij akin kiueyichiuaj Dios tein melauak?

¹⁷ Itech 130 xiujmej tein panouanij semi momiakilianij akin kiueyichiuaj Dios tein melauak. Nejon senkis kinextia ke Dios uan Jesucristo, Tekiuaj akin kiixtalij, yetonij iniuan itatojtokakauan uan kinyekananij, kinyekpianij, kinsentilianij uan kinmachtianij. Uan nejin no kiyeknextia ke Jiova kichiuas ijkon kemej motenkaua. “Itech taltikpak pexontos itaixmatilis Jiova kemej at kipexontia ueyiat.” (Isa. 11:9.) ¡Tel miak tatiochiualismej kiseliskej taltikpakneminij itech nejon tonalmej!

[Tajtolmelaualismej]

[Inetajtaniluan tamachtilis]

[Taixkopin itech página 14]

Yekinika Momachtianij ika Biblia katkaj yolyemankej uan yekmelauj kinekiaj kichiuaskej itanejnekilis Dios

[Taixkopin itech página 15]

Jiova kitasojkamati keman timochikauaj titapaleuiskej maj momoyaua “taixmatilis tein melauak”