Uelis timotokiskej iuan ‘Akin kikaki netataujtil’

MIAKEJ akin kijtouaj kineltokaj ke nemi se Dios amo uelij kimelauaj keyej ijkon kijtouaj. Amo no uelij kimelauaj keyej taneltokalismej kichiuaj tein amo kuali oso keyej Dios kikaua maj onka tajyouilis. Tein melauj, kitataujtiaj akin amo kiixmatij.

Sayoj ke, uelis timotokiskej iuan ‘Akin kikaki netataujtil’. Uelis titakuaujtamatiskej iuan Dios komo tikixmatij, uan nejon techolinis maj tiktasojtakan uan tikpoujkaitakan. Kemaj, takuaujtamatilis tein melauak se kiselia ika tein moita (Hebreos 11:1). Komo tejuatsin tionmomachtia akoni yekmelauj Dios, uelis tikonixmatis uan tikonnojnotsas kemej motasojikniuj. Xikonita tein kijtouaj sekin akin kichiuayaj netataujtil maski omeyolouayaj ox nemia se Dios.

▪ Patricia (akin ika titajtojkej itech yekinika tamachtilis). “Se tonal nimoajsia iniuan majtakti notasojikniuan uan peuak ika tajtouaj taneltokalis. Nikintapouijka ke se tonal, se siuat akin itaixpantijkauj Jiova yajka no kalijtik, sayoj ke nikisak, porin amo niknekia nikakis tein yejua uan nopopaj, akin amo kineltokaya Dios, monojnotsaskiaj. Semej notasojikniuan kijtoj: ‘Itaixpantijkauan Jiova xa kijtouaj tein melauak’.

”Okse ichpoch kijtoj: ‘¿Keyej amo tiyouij semej ininnechikol uan ijkon tikmatiskej?’. Uan yejua nejon tikchiujkej. Maski amo teyi tiknekiaj tikneltokaskej, sekimej tiksentokakej tiyajkej sayoj porin itaixpantijkauan Jiova tel kualtakamej.

”Sayoj ke se tonal domingo nikakik se taman tein kichiuak maj nikpata notanemilil. Tanojnotskej kimelauak keyej tajyouiaj taltikpakneminij. Ompa nimomachtij ke yekinika takat amo kipiaya tajtakol, sayoj ke amo tatakamatik uan yejua ika kinpanoltilij tajtakol uan mikilis nochi ikoneuan. No kimelauak keyej Jesús monekik kitemakas inemilis uan ijkon oksepa kinmakas taltikpakneminij tein yekinika takat kipoloj (Romanos 5:12, 18, 19). * Ijkuak, nochi nikajsikamatik. No nikmatik ke moajsi se Dios tein kitekipachoua tein techpanoua. Niksentokak nimomachtij Biblia uan nejon nechpaleuij maj nikajsikamati ke uelis niktataujtis se akin yekmelauj nemi.”

▪ Allan (akin no ika titajtojkej itech yekinika tamachtilis). “Se tonal, itaixpantijkauan Jiova ajsikej kalijtik, uan nonamik kinpanoltij porin kiiluijkej ke onkas se nemilis nochipaya uan kiuelkakik. Nitelkualanik, yejua ika nikuikak nonamik kampa takualchiua uan nikiluij: ‘Amo ximokaua maj mitskajkayauakan. ¡Amo melauak tein kijtouaj!’.

 ”Yejua nechnankilij: ‘Komo ijkon, xiyouj xikinajsiti uan xikinilui kani mopolojtokej’.

”Amo teyi uelik niknextij. Sayoj ke yejuan katkaj kualtakamej nouan, uan nechkauilijkej se amaix tein kimelauaya ox nemilis iselti peuak oso aksa kichijchiuak. Amaix kuali kimelauaya nejon, yejua ika niknekik okachi nikixmatis Dios. Peuak nimomachtia Biblia iniuan itaixpantijkauan Jiova, uan niman nikitak ke taneltokalis tel taman katka kemej nejua nikitaya. Kemej okachi nikixmatia Jiova, okachi nikmatia toni nikijtos itech nonetataujtiluan. Nikmatia ke monekia nikpatas seki taman itech nonemilis, yejua ika niktajtanij maj nechpaleui. Senkis nikmati ke Jiova nechnankilij.”

▪ Andrew (akin nemi Inglaterra). “Maski amo nimokauaya maj kipatakan notanemilil uan nikteluelitaya tein momachtiaj tamatinij, nikneltokaya ke nemilis iselti peuak porin moijtouaya ke melauak ijkon mochiuak. Amo niknekia nikneltokas ke nemi se Dios porin mochiujtok miak taman tein amo kuali.

”Maski ijkon, kemansa niknemiliaya: ‘Komo moajsi aksa ne iluikak, niknekiskia niktajtanis keyej tinemij uan keyej tel miakej  kichiuaj tein tel amo kuali uan onkak neteuilismej’. Keman nikpiaya kuejmolmej, kemansa nikchiuaya netataujtil porin niknekia nepaleuil, sayoj ke amo nikmatia akoni niktataujtijtoya.

”Satepan, nonamik kimakakej se amat tein kichijchiujkej itaixpantijkauan Jiova tein itokay ¿Podrá sobrevivir este mundo? Yejua nejon tein nochipa nimotajtaniaya. Nejon amat nechpaleuij maj nimotajtani ox monekia nikitas toni kijtoua Biblia. Satepan, se tonal keman amo nitekitik, nechmakakej amaix La Biblia... ¿la Palabra de Dios, o palabra del hombre? Keman nikitak ke tein kijtoua Biblia uan tein momachtiaj tamatinij amo moixnamikij, niknekik okachi nimomachtis. Yejua ika, nikauak maj se itaixpantijkauj Jiova nechmachtiani ika Biblia. Keman nikmatik toni tanejnekilis kipia Dios, kichiuak maj nikita kemej se akin yekmelauj nemi, se akin ueliskia iuan nimotataujtis ika takuaujtamatilis.”

▪ Janet (akin kimachtijkej kemej protestante itech altepet Londres). “Nikitaya ke onkak miak tajyouilis uan taneltokalismej amo monejnemiltiayaj kemej tamachtia Biblia, yejua ika nikauak taneltokalis. Uan no, amo niyayaok tamachtiloyan. Peuak niktsotsona guitarra uan nimokuikatia, ijkon niktania tomin. Ijkuak nikixmatik Patrick. Yejua moskaltij kemej católico uan amo no taneltokayaok kemej nejua.

”Tinemiaj itech se kali kampa taseltijkan, iniuan okseki telpochmej akin amo yayajok tamachtiloyan, uan yejuan kiuelitayaj kiixmatiskej taneltokalismej tein onkak ne Asia. Maski tel youakya katka, tiksentokayaj timonojnotsayaj keyej tinemij nikan taltikpak. Maski Patrick uan nejua amo tikneltokayaj ke nemi se Dios, timonemiliayaj ke monekia onkas se “chikaualis” tein kichijchiuak nochi.

”Satepan timokaltalitoj ompakauin itech altepet Inglaterra porin tiktemotoj tekit kemej tatsotsonanij, uan ompa yolik tokonetsin. Se youak, tokonetsin kokolispeuak, uan peuak niktataujtia se Dios akin nikijtouaya ke amo nikneltokaya. Satepan, kemej Patrick uan nejua amo kuali timouikayajok, nikaujteuak uan nikuiteuak nokonetsin. Oksepa nikchiuak netataujtil porin niknekia nepaleuil, nikchiaya maj aksa nechkakini. Amo nikmatia ke Patrick no ijkon kichiuak.

”Keman tiotakik, ome itaixpantijkauan Jiova kikalpanotoj Patrick uan kinextilijkej itech Biblia seki kuali tayolmajxitilis. Yejua nechnotsak uan nechtajtanij ox niknekiskia maj timomachtikan Biblia iniuan itaixpantijkauan Jiova. Niman tikajsikamatkej ke komo tiknekiaj tikyolpaktiskej Dios, monekia timonamiktiskej. Tikmouiliayaj timonamiktiskej, porin amo kualtsin timouikayaj.

”Okachi tiknekiaj tikmatiskej tein Biblia achtook kijtojka, uan keniuj mochiua ijkon kemej moijtoua, keyej titajyouiaj uan toni iTekiuajyo Dios. Yolik tikajsikamatkej ke Dios kitekipachoua tein techpanoua, uan kemej tiknekiaj tikchiuaskej tein kineki, timonamiktijkej. Tamatilis tein kitemaka Dios techpaleuij maj kuali tikiniskaltikan eyi tokoneuan. Senkis tikmatij ke Jiova kikakik tonetataujtiluan.”

Xikonita ox yekmelauj nemi se Dios

Patricia, Allan, Andrew uan Janet, ijkon kemej tel miak taltikpakneminij, amo mokaujkej maj kinkajkayaua taneltokalis tein amo melauak. Ta okachi kuali, momachtijkej keyej kikaua Dios maj onka tajyouilis. Kemej kitemojkej toni tamachtia Biblia, axkan takuaujtamatij ke Jiova kemaj kikaki netataujtilmej.

¿Tikonuelitaskia tikonmatis ox yekmelauj nemi Dios? Itaixpantijkauan Jiova ika miak pakilis mitsonpaleuiskej xikonmati akoni yekmelauj Dios uan keniuj uelis tionmotokis iuan ‘Akin kikaki netataujtil’ (Salmo 65:2).

[Tajtolmelaualis]

[Tanemilil itech página 10]

“Keman nikmatik toni tanejnekilis kipia Dios, nechpaleuij maj nikita kemej aksa akin yekmelauj nemi, uan akin ueliskia iuan nimotataujtis ika takuaujtamatilis”

[Taixkopin itech página 9]

Takuaujtamatilis tein melauak se kiselia ika tein moita, uan komo tiknekij tikseliskej moneki emaj tiknejnekikan yekmelauj tikixmatiskej Dios