Miakej kinemiliaj ke tein Biblia kitokaytia Tonal keman Motaixkomakas, yeski kemej moita itech taixkopin tein yetok yekmakopa. Kinemiliaj ke tel miakej mosentiliskej iixpan Dios uan kinixkomakaskej ika tein kichiujkej. Sekin kintatiochiuiskej ika se nemilis ne iluikak, uan oksekin kintitaniskej maj tajyouitij miktan. Sayoj ke Biblia kinextia ke itech Tonal keman Motaixkomakas tamis tein amo kuali nikan taltikpak (Salmo 96:13). Jesús yejua Tamelaujkej tein Dios kiixtalij maj kinualkuili taltikpakneminij tein kuali. (Xikonixtajtolti Isaías 11:1-5 uan Hechos 17:31.)

Yekinika takat Adán, kiixnamikik Jiova Dios. Yejua ika, nochin ikoneuan tajtakouaj, tajyouiaj uan momikiliaj (Romanos 5:12). Sayoj ke Jesús oksepa kinmakas nemilis tel miakej tein momikilijkej, uan ijkon kiyektalis tein Adán kichiuak. Amaix tein kipia Biblia, Apocalipsis oso Revelación, kinextia ke nejon mochiuas keman Jesucristo taixyekantos mil xiuit. (Xikonixtajtolti Apocalipsis 20:4, 11, 12.)

Akin oksepa nemiskej kinixkomakaskej, sayoj ke amo ika tein kichiujkej achto ke momikiliskiaj, ta ika tein kichiuaskej satepan ke moteixmatiltis tein kiualkuis tajkuilolmej tein moijtoua itech Apocalipsis capítulo 20 (Romanos 6:7). Tatitanil Pablo kijtoj ke oksepa nemiskej “amo sayo in yolkualime. Ta, no nekes ten amo yolkualime” uan uelis momachtiskej tein kijtoua Dios. (Xikonixtajtolti Hechos 24:15.)

Miakej akin momikilijkej uan amo uelik kiixmatkej Jiova nion kitekitilijkej, oksepa nemiskej uan ijkuak uelis kichiuaskej itanejnekilis. Komo ijkon kichiuaj, uelis kiseliskejya “yek nemilis nachipa”. Sayoj ke akin amo kinekiskej kitakamatiskej Dios, kiseliskej “ueyi tatelchiualis”. (Xikonixtajtolti Juan 5:28, 29 uan Isaías 26:10; 65:20.)

Keman tamisya Tonal keman Motaixkomakas tein uejkauas mil xiuit, taltikpakneminij oksepa kipiaskejya nemilis tein amo kipia tajtakol porin Jiova kichiuas kemej yekinika katka (1 Corintios 15:24-28). ¡Tel kualtsin tein kiseliskej nochin akin tatakamatiskej! Dios kimajkauas Satanás, akin tsaktos mil xiuit itech se ueyi taltekoch, uan kikauas maj kitali se tayejyekolis tein ika tamis. Satanás kitemos keniuj kichiuas maj taltikpakneminij kikauakan Jiova, sayoj ke akin kiixnamikiskej Satanás uelis nemiskej nochipaya nikan taltikpak. (Xikonixtajtolti Isaías 25:8 uan Apocalipsis 20:1, 7-9.)

Biblia ika tajtoua okse tonal keman motaixkomakas. Ijkuak ixpoliuis nochi tein mochiujtok axkan itech taltikpak. Nejin tonal ejkotiuetsis, ijkon kemej Tetsaujkakiouit itech itonaluan Noé, tein kinixpoloj nochin tein amo yolkualmej katkaj. Amo uejkaua, keman “Dios kinixpolos nochi ne taka tamouiskapoloani” oso tein amo yolkualmej, sayoj nemiskej taltikpakneminij tein ‘kichiujtoskej sayoj tein kualtsin chipaujkanemilis’. (Xikonixtajtolti 2 Pedro 3:6, 7, 13.)