1. ¿Keniuj sekin kinitaj analtekojkayomej uan keyej amo kuali nejon tanemilil?

KEMEJ tikitakej itech achto tamachtilis, sekin amo kuali kinitaj analtekojkayomej, hasta kintauelitaj. Sayoj ke akin kinemiliaj ke okachi ueyi chiuanimej ke akin nemij itech okse altepet, amo sayoj kinextiaj ke amo tapoujkaitaj, ta no ke amo kimatij tein kijtouaj. Se amaix kinextia: “Biblia tamachtia ke tataman taltikpakneminij akin moajsij nochin iknimej” (The Races of Mankind). Iknimej uelis yeski tamamej, sayoj ke kisentokaj iknimej.

2, 3. ¿Keniuj kinita Jiova akin okseko kayomej?

² Tein melauj, itech nochi uejueyi altepemej moajsij analtekojkayomej. No ijkon panok ne uejkauj itech xolal Israel, akin peuak kipiaj se kuali uikalis iuan Jiova keman mochiuak netenkaualis ika Tanauatil. Nejon Tanauatil kijtouaya seki taman tein amo ueliskiaj kichiuaskiaj analtekojkayomej, sayoj ke no kinnauatiaya israelitas maj mouikanij iniuan ika melaujkayot uan maj kinpoujkaitanij. No ijkon, akin yekmelauj tikchiuaj kemej Cristo amo tikinchikotasojtaj nion tikinchikoitaj taltikpakneminij. Tikajsikamatij ke, ijkon kemej kijtoj tatitanil Pedro, “Dios amo [kinchichikotasojta] in tagayot [...] komo yejuan kimouistiliaj Yejuatsin uan chipaukanentinemij” (Hech. 10:34, 35).

³ Kemej tikitaj, analtekojkayomej ueliaj mosentiliayaj iniuan israelitas uan kiseliayaj tein kuali. Nejin kinextia keniuj Jiova kinita akin okseko kayomej. Miak xiujmej satepan, tatitanil Pablo kijtoj: “[¿]Melau ke Totajtsin sayo Yejuatsin in Dios den pueblojuani judíos? Pues amo melau. Ta, [...] no in Dios de nochi in taltikpakuani ten amo mopouaj keme judíos” (Rom. 3:29; Joel 2:32).

4. ¿Keyej uelis tikijtoskej ke iuan “Israel tein iaxka Dios” amo moajsij analtekojkayomej?

⁴ Satepan ke Dios kichiuak yankuik netenkaualis,  yejuatsin kiixtopeuak Israel kemej se xolal taixpejpenal, uan peuak kipia se kuali uikalis iuan oloch tokniuan taixpejpenalmej tein kichiuaj kemej Cristo, akin moixmatij kemej “Israel tein iaxka Dios” (Gál. 6:16). Pablo kimelauak ke itech nejin yankuik xolal amo moita “kox se tagat yeski griego oso taka judío [...] kox in tagat kineskayotijke tech inakayo oso amo kinneskayotijke [...] oso poutinemi kampa pueblo escita [...] kox [...] takeual tanamak oso ten amo tanamak. Ta, nochi tejuan tiitaneltokakauan de Cristo [...]. Uan Yejuatsin ne techyekantinemi” (Col. 3:11). Kemej tikitaj, iniuan tokniuan taixpejpenalmej amo moajsij analtekojkayomej.

5, 6. 1) ¿Toni netajtanil uelis mochiuas keman tikitaj tein achtook moijtojka itech Isaías 61:5, 6? 2) ¿Akonimej ‘itiopixkauan Jiova’ uan “analtekojkayomej” tein moijtoua itech Isaías? 3) ¿Keniuj sentekitij yejuan?

⁵ Sayoj ke, maj tikitakan tein achtook moijtojka itech Isaías capítulo 61, tein mochiuaskia keman moajsiskiaj oloch tokniuan tein kichiuaj kemej Cristo. ¿Keyej kinextiaj versículo 5 uan 6 ke moajsiskiaj “analtekojkayomej” akin tekitiskiaj iniuan ‘itiopixkauan Jiova’?

⁶ Nejon tiopixkamej yejuan tokniuan taixpejpenalmej, akin “achtopa [...] Dios kinpankixtis ma oksepa yoltinemikan”. Yejuan “tekititinemiske keme tiopixkame itenkopaka Totajtsin Dios uan itenkopaka Cristo. Uan yejuan tayekantinemiske iuan Cristo ipan se mil xiume” (Apoc. 20:6). Sayoj ke, oksekin itatojtokakauan Cristo akin amo kikauaj Dios uan semi miakej, kichiaj nemiskej nochipaya nikan taltikpak uan amo iluikak. Yejuan akin moixmatij kemej “analtekojkayomej” uan tekitij iniuan akin yaskej iluikak. Ika miak pakilis kinpaleuiaj ‘itiopixkauan Jiova’ itech tekit tein kipiaj uan ijkon kemej yeskia ‘tameuaj inintalpan uan kintekitiliaj itech uvajtal’. Yejuan kinpaleuiaj taixpejpenalmej maj moueyichiua Jiova ijkuak tanojnotsaj uan kinmachtiaj oksekin iTajtol Dios. Ijkon, taixpejpenalmej uan ‘okseki ichkamej’ kinmachtiaj tein melauak taltikpakneminij, uan ika netasojtalis kinpaleuiaj maj kichiuakan itech ininnemilis tein momachtiaj (Juan 10:16).

7. ¿Keniuj akin tikchiuaj kemej Cristo titamatij kemej itekitikauan Dios akin nenkej ne uejkauj, kemej Abrahán?

⁷ Kemej tikitakej itech achto tamachtilis, akin yekmelauj tikchiuaj kemej Cristo tianaltekojkayomej oso titepalyetokej itech  nejin taltikpak kampa taixyekantok Satanás. No titamatij kemej itekitikauan Dios akin nenkej ne uejkauj, kemej Abrahán, akin “se rato san tepalyetinemi[a]j nikan taltikpak” (Heb. 11:13). Tikpiaj tatiochiualis kuali timouikaskej iuan Jiova kemej Abrahán, yeski tikchiaskej tinemiskej ne iluikak oso nikan taltikpak. Santiago kimelauak ke “‘Abrahán takuaujtamatik iuan Jiova uan kipouak yolmelauak’ uan kitokaytijkej ‘itasojikniuj Jiova’” (Sant. 2:23, TNM).

8. ¿Toni motenkauak Dios, uan toni kineltokaya Abrahán?

⁸ Dios motenkauak ke nochin kalyetouanij itech taltikpak, uan amo sayoj se xolal, kiseliskiaj tatiochiualis itechkopa Abrahán uan ichankauan (xikonixtajtolti Génesis 22:15-18). Maski amo niman mochiuaskia tein Dios motenkaujka, Abrahán nochipa takuaujtamatik ke mochiuaskia. Nentinemik 100 xiujmej itech se xolal uan okse iuan ichankauan, uan itech nochi nejon xiujmej kisentokak kipiak ikuali uikalis iuan Jiova.

9, 10. 1) ¿Toni techmachtia neskayot tein kikauak Abrahán? 2) ¿Toni tayoleualis uelis tikinmakaskej oksekin?

⁹ Maski Abrahán amo kimatia kanachi xiujmej monekia mochias, amo keman kikauak maj tami netasojtalis tein kipialiaya Dios uan kisentokak kiueyichiuak. Kisentokak takuaujtamatik itech netenkaualis tein Dios kitemakak, yejua ika amo kitemoj se xolal kampa mokaltaliskia nochipaya (Heb. 11:14, 15). ¿Toni techmachtia neskayot tein kikauak? Motelneki maj timotasojkamatikan ika tein tikpiaskej uan maj amo tiknemilikan ke motelneki timotomintiskej, tiktemoskej maj kuali techitakan oso tikpiaskej se kuali tekit. ¿Keyej tiktemoskej tein oksekin kinemiliaj ke se kuali nemilis ta tein onkak nikan taltikpak amo uejkaua tamis? ¿Keyej tiktasojtaskej tein onkak itech taltikpak ta amo uejkauas? Ijkon kemej Abrahán, tikchiaj se taman tein tel okachi kuali, uan ika miak pakilis tikchiaskej hasta maj mochiua tein Dios motenkaua (xikonixtajtolti Romanos 8:25).

¹⁰ Jiova kinyoleujtokok taltikpakneminij tein kayomej itech tataman altepemej maj kiselikan tatiochiualismej tein Dios motenkaua kitemakas itechkopa Abrahán uan ichankauan. Uan ‘itiopixkauan Jiova’, tokniuan taixpejpenalmej, ijkon kemej “analtekojkayomej”, okseki ichkamej, kitemakatokej nejin tayoleualis noyampa taltikpak itech panoua 600 tajtolmej.

11. ¿Toni kijtoj Salomón itech inetataujtil tein kinextia keniuj kinita Dios analtekojkayomej?

¹¹ Itech xiuit 1026 achto itech totonaluan, keman Salomón matamik templo uan kimaktilij Jiova, kichiuak se netataujtil tein techpaleuia maj tikitakan keniuj kinita Dios taltikpakneminij tein pouij itech okse altepet. Ijkon kemej Dios motenkauak iuan Abrahán, itajtoluan Salomón kinextijkej ke taltikpakneminij tein pouiaj itech nochi altepemej mosentiliskiaj uan kiueyichiuaskiaj Jiova. Yejua kijtoj: “No ijkon analtekojkayot, tein amo poui itech moxolal Israel uan yekmelauj ualeua itech se xolal tein uejka porin kikakik motokay (porin yekmelauj kikakiskej motokay tein semi ueyi uan momay tein chikauak uan keniuj timomasoujtok), uan yekmelauj ualeua uan kichiuaki netataujtil itech nejin kali, xikaki tejua itech ne iluikak, kampa tikixtalij tinemis, uan moneki tikchiuas nochi tein analtekojkayot mitstajtanis; uan ijkon nochin xolalmej itech taltikpak kiixmatiskej motokay uan mitsmoujkatokaskej ijkon kemej kichiua moxolal Israel” (1 Rey. 8:41-43).

12. ¿Keyej sekin uelis kinemiliskej ke itaixpantijkauan Jiova amo kinekij tapaleuiskej kampa nemij?

¹² Se analtekojkayot yejua akin amo  moajsi itech ialtepeuj. Uelis moijtos ke itaixpantijkauan Jiova ijkon moajsij, kampa yeski altepet nemiskej. Yekinika porin motenkaujkej kipaleuiskej sayoj iTekiuajyo Dios tein moajsi iluikak, uan iTekiuaj Jesucristo. Yejua ika, senkis amo mokalakiaj itech kuejmolmej tein onkak itech taltikpaktekiuajyot, maski oksekin kinemiliskej ke amo kinekij tapaleuiskej.

13. 1) ¿Toni techpaleuis maj amo tikitakan aksa kemej se analtekojkayot? 2) ¿Keniuj yekinika kinekia Jiova maj moitanij nochin taltikpakneminij?

¹³ Kemansa se taltikpaknenkej uelis moitas ke analtekojkayot porin taman itajtol, itachiualis, taman kemej moita uan kemej motakentia. Sayoj ke moajsi okseki taman tein nochin taltikpakneminij kipiaj maski seseko kayomej, uan yejua nejon tein okachi moneki. Yejua ika, komo aksa kinemilia ke analtekojkayomej tamamej, ijkon kinemilia porin sayoj kiita tein moita tapani. Sayoj ke ijkuak amo tikitaj tein kichiua maj tamamej, techpaleuia maj amo tikinitakan kemej analtekojkayomej. Tein melauj, komo nochin taltikpakneminij kipiaskiaj sayoj se tekiuajyot, amo akin yeskia analtekojkayot. Uan yejua nejon tein yekinika kinekia Jiova: maj tinochin tisenneminij kemej se kalyetouanij uan maj techixyekantoskia sayoj iTekiuajyo. ¿Uelis axkan mochiuas nejon?

14, 15. ¿Toni kichiuanij itaixpantijkauan Jiova senolochmej?

¹⁴ Axkan tel nemij akin kitemouaj sayoj inintanejnekilis uan kinemiliaj ke ininaltepeuj yejua tein okachi kuali. Yejua ika, techyolpaktia tikmatiskej ke moajsij akin kintasojtaj taltikpakneminij akin okseko kayomej. Sayoj ke, kemej tikmatij, semi ouij se kichiuas nejon. Ted Turner, takat akin kipeualtij tein moita itech televisión CNN, tekitik iniuan akin kiselijkej se kuali tamachtilis tein ualeuayaj itech tataman uejueyi altepemej, uan kijtoj: “Tel kuali tein nechpanok keman nikinixmatik nejin takamej uan siuamej. Amo nikinitayaok kemej analtekojkayomej, ta kemej akin tinemij itech sayoj se altepet nikan taltikpak”. Yejua ika kinnauatij itekitikauan maj amo kikuinij tajtol analtekojkayot, ta maj moijtouani ke nochin senpouiaj kemej itech sayoj se altepet”.

¹⁵ Senolochmej itaixpantijkauan Jiova itech nochi taltikpak, sayoj yejuan kinitaj taltikpakneminij akin okseko kayomej kemej Dios kinita, uan kipatanij tein kiyolmachiliayaj uan tanemilil tein kinpialiayaj. Amo kintauelitaj nion kinemiliaj ke amo uelis se takuaujtamatis iniuan, uan kinyolpaktia kiitaskej tein ueli kichiuaj uan tein kichiua maj tamamej. ¿Tikonnemiliani ke semi motelneki nejin tein mochiuani uan ke semi tapaleuia maj kuali se mouika iniuan oksekin?

16, 17. ¿Keniuj yeski nemilis keman mochiuas tein kijtoua Apocalipsis 16:16 uan Daniel 2:44?

¹⁶ Amo uejkaua, nochin akin pouij itech tataman altepemej moixnamikiskej iuan Jesucristo uan itateuijkauan akin moajsij iluikak, keman mochiuas neteuilis iuan itekiuajyo Dios. Nejon neteuilis tein ika tamisya “kitokaytia[j] ika hebreojtajtol Armagedón” (Apoc. 16:14, 16; 19:11-16). Panoua 2,500 xiujmej achto, Daniel kijtojka keniuj tamiskiaj taltikpaktekiuajyomej tein kiixnamikij itanejnekilis Dios: “Itech inintonaluan nejon tekiuanij, Dios tein nemi iluikak kitalis se tekiuajyot tein amo keman ixpoliuis. Uan nejin tekiuajyot amo panos imako okse xolal. Kikuechos uan kitalis itamilis nochi nejin tekiuajyomej, uan yejua uejkauas nochipaya” (Dan. 2:44).

¹⁷ ¿Tikonnemiliani keniuj yeski nemilis keman mochiuas nejin netenkaualis? Axkan taltikpakneminij xejxeliujtokej porin moajsij itech tataman altepemej, yejua ika onkakej analtekojkayomej. Sayoj ke satepan ke panos Armagedón, nochi nejon amo onkasok. Uan maski kisentokas moitas tein kichiua maj tamamej taltikpakneminij, nejon sayoj kinextis ke Jiova tataman tachijchiuak uan ke semi kualtsin. ¡Tel kualtsin tein tikchiaj! Yejua ika, semi kuali maj tiksentokakan timochikauakan uan ijkon tikueyichiuaskej uan tikpoujkaitaskej Jiova akin tachijchiuak.

18. ¿Toni kinextia ke itaixpantijkauan Jiova amo moitaj kemej analtekojkayomej?

¹⁸ ¿Yekmelauj uelis mochiuas nejon? Kemaj. Moajsi miak taman keyej uelis tikneltokaskej ke ijkon mochiuas. Tein melauj, axkanya itaixpantijkauan Jiova amo moitaj kemej analtekojkayomej. Kemej neskayot, tekit tein mochiuaya itech seki sucursales kipanoltijkej itech sucursal tein moajsi itech okse ueyi altepet, porin ijkon onkaskia okachi kuali taixyekanalis, uan tanojnotsalis okachi kuali mochiuaskia (Mat. 24:14). Keman kiixtalijkej kichiuaskej nejon, amo kitojtokakej tanemilil tein kinpialiaj akin okseko kayomej, sayoj ke kemaj kipoujkaitakej inintanauatiluan tekiuanij. Nejin no kinextia ke Jesucristo, Tekiuaj akin Jiova kiixtalij, kinpaleuijtok itaixpantijkauan Jiova maj amo xejxeliujtokan porin kayomej itech tataman altepemej. Uan amo uejkaua senkis ‘tatanis’ (Apoc. 6:2).

19. Tamachtilis tein melauak, ¿toni tapaleuiani maj mochiua?

¹⁹ Tiitaixpantijkauan Jiova tikayomej itech miak uejueyi altepemej uan titajtouaj tataman tajtolmej, sayoj ke tinochin timochikauaj tikseliskej tamachtilis tein melauak, uan nejon techpaleuia maj amo tixeliujtokan, ta maj tisentekitikan (xikonixtajtolti Sofonías 3:9). Maski tinemij itech nejin taltikpak kampa Satanás taixyekantok, senkis amo tipouij ompa. Tikitaskej ke axkan tisenpouij kemej se kalyetouanij maski uejuejka tikayomej, kinextia ke itech yankuik taltikpak amo onkas analtekojkayomej. Uan ijkuak, nochin akin nemiskej, kiitaskej ke melauak tajtolmej tein ixnesi itech amaix tein yekinika tikijtojkej: “Biblia tamachtia ke tataman taltikpakneminij akin moajsij nochin iknimej” (The Races of Mankind).