1. ¿Itech toni tanemiliaj miakej keman kikakij tajtol tekitikej?

¿ITECH toni tiontanemilia ijkuak tikonkaki tajtol tekitikej? Miakej tanemiliaj itech se taltikpaknenkej akin amo ueyichiujkej, akin amo uelis kichiuas tein kinekis uan kiteltekitiltiaj, sayoj ke amo kiselia tein kuali. Yejua ika miakej amo kinekij mochiuaskej itekitikauj aksa.

2, 3. 1) ¿Keniuj kinitaj itakeualuan oso itekitikauan Cristo? 2) ¿Katiyejua netajtanilmej tiknankiliskej axkan?

² Jesús kijtoj ke imomachtijkauan yeskiaj tekitinij oso takeualmej tein yolyemankej, sayoj ke tekit tein kiseliaj amo kinextia ke amo teyi chiuanimej nion kinijtakoua. Ta kinextia ke kinpoujkaitaj uan inintech takuaujtamatij. Kemej neskayot, maj tikitakan tein kijtoj Jesús tepitsin achto ke momikiliskia, keman ika tajtoj ‘takeual takuaujtamach uan tamatkej’ akin kikauiliskia maj kichiuani seki tekit (Mat. 24:45-47).

³ Tikitaj ke itech amaix Lucas, nejon takeual kitokaytiaj “tayekankatakeual” (xikonixtajtolti Lucas 12:42-44). Maski axkan miakej itatojtokakauan Cristo tein amo kikauaj Dios amo pouij itech nejon takeual, tinochin tiitekitikauan Dios techkauilijtokej tekit kemej se tayekankatakeual. ¿Toni tekimej tikpiaj? ¿Keniuj moneki tikitaskej? Maj tikitakan tekit tein kichiuayaj tayekankatakeualmej tein nemiaj ne uejkauj uan ijkon tikmatiskej tanankilil.

4, 5. ¿Toni tekimej kipiayaj tayekankatakeualmej tein nemiaj ne uejkauj? Xikonijto seki neskayomej.

⁴ Ne uejkauj, tayekankatakeual katka se tekitikej akin iteko itech takuaujtamatia uan kikauiliaya maj kitachili ichan uan maj kiyekana tekit. Miakpa, kikauiliaya maj kiita tein iaxka, itomin uan kiixtaliaya maj kinyekana okseki tekitinij tein moajsiaj kalijtik. Semej akin kipiak nejon tekit yejua Eliezer, akin Abrahán kikauilij maj kitachili nochi tein iaxka, tein semi miak katka. Xa yejua akin  kititanik Mesopotamia maj kitemoti akin yeskia inamik Isaac, uan nejon katka se taman tein motelnekia (Gén. 13:2; 15:2; 24:2-4).

⁵ José, semej akin ualeuaya itech ichankauan Abrahán, katka itayekankatakeual Potifar (Gén. 39:1, 2). Satepan, yejua no kipiak se itayekankatakeual akin kitachiliaya ichan, uan se tonal kinselij majtakti iikniuan uan kinmakak tein kinpolouaya. Uan no, José kinauatij maj kitaliani itatayiloni tachijchiuj ika plata itech se koxtal tein ika kinyejyekoskia iikniuan. Moyekita ke tayekankatakeualmej katkaj takuaujtamachmej uan yejua ika kinmakayaj nejon uejueyi tekimej (Gén. 43:19-25; 44:1-12).

6. ¿Toni tekit kemej tayekankatakeualmej kichiuaj tataman tayekananij itech nechikol?

⁶ Tel miak xiujmej satepan, tatitanil Pablo kijkuiloj ke tayekananij tekitij kemej tayekankatakeualmej (Tito 1:7). Kinixtaliaj maj kinyekanakan “nochi itaneltokakauan de Dios” itech nechikolmej uan kikauaj se kuali neskayot itech nochi (1 Ped. 5:1, 2). Kemej tikmatij, yejuan tataman tekit kichiuaj itech inechikol Dios. Kemej neskayot, miakej sayoj taixyekanaj itech nechikol kampa pouij, uan tokniuan takalpanouanij tapaleuiaj itech miak nechikolmej. Uan Taixyekananij itech Sucursal kiitaj tein kinpoloua nechikolmej tein moajsij itech nochi uejueyi altepemej. Sayoj ke mochia maj nochin kiyekchiuakan tekit tein kiseliaj porin nochin tanankiliskej iixpan Dios (Heb. 13:17).

7. ¿Keyej uelis tikijtoskej ke tinochin tein tikchiuaj kemej Cristo no titayekankatakeualmej?

⁷ ¿No tekitij kemej tayekankatakeualmej miakej tokniuan akin amo kikauaj Jiova uan amo tayekananij? Itech se amat tein tatitanil Pedro kinijkuilouilij nochin itatojtokakauan Cristo, kiniluij: “Xikintekitilikan in oksekin taneltokani ijkon keme Dios namechmajmaktilij ya ne uelilisme. Pero namechilia ximotekitiltijtiyakan ika nochi namotanejnekilis [‘kemej kuali tayekankatakeualmej’, TNM] para xikinpaleuijtiyakan in taneltokani” (1 Ped. 1:1; 4:10). Dios ika iueyi teiknelilis, techmakani netetayokolilmej tein techpaleuia maj tikmatikan tikchiuaskej teisa tein ika uelis tikinpaleuiskej tokniuan. Kemej tikitaj, tinochin akin tiktekitiliaj Dios titayekankatakeualmej, uan nejon tekit kinextia ke Jiova totech takuaujtamati, techpoujkaita uan kichia maj kuali tiktekitiltikan tein techmaka.

8. ¿Toni se taman moneki tikelnamikiskej akin titekitij kemej tayekankatakeualmej?

⁸ Maj tikitakan eyi tamachtilis tein tinochin tiitatojtokakauan Cristo akin titekitij kemej tayekankatakeualmej moneki tikelnamikiskej. Yekinika yejua nejin: tinochin tiiaxkauan Dios uan moneki tikyolpaktiskej. Pablo kijkuiloj: “Amo [...] namechnamiki [...] ximoyekantinemikan tech namonemilis. [...] Porin Dios namechkouako ya ika ueyi patiyot”, ika iesyo Cristo tein kitoyauak kemej se taxtauil (1 Cor. 6:19, 20). Kemej tiiaxkauan Jiova, moneki tiktakamatiskej itanauatiluan tein amo ouijkej (Rom. 14:8; 1 Juan 5:3). No timochiuaj tiitekitikauan Cristo. Kemej tayekankatakeualmej tein nemiaj ne uejkauj, tejuan techkauiliaj maj tikixpejpenakan keniuj tikchiuaskej tekit, sayoj ke amo uelis tikchiuaskej kemej tiknekiskej uan tein tiknekiskej. Moneki tikchiuaskej tekit kemej technauatiaj. Tikpiaskej miak oso amo miak tekit itech inechikol Dios, tiksentokaj tiitekitikauan Jiova uan Cristo.

9. ¿Keniuj Jesús techpaleuia maj tikajsikamatikan tein se teko kichia maj kichiua itakeual?

⁹ Jesús techpaleuia maj tikajsikamatikan tein se teko kichia maj kichiua itakeual. Yejua kintapouij imomachtijkauan se neskayot kampa ika tajtoj se takeual tein ajsik kalijtik satepan ke tekitik nochi tonal. Iteko amo kiiluij: “Ximoseuiki uan xitakuaki”. Ta kiiluij: “Xinechtakualchiuili uan ximoyektataliti para tinechtamakas ika takualis uan ika vino. Uan kuak nejua nitamitakuas ya, ijkuakon tejua no uelis titakuas ya uan titayis movino”. Satepan, Jesús kimelauak neskayot tein kitetapouij keman kijtoj: “Uan no namejuan [...],  kuak nankitamichiuaske ya namotekiu, [...] moneki nankijtoske ijkuin: ‘Tejuan titakeualme ten amo teyika tikualtiaj, porin tikchiuke sayo ten [...] monekia tikchiuaske’” (Luc. 17:7-10).

10. ¿Toni kinextia ke Jiova kitasojkamati keman timochikauaj tiktekitiliskej?

¹⁰ Kemej tikmatij, Jiova kitasojkamati keman timochikauaj tiktekitiliskej. Biblia kiyekijtoua: “Yejuatsin Yolmelauaktsin. lka ya nojon Yejuatsin amo keman kelkauatiu de keniu namejuan nanmotekitiltijke para Dios. Uan no [...] keniu [nankitasojtatinemij]” (Heb. 6:10). Jiova amo keman techtajtania tein amo uelis tikchiuaskej. Uan no, tein technauatia nochipa techualkuilia tein kuali uan amo semi ouij. Sayoj ke, itech neskayot tein Jesús kitetapouij, techmachtij ke se takeual amo sayoj yejua moyolpaktia nion yekinika kichiua itanejnekilis. No ijkon tejuan, ijkuak timotemaktijkej iuan Dios tikixpejpenkej tiktayekanaltiskej itekiyo itech tonemilis.

11, 12. Kemej titayekankatakeualmej, ¿toni kualneskayot moneki tiknextiskej, uan toni moneki tikixtopeuaskej?

¹¹ Ojpatika tamachtilis yejua nejin: kemej titayekankatakeualmej tinochin moneki tiktakamatiskej tanauatilmej tein ixyetok. Semi melauak ke seki tekimej sayoj kinmakaj seki tokniuan, sayoj ke moajsi okseki taman tein tinochin moneki tikchiuaskej. Kemej neskayot, kemej tiimomachtijkauan Cristo uan tiitaixpantijkauan Jiova motelneki maj timotasojtakan se iuan okse. Jesús kijtoj ke taltikpakneminij kimatiskej ke tiimomachtijkauan komo timotasojtaj se iuan okse (Juan 13:35). Sayoj ke no tikintasojtaj akin amo tokniuan oso amo itaixpantijkauan Jiova. Nejon netasojtalis tinochin uelis tiknextiskej uan moneki tikchiuaskej.

¹² Jiova no kichia maj kuali timonejnemiltikan. Moneki tikixtopeuaskej tachiualismej tein iTajtol kijtoua ke amo kuali. Pablo tanejmachtij: “Kuak [...] auilkanentinemij [...]; kuak se kinmouistilijtinemi in tatadiosme; kuak ne namikuani auilkanentinemij iuan okse taka oso iuan oksekin siuame; kuak ne taka auilkanentinemij uan senyetinemij iuan oksekin itakaikniuan. Uan [...] kuak se aksa tachtektinemi; kuak se aksa xijxikuintanemilijtinemi san; kuak se aksa tauantinemi; kuak se aksa tajtolerojtijtinemi; kuak se aksa moaxkatilia ten teaxka [‘yejuan amo yetoskej itech itekiuajyo Dios’, TNM]” (1 Cor. 6:9, 10). Tikmatij ke moneki se mochikauas se kichiuas tein Dios kijtoua ke kuali. Sayoj ke amo nenkaj, ta techualkuilia miak taman tein kuali. Kemej neskayot, techpaleuia maj amo techkui seki kokolismej, maj kuali timouikakan iniuan oksekin uan maj mochikaua tokuali uikalis iuan Dios (xikonixtajtolti Isaías 48:17, 18).

13, 14. ¿Toni tekit kinmaka Dios nochin akin kichiuaj kemej Cristo, uan keniuj moneki tikitaskej?

¹³ Uan no, maj tikelnamikikan ke ijkon kemej tayekankatakeualmej akin nenkej ne uejkauj, tejuan no tikpiaj se tekit tein moneki tikchiuaskej. Jiova techmaka se taman tein tel kualtsin: taixmatilis tein melauak. Uan kichia maj no tikinmachtikan oksekin (Mat. 28:19, 20). Pablo kijkuiloj: “Xitechpouakan [...] keme tiitapaleuijkauan de Cristo [...]. Uan [...] tikinmachtijtinemij [...] in ichtakatamachilisme de Dios, keme se kuali tayekankatekitike” (1 Cor. 4:1). Tatitanil Pablo kimatia ke kemej katka se tayekankatakeual monekia kuali kitekitiltis “ichtakatamachilisme” oso tamachtilis tein melauak, uan no monekia kitematiltis ijkon kemej tanauatij toTekotsin Jesucristo (1 Cor. 9:16).

¹⁴ Ijkuak tikinnextiliaj oksekin tamachtilis tein melauak, tiknextiaj ke tikintasojtaj. Sayoj ke amo tinochin ueli tikchiuaj tekit itech tanojnotsalis kemej oksekin, porin tataman tein tikpanouaj itech tonemilis uan Jiova techajsikamati. Sayoj ke motelneki maj tikchiuakan nochi tein tiueliskej tisejsemej. Ijkon tiknextiaj ke tiktasojtaj Dios ika nochi toyolo uan no taltikpakneminij.

15-17. 1) ¿Keyej motelneki maj takuaujtamach se tayekankatakeual? 2) ¿Keniuj kinextij Jesús tein kipanoua akin amo takuaujtamach?

¹⁵ Expatika tamachtilis tein moteluika iuan ome tein achto tikitakej, yejua nejin: moneki tiknextiskej ke titakuaujtamachmej porin titatakamatij. Se tayekankatakeual uelis kipias kualneskayomej uan uelis kichiuas miak taman, sayoj ke amo kipaleuis komo amo tatakamati nion kichiua tein kinauatiaj. Motelneki maj takuaujtamach komo kineki kiyekchiuas tekit. Maj tikelnamikikan itajtoluan Pablo: “In tayekankatekitike moneki [...] kiyekchiuas nochi ten [motentalijka] ya ke kiyekchiuas” (1 Cor. 4:2).

¹⁶ Uelis tikyekmatiskej ke komo titakuaujtamachmej, Jiova techtatiochiuis. Sayoj ke komo amo, tikpoloskej nejon tatiochiualis. Yejua nejon tein Jesús tamachtij keman kitetapouij se neskayot kampa ika tajtoj istak tomin. Takeualmej akin katkaj takuaujtamachmej uan kimiakiltijkej tomin, ininteko kiniluij ke kuali tekit tein kichiujkaj uan kinmakak tein kinnamikia. Sayoj ke takeual akin amo tatakamatik kiiluij ke “amo yolkuali” uan ‘tatsiu’. Kikuilij tomin tein kimakaka uan tanauatij maj kikalankixtikan (xikonixtajtolti Mateo 25:14-18, 23, 26, 28-30).

¹⁷ Jesús kinextij itech okse neskayot tein kitetapouij toni kipanoskia akin amo takuaujtamach: “Onkaya se patrón ten semi rico ten kipiaya se itayekankatakeual. Uan [...] aksame kiteluilitoj ne itayekankatakeual [...] ke yejua kiauilojtok ten [iaxka] in patrón. Ijkuakon [...] kinotsak ne itayekankatakeual uan kilij ijkuin: ‘¿Toni kijtosneki nijin tajtolme ten nejua niktekakilij de tejua? Axkan nikneki ma tiktepotstokakan [oso tikmelauakan] tocuenta de motekiu porin [...] amo tiksentokas titekitis keme tinotayekankatakeual’” (Luc. 16:1, 2). Kemej tayekankatakeual kiauiloj tein iaxka iteko, yejua kikuilij tekit. ¡Tel kuali techmachtia tinochin nejon  neskayot! Maj nochipa tikyekchiuakan tekit tein Jiova techmaka.

18. ¿Keyej moneki maj amo tiktamachiuakan totekiuj ika tein kichiuaj oksekin?

¹⁸ Tisejsemej uelis timotajtaniskej: “¿Keniuj nikchiua tekit kemej tayekankatakeual?”. Sayoj ke amo kuali yetok maj tiktamachiuakan totekiuj ika tein kichiuaj oksekin. Biblia techyolmajxitia: “Cada se tokniu moneki ma moixejekoltijtiu de inemilispan. Uan [...] uelis moyolpaktijtiyas ya [...] porin yejua [kimattok] ya ke kichiutinemi sayo ten kuali. Uan [...] amo [...] porin monejneuilia [oso kitamachiua itekiuj] iuan okse tokniu taneltokakke” (Gál. 6:4). Maj amo tiktamachiuakan totekiuj iuan tein oksekin kichiuaj, ta maj tikitakan tein tisejsemej ueli tikchiuaj. Nejon techpaleuis maj amo timoueyichiuakan uan maj amo timoyolkokokan. Keman timoitaskej keniuj titekititokej, moneki tikelnamikiskej ke tein tikpanouaj itech tonemilis uelis mopatas. Xa timokokouaj, tixiuejkejya oso tikpiaj okseki taman tein moneki tikchiuaskej uan nejon techtsakuilia maj amo tiuelikanok titekitikan kemej achto. Oso xa ueliskia okachi titekitiskej. Komo ijkon, ¿keyej amo tiktemouaj okachi titekitiskej itech tanojnotsalis?

19. ¿Keyej moneki maj amo timosenkauakan komo amo tikseliaj se tatiochiualis tein tikuelitaskiaj tikpiaskej?

¹⁹ No moneki maj amo tiktamachiuakan tekit tein tikpiaj ika tekit tein kipiaj oksekin tein no tikuelitaskiaj tikpiaskej. Kemej neskayot, se tokniuj xa kineki tekitis kemej tayekankej itech nechikol oso kitemakas tanojnotsmej itech uejueyi nechikolmej. Semi kuali maj se mochikaua se kiajsis nejon tatiochiualismej, sayoj ke maj amo timosenkauakan komo amo tikseliaj keman tikchiayaj. Uelis moajsis seki taman tein techouijmakas tikajsikamatiskej, tein kichiuas maj amo niman tikselikan kemej tikchiayaj. Maj tikelnamikikan ke Moisés xa kinemiliaya ke ueliskiaya kinkixtis israelitas ompa Egipto, sayoj ke monekik mochias 40 xiujmej. Nejon xiujmej tein mochiak, kipaleuij maj kiixualti kualneskayomej tein kipaleuiskia maj ueli kiixyekana se xolal tein taixnamikia uan amo tatakamatia (Hech. 7:22-25, 30-34).

20. ¿Toni techmachtia tein kichiuak Jonatán?

²⁰ Tein melauj, xa se taman tatiochiualis tein tiknekij amo keman tikseliskej. Yejua nejon tein kipanok Jonatán. Kemej katka ikonetsin Saúl, kinamikia yeski tekiuaj itech Israel. Sayoj ke Dios kiixpejpenak David, akin okachi katka telpoch ke yejua. ¿Toni kichiuak Jonatán? Ika miak pakilis kiselij akin Dios kiixpejpenak uan kipaleuij David maski ueliskia kipolos inemilis. Tein melauj kiiluij: “Tejua yeski titekiuaj itech Israel, uan nejua nimochiuas ojpatika satepan ke tejua” (1 Sam. 23:17). Jonatán amo mokuejmoloj, uan kinextij ke amo kinexikoluiaya David kemej kichiuak Saúl. ¿Toni techmachtia? Maj amo tikinnexikoluikan oksekin porin kipiaj se tatiochiualis tein tejuan amo tikpiaj, ta maj timochikauakan tikyekchiuaskej tekit tein tikpiajya. Uelis tikyekmatiskej ke ijkuak Dios tayektalis nikan taltikpak, kichiuas maj itekitikauan kipiakan nochi tein kinejnekij.

21. ¿Keniuj moneki tikitaskej tekit kemej tayekankatakeualmej?

²¹ Maj tikelnamikikan ke tikchiuaskej tekit kemej tayekankatakeualmej, amo kinextia ke amo teyi tichiuanimej oso ke toteko techchikaujkauia maj titekitikan. Ta Jiova totech takuaujtamati uan techpoujkaita, porin techmakatok se tekit tein amo oksepa mochiuas: maj titetapouikan kuali tanauatilmej itech itamian tein amo kuali tein mochiujtok nikan taltikpak. Uan no, kemej Jiova totech takuaujtamati, techkaua maj tikixpejpenakan keniuj tikchiuaskej tekit. Yejua ika, kemej tayekankatakeualmej moneki maj titakuaujtamachmej uan maj tikitakan ke se ueyi tatiochiualis tiktekitiliskej Jiova, akin okachi ueyichiujkej itech iluikak uan taltikpak.