1, 2. ¿Akonimej “taixpejpenalmej” akin kintajkuilouilij Pedro, uan keyej kijtoj ke “tepalyetokej”?

KEMEJ 30 xiujmej satepan ke Jesús mokepak iluikak, tatitanil Pedro kinijkuilouilij se amaix “akin tepalyetokej tein moyaujtokej itech tal Ponto, Galacia, Capadocia, Asia uan Bitinia, akin taixpejpenalmej” (1 Ped. 1:1, TNM). Tikmatij ke “akin taixpejpenalmej” yejuan akin kinixpejpenkaj ika yektikatsin espíritu, ijkon kemej Pedro, uan ‘kinyankuikayolitijkej’ ika se nechialis, tein kijtosneki ke tekiuajtiskej iuan Cristo ompa iluikak (xikonixtajtolti 1 Pedro 1:3, 4). Sayoj ke satepan, tatitanil kintokaytij “nananaltekokayome ten nankalyetinemij sekan de namopueblo” (1 Ped. 2:11). ¿Keyej ijkon kintokaytij? ¿Keyej moneki timomachtiskej tein kijtoj tatitanil, ta axkan amo miakej itaixpantijkauan Jiova akin kijtouaj ke taixpejpenalmej?

² Tein melauj, semi kinamikia maj Pedro kijtouani ke tokniuan itech yekinika siglo ‘tepalyetoyaj’, porin amo nochipa nemiskiaj itech taltikpak. Uan no ijkon panoua iniuan tokniuan taixpejpenalmej itech nejin tonalmej. Tatitanil Pablo, akin no pouia itech “amo ueyi oloch ichkamej”, kimelauak: “Tejuan [...] tipoutinemij ne eluiyaktsinko. Uan no tiyolikachixtokke [...] Totemakixtijkatsin, Yejuatsin ne Totekotsin Jesucristo” (Luc. 12:32, TNM; Filip. 3:20). Kemej taixpejpenalmej poujtinemij “ne eluiyaktsinko”, keman momikiliaj kikauaj ininnemilis nikan taltikpak uan kiseliaj se taman tein okachi kuali: nemilis tein amo kipiasok mikilis ompa iluikak (xikonixtajtolti Filipenses 1:21-23). Yejua ika moijtoua ke yejuan yekmelauj tepalyetokej itech nejin taltikpak kampa taixyekantok Satanás.

3. ¿Toni netajtanil ika ‘okseki ichkamej’ tiknankilitij?

³ ¿Uan toni panos iniuan ‘okseki ichkamej’? (Juan  10:16.) Biblia techmachtia ke yejuan kemaj mokauaskej itech taltikpak uan ompa nemiskej nochipaya. Sayoj ke, kemej tikitaskej satepan, no uelis se kijtos ke tepalyetokej.

4. ¿Toni amo ueli kichiuaj taixyekananij itech taltikpak?

⁴ Kemej Jiova kikaujtokok maj kisentoka mochiua tein amo kuali nikan taltikpak kampa taixyekantok Satanás, nochin taltikpakneminij, uan no itatojtokakauan Cristo, kisentokaskej tajyouijtoskej porin Satanás kiixnamikik Jiova. Ijkon kinextia Romanos 8:22: “Tikmatij ke [...] nochi ten Dios itachijchiu; [...] tajyouijtiuitse ika ueyi toneukayot”. Maski sekin taltikpakneminij, kemej tekiuanij, tamatinij uan akin tapaleuiaj ika tomin, kitemouaj kiajchiuaskej tajyouilis, amo keman ueliskej.

5. Itech 1914 uan hasta axkan, ¿toni kiixpejpenaj kichiuaskej tel miakej taltikpakneminij, uan keyej?

⁵ Yejua ika, itech 1914 uan hasta axkan, tel miakej taltikpakneminij kiixpejpenaj mokauaskej maj kinixyekana Jesucristo, Tekiuaj akin Dios kiixtalij. Yejuan nion tepitsin kinekij pouiskej itech nejin taltikpak kampa taixyekantok Satanás nion kinekij kipaleuiskej. Ta okachi kuali, kikuij ininnemilis, ininchikaualis uan tein kipiaj, uan ika kipaleuiaj iTekiuajyo Dios (Rom. 14:7, 8).

6. ¿Keyej nochin itaixpantijkauan Jiova kemej yeskia ‘analtekokayome’ itech nejin taltikpak?

⁶ Kemej tikmatij, itaixpantijkauan Jiova moajsij itech panoua 200 uejueyi altepemej, uan kitemakaj se kuali neskayot kampa nemij. Sayoj ke yejuan kemej yeskia ‘analtekokayome’ oso tepalyetokej, uan amo mokalakiaj itech kuejmolmej tein kipiaj tekiuanij uan taltikpakneminij. Tein melauj, yejuan moitajya kemej akin poujtokej itech yankuik taltikpak tein Dios motenkaua kiualkuis, uan yolpakij kimatiskej ke sayoj seki tonalmej tepalyetoskej itech nejin taltikpak kampa mochiujtok tein amo kuali.

7. ¿Kani nemiskej nochipaya itekitikauan Dios, uan kemanian?

⁷ Amo uejkaua, Cristo kitekitiltis  tanauatil tein kipia uan ijkon kiixpolos nochi tein amo kuali itech taltikpak tein kiixyekantok Satanás. Itekiuajyo tein yektik kiixpolos tajtakol uan tajyouilis tein onkak axkan. Uan no, senkis kinixpolos akin kiixnamikij iueyitaixyekanalis Jiova, yeski taltikpakneminij oso iluikakneminij. Uan itekitikauan Dios akin amo keman kikauaj, uelis nemiskej nochipaya itech Xochital nikan taltikpak (xikonixtajtolti Apocalipsis 21:1-5). Taltikpakneminij senkis “ki[n]ajchiuiliskej ijtakauilis uan kipias[kej] ueyi nemakixtilis kemej tein kipiaj ikoneuan Dios” (Rom. 8:21, TNM).

8, 9. ¿Toni kijtosnekik Pedro keman ika tajtoj ‘tanejnekilis ten kuika tajtakol’?

⁸ Itech 1 Pedro 2:11, tatitanil kimelauak toni moneki kichiuaskej tokniuan keman kijtoj: “Namechtatautia ke amo ximotekauilikan ke ma namechyekana namotanejnekilis ten kuika tajtakol. Porin [...] moteuijtinemi iuan [...] [‘nanmonemilis’, TNM]”. Nejin tayolmajxitilis kinmakak tokniuan taixpejpenalmej, sayoj ke oksekin iichkauan Jesús no moneki kitakamatiskej.

⁹ Amo kijtosneki ke nochi tanejnekilis amo kuali, komo mochiua ijkon kemej Dios kiyolpaktia. Tein melauj, nejin tapaleuia maj okachi tiyolpakikan itech tonemilis. Kemej neskayot, totech moajsi maj tiknejnekikan tikuaskej uan titayiskej tein uelik, timoixpetaniskej uan timosentiliskej iniuan totasojikniuan. Uan komo tikpiaj tonamik, no totech moajsi tiknejnekiskej iuan timoyolpaktiskej (1 Cor. 7:3-5). Sayoj ke ijkuak Pedro ika tajtoj ‘tanejnekilis ten kuika tajtakol’, ika tajtojtoya tein “moteuijtinemi” iuan tonemilis. Yejua ika, moneki maj tiktsakuilikan totanejnekilis tein amo mouika iuan itanejnekilis Dios tein uelis kijtakos tokuali uikalis iuan. Komo amo tikchiuaj, uelis tikpoloskej tonemilis.

10. ¿Toni tamekauilis techtalilia Satanás tein ika kineki maj tipouikan itech taltikpak kampa taixyekantok?

¹⁰ Satanás amo kineki maj tiksentokakan timonejnemiltikan kemej akin “tepalyetokej” itech nejin taltikpak. Kineki maj tiktemokan timotomintiskej, maj tikuelitakan auilnemilis, maj tiknekikan timoueyichiuaskej, maj tiktemokan nochipa titayekantoskej uan maj tiknemilikan ke toaltepeuj okachi kuali, uan maj amo tikinyekitakan akin okseko kayomej. Sayoj ke nochi nejon se tamekauilis tein techtalilia Satanás. Moneki tikixtopeuaskej nejon amo kuali tanejnekilis, ijkon tikyeknextiskej ke amo tiknekij tipouiskej itech nejin taltikpak kampa taixyekantok Satanás uan ke tinemij kemej akin “tepalyetokej”. Tein yekmelauj tiknejnekij uan timochikauaj tikajsiskej, yejua nemilis nikan taltikpak keman Dios tachipauas uan onkas melaujkayot.

11, 12. ¿Keniuj sekin kinitaj akin okseko kayomej, uan keniuj no ijkon kinpanoua itaixpantijkauan Jiova?

¹¹ Pedro kisentokak kimelauak toni moneki kichiuaskej tokniuan akin ‘analtekokayome ten kalyetinemij sekan de ininpueblo’. Yejua kijtoj itech versículo 12: “Xiksentokakan xichipaukanentiyakan intsalan [oso ininixpan] nekes ten amo kixmatij Dios. Uan maski yejuan iksa namechiji[j]toaj ke namejuan nantachiuanime ten amo kuali, pero kuak kitstoske ya namokualitachiualisuan, ijkuakon yejuan kiueyimatiske Dios”.  Kemansa kinijijtouaj akin analtekojkayomej uan  kinijtouiliaj ke amo yolkualmej, sayoj porin taman tajtouaj, taman inintachiualis uan inintaken oso taman kemej moitaj. Sayoj ke ininkuali tachiualis uelis tapaleuis maj kipatakan tanemilil tein kinpialiaj.

¹² No ijkon, akin yekmelauj kichiuaj kemej Cristo, uelis moitas ke amo monejnemiltiaj kemej akin nemij ompakauin kampa yejuan nemij. Kemej neskayot, okseki taman ika tajtouaj, taman motakentiaj uan mochijchiuaj uan taman moixpetaniaj. Yejua ika, sekin akin amo kinyekixmatij itaixpantijkauan Jiova kinijtouiliaj tein amo melauak. Sayoj ke no moajsij akin kuali ininka tajtouaj porin kuali monejnemiltiaj.

13, 14. Xikonnexti ika se neskayot keniuj tamatilis “monextijtiyas tech in chipaukanemilis”.

¹³ Komo kuali timonejnemiltiaj, uelis tapaleuis maj kiitakan ke amo melauak tein techijtouiliaj. Hasta Jesús, taltikpaknenkej akin sayoj yejua amo keman mopoloj nion tajtakoj, no kijtouilijkej tein amo melauak. Sekin kijtojkej ke “tel takua[ya] uan tayitinemi[a] ne vino uan no motasojtatinemi[a] iuan ne tatopaluiani uan [...] nekes ten amo kitakamatke itanauatil in Moisés”. Sayoj ke kemej katka tamatkej uan nochipa kitekitilij Dios, kinextij ke amo melauak tein kijtouiliayaj. Yejua kijtoj: “Dios itanemililis [oso tamatilis] monextijtiyas tech in chipaukanemilis” (Mat. 11:19). Uan no ijkon panoua axkan. Kemej neskayot, sekin akin nemij ompakauin kampa moajsi Betel ompa Selters (Alemania), kinijtouiliaj ke tel taman kemej nemij tokniuan akin ompa tekitij. Sayoj ke, akin taixyekana itech nejon xolal kintajtouij. Yejua kijtoj: “Itaixpantijkauan Jiova tein ompa tekitij taman monejnemiltiaj, sayoj ke nion tepitsin taijtakouaj itech toxolal”.

¹⁴ No ijkon kinpanok itaixpantijkauan Jiova akin kayomej Moscú (Rusia). Yejuan kintakajkayauilijkej ika miak taman tein amo kuali. Sekin kijtojkej ke kichiuaj maj kalyetouanij moxexelokan, tayolchikauaj maj ininselti momiktikan uan amo kinekij kiseliskej tapajtilis. Sayoj ke itech metsti junio xiuit 2010, Tribunal Europeo de Derechos Humanos, kijtoj ke tekiuanij ompa Moscú amo kuali tein kichiujkej keman kitsakuilijkej inintaueyichiualis itaixpantijkauan Jiova uan keman amo kinkauayaj maj monechikokan. No kijtoj ke amo uelik kinextijkej ke amo kuali monejnemiltiaj, uan ke amo taixejekol kemej kikuikej tanauatilmej iniuan.

15. ¿Toni tayolmajxitilis tein kisa itech Biblia kitakamatij tokniuan akin moajsij semanauak taltikpak?

¹⁵ Itaixpantijkauan Jiova akin moajsij semanauak taltikpak kichiuaj okse taman tein Pedro kijtoj ke monekia kichiuaskej: “Keme nantakuautamatij iuan Totekotsin, [...] ximotekauilikan ma namechyekanakan nochi taman taltikpaktekiuani  maski se rey [...] [akin] kachi ueyi tayekanke. Uan xikintakamatiyakan tekiuani” (1 Ped. 2:13, 14). Maski amo tipouij itech nejin taltikpak, tiktojtokaj itayolmajxitilis Pablo uan tikintakamatij tekiuanij, komo amo tiktapanauiliaj itanauatiluan Dios (xikonixtajtolti Romanos 13:1, 5-7).

16, 17. 1) ¿Toni kinextia ke tiitaixpantijkauan Jiova amo tikinixnamikij tekiuanij? 2) ¿Toni kijtouanij sekin uejueyi chiuanimej?

¹⁶ Maski tiitaixpantijkauan Jiova timonejnemiltiaj kemej akin “tepalyetokej” itech nejin taltikpak, amo kijtosneki ke tikinixnamikij tekiuanij. Amo tikintsakuiliaj oksekin maj kiixpejpenakan akoni yeski tekiuaj uan keniuj kimelauaskej kuejmolmej tein onkak itech taltikpak. Sekin taneltokalismej mokalakiaj itech kuejmolmej tein onkak itech tekiuajyot, sayoj ke tiitaixpantijkauan Jiova amo ijkon tikchiuaj. Amo tiktemouaj maj tekiuanij kipatakan kemej kinixyekanaj taltikpakneminij uan amo keman tiknemiliskiaj tikinixnamikiskej oso tikchiuaskej maj oksekin taixnamikikan.

¹⁷ Pedro kijtoj ke maj ‘tikinmouiskapouakan nochi ueyichiuanime’. Yejua ika tikintakamatij tekiuanij uan ijkon tiknextiaj ke tikinpoujkaitaj porin kipiaj se tanauatil (1 Ped. 2:17). Sekin uejueyi chiuanimej kijtouanij ke amo onkak keyej kinemiliskej ke itaixpantijkauan Jiova taijtakouaj. Kemej neskayot, Steffen Reiche, akin pouia itech tekiuajyot tein moajsi Brandeburgo, uan satepan mochiuak semej akin kiixtaliaj tanauatilmej itech ialtepeuj, kijtoj ke itaixpantijkauan Jiova kuali monejnemiltijkej keman nazis kintajyouiltijkej. Amo kikaujkej inintaneltokalis uan kinpaleuijkej oksekin akin no tsaktoyaj. Kijtoj ke nejon kualneskayomej motelneki itech se altepet kemej Alemania, okachiok porin sekin kinteltajyouiltiaj akin kayomej itech okseki altepemej, kipiaj okse taneltokalis oso kipaleuiaj okse tekiuajyot.

18. 1) ¿Keyej ‘tikintasojtaj nochi in tokniuan taneltokani’? 2) ¿Toni kimoujkaitanij sekin taltikpakneminij?

¹⁸ Tatitanil Pedro tayolmajxitij: “Xikintasojtakan nochi in tokniuan taneltokani” (1 Ped. 2:17). Tiitaixpantijkauan Jiova tikmoujkatokaj yejuatsin, tein kijtosneki ke amo tiknekij tikchiuaskej tein amo kiyolpaktia, uan nejon techpaleuia maj tikchiuakan Itanejnekilis. Uan no, tiyolpakij tipouiskej iniuan tokniuan tein moajsij noyampa taltikpak tein tiksentekitiliaj Jiova. Yejua ika ‘tikintasojtaj nochi in tokniuan taneltokani’. Axkan amo semi moita maj taltikpakneminij motasojtakan, yejua ika sekin kimoujkaitaj nejon. Kemej neskayot, se siuat akin kitakeujtokej itech se tekitiloyan tein ualeujtok Estados Unidos, kampa kinpaleuiaj akin youij itech okse altepet, semi kimoujkaitak netasojtalis uan kualtakayot tein monextilijkej tokniuan akin uejuejka kayomej tein mosentilijkej itech se ueyi nechikol tein mochiuak Alemania itech xiuit 2009. Ika yolpakilis kijtoj ke amo keman kiitstoya nejon. ¿Tikonkakini maj no ijkon tajtokan akin kinitanij itaixpantijkauan Jiova itech se ueyi nechikol?

19. ¿Toni tikixtaliaj tikchiuaskej, uan keyej?

¹⁹ Kemej timomachtijkejya, tiitaixpantijkauan Jiova, tiknextiaj ika miak tataman ke tinemij kemej akin “tepalyetokej” itech nejin taltikpak kampa Satanás taixyekantok. Tiyolpakij titepalyetoskej uan tikixtaliaj tiksentokaskej ijkon timonejnemiltiskej. Senkis tikchiaj tinemiskej nochipaya nikan taltikpak keman Dios tachipauas uan onkas melaujkayot. ¿Melauak ke tiknekij maj ejkoya nejon tonal?