Miakej kijtouayaj ke ijkon kemej kinextiaya calendario maya, itech tonal 21 metsti diciembre xiuit 2012, mopataskia tein mochiujtok itech nochi taltikpak. ¿Toni tikonmachilia keman tiontanemilia itech nejon tonal? Komo tikonchiaya maj mochiua se taman itech nejon tonal, axkan xa tionyolseuikya, tionmoyolkokoua oso amo tikonnekiok tikonkakis nejon. ¿Oksepa sayoj mopolojkej ijkuak kijtojkaj ke ualaskia ixpoliuilis?

¿Toni tikonnemilia ika ixpoliuilis tein ika tajtoua Biblia? (Mateo 24:3.) Sekin kimouiliaj maj taltikpak chichinaui. Oksekin kiteluelitaj kiitaskej tein uelis panos keman ualas ixpoliuilis uan oksekin amo kinekijok kikakiskej maj ika tajtokan. ¿Keyej miakej ijkon kimachiliaj? ¿Katiyejua yeskia tanankilil tein melauak?

Xa tikonmoujkaitas ijkuak tionmomachtis tein yekmelauj kijtoua Biblia ika ixpoliuilis. Ompa techiluia keyej uelis tiknejnekiskej maj ejko ixpoliuilis; no kinextia ke uelis titasematiskej uan amo tikchiaskejok komo tikmachiliaj ke tel uejkaua. Yejua ika, timitsonyoleuaj xikonita keniuj kinankilia Biblia naui netajtanilmej tein taltikpakneminij okachi mochiuiliaj.

BIBLIA TANANKILIA: “[Dios] kichijchiuak taltikpak kampa ixyetok, amo keman kioliniskej, nion sennochipaya” (SALMO 104:5).

Taltikpak amo ixpoliuis ika tit nion ika okse taman; Biblia tamachtia ke nikan taltikpak nochipa nemiskej taltikpakneminij. Salmo 37:29 kijtoua tein mochiuas: “Akin yolmelaujkej yejuan ininaxkatis taltikpak, uan ompa nemiskej nochipaya” (Salmo 115:16; Isaías 45:18).

Keman Dios kichijchiuak taltikpak, kijtoj ke nochi “tel kuali katka”, uan ijkon kisentoka kiita (Génesis 1:31). Yejuatsin amo kiixtalijtok kiixpolos; ta motenkaua ke ‘kintajtamis nekes ten taijtakojtinemij nikan taltikpak’ uan ijkon amo kikauas maj senkis kijtakokan (Apocalipsis [Revelación] 11:18).

Sayoj ke tejuatsin xa tiontanemilia itech tajtolmej tein kijtoua 2 Pedro 3:7, kampa kinextia: “Dios [...] kinchialtijtok in taltikpak uan eluiyak para ne tonal kuak kintamichichinos ya”. ¿Amo kijtoua nejin tajkuilol ke taltikpak chichinauis? Tein melauj, ijkuak Biblia kikui tajtolmej iluikak, taltikpak uan tit, kemansa sayoj ika kiixnextia teisa. Kemej neskayot, Génesis 11:1 kijtoua ke “nochi taltikpak kisentokaya tajtouaya sayoj se tajtol”. Moyekita ke nikan tajtol “taltikpak”, kijtosneki taltikpakneminij.

Tein achto kijtoj Pedro keman ika tajtoj 2 Pedro 3:7, kinextia ke iluikak, taltikpak uan tit tein ompa moijtoua, no sayoj kiixnextia teisa. Versículo 5 uan 6 ika tajtoua Tetsaujkakiouit itech itonaluan Noé. Nejon tonalmej, ixpoliujkej taltikpakneminij, sayoj ke taltikpak kampa axkan tinemij amo ixpoliuik. “Taltikpak” tein ixpoliuik yejuan taltikpakneminij akin tateuiayaj, uan “iluikak”, yejuan akin taixyekanayaj (Génesis 6:11). No ijkon, versículo 7 kijtoua ke senkis ixpoliuiskej taltikpakneminij akin amo yolkualmej uan akin kinixyekanaj, kemej yeskia ika tit.

BIBLIA TANANKILIA: “Nochi in tajtakolnemilis tantiu ya iuan nochi nijin tanejnekilis de pitsotik ten itech poui. Pero ne naken kichiutinemi ten kimonekiltia Dios, yejua ne nachipa [yetos]” (1 JUAN 2:17).

Nikan amo kijtoua ke ixpoliuis taltikpak, ta nochin taltikpakneminij akin amo kichiuaj itanejnekilis Dios. Ijkon kemej se tapajtijkej akin teteki kikixtilia nakat tein kijtakojtok akin mokokoua uan ijkon uelis kimakixtis, no ijkon Dios kemej yeskia kinkixtis akin amo yolkualmej uan ijkon akin yolkualmej uelis yekmelauj nemiskej ika yolpakilis nikan taltikpak (Salmo 37:9). Yejua nejon tein kuali tein kiualkuis ixpoliuilis.

Nejon tanemilil tein kuali ika ixpoliuilis moajsi itech seki Biblias, tein kikepaj kemej “itamiampa nochi tein mochiujtok itech taltikpak” (Mateo 24:3, TNM). Komo taltikpakneminij uan taltikpak kisentokaskej moajsiskej satepan ke panos ixpoliuilis, ¿melauj ke taixejekol maj tiknemilikan ke peuas se yankuik nemilis oso yankuik taman tein mochiujtos nikan taltikpak? Biblia kijtoua ke ijkon yeski, ta ika tajtoua “tonalme ten uitse ok” (Lucas 18:30).

Jesús kijtoj ke itech nejon “tonalme ten uitse ok Dios kichiuas nochi yankuik ya”. Yejua oksepa kichiuas kemej yekinika kinekia Dios maj taltikpakneminij nemikan (Mateo 19:28). Itech nejon tonalmej uelis tikpiaskej tatiochiualismej tein nikan moijtoua:

• Taltikpak mochiuas se xochital kampa nochin kipiaskej yekyetolis uan yeknemilis (Isaías 35:1; Miqueas 4:4).

• Tekit tein kinualkuilis tein kuali uan kinyolpaktis (Isaías 65:21-23).

• Pajtiskej nochin akin mokokouaj (Isaías 33:24).

• Oksepa mochiuaskej telpochmej uan ichpochmej (Job 33:25).

• Oksepa nemiskej akin momikilijkejya (Juan 5:28, 29).

Komo tikchiuaj itanejnekilis Dios amo onkak keyej tikmouiliskej ixpoliuilis, ta tiktelnejnekiskej maj ejko.

BIBLIA TANANKILIA: “Ijkuak nankiitaskej mochiujtokya nejin tachiualismej, xikmatikan ke itekiuajyo Dios amo uejka yetok” (LUCAS 21:31, TNM).

Itech amaix The Last Days Are Here Again (Itamian tonalmej oksepa mokepkej), tamachtijkej Richard Kyle kijkuiloj ke “tein axkan ijsiujka mopatatok uan eliuisyot tein onkak, kichiua maj okachi kijtokan kemanian ualas ixpoliuilis”. Okachiok komo tein mopatatok uan eliuisyot tein onkak moita ke amo uelis se kimelauas keyej ijkon panoua.

Sayoj ke, tanauatianij akin ika tajtojkej ixpoliuilis itech Biblia, amo kinemilijkej kimelauaskej tein mochiujtoya itech inintonaluan. Ta Dios kichiuak maj itanauatijkauan kijtouanij tachiualismej tein kinextiskiaj ke amo uejkaua ejkoskia ixpoliuilis. Xikonita seki tajkuilolmej tein achtook kinextij toni mochiuaskia, uan xikonita ox mochiujtokya oso amo.

• Neteuilis, mayan, talolinilis uan kokolismej tein ijsiujka momoyauaskia uan temiktiskia (Mateo 24:7; Lucas 21:11).

• Okachi moitaskia tein tel amo kuali (Mateo 24:12).

• Taltikpakneminij kijtakojtoskiaj taltikpak (Apocalipsis 11:18).

• Taltikpakneminij sayoj yejuan motasojtaskiaj, moyolpaktiskiaj uan kitelnekiskiaj tomin, sayoj ke amo kitasojtaskiaj Dios (2 Timoteo 3:2, 4).

• Moxexeloskiaj kalyetouanij (2 Timoteo 3:2, 3).

• Amo kinekiskiaj kineltokaskej tein kinextia ke ixpoliuilis amo uejkaua ejkos (Mateo 24:37-39).

• Noyampa taltikpak moteixmatiltijtoskia kuali tanauatilmej tein kichiuati iTekiuajyo Dios (Mateo 24:14).

Jesús kijtoj ke ijkuak ‘tikitaske de ke mochiutok ya nochi nijin’, techpaleuiskia maj tikmatikan ke amo uejkaua ejkos ixpoliuilis (Mateo 24:33). Tiitaixpantijkauan Jiova tikyekmatij ke melauak nejon tein kinextia ke amo uejkaua ejkos ixpoliuilis, yejua ika tikteixmatiltiaj tein tikneltokaj itech 236 uejueyi altepemej uan xolalmej.

BIBLIA TANANKILIA: “Keman takamej kijtojtoskej: “¡Onkak yolseuilis uan yekyetolis!”, ijkuak ejkotiuetsis ininixpoliuilis, kemej ijkuak se siuat kimachilia tekokojkayot keman yoliti ikonetsin, uan amo uelis mopaleuiskej” (1 TESALONICENSES 5:3, TNM).

Biblia kinextia ke ixpoliuilis yeski kemej ijkuak se siuat kipiati ikonetsin: tekokojkayot tein kimachilia amo ueli kitsakuilia uan peua ijsiujka. No ijkon, tonalmej tein panos hasta keman ejkos ixpoliuilis yeski kemej se siuat akin kokoxkayetok ika se konet, porin yejua kiita miak taman tein kinextia ke amo uejkaua kipiati ikonetsin. Uan maski amo panos itech tonal keman kiixejekojka tapajtijkej, yejua kiyekmati ke amo uejkaua yolis. No ijkon, maski ixpoliuilis amo ejko keman miakej kichiayaj, nejon amo kipata tein senkis kinextia ke tinemij ‘itamian tonalmej’ (2 Timoteo 3:1).

Sayoj ke tejuatsin xa tionmotajtania: “Komo moajsi miak taman tein kiyeknextia ke amo uejkaua ejkos ixpoliuilis, ¿keyej tel miakej amo kiitaj nejon?”. Biblia kijtojka ke miakej amo kiitaskiaj tein kinextiskia ke amo uejkaua ejkoskia ixpoliuilis. Yejuan amo kineltokaskiaj ke okachi amo kuali tein mochiujtoskia uan ke nejon kinextiskia ke nentoskiaj itech itamian tonalmej, ta mokejkeloskiaj ijkon: “Touejkautatuan momikilijke ya uan desde ne tonal hasta axkan amo teyi tikitaj ten yankuik. Uan kachi no ijkon san desde ne tonalme kuak tsinpeuak in taltikpak” (2 Pedro 3:3, 4). Ika okseki tajtolmej, maski  moyekitaskia tein kiyeknextiskia ke moajsiskiaj itech itamian tonalmej, miakej amo kineltokaskiaj (Mateo 24:38, 39).

Nejin tamachtilis kipia sayoj seki taman tein kijtoua Biblia tein kinextia ke ixpoliuilis amo uejkaua ejkos. * ¿Tikonuelitaskia tikonmatis okachi? Komo ijkon, timitsonyoleuaj xikontajtani itaixpantijkauan Jiova se nemachtil ika Biblia tein amo moneki tikonixtauas. Uelis mitsonmachtiskej mochan, oso okseko kampa tikonnekis oso no ika teléfono. Sayoj monekis tepitsin motiempo, maski tein melauj, mitsonualkuilis miak taman tein okachi kuali.