Dios amo kipia se yekmelauj inamik akin iuan kipias konemej. Yejuatsin kichijchiuak nochi tein yoltok. Sayoj ke, kemej tejuan techchijchiuak maj tiuelikan tiknextikan netasojtalis uan okseki taman tein Dios kinextia, yekinika takat Adán, kitokaytijkej “ikoneu de Dios”. No ijkon, Jesús kitokaytiaj “Tekonetsin de Dios” porin kichijchiuak maj ueli kinexti netasojtalis uan okseki taman tein Dios kinextia. (Xikonixtajtolti Lucas 3:38 uan Juan 1:14, 49.)

Dios kichijchiuak Jesús achto ke kichijchiuaskia Adán. Tein melauj, yejua yekinika kichijchiuak, uan satepan tapaleuij maj mochijchiua nochi okseki taman hasta ángeles. Yejua ika, Biblia kitokaytia Jesús “tayekankakonet itech nochi [i]tachijchiualis” Dios. (Xikonixtajtolti Colosenses 1:15, 16, TNM.)

Achto ke Jesús yoliskia Belén, katka se ángel ompa iluikak. Keman ajsik tonal tein Dios kiixtalijka, kipanoltij inemilis iijtik María uan ijkon yoliko kemej se taltikpaknenkej. (Xikonixtajtolti Lucas 1:30-32; Juan 6:38 uan 8:23.)

¿Keyej Dios kichiuak maj Jesús yolini nikan taltikpak kemej takat? ¿Toni tekit kichiuak tein motelnekia? Komo tikontemoua tanankililmej itech Biblia, tikonitas keniuj okachi tikonajsikamatis uan tikontasojkamatis tein Dios uan Jesús kichiujkej tein ika techpaleuiaj.