1, 2. ¿Keniuj okachi kichikaua totakuaujtamatilis keman titanemiliaj itech inechikol Jiova tein moajsi iluikak uan taltikpak?

SEMI tikmoujkaitaj tikmatiskej ke tipouij itech se ueyi nechikol tein moajsi iluikak uan taltikpak. Ezequiel capítulo 1 uan Daniel capítulo 7 ika tajtoua tein kinitaltijkej nejin ome tanauatianij, uan ompa tikyekitaj ke Jiova kichiujtok tein moneki uan ijkon mochiuas itanejnekilis. Jesús kiixyekana inechikol Dios tein poui nikan taltikpak uan ijkon kisentokas kiteixmatiltis kuali tanauatilmej, kiyekpias ininkuali uikalis iuan Dios akin tanojnotsaj uan tapaleuis maj moskalti taueyichiualis tein melauak. Yejua ika, senkis uelis titakuaujtamatiskej itech inechikol Jiova (Mat. 24:45).

² Sayoj ke, ¿no ijkon titeltekititokej kemej kichiua inechikol Dios? ¿Okachi techyolpaktia tikchiuaskej itekiyo Dios oso amo semiok? Keman titanemiliskej itech nejin netajtanilmej, xa tikitaskej ke tepitsin tisioujtokej oso ke amo semi timochikauaj kemej achto. Tein melauj, nejon uelis techpanos tinochin. Itech yekinika siglo, tatitanil Pablo monekik kinyolchikauas iikniuan maj kitojtokakan ineskayo Jesús. ¿Keyej? Yejua kijtoj: “Ika ya nojon moneki amo xisiouitij uan nion no [xiyolkuetauitij] tech namotakuautamatilis” (Heb. 12:3). No ijkon, tamachtilis tein achto tikitakej, tein technextilij toni kichiujtok inechikol Jiova, monekiskia techtelpaleuis maj tiksentokakan tikpiakan yolpakilis uan taxikolis.

3. ¿Toni moneki tikchiuaskej uan ijkon amo tisiouiskej, uan toni tikitaskej itech nejin tamachtilis?

³ Sayoj ke, Pablo kinextij ke moneki tikchiuaskejok teisa uan ijkon amo tisiouiskej: moneki timochikauaskej “tikchiutinemiske ten kuali” (Gál. 6:9). Ika nejin moita ke tinochin moneki titekitiskej. Maj tikitakan makuil taman tein techpaleuis maj tiksentokakan tikpiakan yolpakilis uan maj tikauakan maj techyekana inechikol Jiova. Nejin techpaleuis maj tikitakan ox onkak teisa kampa moneki okachi timochikauaskej tejuan oso tochankauan.

4. ¿Toni kinextia ke nechikolmej motelneki itech taueyichiualis tein melauak?

⁴ Itekitikauan Jiova nochipa kiitanij ke motelneki nechikolmej. Ompa iluikak, ángeles kinyoleuaj kemansa maj yakan iixpan Jiova (1 Rey. 22:19; Job 1:6; 2:1; Dan. 7:10). Ne uejkauj, xolal Israel monekia mosentilis uan ijkon takakiskia uan momachtiskia (Deut. 31:10-12). Judíos itech yekinika siglo momattoyaj yaskej kampa monechikouayaj uan ompa kiixtajtoltiayaj iTajtol Dios (Luc. 4:16; Hech. 15:21). Uan keman mopeualtij nechikol kampa kichiuaj kemej Cristo kisentokaya moitaya ke motelnekij nechikolmej. Axkan no se taman tein motelneki itech totaueyichiualis iuan Jiova. Akin yekmelauj tikchiuaj kemej Cristo timosentiliaj uan ijkon “timotasojtatiyaske se uan okse uan [...] tikchiutiyaske in kuali tachiualisme”. Moneki “ma timosenpanyolmajxitijtiyakan se uan okse uan kachi ok [...] porin tikitaj ke kachi motokijtiuits ya ne [i]tonal [Jiova]” (Heb. 10:24, 25).

5. ¿Keniuj uelis timoyolchikauaskej se uan okse itech nechikolmej?

⁵ Se taman tein tel kuali kemej uelis timoyolchikauaskej se uan okse yejua komo titanankiliaj itech nechikolmej. Kemej neskayot, uelis tiknextiskej totakuaujtamatilis keman tiknankiliskej se netajtanil, tiknextiskej keniuj uelis tikuiskej itech tonemilis se tajkuilol tein moajsi itech Biblia, oso ika amo miak tajtolmej tikijtoskej se neskayot tein kinextis ke tiktakamatiskej tein timomachtiaj kiualkui tein kuali (Sal. 22:22; 40:9). Maski uejkaujya peuak tiyouij nechikolmej oso amo, xa tinochin uelis tikijtoskej ke semi techyolchikauaj inintanankililuan tein kisa itech ininyolo tokniuan telpochmej oso ichpochmej uan akin uejueykejya.

6. ¿Keniuj techpaleuiaj nechikolmej tein tikpiaj?

⁶ ¿Toni okseki nepaleuilmej tikseliaj, yejua ika Jiova kisentoka techiluia maj amo timopolouilikan nechikolmej? Nechikolmej uan uejueyi nechikolmej techoliniaj maj tiksentokakan titanojnotsakan ika yolchikaualis uan maj tikxikokan taixnamikilis oso keman amo kinekij techkakiskej kampa titanojnotsaj (Hech. 4:23, 31). Uan no, tanojnotsmej uan okseki tamachtilis tein kisa itech Biblia kichikaua totakuaujtamatilis (Hech. 15:32; Rom. 1:11, 12). Tamachtilis uan yolchikaualis tein titemakaj uan tikseliaj keman timosentiliaj, techualkuilia yekmelauj yolpakilis uan “yolseuilis itech tonalmej keman onkas ouijkayot” (Sal. 94:12, 13). Tokniuan akin kiitaj toni Tamachtilis mokixtis akin tekitij iuan Oloch Taojtokaltianij, kiixyekanaj tekit tein tapaleuia maj motemaka tamachtilis itech ixolal Dios noyampa taltikpak. ¡Tikteltasojkamatij tamachtilis tein tikseliaj itech nechikolmej nochi semanas!

7, 8. 1) ¿Toni okachi motelneki keman timonechikouaj? 2) ¿Keniuj mitsonpaleuiaj nechikolmej?

⁷ Sayoj ke, amo tiyouij nechikolmej sayoj porin tikselitij tein kuali, ta porin tikchiuatij tein okachi motelneki; tikueyichiuatij Jiova (xikonixtajtolti Salmo 95:6). ¡Se ueyi tatiochiualis tikueyichiuaskej toDios akin tel ueyi! (Col. 3:16.) Yejuatsin kinamiki maj nochipa tikueyichiuakan, uan tikchiuaj keman timonechikouaj uan titanankiliaj (Apoc. 4:11). Yejua ika Jiova techyolchikaua maj amo tikchiuakan kemej “sekin tokniuan [akin] amo mosentilijtinemij” (Heb. 10:25).

⁸ ¿Tikajsikamatij ke nechikolmej techpaleuiaj maj titaxikokan hasta keman Jiova kiixpolos tein amo kuali nikan taltikpak? Komo ijkon, nechikolmej yeski se taman tein “okachi tayekantok” itech tonemilis uan tiktemoskej keniuj amo timopolouiliskej maski onkas okseki taman tein moneki tikchiuaskej (Filip. 1:10). Sayoj se tel ueyi ouijkayot ueliskia kichiuas maj amo tikueyichiuakan Jiova iniuan tokniuan.

9. ¿Toni kinextia ke tanojnotsalis motelneki?

⁹ Titapaleuiskej ika nochi tochikaualis itech tanojnotsalis no techpaleuia maj timokauakan maj techyekana inechikol Jiova. Jesús kipeualtij nejin tamachtilis keman yetoya nikan taltikpak (Mat. 28:19, 20). Ijkuak uan hasta axkan, inechikol Jiova kiitani ke motelneki se kiteixmatiltis kuali tanauatilmej ika iTekiuajyo Dios uan se kinpaleuis maj mochiuakan imomachtijkauan Jesús. Miak tein mochiuani itech totonaluan kinextia ke ángeles techpaleuiaj uan techyekanaj kampa moajsij akin “Dios kinijitak ya para ma kipiakan ne yek nemilis nachipa” (Hech. 13:48; Apoc. 14:6, 7). Inechikol Jiova tein poui nikan taltikpak yekmelauj moajsi uan tel kuali kiixyekantok nejin tekit tein motelneki. ¿No tayekantok itech monemilis nejin tekit?

10. 1) Xikonnexti ika se neskayot keniuj uelis kisentokas techyolpaktis itekiyo Dios. 2) ¿Keniuj tanojnotsalis mitsonpaleuiani amo xionsioui?

¹⁰ Keman titanojnotsaj ika nochi toyolo, kisentoka techyolpaktia tikchiuaskej itekiyo Dios. Maj tikitakan tein kijtoj Mitchel, akin miak xiujmejya tekititok kemej tayekankej uan precursor regular: “Nechtelyolpaktia nikinnojnotsas taltikpakneminij ika tamachtilis tein melauak. Nitanemilia itech se yankuik tamachtilis tein kisa itech amaix Tanejmachtijkej oso ¡Despertad! uan nikmoujkaita tamatilis, taajsikamatilis uan tel kuali taixejekolis tein moita itech nochi toamaixuan. Niknejneki nikisas tanojnotsalis uan ijkon nikitas keniuj tanankiliaj taltikpakneminij uan niktemos keniuj nikchiuas  maj kinekikan okachi kimatiskej. Tanojnotsalis nechpaleuia maj nikita tein okachi tayekantok itech nonemilis. Komo moneki nikchiuas okse taman, nimochikaua nikchiuas achto oso satepan, uan ijkon amo nikchiuas itech horas tein nikixtalijtok nitanojnotsas”. Kemaj, tikchiujtoskej itekiyo Dios itech nejin itamian tonalmej no techpaleuis maj titaxikokan (xikonixtajtolti 1 Corintios 15:58).

11. ¿Keyej moneki tikixtajtoltiskej nochi amaixmej tein tikseliaj uan itech titanemiliskej?

¹¹ Kemej Jiova kineki techyolchikauas, techmakani miak tamachtilis itech amaixmej. Xa tinochin tikelnamikij tonal keman satepan ke tikixtajtoltijkej teisa itech toamaixuan tikijtojkej: “¡Yejua nejin tein niknekia! ¡Kemej yeskia Jiova kichiuak maj nechijkuilouilianij!”. Onkak keyej ijkon tionmomachilis, ta Jiova techmachtia uan techixyekana ika amaixmej. Yejuatsin motenkaua: “Nikchiuas xikpia ajsikamatilis nepakaok tein moita, uan nimitsnextilis ojti kampa moneki tiyas” (Sal. 32:8). ¿Timochikauaj tikixtajtoltiskej nochi amaixmej tein tikseliaj uan itech titanemiliaj? Komo ijkon tikchiuaj, techpaleuis maj tiksentokakan tikchiujtokan itekiyo Dios itech nejin itamian tonalmej uan totakuaujtamatilis amo tamis (xikonixtajtolti Salmo 1:1-3; 35:28 uan 119:97).

12. ¿Toni techpaleuis maj tiktasojkamatikan toamaixuan?

¹² Techpaleuis maj tiktasojkamatikan toamaixuan komo titanemiliaj itech nochi tekit tein moneki mochiuas uan ijkon uelis tikpiaskej. Moneki tatemoskej, tajkuiloskej, kiyektaliskej, kitaliskej taixkopimej uan kitajtolkepaskej nochi tamachtilis tein mokixtia itech amat oso tein kitaliaj itech Internet. Tokniuan akin kiitaj tein Moijkuilos akin tekitij iuan Oloch Taojtokaltianij kiixyekanaj nejin tekit. Sucursales tein kikixtiaj amaixmej kititanij itech nochi nechikolmej, yeski uejka oso amo. ¿Keyej mochiua nochi nejin tekit? Porin ijkon, ixolal Jiova uelis kiselis tamachtilis uan taixyekanalis tein kipaleuis maj amo keman kikaua Dios (Is. 65:13). Yejua ika, maj tikselikan nochi tamachtilis tein techmaka inechikol Jiova itech toamaixuan (Sal. 119:27).

13, 14. Ompa iluikak, ¿akonimej kipaleuiaj inechikol Jiova, uan keniuj uelis tikchiuaskej kemej yejuan?

¹³ Itech se taman tein kiitaltijkej tatitanil Juan, moitaya Jesús tokotsyetiaya ipanko se istak caballo uan yaya kintaniti akin kiixnamikij Jiova (Apoc. 19:11-15). ¿Melauak ke kichikaua totakuaujtamatilis tikmatiskej ke iikan Jesús youij ángeles akin amo kikauaj Jiova, uan iuan yetokej tokniuan taixpejpenalmej akin taxikojkej nikan taltikpak uan kiselijkejya ininnetetayokolil ompa iluikak? (Apoc. 2:26, 27.) Ininkuali neskayo techmachtia ke no moneki tikinpaleuiskej akin taixyekanaj itech inechikol Jiova.

¹⁴ No ijkon, akin pouij itech miak taltikpakneminij, ika nochi ininyolo kipaleuiaj tekit tein kichiuaj iikniuan Cristo taixpejpenalmej tein moajsijok nikan taltikpak uan kiixyekanaj inechikol Dios (xikonixtajtolti Zacarías 8:23). ¿Keniuj tisejsemej uelis tikpaleuiskej inechikol Jiova? Se taman, komo tikintakamatij akin techixyekanaj (Heb. 13:7, 17). Moneki tipeuaskej itech tonechikol. Keman ininka titajtouaj tayekananij, ¿tikijtouaj tein kinpaleuis oksekin maj kinpoujkaitakan yejuan uan tekit tein kichiuaj? ¿Tikinyolchikauaj tokoneuan maj kinpoujkaitakan nejin tokniuan akin amo kikauaj Jiova uan maj kintajtanikan tayolmajxitilis ika Biblia? Okse taman, ¿timonojnotsaj kalijtik keniuj uelis tikpaleuiskej ika totomin tanojnotsalis tein mochiua itech nochi taltikpak? (Prov. 3:9; 1 Cor. 16:2; 2 Cor. 8:12.) ¿Tikitaj ke motelneki maj chipauak Kali kampa tiMosentiliaj uan maj moyektali keman moneki?  Jiova kitemaka iespíritu kampa onkak poujkaitalis uan amo xeliujtokej. Nejon espíritu nochipa techpaleuia maj amo tisiouikan itech itamian nejin tonalmej (Is. 40:29-31).

15. ¿Keyej mojmostaj moneki timochikauaskej uan ijkon uelis timonejnemiltiskej kemej Jiova kiyolpaktia?

¹⁵ Uan okse taman tein techpaleuis maj titaxikokan uan maj tikauakan maj techyekana inechikol Jiova, moneki tiknextiskej ke tikchiuaj tein titanojnotsaj. Yejua ika moneki tikyekitaskej toni “kiselia toTajtsin” (Efes. 5:10, 11, TNM). Semi techouijmaka tikchiuaskej tein kuali porin techixnamiki Satanás, taltikpak kampa taixyekantok, uan no porin titajtakouanij. Nansekimej, tokniuan, mojmostaj nanmochikauaj nankiyekpiaskej nanmokuali uikalis iuan Jiova, uan yejua ika yejuatsin namechteltasojta. ¡Amo ximosenkauakan! Keman timonejnemiltiaj kemej Jiova kiyolpaktia, kuali timomachiliaj uan tikyekmatij ke totaueyichiualis amo nenkaj (1 Cor. 9:24-27).

16, 17. 1) ¿Toni moneki tikchiuaskej komo tiueyitajtakouaj? 2) ¿Toni techmachtia tein kipanok Anne?

¹⁶ Sayoj ke, ¿toni moneki tikchiuaskej komo tiueyitajtakouaj? Moneki niman titajtaniskej nepaleuil. Okachi amo kuali komo se kitatia tajtakol. Kemej neskayot, David akin kitatij tein kichiujka, kijtoj: “Keman amo teyi nikijtoj, patik noomiyouan porin niteltayokolchokaya nochi tonal” (Sal. 32:3). Komo tiktatiaj totajtakol, tikpolouaj toyolpakilis uan no uelis tikpoloskej tokuali uikalis iuan Jiova, sayoj ke “akin kijtoua itajtakoluan uan kikaua, kinextiliskej teiknelilis” (Prov. 28:13).

¹⁷ Maj tiknemilikan tein kipanok Anne, * akin keman ichpochok katka kichiujtoya tekit kemej precursor regular. Peuak kipia ome taman nemilis uan kiselij tein amo kuali. Yejua kijtoua: “Notanemilil tein tepitsinok nechpaleuiaya, nechkuejmolouaya. Nochipa amo kuali nimomachiliaya uan nimoteltayokoltiaya”. ¿Toni kipaleuij maj kimelaua ikuejmol? Itech se nechikol ika motajtoj Santiago 5:14, 15 uan kiajsikamatik ke monekia kiselis nepaleuil uan kinnojnotsak tayekananij itech nechikol. Anne kijtoua: “Nejon tajkuilol kemej yeskia se pajti tein Jiova kiixtalijtok maj ika tikpajtikan oso tikyektalikan tokuali uikalis iuan. Teouijmaka se tayis, sayoj ke tepajtia. Nikchiuak tein tayolmajxitia uan nechpaleuij”. Panokya seki xiujmej, uan axkan Anne oksepa kiyolpaktia kitekitilis Jiova ika se tanemilil chipauak.

18. ¿Toni moneki tikixtaliskej tikchiuaskej?

¹⁸ Se ueyi tatiochiualis tinemiskej itech itamian tonalmej uan tipouiskej itech inechikol Jiova tein tel kuali tekititok. Maj amo keman tikelkauakan nejon. Okachi kuali, maj tiksenchiuakan tein monekis iniuan tochankauan uan ijkon nochipa tiyetoskej itech nechikolmej, tikintemoskej akin kipiaj se kuali yolo uan tikseliskej tamachtilis tein kisa itech toamaixuan. Uan no, maj tikinpaleuikan akin techixyekanaj uan maj tikchiuakan kemej titanojnotsaj. Komo ijkon tikchiuaj, amo sayoj tikauaskej maj techixyekana inechikol Jiova, ta amo keman techsioujtis tikchiuaskej tein kuali.