1, 2. ¿Toni tein achtook moijtojka ke panoskia itamian tein mochiujtok itech taltikpak xa kichiuak maj imomachtijkauan Jesús kinekikan kimatiskej okachi, uan keyej?

PEDRO, Santiago, Juan uan Andrés uelik mokaujkej sayoj yejuan iuan ininTamachtijkauj. Kisentokayaj kinemiliayaj tein Jesús kiniluijka ke templo kiixpoloskiaj (Mar. 13:1-4). Yejua ika kitajtanijkej: “¿Kemanian mochiuas nochi nejin, uan toni neskayot tikitaskej itech moyetolis uan itamiampa nochi tein mochiujtok itech taltikpak?” (Mat. 24:1-3, TNM). Jesús kintapouij ke mochiuaskia miak taman tein amo sayoj senkis kipataskia ininnemilis taltikpakneminij, ta no kiniluij ke kinextiskia ke amo uejkaua tamiskia tein mochiujtok itech taltikpak kampa taixyekantok Satanás. Moajsi se tachiualis tein xa kichiuak maj imomachtijkauan kinekikan kimatiskej okachi. Satepan ke ika tajtoj kuejmolmej tein tel tetayokoltiaj, kemej neteuilis, mayan oso ke okachi mochiuaskia tein amo kuali, Jesús achtook kijtoj ke itech itamian tonalmej mochiuaskia se taman tein kuali: “Nejin kuali tanauatilmej ika tekiuajyot motetapouis semanauak taltikpak kampa nemij uan ijkon nochin kimatiskej; uan ompa ejkos tamilis” (Mat. 24:7-14, TNM).

² Imomachtijkauan Jesús ika yolpakilis iuan kiteixmatiltijkaj “kuali tanauatilmej ika itekiuajyo Dios” (Luc. 8:1; 9:1, 2, TNM). Uan ijkuak, xa kielnamikkej nejin tein kijtojka ininTamachtijkauj: “Ongak miak tekit de tapixkalis pero in tekitini amo semi miak ongakke. Ika ya nojon namechilia ximotatautilikan inauak Namoteko ten niaxka nijin tapixkalis para ma Yejuatsin kachi ok ma kinualtitani itekitikauan” (Luc. 10:2). Sayoj ke ¿keniuj ueliskiaj tanojnotsaskej “semanauak taltikpak kampa nemij uan ijkon nochin kimatiskej” kuali tanauatilmej? ¿Kani ualaskiaj okachi tekitinij? ¡Kuali kiajsikamatiskiaj keman ompa tokotsyetoyaj  iuan Jesús komo ueliskiaj kiitaskej tein mochiuaskia satepan! Amo tiomeyolouaj ke kimoujkaitaskiaj komo kiitaskiaj keniuj mochiuaskia tein ika amo miak tajtolmej kijtoua Mateo 24:14.

3. ¿Keniuj mochiujtok axkan tein kijtoua Lucas 21:34, uan toni moneki timotajtaniskej?

³ Nejon tein achtook kijtojka Jesús mochiujtok itech totonaluan, porin tel miakej takamej uan siuamej kiteixmatiltijtokej noyampa taltikpak kuali tanauatilmej ika iTekiuajyo Dios (Is. 60:22). Sayoj ke, Jesús kiteajsikamatiltij ke sekin tokniuan kinouijmakaskia kisentokaskej kitayekanaltiskej tanojnotsalis itech itamian tonalmej, tein kijtosneki ke kichiujtoskiaj okseki taman uan ‘yoltanemilijtoskiaj’ itech nejon (xikonixtajtolti Lucas 21:34). Axkan no yejua tikitaj ke mochiujtok. Sekin akin pouij itech ixolal Dios mokalakijtokej itech okseki taman. Nejon moita ika tein kiixpejpenaj kichiuaskej itech tekit, uejueyi tamachtilis oso tein kiixtaliaj kipiaskej. Sekin no kitelkuij tonalmej itech neauiltilis uan neixpetanilis. Oksekin tokniuan amo semi kichiuajok itekiyo Dios porin motekipachouaj ika tein kipanouaj itech ininnemilis. Yejua ika, kuali komo timotajtaniaj: “¿Keniuj nimoajsi? Ika tein nikixpejpena nikchiuas, ¿toni niknextia ke tayekantok itech nonemilis?”.

4. 1) ¿Toni Pablo kitataujtij Dios maj kichiuaskiaj itatojtokakauan Cristo akin nemiaj Filipos, uan keyej? 2) ¿Toni tikitaskej itech nejin tamachtilis uan itech okse, uan keyej?

⁴ Itech yekinika siglo, miakej itatojtokakauan Cristo “kachi ok [tanojnotstinemiaj] ika in Tajtoltsin de Dios [...], pero amo ika moukayot”, ijkon kemej kichiuaya Pablo (Filip. 1:12-14). Sayoj ke, monekia mochikauaskej uan ijkon itekiyo Dios kisentokaskia tayekantoskia itech ininnemilis. Yejua ika tatitanil Pablo kitataujtij Dios maj tokniuan akin nemiaj Filipos kiyekitaskiaj “toni okachi tayekantok” (xikonixtajtolti Filipenses 1:9-11, TNM). Uan no ijkon panoua itech totonaluan. Timiakej ika yolchikaualis tikteixmatiltiaj iTajtol Dios. Maski ijkon, ¿ueliskia techolinis maj okachi titapaleuikan itech tanojnotsalis tein motelneki, komo tikitaj toni kichiujtok axkan inechikol Jiova? Kemaj. Nejin tamachtilis techpaleuis maj titanemilikan itech nochi tein Jiova kiixtalijtok uan ijkon ueli mochiua tein moijtojka itech Mateo 24:14. ¿Toni kiixtalia kichiuas inechikol, uan keniuj uelis techyololinis tejuan uan tochankauan komo tikixmatij nejon tein kiixtalijtok? Itech okse tamachtilis tikitaskej toni techpaleuis maj titaxikokan uan maj tikauakan maj techyekana inechikol Jiova.

5, 6. 1) ¿Keyej Jiova kikauak maj tikixmatikan seki taman tein kichiua inechikol ompa iluikak? 2) ¿Toni kiitaltijkej Ezequiel?

⁵ Onkak miak taman tein Jiova kiixejekoj maj amo moijkuilo itech Biblia. Kemej neskayot, maski tel kualtsin yeskia maj kimelauaskia keniuj tekiti tokuatixyo oso tein onkak itech iluikak uan taltikpak, amo kichiuak. Okachi kuali, techmatiltij tein moneki uan ijkon uelis tikajsikamatiskej itanejnekilis uan tinemiskej kemej yejuatsin kineki (2 Tim. 3:16, 17). ¡Uan semi kualtsin tein Biblia kijtoua ika inechikol Jiova tein poui iluikak! Tel miak taman se kimachilia keman se kiixtajtoltia tein Isaías, Ezequiel, Daniel uan Juan kijkuilojkej keniuj Dios kiixtalijtok maj mochiua teisa ompa iluikak (Is. 6:1-4; Ezeq. 1:4-14, 22-24; Dan. 7:9-14; Apoc. 4:1-11). Jiova kemej yeskia tatapoua ne iluikak uan ijkon ueli tikitaj tein ompa mochiujtok. ¿Keyej yejuatsin kinekik maj nejon moijkuilouani itech Biblia?

⁶ Porin Jiova kineki maj nochipa tikelnamikikan ke tipouij itech se nechikol tein  moajsi iluikak uan taltikpak. Mochiujtok miak taman uan ijkon itanejnekilis Jiova ueli mochiua, uan seki amo ueli tikitaj. Kemej neskayot, Ezequiel kiitak inechikol Dios tein poui iluikak tein moixnextiaya ika se ueyi carruaje. Nejin uelia ijsiujka mooliniaya uan niman uelia yaya oksekopa (Ezeq. 1:15-21). Ika sayoj sepa momalakachoskiaj iruedas, uejka ajsia. Ezequiel no kiitak seki taman tein kipiaya Akin kinejnemiltiaya nejon carruaje: “Nikitak teisa petani kemej oro uan plata tamanelol uan kemej tit tein kikentoya [...]. Moitaya kemej yeskia iueyiyo Jiova tein petani” (Ezeq. 1:25-28). Tanauatijkej Ezequiel kitelmoujkaitak nejon. Kiitak Dios keniuj tel kuali kiixyekana inechikol uan ika iespíritu kiolinia. ¡Tein kiitak Ezequiel tel kualtsin kinextij keniuj tekititok inechikol Jiova ompa iluikak!

7. ¿Keniuj kichiua maj titakuaujtamatikan iuan Jiova uan Jesús tein kiitaltijkej Daniel?

⁷ Daniel no kiitak miak taman tein kichiua maj titakuaujtamatikan iuan Jiova uan Jesús. Kiitak Jiova, akin moixnextiaya kemej se “Akin xiuejya itech Tonalmej” uan tokotsyetoya itech se trono tein kipiaya tit uan ruedas (Dan. 7:9). Jiova kinekia maj Daniel kiitani ke inechikol tekititok, kichiujtok itanejnekilis. Nejon tanauatijkej no kiitak “aksa kemej se ikonetsin taltikpaknenkej”, tein kijtosneki yejua Jesús, akin kiixtaliayaj maj kiixyekana inechikol Jiova nikan taltikpak. Itekiuajyo Jesús tein tel kuali amo moajsi sayoj seki xiujmej, ta “itaixyekanalis yejua se taixyekanalis tein uejkauas nochipaya uan amo keman panos, uan itekiuajyo se tein amo keman kiixpoloskej” (Dan. 7:13, 14). ¿Melauj ke nejin techyolchikaua maj titakuaujtamatikan  iuan Jiova uan tein kichiujtok? Yejuatsin kimakak “taixyekanalis uan poujkaitalis uan tekiuajyot” iKonetsin, akin kiyejyekojkej uan kinextij ke amo keman kikauaskia Jiova. Moyekita ke Jiova iuan takuaujtamati iKonetsin. Uan tejuan no uelis titakuaujtamatiskej iuan totayekankauj Jesús.

8. ¿Keniuj momachilijkej Ezequiel uan Isaías keman Jiova kinitaltij se taman, uan keniuj moneki timomachiliskej tejuan?

⁸ ¿Keniuj moneki timomachiliskej keman okachi kuali tikixmatij inechikol Jiova tein poui iluikak? Ijkon kemej Ezequiel, tikmoujkaitaj uan okachi timoyolyemaniaj keman tikajsikamatij tein Jiova kichiujtok (Ezeq. 1:28). Titanemiliskej itech inechikol Jiova techyolchikaua maj tikchiuakan tein moneki, ijkon kemej kiyolchikauak Isaías. Keman kiyoleujkej maj kintapouiti oksekin tein Jiova kichiujtoya, niman kiselij nejon tayoleualis (xikonixtajtolti Isaías 6:5, 8). Isaías kuali kimatia ke ika inepaleuil Jiova ueliskia kiixnamikis tein yeski ouijkayot. ¡Tejuan no semi techyolchikaua tikixmatiskej inechikol Jiova tein poui iluikak, tein nochipa tekititok uan senkis motemaka kichiuas itanejnekilis!

9, 10. ¿Keyej moneki maj inechikol Jiova no moajsi nikan taltikpak?

⁹ Ika iKonetsin, Jiova kiixtalij itech taltikpak se nechikol tein tekiti iuan nechikol tein poui iluikak. ¿Keyej moneki se nechikol nikan taltikpak uan ijkon mochiuas tekit tein ika tajtoua Mateo 24:14? Maj tikitakan eyi taman.

¹⁰ Yekinika, Jesús kiyekijtoj ke ika tanojnotsalis imomachtijkauan ajsiskiaj “nonouiyampa de nochi senmanauak” (Hech. 1:8). Ojpatika, moneki se taixyekanalis uan ijkon tanojnotsanij uelis kiseliskej yolchikaualis uan tamachtilis tein kitemaka Biblia (Juan 21:15-17). Uan expatika, moneki mochiuas tein kinpaleuis maj uelikan mosentilikan uan ijkon kiueyichiuaskej Jiova uan kinmachtiskej keniuj tanojnotsaskej (Heb. 10:24, 25). Nejin amo ueliskia mochiuas komo amo onkaskia se taixyekanalis. Moneki maj onka se kuali taixyekanalis itech tanojnotsalis uan ijkon itatojtokakauan Cristo kuali kichiuaskej nejin tekit.

11. ¿Keniuj uelis titapaleuiskej maj mochiua tein kiixtalia inechikol Jiova?

¹¹ ¿Keniuj uelis titapaleuiskej maj mochiua tein kiixtalia inechikol Jiova? Se taman tein motelneki, komo nochipa titakuaujtamatij iniuan akin Jiova uan Jesús kinixtaliaj maj kiixyekanakan tanojnotsalis. Itech nejin taltikpak onkak miak taman tein ueliskia kichiujtoskiaj nejon tokniuan. Sayoj ke, ¿toni kitayekanaltia inechikol Dios nikan taltikpak?

12, 13. ¿Keniuj kichiuaj tein kinnauatijtokej tokniuan tayekananij akin kiixyekanaj tanojnotsalis itech uejueyi altepemej kampa pouij, uan keyej mitsonyolchikaua nejon?

¹² Noyampa taltikpak kinixtalianij tokniuan tayekananij akin kipiaj kuali taixejekolis maj taixyekanakan uan maj tapaleuikan maj moteixmatilti iTekiuajyo Dios itech uejueyi altepemej kampa pouij. Keman moneki kiixtaliskej maj mochiua teisa, kitemouaj maj iTajtol Dios kinixyekana, porin kiitaj kemej ‘se tauil tein kinmetstauilia, uan kemej se tanex itech ojti kampa nejnemij’ (Sal. 119:105). No kitataujtiaj Jiova maj kinyekana (Mat. 7:7, 8).

¹³ Ijkon kemej akin kiixyekanayaj tanojnotsalis itech yekinika siglo, axkan tokniuan tayekananij akin no kiixyekanaj nejin tekit motemakaj tamachtiskej “ika in Tajtoltsin de Dios” (Hech. 6:4). Kintelyolpaktia kiitaskej ke okachi momoyaujtok kuali tanauatilmej amo sayoj kampa yejuan taixyekanaj, ta itech nochi taltikpak (Hech. 21:19, 20). Keman kichiuaj tein  moneki uan ijkon kisentokas motanojnotsas, kiitaj tein kijtoua Biblia uan mokauaj maj kinixyekana iespíritu Dios, uan amo kiixtaliaj miak tanauatilmej nion itech nochi kijtouaj keniuj mochiuas teisa (xikonixtajtolti Hechos 15:28). Ijkon, nejon tokniuan akin kichiuaj tein kinnauatijtokej kitemakaj se kuali neskayot itech nechikolmej (Efes. 4:11, 12).

14, 15. 1) ¿Toni tekimej mochiujtok uan ijkon kisentokas motanojnotsas itech nochi taltikpak? 2) ¿Keniuj timomachiliaj keman tikitaj ke se ueyi tatiochiualis maj se kiteixmatilti kuali tanauatilmej?

¹⁴ Se taman tein miakej amo ueli kiitaj yejua chikaujkayot tein kichiuaj akin tapaleuiaj maj motemaka tamachtilis ika iTajtol Dios itech toamaixuan, nechikolmej uan uejueyi nechikolmej. Miakej tokniuan tapaleuiaj maj motajtolkepa nejon tamachtilis itech panoua 600 tajtolmej, uan ijkon okachi miakej uelis kiixmatiskej “ueyi itatiochiualisuan de Dios” itech inintajtol (Hech. 2:7-11). Tokniuan telpochmej uan ichpochmej kitekitiltiaj uejueyi teposmej tein tel ijsiujka kikixtiaj toamaixuan. Satepan, nejon amaixmej kititanij hasta kampa okachi uejka.

¹⁵ Mochiujtok miak tekit tein tapaleuia maj tiksentokakan tikteixmatiltikan kuali tanauatilmej iniuan akin timonechikouaj. Kemej neskayot, miakej tapaleuiaj maj mochijchiua Kali kampa tiMosentiliaj uan Kali kampa mochiuaj Uejueyi Nechikolmej, kinpaleuiaj akin tajyouiaj keman mochiua se tetsauit oso aksa kipanoua ouijkayot keman kipajtiaj. Sekin kichiuaj tekit tein tapaleuia maj mochiua uejueyi nechikolmej uan tataman escuelas kampa motamachtia ika Biblia. Nejin sayoj seki tekimej tein xa amo tikitaj. Sayoj ke, ¿keyej mochiua miak tekit? Porin ijkon motayolchikaua maj moteixmatilti kuali tanauatilmej, maj okachi mochikaua ininkuali uikalis iuan Dios akin tanojnotsaj uan maj taneltokalis tein melauak kisentoka moskalti. ¿Kichiujtoni inechikol Jiova nikan taltikpak tein okachi tayekantok? Kemaj.

16. ¿Toni tamachtilis uelis tiktemoskej tein techpaleuis tejuan uan tochankauan?

¹⁶ ¿Kemansa tikxelouaj tiempo uan titanemiliaj itech tekit tein kichiujtok inechikol Jiova? Sekin tokniuan kitemouaj tein okachi kimelauas nejon uan itech tanemiliaj, keman taueyichiuaj kemej kalyetouanij oso momachtiaj ininselti. Semi teyolpaktia se momachtis tein Isaías, Ezequiel, Daniel uan Juan kinitaltijkej. Amaix Los testigos de Jehová, proclamadores del Reino de Dios, DVD uan okseki amaixmej, techpaleuia maj okachi kuali tikixmatikan inechikol Jiova.

17, 18. 1) ¿Keniuj mitsonpaleuiani nejin tamachtilis? 2) ¿Toni netajtanilmej moneki timochiuiliskej?

¹⁷ Titanemiliskej itech nochi tein Jiova kichiujtok ika inechikol techpaleuia. Ijkon kemej kichiua nejon kualtsin nechikol, maj tikyekitakan tein okachi tayekantok. Ijkon tiktojtokaskej ineskayo Pablo akin kijkuiloj: “Ma amo keman timoyolkejkepakan tech totekiu porin Totajtsin Dios techyoliknelij uan techtekimaktij ya ma titekititinemikan” (2 Cor. 4:1). Yejua kinyolchikauak iikniuan ika nejin tajtolmej: “Ma amo keman tisiouitij de tikchiutinemiske ten kuali. Porin [...] ti[k]selijtiyaske in taxtauil ne tonal kuak Dios kimonekiltis” (Gál. 6:9).

¹⁸ ¿Onkak teisa tein moneki tikpataskej, uelis yeski tisejsemej oso kemej kalyetouanij, uan ijkon tikchiuaskej tein okachi tayekantok? ¿Uelis tikauaskej seki taman tein amo semi tayekantok uan ijkon uelis okachi titapaleuiskej itech tanojnotsalis tein motelneki? Itech okse tamachtilis tikitaskej makuil taman tein techpaleuis maj no ijkon tikchiuakan kemej inechikol Jiova.